Luk 5

Chisʋs ʋt Saimon i̱ peni yo̱ fohkʋt a̱sha hosh okla ha̱ nan‐ithʋnanchi, 1: 4 Saimon ʋt, Chisʋs osh i̱ mihʋt nan anukfilli pulla ho, himona ka nʋni la̱wa fehna hokli: 11 mihma Saimon, Chemis, micha Chan aiena kʋt Chisʋs a̱ apeha. 12 Chisʋs ʋt leplosi ʋbi yo̱ hlakofichi: 16 atuk osh ʋba pit anumpula chi̱ hosh haiaka ia; 17 mikmʋt hatak palsi isht abeka yatuk a̱ hlakofichi; 27 Chisʋs ʋt Leifai nan im ai ithʋna toba chi̱ ka i̱ miha: 29 micha pʋblikan ʋhleha mikmʋt hatak nan‐ashʋchi ʋhleha aiena ka yʋmmʋt ai ʋlhpesa ho̱ ibai impa hatuk ʋt miha; 33 ilap nan im ai ithʋna ʋhleha hʋt kaniohmit nan i̱ palʋmma he anoli.

1Atuk o̱ yakohmi tok; okla hʋt Chihowa im anumpa ha̱ hakla chi̱ kʋt yʋmmak ash atehlifichit kaiyanchi ho̱, Chenesalet hohtak lapalika yo̱ hikia;

2Yohmi cha peni tuklo kʋt hohtak lapalika ya̱ takohnli na pisa tok: yohmi kia hatak nʋni ʋbi ʋhleha hatuk ʋto a kocha wiha tuk osh nʋni isht‐hokli achʋfa hosh ma̱ya ha tok.

3Mihmʋt peni achʋfalit Saimon ak o̱ immi yo̱ pit chukowa mʋt, oka alaka takali tuk a̱ kanʋllichit mishemanchit pit takalicha hinla ka, im ahni tok. Mihmʋt binili cha, peni yo̱ fohkʋt a̱sha hosh okla ha̱ nan ithʋnanchi tok.

4Anumpuli kʋt ont issa mʋt, Saimon ash o̱, Ahofombika pit takalichi cha, nʋni isht‐hokli puta ka okʋchit ish hoklashke, im achi tok.

5Mihma Saimon ash osh afalaminchi mʋt, A̱ shahli ma! ninak a̱ isht il a̱sha na oyunna kʋt nana ke hoklo ke tuk: yohmi kia chishno chim anumpa atuk oka, nʋni isht‐hokli a̱ pit okʋchi li mak inlashke, im achi tok.

6Micha ilʋppa okla yʋmihchi mʋt, nʋni la̱wa fehna ho̱ hokli na i̱ nʋni isht hokli ʋt mitafa tok.

7Yohmi ma im itapela ʋhleha hʋt peni achʋfa ya̱ a̱sha tuk ʋt ʋla cha, ant apela hinla ka, okla pit im abʋchi tok. Mihma okla ai ʋla cha, peni ash it aieninchit okla alotoli: yohmi hoka yʋmmak ash ot okbilhhʋt isht iʋt okla tok.

8Saimon Pita yʋt yakohmi na pisa mʋt, Chisʋs iyi̱kala ha ya̱ pit tikinlit aka hlipiʋt, Hatak nan‐ashʋchi sia hoka a̱ filʋmmit, kanima ish iashke, Chitokaka ma! achi tok.

9Himonna okʋchit kohchi kʋt, nʋni yʋt yohmi ho̱ hokli kʋt, ilapo, micha inla apehʋt a̱ya tuk ʋt momʋt nukhlakancha tok.

10Mihma Saimon im itapela, Sebete ushi, Chemis, micha Chan ita tuklo kak kia yʋmohmi tok. Mihma Chisʋs ʋt Saimon a̱, Chi nukshopa ná, himak pilla ha̱ hatak ak o̱ ish hokla chi̱ hoke, im achi tok.

11Mihma i̱ peni ash ʋhli ha̱ okla ant itaiyali mʋt, nana moma kʋt a̱sha na issa cha, yʋmmak ash okla iakaiya tok.

