Chan 4
4
Chisʋs ʋt Samalia ohoyo ho̱ ai okcha̱ya oka ak o̱ isht im anumpuh hosh 1, 26 ilap ak osh Klaist mak atuk ʋt il anoli; 28 mihma ohoyo hash ot falamʋt tʋmaha ha̱ ona cha, yʋmmak atuk a̱ okla ha̱ im anoli; 39 mihma okla hash ot na yimmi. 43 Chisʋs ʋt falamʋt Kalili a̱ ona tuk osh Kana ak o̱ anta hosh, hatak holitompa ushi ʋt abeka hosh Kapenaʋm ak o̱ itonla ka, pit hlakofichi.
1Chisʋs ʋt nan ithʋna ʋhleha ikbit baptismochi kʋt, Chan a̱ i̱ shahlichi ka, Falisi ʋhleha hʋt haklot ma̱ya ka, Chitokaka yʋt akostininchi hatuk osh,
2Chisʋs ʋt ilap inli kʋto baptismochi keyu ho̱, amba nan im ai ithʋna ʋhleha hak atuk ak o̱,
3Chutea yash issʋt Kalili yash inli ho̱ anonti ia tok.
4Yohmi kʋt Samalia ya̱ pit hlopullit ma̱ya he ʋlhpesa tuk a tok.
5Atuk osh Chekob ʋt ushi Chosef a̱ osapa ima tok talaia ka bili̱ka, Samalia yakni tʋmaha Saika hohchifo ho̱, ʋla tok.
6Yohmi ma Chekob i̱ kʋli hʋt yʋmma hiki̱a tok; yohmi hatuk o̱ Chisʋs ʋt nowʋt a̱yʋt hoyʋbli mʋt, hʋshi kanʋlli isht ʋlhpisa ont hannali foka hatuk o̱, kʋli yʋmmak ash yakohmit a bininli tok.
7Atuk o̱ Samalia ohoyo hʋt oka ochit a̱ya hosh yʋmmak ash o̱ ʋla ma, Chisʋs ash ot, Sʋpeta na ak ishkó, im achi tok.
8Nan im ai ithʋna ʋhleha hamo ilimpa chumpʋt tʋmaha ilhkoli tuk a tok.
9Yohmi ma Chu okla hʋt Samalia okla ha̱ nan ai itim ahalaia keyu chatuk oka, Katiohmi ho̱ Chu chia hokak osh, ʋno ʋt Samalia ohoyo sia ha̱ oka is sʋm asilhha cho? im achi tok.
10Chisʋs ash ot afalaminchi mʋt, Chihowa i̱ na‐hʋlbena ha̱, micha kʋna hosh, Sʋpeta na ak ishkó; chim achi aiena ka ish ithana hatuk okmʋt, ilapo ak o̱ ish im asilhha na yʋmmak okʋt oka okcha̱ya yo̱ chipeta he tuk oke, im achi tok.
11Mihma ohoyo hash ot, A̱ shahli ma! isht ish ocha hi ʋt nana kia ik chim iksho ho̱, anonti kʋli hʋt hofobishke; yohmi ka katimak o̱ oka okcha̱ya yʋmma ish ai ishi hosh?
12Chishno ak osh pi̱ki Chekob ʋt ilapo inli, micha im ʋlla ʋhleha, mikmʋt i̱ wak aienʋt ai ishko yatuk ʋt kʋli ha̱ pima tok a̱ ish imaiya hotuma! im achi tok.
13Chisʋs ʋt afalaminchi mʋt, Kʋna hosh oka ilʋppa ishko tukmʋt, anonti itukshila he;
14Amba kʋna hosh oka ya̱ ipeta la chi̱ yʋmmak o̱ ishko hokʋto, nitak nana itukshila he keyu; amba ʋno ak osh oka ya̱ ipeta la chi̱ hokʋno, yʋmmak atuk ma a foyukʋt tobohonli na nitak bília hi oke im achi tok.
15Ohoyo hash ot, A̱ shahli ma! oka ilʋppa is sʋpeta na ik sʋtukshilokmʋt, anonti ochit a̱ya kʋt ilʋppak o̱ ak le kashke, im achi tok.
16Chisʋs ash ot, Ia cha, chi̱ hatak a̱ ont i̱ howʋt ʋlá, im achi tok.
17Mihma ohoyo hash ot afalaminchi mʋt, A̱ hatak ʋt ikshoshke, achi ma, Chisʋs ʋt, A̱ hatak ʋt iksho, ish achi kʋt, ʋlhpesa ish mihʋshke.
