Mak 2
2
Chisʋs ʋt hatak palsi isht abeka yo̱ hlakofichi, 1: 13 Chisʋs ʋt Mahlu ʋt nan im ai ithʋna toba chi̱ ka i̱ miha; 15 micha pʋblikan ʋhleha mikmʋt nan ashʋchi ʋhleha aiena ibai impa ka nan isht mihachi ma kaniohmi ho̱ yohmi hatuk ʋt anoli. 18 Mihmʋt nan im aiithʋna ʋhleha ha̱ nan ik hullocho hoka nan isht mihachi; mihma yʋmmak ash osh ik yohmo kʋt im ai ʋlhpesa atuk a̱ miha mʋt; 23 nan im aiithʋna ʋhleha ha̱ nitak hullo kobʋffi ho̱ nan isht mihachit a̱sha ma, yʋmmak okʋt nitak hullo kobʋffi hatuk o̱ keyu ka miha.
1Atuk o̱ nitak kanohmi ma, anonti Kapenaʋm a ont chukowa tok: mihma aboha anu̱ka a̱sha ka annoa tok.
2Yohmi ma ashali̱ka la̱wʋt ant itahoba, yohmi na aiasha hi ʋt iksho ma, okhissa itikba yash kia a hikia hi ʋt iksho ki tok, mihma ʋbanumpa ha̱ isht im anumpohonli tok.
3Yohmi ma hatak ʋt palsi isht abeka ho̱ ushtʋt it i̱ shoyulit, isht im ʋla tok.
4Micha okla itakantʋli ka, i̱ bili̱ka okla ona he keyu mʋt, a hikia ka paknaka ya̱ isht hulmo ya̱ tiwi tok; atuk osh tiwit tahli mʋt, palsi isht abeka yʋt ai onʋtola topa hash okla aka pit bohli tok.
5Okla na yimmi ka Chisʋs ʋt pisa mʋt, palsi isht abeka atuk ash o̱ Sʋso ma! na chim aiashʋchika puta kʋt chi̱ kashofa mak oke, im achi tok.
6Yohmi kia na‐holissochi ʋhleha kanimi kʋt yʋmma binohma̱ya tuk ʋt, chu̱kʋsh anu̱kaka isht anukfillit,
7Na katihmi ho̱ hatak ilʋppʋt yakohmichit Chihowa ik ahobalot anumpuli cho? Kʋta hosh nan ai aiashʋchika puta ka kashofa hinla ho̱? Chihowa ak illa keyu̱?
8Mihma yakohmichit okla im anukfila ka Chisʋs ʋt ilap chu̱kʋsh ak inli ka isht akostininchi mʋt, ashalika, Na katihmi ho̱ ilʋppa puta ka hʋchi chu̱kʋsh anu̱kaka isht hʋchim anukfila cho?
9Palsi isht abeka atuk a̱, Na chim ai ashʋchika puta kʋt chi̱ kashofa hoke; im achi kak okmá, keyukmʋt, Wakayʋt, chi̱ potʋlhpo a̱ sholi cha, nowá, achi kak okmá, katima kak osh ahchiba kʋt ik lauwo cho?
10Yohmi kia Hatak Ushi ʋt yakni paknaka nan aiashʋchika puta ka kashofa hi ʋt ai im ʋlhpiesa hatuk a̱ hʋsh akostinincha chi̱ kak o̱.
11Palsi isht abeka yash o̱ im anumpulit, Tanit, chi̱ potʋlhpo a sholi cha, chin chuka ish iashke; chim achi lishke, im achi tok.
12Mihma ashali̱ka yʋmmak ash ot tanit, potʋlhpo ash sholi cha, okla momʋt pi̱sa na kohchʋt ia tok: yohmi na momʋt nukhlakancha mʋt, Nitak nan ash ilʋppa chohmi na e pisa chatuk keyushke, ahanchit Chihowa ya̱ pit holitoblichi tok,
13Atuk o̱ anonti kohchʋt ia mʋt, okhʋta lapalika yo̱ ona tok: mihma okla laua yʋt momʋt ant im ai itahoba na nan im abahanchi tok.
14Atuk osh ont ia hosh a̱ya mʋt, Lefai Alfeʋs ushi ʋt tʋli‐holisso abohli a̱ a̱sha na pisa mʋt, yʋmmak ash o̱, Is siakaiyashke, im achi tok.
