Apostel isht Anumpa 13

1Yohmi ma iksa Antiak aha̱shwa ka kaniohmi kʋt hopaii, micha nan im abʋchi ʋhleha, Banabas, micha Simion osh Naika hohchifo, anonti Lusiʋs, Sailini ʋtta, micha Maneʋn, Helot na pehlichi ya̱ iba hofanti tok, micha Sal chohmi kʋt ma̱ya tok.

2Okla Chitokaka pit aiokpʋchit nahullochit ma̱ya ma, Banabas, micha Sal ita tuklo ka, a toksʋli im ai atokoli li tuk isht a̱shwa chi̱ ka, hʋs sʋm atokolashke, Shilombish Holitopa yʋt achi tok.

3Mihma okla nahullochit ʋba pit anumpuli cha, ibbak a̱ isht umbitepʋt taiyahli mʋt, okla pit tihleli tok.

4Yohmi ma Shilombish Holitopa yak osh pit tihleli hoka, iʋt Silushi a̱ itonachi tok osh, yʋmma a̱shwʋt peni ʋlhtot iʋt Saipilʋs a̱ itonachi tok.

5Micha Salemʋs a̱ ont a̱shwa mʋt, Chu okla i̱ sinakak puta Chihowa im anumpa isht ai anumpohonli tok. Mihma Chan a̱ il ai apelahanchi akinli tok.

6Micha tashaiyi ya̱ a hlopullit Pefʋs a̱ itonachi mʋt, hatak isht ahullo achʋfa hopaii ilahobi, Chu hatak Bachisʋs hohchifo ho̱, pisa tok.

7Yʋmmak okʋt nahullo mi̱ko hatak nan ithana, Sachis Paulʋs a̱ awant anta tuk o̱, yʋmmak ash ot Banabas, micha Sal aiena ka hoyo mʋt, Chihowa im anumpa ha̱ haklo bʋnna tok.

8Yohmi kia Ilimʋs hatak isht ahullo ash ot, hohchifo hʋt toshowakmʋt yʋmmak oka nahullo mi̱ko a̱ na yimmika ai i̱ filʋmmichi bʋnna kʋt yʋmmak ash im ataklʋmmi tok.

9Mihma Sal mʋt, Pal hohchifo akinli hosh, Shilombish Holitopa yʋt anukfohkʋt kʋnia hosh, yʋmmak ash atokolit pisa tok.

10Mihma, Na haksichi, micha nan ik ai ʋlhpeso aiena banot isht alotowa, nan isht ahullo okpulo ushi, ahopoyuksa oklu̱ha in tʋnʋp ma! Chitokaka i̱ hina ai a̱hli puta okpʋni kʋt, ish issa he keyu cho?

11Mikma, yakeh! himak a̱ Chitokaka ibbak ʋt chi onʋtula hoka, chi lʋpakmʋt hʋshi a̱ chik peso ho̱ ahchiba chi̱ hoke; achi tok. Mihma chekosi makinli ho̱ tohbi, micha okhlilika aienʋt onʋtula tok. Mihma kʋna kia ibbak a̱ halʋlli cha isht a̱ya chi̱ ka, hoyot fullokahanchi tok.

12Mihma nahullo mi̱ko ʋt Chitokaka im anumpa ha̱ anukhlakancha cha, nana kʋt yʋmohmi na pisa mʋt yimmi tok.

13Mihma Pal ʋt itʋpeha yash aienʋt Pefʋs a̱ a hotofi cha, okla mintit Pa̱filia yakni Pʋki a̱ ai ʋla tok. Mihma Chan ʋt i̱ filʋmmit Cheluselem a̱ falamʋt ona tok.

14Amba Pʋki a a̱sht kohchʋt okla ia mʋt, Pisitia yakni Antiak a̱ ai ʋla cha, nitak hullo a̱ sinakak a̱ ont chukowʋt chieya tok.

15Mihma nan ʋlhpisa, micha hopaii i̱ holisso puta aiena kash, itim anumpulit atahli ma, sinakak apehlichi ʋhleha yʋt, Hatak, il itibapishi ʋhleha ma! okla isht im anumpa he anumpa hʋt hʋchim a̱shakmʋt hʋsh anumpulashke; achit auet im anoli tok.

16Mihma Pal ʋt hikia cha ibbak a̱ pit isht im alʋmmit, Islael okla, micha Chihowa ya̱ i̱ nukshohumpa ʋhleha hʋchia ma! hʋsh haponaklashke.

17Okla ilʋppa Islael ʋhleha in Chihowa yʋt pin tikba ʋhleha ya̱ atokoli mʋt, hatak nowʋt a̱ya chiyuhmi hosh Echip a̱ okla aha̱shwa ma, yʋmmʋt holitobli tuk osh, ilap ibbak kʋllo pulla kʋt yʋmmak ash isht akohonchi tok.

