Chan 19

Pailat ʋt Chisʋs ash fʋmmit issa ma, tʋshka chipota ʋhleha hʋt kʋti tʋnna yo̱ iachokolichi, 1: 4 hlakofichi bʋnna kia, Chu okla nan ahni kak o̱ im antia hatuk osh, yʋmmʋt ititaiyukhʋna ahonʋhla chi̱ mak o̱, im issa: 17 tʋshka chipota ʋhleha hʋt i̱ nafohka yatuk a̱ iti hopela: 26 Chisʋs ʋt ishki yatuk a̱ achukmalit apelahancha chi̱ ka, nan im ai ithʋna i̱ holitopa yatuk a̱ i̱ miha cha, illi. 31 Tʋshka chipota ʋhleha hʋt, Chisʋs naksi a̱ tʋli halupa ishit bahli. 38 Chosef Alimahlea minti, micha Nikotemʋs ita tuklo hosh Chisʋs haknip a̱ ishi cha, hohpi.

1Yohmi hatuk o̱ yʋmma foka ma Pailat ʋt Chisʋs a̱ ishi cha, fʋmmi tok.

2Mihma tʋshka chipota ʋhleha hʋt kʋti tʋnʋt iachuka ikbit, noshkobo ha̱ iachukolichi mʋt, na tishepa na fohka holitopa yo̱ ishit okla anchichi tok.

3Mihmʋt aiokpʋchi mʋt, Chu okla i̱ mi̱ko yosh nan ik yukpá, achi mʋt ibbak okla isht isso tok.

4Yohmi ma anonti Pailat ash ot ia cha, Yakeh! nana ik ai‐ʋlhpeso nana kia ai a takali na akostininchi li keyu ka hʋsh akostinincha chi̱ mak o̱, ilauelit hʋchi̱ kohchi lishke, im achi tok.

5Mihma Chisʋs ʋt kʋti iachuka ha̱ iachukoli cha, na‐tishepa na‐fohka holitopa fohka hosh auet kohcha tok. Mihma Pailat ash osh, Yakeh! hatak atukma ho pesá, okla ha̱ im achi tok.

6Yohmi ma na‐holitompa isht a̱sha pehlichi ʋhleha, mikmʋt nan‐ʋlhtoka ʋhleha aiena kash ot yʋmmak ash pisa mʋt, chitoli hosh mihʋt, Ititaiyukhʋna ak o̱ oh ahonʋhlichí, ititaiyukhʋna ak o̱ oh ahonʋhlichí; ahanchi ma, Pailat ash osh, Oh ishi cha, ititaiyukhʋna ak o̱ oh ahonʋhlichí; ʋno yokʋto nana ik ai‐ʋlhpeso nana kia ai atakali ka ak im akostinincho hoke, im achi tok.

7Chu okla hʋt afalaminchi mʋt, Nan‐ʋlhpisa hʋt pin tonla: yohmi ka ilʋppak okʋt Chihowa Ushi ilapissa hatuk okʋt, pi̱ nan‐ʋlhpisa pulla kak o̱ isht illa he ʋlhpesa hoke, im achi tok.

8Yohmi hatuk o̱ Pailat ʋt anumpa yʋmma haklo mʋt, nukshopa kʋt isht i̱ shahli tok.

9Mihmʋt anonti nan ai apesa yash ont chukowa cha, Chisʋs ash o̱, Katima ko̱ ish minti tok oh cho? im achi tok. Yohmi kia Chisʋs ash ot nana ik im acho ki tok.

10Yohmi ma Pailat ash ot, Chik sʋm anumpulo mak oh cho? ʋno ʋt ititaiyukhʋna ya̱ a chi ahonʋhlichi la hi ʋt ʋm ʋlhpesa, anonti chi̱ hotofi la hi ʋt ʋm ʋlhpesa aiena ka chik ithaiyano cho?

11Chisʋs ʋt afalaminchi mʋt, Chishno yokʋt ʋba ak o̱ auet a chima ho̱ keyukma, ʋno yoka nana ho̱ is sa kanihcha hi ʋt chim ʋlhpesa keyushke: yohmi hoka sʋshit a̱yʋt chibbak a̱ ant sa fohki tuk a̱ yʋmmak osh nan‐ashʋchi kʋt ai in chinto hoke, achi tok.

12Yohmi ma yʋmma ai ʋhlit minti ka Pailat ʋt yʋmmak ash i̱ hotofi bʋnnʋt im anukfihinla tok: yohmi kia Chu okla hʋt chitolit anumpulit, Hatak ilʋppa ish i̱ hotofi hokmʋt, Sesa ya̱ i̱ kana chia ha he keyu. Kʋna hosh mi̱ko il apesakmʋt, Sesa ak o̱ i̱ sanalit anumpuli hoke, okla achi tok.