18Hatak ʋt tahlapi hosh chim a̱sha tuk osh, anonti himonasi a̱ chim a̱sha kʋto, chi̱ hatak atuk o̱ keyu hoka, yʋmmak okʋno aia̱hli mak osh ish mihʋshke, im achi tok.
19Ohoyo hash ot, A̱ shahli ma! hopaii chia hatuk o̱ chi akostininchi lishke.
20Pin tikba ʋhleha hʋt nʋnih ilʋppa̱k o̱ a̱sht Chihowa pit aiokpahanchi tok: a tok ak o̱ hʋchishno ʋto Chelusalem a̱ a̱shʋt hatak puta kʋt Chihowa pit aiokpahancha he ʋlhpesa hatuk a̱ ish mihʋshke, im achi tok.
21Mihma Chisʋs ash ot, Ohoyo chia mʋt is sa̱ yimmashke; nʋnih ilʋppa, micha Chelusalem aiena kak kia ma̱yʋt I̱ki a̱ pit hʋsh aiokpʋcha he keyu ka hi a̱ hʋshi kanʋlli ʋlhpisa hʋt mihinti hoke.
22Hʋchishno ʋto yʋmmak o̱ hʋsh ahni keyu hosh pit hʋsh aiokpʋchishke; isht‐ai‐okcha̱ya hi ʋt Chu okla immi hoka, pishno ʋto nana ho̱ pit il aiokpʋchi hokʋt il ithana hoke.
23Yohmi kia Chihowa pit aiokpʋchi aia̱hli ʋhleha hʋt shilombish, mikmʋt aia̱hli aiena mak o̱ isht aiokpahancha hi a̱, hʋshi kanʋlli at ʋlhpisa hʋt mihinti ho̱, anonti himonasi a̱ ʋla hoke: yʋmma chohmi hosh ilapa̱ aiokpʋcha he ak o̱ I̱ki ʋt hoyo hoka.
24Chihowa yʋt Shilombish oke: yohmi ka kʋna hosh yʋmma pit aiokpʋchi hokʋt shilombish, mikmʋt aia̱hli aiena mak o̱ isht aiokpʋchi pullashke, im achi tok.
25Ohoyo hash ot, Messias, Klaist hohchifo kʋt, ʋla hi a̱ ithana lishke, yʋmmʋt ʋla hok mak osh, nana moma ka pim anola hi oke, im achi tok.
26Chisʋs ash osh, Ʋno ʋt chim anumpohonli li kak osh mihi yo̱ sia hoke, im achi tok.
27Mihma nan im ai ithʋna ʋhleha hash ot ilʋppa ataklama ma ai ʋla cha, yʋmmʋt ohoyo ha̱ it im anumpuli tuk a̱, okla anukhlakancha tok: yohmi kʋt hatak achʋfa kia, Nanta ho̱ ish hoyo hosh? Katiohmi ho̱ yʋmma ish it im anumpuli cho? achi kia iksho ki tok.
28Yohmi ma ohoyo hash ot isht‐ochi ash talali cha, iʋt tʋmaha ont chukowa mʋt, hatak puta kash,
29Yakeh! hatak ʋt nana ho̱ a kaniohmi li tok a̱ mominchit ʋm anoli ka ant ho pesá, ilʋppʋt Klaist mak o̱ keyu ho̱? achi tok.
30Mihma tʋmaha hash a kohchʋt iʋt, yʋmmak ash okla im ai ona tok.
31Yohmi ta̱kla ma nan im ai ithʋna ʋhleha hash ot, Pi̱ shahli ma! impá, achit im asilhha tok.
32Yohmi kia, Ilhpak ʋpa la chi̱ kʋt ʋm a̱sha yʋmmak oka hʋch ik akostininchoshke.
33Yohmi hatuk o̱ nan‐ithʋna ʋhleha hash ot, Ʋpa chi̱ ka hatak nana kia isht im ʋla tuk atuk o̱? it im achit ma̱ya tok.
34Chisʋs ash ot, Auet sa kanchi tok nan ahni kak o̱ a yʋmohmi, micha i̱ na‐toksʋli atahli aiena kak osh ʋm ilhpak oke.
35Na‐hoyo ai ʋlhpesa chi̱ ka hʋshi ushtʋt a̱sha moma, hʋsh achi keyu ho̱? yakeh! oh ʋba chakali cha, osapa puta kʋt himonasi ak kia a hoya he ai ona kʋt tohmbi ka ho pesá, hʋchim achi lishke.
36Na‐hokchi, micha nan ʋmo ita‐tuklo kʋt itibai yukpa chi̱ ka, nan ʋmo yash ot ʋlhtoba ha̱ ishi hosh ai okcha̱yʋt bilia na‐wa̱ya ya̱ hoyo hoke.