18Micha afʋmmi pokoli ushta foka yakni haiaka okla nana a kaniohmi ka, ant ik yohmí, im ahni tok.

19Micha Kenan yakni a̱ oklushi untuklot ai imaiyachi mʋt, i̱ yakni atuk a̱, na shueli ho̱, isht ai i̱ hopela tok.

20Micha yohmi ha ya nan apesa ʋhleha im a hiohlihinchi na, afʋmmi tahlepa ushta cha pokoli tahlapit aiena foka ho̱, Samuel hopaii ʋt ʋtta tok.

21Atuk o̱ i̱ himmakma, mi̱ko okla asilhha tok. Mihma Chihowa yʋt Sis ushi, Sal, hatak Benchamin isht atiaka yo̱, i̱ hilechi na afʋmmi pokoli ushta tok.

22Atuk osh yʋmmak ash ai ishi mʋt, Lewi ak osh i̱ mi̱ko ya chi̱ ho̱ okla ha̱ i̱ hilechi tok; yʋmmak o̱ pit atokolit, Ilap ʋt, Lewi Chesse ushi, ʋno sa chu̱kʋsh fehna iakaiya hatak, micha ʋno nan ai ahni li ya̱ mominchit ai a̱hlicha chi̱ mako̱ ahayuchi lishke; achi tok oke.

23Hatak ilʋppa isht ai unchululi yo̱ Chihowa yʋt ilap miha tok pulla hosh, okchalinchi Chisʋs a̱ Islael okla ha̱ i̱ hilechi tok.

24Yʋmmʋt ik lo ki̱sha ho̱, Chan ʋt ʋmmona ka Islael okla moyuma ka ile kostininchit baptismo ya̱ isht im anumpohonli tok.

25Micha Chan ʋt anumpulit ahanta mʋt, Kʋta hak o̱ sia hʋchim ahoba cho? Ʋno ʋto mih mak o̱ sia keyu hoke. Amba siakaiyʋt minti kak o̱, yʋmma iyi i̱ shulush a̱ ʋno ʋt i̱ hotofi la he si ahoba keyu hoke; achi tok.

26Hatak itibapishi li ʋhleha ma! Eblaham isht atiaka ushi, micha kʋna hosh hʋchi takla a̱shwa kʋt Chihowa ya̱ i̱ nukshohumpakma, hʋchishno ak o̱, ai okcha̱ya isht anumpa ilʋppʋt hʋchim a̱ya hoke.

27Cheluselem ai asha, micha i̱ hochitoka aiena kʋt, yʋmma, micha hopaii ʋhleha im anumpa nitak hullo moma ka itim anumpuli chatuk aiena ka ik ithano hatuk osh, na palʋmmi ka onochit yʋmmak atuk a̱, ai‐a̱hlichi tok oka.

28Micha kaniohmi ho̱ yʋmmak okʋt isht ai illa he ʋlhpesa kʋno, im ai akostininchi keyu ho kakosh, illa he a̱ ahnit, Pailʋt a̱ okla im asilhha tok.

29Micha yʋmma isht a holihi̱so tok a̱ mominchit ai a̱hlichit okla tahli mʋt, iti ash ai ishit akʋchi cha ahollopi anu̱kaka ya̱ bohyuli tok.

30Yohmi kia illi tuk a̱ Chihowa yʋt tanichi tok.

31Yohmi ma Kalili ya̱ a̱sht apehʋt mintit Cheluselem a̱ ai ʋla tuk ʋt yʋmma okla pi̱sa na nitak kanohmi tok; mih mak osh yʋmma atokowʋt okla ha̱ im anoli yoke.

32Yohmi hosh anumpa achukma pin tikba ʋhleha ima tok a̱ isht e hʋchim anumpulishke.

33Im ʋlla ʋhleha hʋpia hak o̱, Chihowa yʋt yʋmmak ash isht pim ai a̱hlichi hosh Chisʋs a̱ falamichit tanichi tok. Yohmi kʋt ataloa ont atu̱kla ka, Sʋso chia hoke, himak nitak a̱ chikbi lishke, achit aholisso akinli hoke.

34Micha yʋmmʋt illi tok a̱ falaminchit tanichi ka himmakma falamʋt ahollopi a̱ chukowa he keyu hatuk o̱ yak ahanchi tok, Lewi i̱ nan isht il aiyukpa a̱hli ka chima la hi oke.

35Yʋmohmi hatuk o̱ anonti, Chi̱ Holitopa ka ant nan toshbi ka ik pisá, ish im ahna he keyu hoke, inla ma ai ahanchi hoke.

36Lewi ak okʋto Chihowa nan ahni pulla ho̱, im okla ha̱ nan isht im ahantʋt in taiyaha mʋt, illi cha in tikba ʋhleha ha̱ ibafohkʋt itoyulʋt nan toshbi ma piesa tok oka.

37Amba Chihowa yʋt falaminchit tanichi tok, yʋmmʋto nan toshbi nana kia ik peso ki tok.

