Luk 14

Chisʋs ʋt, nitak hullo nitak o̱ hatak nipi shofohli isht abeka ya̱ hlako fichi, 1: 7 hatak im anukfila kʋllo ʋhleha hʋt im anukfila ha̱ akanlosecha hi a̱, micha nan in laua ʋhleha hʋt ilbʋsha ya̱ i̱ kana he aiena ka im abʋchi. 15 Opiaka impa chito a̱sha tok isht ʋlhpisa. 25 Chisʋs a̱ nan im ai ithʋna e toba chi̱ hokmʋt, yʋmmak o̱ e holitobli hatuk mak osh pishno ʋt ile kaiyanchit, nana fehna hatuk kia il issa hinla hatuk puta ka, yʋmmak okʋt nan isht ʋlhpisa ilaiyuka ho̱ isht a pim abʋchi.

1Atuk o̱ yakohmi tok; nitak hullo yo̱ impa chi̱ Falisi mi̱ko ʋhleha achʋfa ka̱ in chuka yo̱ pit chukowa ma, okla apesʋchi tok.

2Yohmi ma hatak achʋfa kʋt haknip oka atoba ililli ho̱ isht abeka kʋt itikba ya̱ a̱sha tok.

3Mihma Chisʋs ash ot na mihʋt, nan‐ʋlhpisa ithʋnanchi ʋhleha, Falisi okla aiena kash im anumpulit, Nitak hullo ya̱ na hlakoficha he ai ʋlhpiesa hoh cho? achi tok.

4Mihma nan ik achot ma̱ya tok. Mihma yʋmmak ash ishi cha, hlakofichi mʋt, kanima ia chi̱ ka, im ahni tok.

5Mihmʋt okla hash im anumpulit, Hʋsh katima kak osh hʋchim issuba haksobish falaia okmá, keyukmʋt wak toksʋli okmá, nana kʋt yakni chiluk hofobi o̱ pit itula ka, ashali̱ka nitak hullo nitak a̱ halʋllit hʋch ik kohcho ka hinla cho? achi tok.

6Yohmi ma anonti ilʋppa puta ka okla ai isht im afala mincha he keyu ki tok.

7Mihma im annoa tuk ʋhleha hʋt aiasha holitompa kak o̱ hoyot a binohli na pisa mʋt, nan‐isht ʋlhpisa ha̱ takalichit,

8Ohoyo ipetʋchi ish a̱ya hi a̱, kʋna hosh chim anoli tuk ma, aiasha holitopa i̱ shahli ka chik binilo kashke; hatak holitopa kʋt chishno a̱ chi̱ shahli kia yʋmmak ash ot im anoli tuk a hinla hoke.

9Atuk o̱ chim anoli tuk, anonti yʋmma im anoli tuk yʋmmak ash ot ita tu̱klot ʋla cha, Hatak ilʋppak osh ik aiashá, chim achikma, chi hofahyʋt aiasha ik a lauwo kak o̱ ish a binila hinla hoke.

10Amba chim annoakmʋt iʋt, aiasha ik a lauwo kak o̱ ish a binili tuk o̱, na chim anoli tuk ash ot ʋlakmʋt, A̱ kana hʋt chaha i̱ shahli kak o̱ pit oiyá, chim acha hinla hoke: yohmikma chibai impʋt ma̱ya yʋmma ish ai i̱ holitopa he mak oke.

11Kʋna hosh ilefehnʋchi hokʋto aka ona he; anonti kʋna hosh ik ile fehnacho hokʋto holitopa hi oke.

12Yohmi mʋt ilapa hoyo tuk ash kia, Tʋbokoli impa yokmá, keyukmʋt opiaka impa yokmá, nana ho̱ ish ikbi kʋt, chi̱ kana ʋhleha, micha ish itibapishi ʋhleha, mikmʋt chi̱ kanomi ʋhleha, chin chuka panta hatak nan in laua puta kia chik hoyo kashke; yʋmmak keyukma, ilapo mʋt chishno a̱ chi hoya hinla hoke: yohmikma nana ho̱, ish yʋmihchi tuk a̱ ai itilauit chim ʋlhtoba hi oke.

13Amba impa chito ish ikbikmʋt, ilbʋsha, imomokpulo, kinafa, lʋpa aiena kak o̱ ish hoyashke.

14Yohmikmak osh na chi yukpa hi oke: yʋmmak okʋto chishno ma afalaminchit ai itilauechit chi̱ yʋmihcha he keyu hoka: hatak ʋlhpesa illi puta kʋt tanik mak o̱ yʋmmak atuk a̱ falamʋt pit ai itilauit chim ʋlhtoba hi oke, im achi tok.

15Mihma ai ibai impʋt ma̱ya tuk ash o̱ achʋfʋt ilʋppa puta ka haklo mʋt, Chihowa apehlichika ya̱ pʋska ai ʋpa kak osh mihi hosh na yukpa hi oke, im achi tok.

16Mihma yʋmmak ash o̱, Hatak achʋfa hosh opiaka impa chito fehna ka ikbi cha, lauʋt a̱ya chi̱ ka, im anoli tok.

17Atuk ash opiaka impa ont ai ʋlhpesa ma, im annoa tuk ʋhleha hash, Himak ano nana moma kʋt ʋlhtahʋshke, ho mintí, im acha chi̱ ho̱, in tishu ha̱ chʋffichi tok.