12Atuk o̱ yakohmi tok; yʋmmak ash ot tʋmaha kaniohmi ho̱ anta tuk o̱, hatak ʋt leplosi isht ai ʋbi fehna hosh anta tuk osh, Chisʋs a̱ pisa mʋt, hlipiʋt itola cha, im ilbʋshʋt Chitokaka ma! chishno ʋt ʋlhpesa ish ahnikmʋt, is sa̱ kashofa hinlʋshke, im achi tok.

13Mihma ibbak pit welit potoli mʋt, Ʋlhpesa ahni lishke; chi kashofashke, im achi tok. Yohmi ma leplosi ash ot ashali̱ka a mokofʋt kʋnia tok.

14Mihma hatak nana kia ik im anolo ka chi̱ ka i̱ miha mʋt, amba iʋt na‐holitompa isht ʋtta yak o̱ ont im ile haiakʋchi cha, na chi̱ kashofa ka nan‐isht‐ai im atokowa mak o̱ Moses ʋt nan apesa tok a, nana ka ish bohlashke, im achi tok.

15Yohmi kia yohmi ha yak o̱ isht i̱ shahlit kanima moma ka yʋmmak o̱ ai annoa tok: yohmi ma im a haponakla chi̱, micha haknip ik achukmo puta kʋt a hlakofa chi̱ hosh okla chinto fehnʋt ai itʋnaha tok.

16Mihma ilap illʋt ai i̱ mokofʋt, yakni haiaka ona cha, ʋba pit anumpohonli tok.

17Atuk o̱ yakohmi tok: nitak kaniohmi ho̱ nana ithʋnanchi hosh ahanta ma, Falisi ʋhleha, micha nan‐ʋlhpisa ithʋnanchi ʋhleha aiena kʋt Kalili yakni tʋmaha aiasha moma, micha Chutea, mikmʋt Chelusalem aiena ka a̱sht kohchʋt a̱ya kʋt yʋmma binohma̱ya tok: yohmi ma Chitokaka nan‐isht im aia̱hlika yʋt okla ma hlakoficha chi̱ kʋt ai iklʋnnʋt takali tok.

18Yohmi ma hatak kanohmi kʋt hatak ʋt palsi ʋbi yo̱ potʋlhpo ai it i̱ sholit isht ʋla tok: mihmʋt kaniohmit yʋmma pit isht chukowa cha, itikba ya̱ ont bohla hinla kʋt, okla akostininchi bʋnna tok.

19Mihmʋt okla hak osh laua fehna hatuk o̱, kaniohmit pit isht chukowa hinla kʋt ik akostinincho mʋt, aboha paknaka yo̱ okla pit oiya cha, pit hlopullichit in topushi ash fo̱kit iklʋnna ka Chisʋs itikba ya̱ pit bohli tok.

20Mihma okla na yimmi ka pisa mʋt, Hatak chia kʋt na chim ai ashʋchika yʋt chi̱ kashofa hoke, im achi tok.

21Mihma na‐holissochi ʋhleha, micha Falisi ʋhleha aiena kʋt, Ilʋppʋt kʋta hokak osh Chihowa ik ahobalot anumpuli cho? Kʋta hosh nan‐ai ashʋchika ya̱ kashofa hinla? Chihowa ak illa keyu̱? aiahnit okla im anukfilʋt aiasha tok.

22Yohmi kia yʋmma im anukfila ha̱ Chisʋs ʋt im akostininchi mʋt, anumpulit, Nanta mak o̱ hʋchi chu̱kʋsh anu̱kaka isht hʋchim anukfila cho?

23Na chim ai ashʋchika puta kʋt chi̱ kashofashke, achi kak okmá, keyukmʋt, Tani cha nowá: achi kak okmá, katimampo kak osh ahchiba kʋt ik lauwo cho?

24Yohmi kia Hatak Ushi ʋt nan ai ashʋchika puta kashofa hi ʋt yakni paknaka ya̱ ai im ʋlhpiesa hatuk a̱ hʋsh akostinincha chi̱ kak oka, im achi mʋt, palsi ʋbi ash, Tanit chin topushi a̱ ish ishi cha, chin chuka ish iashke, chim achi lishke, im achi tok.