38Yʋmohmi ka hatak il itibapishi ʋhleha ma! hatak ilʋppa pulla hatuk mak o̱, nan ai ashʋchika puta isht kashofa yʋt ishit hʋchim anumpa hoka hʋsh ithaiyanashke.

39Micha Moses i̱ nan ʋlhpisa ak okmʋno yʋmma kaniohmit isht hʋsh ai i̱ hlakofa he keyu ke tuk kia, na yimmi ʋt momʋt yʋmma pulla kano oklu̱ha isht ai i̱ hlakofi hoke.

40Yʋmohmi hoka ahah! hʋsh ai ahnashke; yʋmmak keyukma hopaii ʋhleha i̱ holisso ha̱ isht ai anumpʋt,

41Na shitilema ʋhleha hʋchia hʋt ho pesa cha, okokko! ahnit, ik hʋchi nukhlakanchá; hʋchi̱ nitak a̱ nan isht ʋtta ya̱ isht ahanta li ka, kʋna kia ik hʋchim anoli mak o̱, kaniohmit nan isht ʋtta yʋmma a hʋchi yimma he keyu, achi kʋt hʋchi onʋtula hinla hoke; achi tok.

42Mihma Chu okla hʋt sinakak a̱ a kohcha wiha ma, okla nan ik ithano ʋhleha yʋt anumpa yakohmi kash ot nitak hullo atu̱klakma isht im anumpa hinla kʋt asilhha tok.

43Yʋmohmi tuk o̱ itʋnaha yash ot tisheli ma, Chu okla laua, micha himona ʋbanumpuli toba ʋhleha aiena kʋt Pal micha Banabas ita tuklo ka apehʋt a̱ya tok. Mihma yʋmmak ash ot im anumpulit, Chihowa im ai isht il ayukpa pulla ho̱ ai itʋnowa chi̱ ka atohnohonchi tok.

44Atuk o̱ atu̱kla nitak hullo ya̱ tʋmaha chito achʋfa kʋt moma̱ hosit Chihowa im anumpa hakla chi̱ kʋt itʋnaha tok.

45Yohmi kia Chu okla hʋto okla laua ya̱ pisa mʋt, nukhobelʋt alota mʋt, Pal ʋt nana anumpuli ka ik ahobalot na mihachit itachowʋt ma̱ya tok.

46Yohmi ma Pal, micha Banabas ita tuklo kash ot nukwa̱ya iksho kʋt isht i̱ shahlit ia mʋt, Chihowa im anumpa hʋt ti̱kba hʋchishno ak o̱ a hʋchim anumpa he mʋto ai ʋlhpiesa tuk okʋno; yohmi kia, yʋmmak ash naksi ka pit hʋsh bohli cha, okcha̱yʋt bilia he o̱ ik chi ahobo kʋt isht hʋsh il anukfihinli hoka, okla nan ik ithano yak o̱ pit il i̱ filemʋshke.

47Yakohmi ho̱ Chitokaka yʋt pim apihi̱sa mʋt, Okla nan ik ithano ʋhleha ya̱ ish in tohwikela chi̱, yakni ont ʋhli fullota kʋt isht ai okcha̱ya he mako̱, chi hilechi lishke; ahanchi tuk oke, achi tok.

48Mihma okla nan ik ithano ʋhleha yʋt ilʋppa haklo mʋt, okla na yukpʋt Chitokaka im anumpa ha̱ aiokpahanchi tok. Mihma okcha̱yʋt bilia he isht im ʋlhpisa tok ʋto momʋt yimmi tok.

49Yohmi na Chitokaka im anumpa hʋt annoʋt yakni yʋmma mominchit a hlopulli tok.

50Yohmi ma Chu okla hʋt, ʋbanumpuli ohoyo holitompa ʋhleha, micha hatak holitompa tʋmaha a̱sha tuk aiena ka atohnohonchi cha, Pal, micha Banabas ita tuklo ka isht ai ilbʋshaka ya̱ ilhkolichi tok; micha i̱ yakni a̱ kohchit kanom pit tihleli tok.

51Yohmi kia iyi hituk chubbi a̱sha tuk a̱ on tahtuli cha, mintit Aikoniʋm a̱ itʋlachi tok.

52Mihma nan ithʋna ʋhleha yʋt na yukpa, micha Shilombish Holitopa aiena ka isht anukfohka tok.

Pal, micha Banabas ita tuklo kʋt i̱ palʋmmi, 1, 8 Pal ʋt Listi a̱ hatak imomokpulo a̱ hlakofichi na, nan‐ishtahullo ʋhleha hatuk o̱, okla hʋt ahobʋchi, 1, 19 Pal ʋt tʋli isht boa, 21 Tʋmaha ilaiyuka hlo pullit a̱ya mʋt, falamʋt Antiak a̱ itʋlachi.

Currently Selected:

Apostel isht Anumpa 13: CHH

Highlight

Copy