13Yohmi hatuk o̱ Pailat ʋt anumpa yʋmma haklo mʋt, Chisʋs ash ishit kohchi cha, ilap ʋto nan ai‐apesa ai‐o̱‐minili om binili tok, yʋmmʋt Tʋli potʋlhpo hohchifo ho̱, amba Heblu ano Kabbahla hohchifo ha tok.

14Mihma nan ʋbanʋblit ont ia a̱sha chi̱ ka, ai il atahlit ma̱ya nitak, mihmʋt hʋshi kanʋlli ʋlhpisa yʋt ont isht hannali foka aiena; yohmi hatuk o̱ Chu okla hash o̱, Hʋchi̱ mi̱ko ya̱ ho pesá, im achi tok.

15Yohmi kia okla chitoli hosh anumpulit, Kanima isht oh ia cha, kanima isht oh ia cha, ititaiyukhʋna oh ahonʋhlichí, achi ma, Pailot ash ot, Hʋchi̱ mi̱ko ya̱ ititaiyukhʋna ahonʋhlichi la chi̱ cho? im achi ma, na holitompa isht a̱sha pehlichi ʋhleha hash ot, Pi̱ mi̱ko ʋt iksho, Sesa ak banoshke, im achi tok.

16Yohmi ma pola̱ka yʋmmak ash ot ititaiyukhʋna ahon ʋhlʋt illa chi̱ mak o̱, ibbak i̱ fohki tok. Yʋmma foka ma Chisʋs ash o̱ okla ishi cha, halʋllit kanima isht ia tok.

17Yohmi ma im ititaiyukhʋna yash o̱ sholi cha iʋt yakni hohchifo noshkobo foni aiasha yo̱, anonti Heblu yokʋno yʋmmʋt Kalkohla hohchifo ho̱ ona tok.

18Mihma yʋmmak ash, micha inla yʋt tuklo ho̱ aieninchit ititaiyukhʋna okla ai ahonʋhlichi tok: Chisʋs ak osh iklʋnna yo̱ takali na achʋfa bi̱kʋt ita hlakla̱ka takohli tok.

19Mihma Pailat ʋt nan anoli holisso ha̱ holissochit ititaiyukhʋna ya̱ a lapalichi tok. Yohmi ka holisso kʋt, CHISƲS NASALET MINTI CHU OKLA I̱ MI̱KO YOKE, achi ha tok.

20Yohmi na Chisʋs ʋt ititaiyukhʋna ai ahonʋhlʋt illi yʋmmʋt tʋmaha ha̱ i̱ bili̱ka ha tok: yohmi ka holisso kʋt Heblu, Klik, mikmʋt Latin aiena anumpa hosh isht a holisso hatuk oka, nan anoli holisso ilʋppak ash Chu okla laua kʋt pisa tok.

21Yohmi ma Chu okla na holitompa isht im a̱sha peh lichi ʋhleha hash osh Pailat a̱, Chu okla i̱ mi̱ko, achit chik holissocho kashke; amba Chu okla i̱ mi̱ko sia hoke, achi chatuk yʋmmak o̱ ish holissochashke, okla im achi tok.

22Mihma Pailat ash ot, Nana ho̱ holissochi li kʋt holissochi li mak atuk oke, im achi tok.

23Yohmi ma tʋshka chipota ʋhleha hʋt Chisʋs a̱ ititaiyukhʋna ahonʋhlichi mʋt, i̱ na fohka yatuk a̱ ishit ita kʋsh koa ushtali cha, tʋshka, chipota ʋt i̱ kashampa aiyuka tok; mihmʋt i̱ na fohka lumbo ash kia aieninchi tok: na fohka lumbo yʋt ahchu̱wa yo̱ keyu, paknaka yak o̱ a tʋnnʋt ma̱ya hosh ont taiyaha ha tok.

24Yohmi hatuk o̱, Ilʋppak okʋno keho hlilʋffo hosh, amba kʋna hosh immi ha chi̱ ka, na shoelit kil oh a̱shá, ilap bi̱ka it im achit ma̱ya tok; yohmi ka Holisso Holitopa ʋt, Ʋm ilifoka ya̱ okla iti̱ hopela mʋt, a̱ na fohka lumbo yoka na shoeli isht aiasha kʋno, achi ka ont aia̱hla chi̱ mak a tok; yohmi hatuk o̱ tʋshka chipota ʋhleha hʋt ilʋppa okla yakohmi tok.

25Mihma Chisʋs ititaiyukhʋna a takali ka ituma ya̱ ishki, micha ishki nakfish, mikmʋt Meli Kleofas tekchi, mikmʋt Meli Maktalene aiena hosh hiohma̱ya tok.