25Mihma okla momʋt pi̱sa na tanit ai onʋtola tuk ash ishi mʋt, Chihowa ya̱ holitoblichit aiokpahanchit in chuka ia tok.

26Mihma okla momʋt nukhlakancha fehnʋt, Chihowa ya̱ holitoblichit aiokpahanchi mʋt, nukshopa fehna hosh, Himak nitak oka nana kʋt inla fehna ho̱ eho piesʋshke, achi tok;

27Atuk o̱ nana kʋt a yakohmi ha ya̱ kohchʋt ia mʋt, pʋblikan ʋt Lefai hohchifo hosh tʋli holisso abohli ya̱ a̱sha na ont pisa mʋt, Is si akaiyashke, im achi tok.

28Mihma nana moma kʋt a̱sha na issʋt wakaya mʋt, iakaiya tok.

29Mihmʋt Lefai ash osh ilap in chuka akinli ho̱ yʋmmak ash o̱ impa chinto fehna im ai ikbi tok: mihma pʋblikan ʋhleha, micha inlaka aiena kʋt laua hosh iba takla binohma̱ya tok.

30Yohmi kia i̱ na‐holissochi ʋhleha, micha Falisi ʋhleha aiena kʋto yʋmma nan im ai ithʋna ʋhleha ha̱ lumʋt nana mihachit, Nanta katiohmi ho̱ pʋblikan ʋhleha, micha nan‐ashʋchi ʋhleha aiena ka it‐ibai impʋt, nan it ibai ishkot hʋsh aiasha cho? achi tok.

31Mihma Chisʋs ʋt afalaminchi mʋt, Haknip im achuk ma hokʋto alikchi a̱ bʋnna keyu; amba abeka mak oh chatuk oke.

32Hopoyuksa ʋhleha ak o̱ hoyot a̱ya li ha tok keyu: amba nan‐ashʋchi ʋhleha hʋt ile kostinincha chi̱ kak atuk oke, im achi tok.

33Yohmi ma, Nanta katiohmi ho̱ Chan nan im ai ithʋna ʋhleha hʋto chekosikma nahullochit, ʋba pit anumpuli aienʋt aha̱shwa, mikma Falisi ʋhleha nan im ai ithʋna ʋhleha ak kia yʋmohmi akinli hokak o̱, amba chimmi hʋto impʋt nan‐ishkot aiasha cho? okla im achi tok.

34Mihma hatak himona ohoyo itauwaya tuk ʋt ta̱kla anta moma ka, i̱ kana ʋhleha hʋt nukha̱klot nahullocha hinla, hʋsh im apesa ʋlhpesa cho?

35Yohmi kia hatak himona ohoyo itauwaya tuk ash ot ai i̱ filʋmma he nitak ʋt ai ona he: yohmik mak o̱ nitak yʋmma fokakmʋno okla nukha̱klot nahullocha hi oke.

36Mihmʋt nan isht ʋlhpisa ho̱ aieninchit isht im anumpuli mʋt, Hatak nan ak osh na‐fohka himona a hlila̱fa ka na‐fohka sipokni a̱ akʋlli chatuk keyu: yʋmmak keyukma himona yʋt hlilʋffikmʋt, anonti himona ya̱ a hlila̱fa tuk okʋt sipokni a̱ ai it im ʋlhpesa he keyu hoke.

37Mikma hatak nan ak osh oka pa̱ki himona ya̱ shukcha sipokni yo̱ pit ʋni chatuk keyu: yʋmmak keyukma oka pa̱ki himona yash ot shukcha ya̱ mitahlichi cha hlayakma, anonti shukcha yash ot okpulo chatuk.

38Amba oka pa̱ki himona yʋt shukcha himona yo̱ ʋlhto hok mak osh tu̱klot nan ik kanihmo chatuk oke.

39Micha hatak nan ak osh oka pa̱ki siponki a̱ ishko ha yʋt ashali̱ka himona ma bʋnna chatuk keyu: sipokni ak osh achukma kʋt i̱ shahlishke, achi hokʋt, im achi tok.

Currently Selected:

Luk 5: CHH

Highlight

Copy