18Mihma moyumʋt im anukfila achʋfa ohmit taha mʋt, okla nan isht ile mihachit isht ia tok. Ʋmmona kʋt, Osapa iskitini yo̱ chumpa li tuk osh, yʋmma pisʋt ia la he ʋlhpesa hoke; ʋno yokʋno ik a̱yo mak kia ba is sʋm ahna hi a̱ chim asilhha lishke, im achi tok.

19Mihma inla mʋt, Ʋno ʋt wak toksʋli yok tahlapi ho̱, chumpa li tuk osh, iʋt kaniohmi hatuk okma pisa la chi̱ hatuk oka, ʋno yokʋno ik a̱yo mak kia ba is sʋm ahna hi a̱ chim asilhha lishke, achi tok.

20Mihma anonti inla hosh, Ʋno ʋt ohoyo itauwaya li; yohmi hatuk osh a̱ya la he keyushke, achi tok.

21Yʋmohmi ma tishu yʋmmak ash ot ʋla cha, i̱ shahli ha̱ ilʋppa puta kash ant im anoli tok. Mihma chuka yʋmma pehlichi ash ot im okpulo mʋt, in tishu hash, Tu̱shpʋt kohchʋt iʋt tʋmaha itin takla hina hochito, chipunta aiena ka a̱yʋt, ilbʋsha, micha imomokpulo, mikmʋt kinafa, micha lʋpa aiena ka pehlichit ilʋppa isht ish lashke, im achi tok.

22Atuk o̱ tishu hashot, Chitokaka ma! chishno nana ish ai apesa tuk ano, ont aia̱hlit taha akinli kia, aiasha ʋt a̱sha momʋshke, achi tok.

23Mihma i̱ shahli ash ot tishu hash, Kohchʋt iʋt, haiaka hina bʋshkʋchi, mikmʋt kʋti holihta anu̱kaka aiena puta ka a̱yʋt, ilʋppa ʋla chi̱ ka, ish atu̱shpalechi na an chuka ʋt alota mak inlashke,

24Im annoa tuk ʋhleha hatuk yʋmmak amo achʋfa kia ʋm opiaka impa ya̱ iskitinosi kia ai ʋpa he keyu mak oke, hʋchim achi lishke, im achi tok, im achi tok oke.

25Atuk o̱ okla la̱wa fehna hosh apehʋt a̱ya ma, yʋmmak ash ot filema cha;

26Kʋna hosh a̱yʋt ʋm ʋla kʋt, i̱ki, micha ishki, mikmʋt tekchi, mikmʋt im ʋlla, anonti ilap itibapishi, mik mʋt in tek ʋhleha aiena, mikmʋt im ilhfiopak akinli aiena kak kia, i̱ nukkilli keyu hokʋto, nan ʋm ai ithʋna a he keyushke.

27Micha kʋna hosh im iti‐taiyukhʋna ya̱ shoyuli cha, siakaiya keyu hokʋto, nan ʋm ai ithʋna a he keyushke.

28Hʋsh katima kak osh chuka chaha ikba he ahni kʋt, ʋmmona ka aka binilit, Tahli la hinlakmá, nanta cho? ahnit ai‐ʋlhtoba he ma hotinʋt ik peso ka hinla cho?

29Yʋmmak atuk keyukmʋt nutaka in tola ya̱ bohli ha yosh, anonti atahla he keyukma, yʋmmak atuk ash pi̱sa kʋt momʋt isht itukhlakafʋt,

30Hatak ilʋppʋt itʋbʋnnit isht ia tuk ak osh, atahla he keyu ke tuk, acha hinla hoke.

31Yʋmmak keyukmʋt mi̱ko nanta ak osh mi̱ko inla yo̱ it in tanampa chi̱ kʋt, ʋmmona ka aka binilit, ilapʋt tahlepa sipokni pokoli ishi kʋt, tahlepa sipokni pokoli tuklo pehlichi hosh i̱ kohcha ka, amokʋfa he ʋlhpesakmá, nana kʋt anukfillit ik peso ka hinla cho?

32Yʋmmak keyukmʋt, achʋfa yash ot hopaki pilla auet takanli moma kak inli ho̱ itin nanaiya ka ahnit, anumpa shali a̱ pit chʋfficha hinla hoke.

33Yohmi ka yʋmmak o̱ chiyuhmit, hʋchishno ʋt hʋsh moma kʋt nana ho̱ hʋchim a̱sha tuk ʋt mominchit hʋsh issa keyukmʋt, nan ʋm ai ithʋna hʋchia ha he keyu hoke.

34Hʋpi ʋt achukma hoke: yohmi kia hʋpi hash ot homi tuk ʋt i̱ kʋniakmʋto, katiohmi kak osh anonti homa hinla cho?

35Yʋmmʋt yakni, micha nan i̱ yʋlhki yakni isht achukmʋli aiena kak kia isht ai im ʋlhpesa he keyu; amba hatak ʋt kocha pit kanchi chatuk oke. Kʋna hosh isht haponakla he haksobish ʋt i̱ hinlikmʋt, haklashke, im achi tok.

Currently Selected:

Luk 14: CHH

Highlight

Copy