26Yohmi hatuk o̱ Chisʋs ʋt ishki, micha nan im ai ithʋna yʋmma i̱ hullo beka tuk mak osh itatuklot hinli na pisa mʋt, ishki ash o̱, Ohoyo ma! chiso ha̱ ish pisashke, im achi tok.

27Mihmʋt nan im ai ithʋna yash o̱, Chishki a̱ ish pisashke, im achi tok. Mihma nan im ai ithʋna yʋmmak ash osh hʋshi kanʋlli ʋlhpisa yʋmmak fehna ai‐ʋhlit ia ka, ohoyo hash ilauelit ilap in chuka akinli ho̱ bohli tok.

28Yakohmi ha ya, nan oklu̱ha kʋt ont ai ʋlhtaha ka, Chisʋs ʋt ithana hatuk osh, Holisso Holitopa yʋt ont ai a̱hla chi̱ ka, Sa tukshilʋshke, achi tok.

29Yohmi ma nan‐ai‐ʋlhto wineka alota kʋt talaia tok; atuk o̱ na‐shatʋmmi yo̱ wineka yash alotolit hissop o̱ takalichit itih ha̱ pit tikelichi tok.

30Yohmi hatuk o̱ Chisʋs ʋt wineka yash ishkot pisa mʋt, Ʋlhtaiyahʋshke, achi tok; yohmi cha aka yuhchunukli mʋt, fiopissa tok.

31Yohmi hatuk o̱ nan il ai atahli nitak atuk oka, nitak hullo ya̱ haknip ʋt ititaiyukhʋna ya̱ ik a takohma̱yo ka chi̱ ka, nitak hullo yʋmmʋt nitak holitopa hatuk oka, Chu okla hash osh yʋmma hanali ak osh kobahli na ishit kanima ia hinla ka, Pailat a̱ im asilhha tok.

32Yohmi na tʋshka chipota ʋhleha hash ot iʋt, ititaiyukhʋna ai iba honʋhlʋt okla kash achʋfalit ti̱kba hanali ha̱ kobahlichi mʋt, anonti achʋfa yash kobahlichi tok.

33Amba Chisʋs ʋt a takali tuk a̱ okla ona mʋt, yʋmmʋto illi ma̱shko tuk o̱ pisa cha, yʋmmʋno hanali ha̱ ik kobahlecho ki tok.

34Yohmi kia tʋshka chipota ʋhleha yash ot achʋfʋt naksi a̱ na halupa ho̱ ishit bahli na ashali̱ka issish, micha oka aiena hosh auet fohopa tok.

35Yohmi ka yʋmma pisa tok mak osh atokowa ka anoli; yohmi ka yʋmmʋt atokoli ka ai a̱hli hoke: yohmi ka hʋchishno ʋt hʋchi yimma chi̱ ka, ai a̱hli mak o̱ miha kʋt ithana hoke.

36Holisso Holitopa yʋt, Foni ʋt ik pakoto ka he, achi kʋt ont ai a̱hla chi̱ mak o̱, nana kʋt a yakohmi tok.

37Micha anonti Holisso Holitopa ai anumpa inla mʋt, Yʋmma okla bahli tuk ʋt yʋmmak ash pisa hi oke, achishke.

38Micha ai yakohmi ha ya, Chosef Alimahlea minti ʋt Chisʋs a̱ nan im ai ithʋna akinli kia, Chu okla ha̱ i̱ nukshopa kʋt il aluma beka tuk osh, Chisʋs haknip a̱ isha hinla kʋt, Pailat a̱ ont im asilhha tok: mihma Pailat ʋt ʋlhpesa, im ahni tok. Yohmi hatuk o̱ iʋt, Chisʋs haknip ash ont ishi tok.

39Yohmi ma Nikotemʋs ʋt nan ʋmmona ka ninak o̱ a̱yʋt Chisʋs a̱ pisa tok yʋmmak ash kia ʋla cha, mʋh micha aloes itibʋlhto kʋt weki tahlepa achʋfa foka ho̱ isht ʋla tok.

40Yohmi ma Chisʋs haknip ash o̱ ishit okla cha, Chu okla hʋt hohpi kʋt yʋmihchi chatuk mak o̱, yʋmmak ash o̱ linen osh na‐balama pit aiena ho̱ isht a bonulli tok.

41Ititaiyukhʋna ahonʋhlʋt ai illi yʋmma osapushi osh talaia tok: mihma osapushi anu̱kaka ya̱ sepʋlka himona, hatak ʋt ik a hollopo ki̱sha yo̱, hiki̱a tok.

42Yohmi hatuk o̱ Chu okla nan il ai atahli nitak a tok; yohmi hatuk o̱ sepʋlka yʋt yʋmma auet i̱ bili̱kasi hatuk oka, vʋmmak o̱ Chisʋs a̱ bohlit okla tok.

Currently Selected:

Chan 19: CHH

Highlight

Copy