15Atuk o̱ yakohmi tok: Chisʋs ʋt yʋmma im aboha anu̱ka ya̱ impa hosh a̱sha ma, pʋblikan micha nan‐ashʋchi ʋhleha aiena kʋt laua hosh Chisʋs, micha nan im ai ithʋna ʋhleha aiena ka ta̱kla binohma̱ya akinli tok: yʋmmak okʋt laua hatuk osh, okla apihʋt a̱ya tuk a tok.
16Micha na‐holissochi ʋhleha, micha Falisi ʋhleha aiena kʋt, yʋmmʋt pʋblikan ʋhleha, micha nan ashʋchi ʋhleha aiena ka it ibai‐impa na pisa mʋt, nan im ai ithʋna ʋhleha hash o̱, Katiohmi ho̱ pʋblikan ʋhleha, micha nan‐ashʋchi ʋhleha aiena kʋno it ibai impʋt nan it ibai ishko cho? im achi tok.
17Mihma Chisʋs ʋt haklo mʋt, Haknip im achukma hokʋto, alikchi a̱ bʋnna keyu, amba abeka kak oke: nan‐ashʋchi ik im iksho ʋhleha ho̱ hoho̱yot a̱ya li tok keyu, amba, nan‐ashʋchi ʋhleha yosh ile kostinincha chi̱ kak a tok, im achi tok.
18Mihma Chan, micha Falisi ʋhleha aiena nan im ai ithʋna ʋhleha hʋt na hullohonchi beka tok: atuk osh ai ʋla mʋt, Nanta katiohmi ho̱ Chan micha Falisi ʋhleha aiena nan im ai ithʋna ʋhleha hʋt na hullohonchi ma, amba chishno na chim ai ithʋna ʋhleha hʋto nan ik hullocho cho? im achi tok.
19Mihma Chisʋs ʋt, Hatak himona ohoyo itauwaya tuk ʋt takla anta moma ka, i̱ kanomi ʋhleha hʋt nukha̱klot na hullocha hinla cho? Hatak himona ohoyo itauwaya tuk ʋt im a̱sha ta̱kla hokʋt okla nahullocha he keyu hoke.
20Yohmi kia hatak himona itauwaya yash ot ai i̱ filʋmma he nitak ʋt ai ona he; yohmikmak o̱ nitak yʋmma fokakmʋno okla nukha̱klot nahullocha hi oke.
21Hatak nana kia nantʋnna hlilafa himona ka anchi hlipa ya̱ isht akʋlli chatuk keyu: yʋmmak keyukma, na hlilafa himona ʋlhkʋta atuk ʋt sipokni ash hlilʋffi na i̱ shahlit hlilafʋt okpulo hoke.
22Mikma hatak nana kia oka‐pa̱ki himona ya̱ shukcha sipokni yo̱ apitta chatuk keyu: yʋmmak keyukma, oka‐pa̱ki himona yash ot shukcha yash mitahlichi na hlayakma; shukcha yash ot okpula hinlʋshke: amba oka‐pa̱ki himona ʋt shukcha himona yo̱ ʋlhpitta pullashke, im achi tok.
23Atuk o yakohmi tok; nitak‐hullo nitak o̱ osapa hlopullit a̱ya tok: mihma nan im ai ithʋna ʋhleha hʋt onush a̱ hlinlit itʋnowa tok.
24Mihma Falisi ʋhleha hʋt, Yakeh! na‐katihmi ho̱ nitak‐hullo nitak o̱ nana kʋt ai ʋlhpesa keyu ka, okla yʋmohmi cho? im achi tok.
25Mihma, Lewi ʋt ilap, micha apehʋt a̱ya tuk aiena kʋt hohchʋfo mʋt, nana ka bʋnna cha, a kaniohmi tok:
26Micha na holitompa isht ʋtta i̱ shahli Abaiahla ʋt ahanta nitak a̱ Chihowa im aboha ya̱ pit chukowa cha, yʋmma ai ʋpa he ʋlhpesa hatuk keyu, amba na‐holitompa isht a̱sha ʋhleha kak a he tuk a̱, pʋska holitopa ya̱ ʋpa mʋt, anonti apehʋt a̱ya tuk ma ipeta tok a̱ himonna kia holisso hʋch ik it im anumpulo chatuk oh cho? im achi tok.
27Mihmʋt nitak‐hullo ʋt hatak ak o̱ im ʋlhpisa a tok: hatak ak osh nitak‐hullo ak o̱ im ʋlhpisa tok keyushke.
28Yohmi hoka, Hatak Ushi ʋt nitak hullo ak kia in Chitokaka yoke, im achi tok.
Currently Selected:
Mak 2: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