37Yohmi ka achʋfʋt hokchi okma, anonti achʋfa hosh ʋmo, achi tok a̱ yʋmmʋt aia̱hlishke,
38Hʋchishno ʋt hʋsh a toksaiyali tok keyu kʋt hʋsh ai ʋma chi̱ ka, pit hʋchi tihleli li tuk: hatak inla yosh toksʋli tuk o̱, im a toksʋli yash pit hʋsh chukowa tuk oke, im achi tok.
39Mihma ohoyo hʋt nana ʋlhtokowa ka anolit, Nana ho̱ a kaniohmi li tok a̱ mominchit ʋm anolishke, achi ka Samalia okla tʋmaha a̱sha tuk ʋt lauʋt yʋmmak ash isht ai i̱ yimmi tok.
40Yohmi hatuk osh Samalia okla hʋt yʋmmak ash im ai ʋla mʋt, ta̱kla anta hinla ka im asilhha tok; mihma yʋmma anta na nitak tuklo tok.
41Mihma ilap fehna akinli im anumpa hatuk o̱ himakma yimmi kʋt laua tok.
42Mihmʋt ohoyo hash o̱, Himak ano pi yimmishke, chishno ak osh nan ish anoli kak o̱ keyu; pishno akinli hosh il ai i̱ haponaklo cha, ilʋppak osh Klaist, yakni okchalinchi mak atuk pulla ka il akostininchishke, im achi tok.
43Nitak tuklo ont ʋbanʋpa ma yʋmmak ash kohchʋt ia mʋt, Kalili a̱ ona tok.
44Chisʋs akinli kʋt hopaii ʋt ilap i̱ yakni akinli ka a holitopa hi ʋt ik im iksho ka, ʋlhtokowa anoli tok.
45Micha Kalili ash ʋla ma, Kalili okla hʋt yʋmmak kia impa holitopa ya̱ itʋnowa hatuk osh, impa holitopa isht a̱sha yʋmmʋt Chelusalem a̱ nana puta ka a yʋmihchi tuk mo minchit pisa tuk okʋt, yʋmmak ash o̱ okla aiokpʋchi tok.
46Yohmi hatuk o̱ Chisʋs ash ot Kalili yakni Kana yʋmmak o̱ oka ya̱ okapa̱ki ai ikbi tok ash ot, anonti ona tok. Mihma hatak holitompa achʋfa hosh ushi ʋt abeka kʋt Kapenaʋm a̱ itonla tok.
47Atuk osh, Chisʋs ʋt Chutea ya̱ a kohchʋt a̱yʋt Kalili ʋla ka, haklo mʋt, yʋmmak ash im ona cha, ushi ʋt illa̱ hosi hatuk o̱, iʋt ont hlakoficha hinla ka, im asilhha tok.
48Yohmi ma Chisʋs ash ot, Nan isht atokowa, micha na‐fehna aiena ho̱ hʋsh pisa ho̱ keyukmʋt, hʋchi yimma he keyushke, im achi tok.
49Mihma hatak holitompa hash osh, A̱ shahli ma! ʋm ʋlla ʋt ik inlo ta̱kla ish onashke, im achi tok.
50Mihma Chisʋs ash ot, Chiso hʋt okcha̱ya hoke; ish iashke, im achi tok. Mihma hatak ash ot, Chisʋs ʋt im anumpuli ka anumpa ha̱ yimmi cha, ia tok.
51Atuk osh ia hosh a̱ya ma, nan isht im a̱sha ʋhleha hʋt afama cha, Chiso hʋt okcha̱yʋshke; achit im anoli tok.
52Mihma hʋshi kanʋlli ʋlhpisa yʋt kaniohmi kak o̱ pit nuktanlʋt isht ia tuk a̱ im a ponaklo tok. Mihma, Pilashash hʋshi kanʋlli ʋlhpisa ont isht untuklo kak o̱ yʋnha hʋt shipa tuk, im achi tok.
53Yohmi ma i̱ki ash ot, Chisʋs ʋt, Chiso hʋt okcha̱ya hoke, im achi tuk hʋshi kanʋlli ʋlhpisa ʋt yʋmmak fehna akinli tuk a̱ ithana tok; micha ilapo fehna, mikmʋt in chuka chʋfa yʋt a momʋt yimmi tok.
54Chisʋs ʋt Chutea ya̱ a kohchʋt a̱yʋt Kalili a̱ ʋlʋt, anonti na‐fehna ka ai yimihchi kʋt ilʋppʋt ont atu̱kla ha tok oke.
Currently Selected:
Chan 4: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
