Apostel isht Anumpa 10
10
1Hatak achʋfa Seselia ya̱ ahanta kʋt, Kanilis hohchifo hosh tʋshka chipota a̱ya achʋfa, Itili okla achi ho̱, i̱ kʋpitʋni ha tok.
2Hatak achukma, micha in chuka‐chʋfa moma aienʋt Chihowa ya̱ i̱ nukshompa cha, okla ha̱ na habenʋchi fehna mʋt, Chihowa ya̱ pit im anumpohonli na bilia tok.
3Yʋmmak ashot holhpokuna chohmit pisa ka nitak hʋshi kanʋlli isht ʋlhpisa ont isht chakkali foka ho̱, Chihowa im enchil ʋt haiaka achukma hosh mintit ant iba chukowa mʋt, Kanilis, im achi tok.
4Yohmi ma yʋmmak ash atokowʋt pisa mʋt nukshopa cha, Chitokaka ma! nanta hoh cho? achi tok; mihma, Ʋba pit ish anumpohonli, micha nan ish hopela puta aiena ka, Chihowa yʋt ithaiyana he mak o̱ ʋba ihi̱ya hoke.
5Yohmi hoka himak a̱, Saimon, Pita hohchifo ka pit hoyot, hatak a̱ Chappa pit ish tihlelashke.
6Yʋmmak okʋt Saimon wak hakshʋp hummʋchi in chuka mʋt okhʋta lapali ka yo̱ talaia ho̱, awant anta hoke; yʋmmak osh nana ho̱ ish kaniohma he tuk ma, chim anola hi oke; im achi tok.
7Mihma enchil, Kanilis a̱ im anumpohonli tuk ash ot ia ma, chuka nan isht im ai ʋtta ya̱ tuklo, micha tʋshka chipota nan isht im ai ashwa bilia ya̱ a̱hli achukma achʋfa ho̱ aieninchit hoyo tok.
8Micha nan oklu̱ha kash mominchit im anolit taiyahli mʋt, Chappa ya̱ pit tihleli tok.
9Ont onna ma okla itʋnowʋt ma̱ha̱ya mʋt, tʋmaha hash pit bili̱ka ona ma, hʋshi kanʋlli isht ʋlhpisa ont isht hannali foka ho̱, Pita yʋt ʋba pit anumpula chi̱ hosh aboha pakna pit oiya tok.
10Atuk osh hohchʋfo fehnʋt taiyaha cha, impa he tuk osh; amba okla atahlit isht ma̱ya ma, holhpokuna ho̱ chohmi tok.
11Micha shutik ʋt tiwa, yohmi ma, nan ai ʋlhpitta yosh nan tohbi chito wishakchi u̱shtʋt ita shekonopa ho̱ chohmi hosh aka i̱ mintit, yakni ant onʋtoyula ho̱, pisa tok.
12Mihma anu̱kaka ya̱ nan‐ʋlhpoa puta, hanalushta iliayuka yakni aiasha kʋt moyuma, micha napoa puta, micha nana aka a balʋlli puta, micha ʋba hushi puta aiena kʋt ai asha tok.
13Yʋmohmi ma anumpa hʋt mintit im ʋla kʋt, Pita, tani cha, ʋbit ʋpá; achi tok.
14Yohmi kia Pita ashot, Yohma he keyushke, Chitokaka ma! nana kʋt ai ʋlhpesa keyu, kashofa keyu hokʋno himonna kia, ʋpa li chatuk keyu hokʋt; achi tok.
15Yohmi ma anonti anumpa hʋt atu̱kla ma, im anumpuli kʋt, Nana ho̱ Chihowa yʋt kashofi tuk a̱, yʋmma ʋlhpesa keyu, chik hochifo kashke; achi tok.
16Hituchina ha yo̱ ilʋppa yakohmi tok; yohmi ma nana ai ʋlhpitta kash ot falamʋt ʋba ia tok.
17Pita yʋt holhpokuna chohmit nana pi̱sa tuk, yʋmmʋt nana isht akaniohmi hatuk a̱ ik akostinincho chohmi ai itin ta̱kla ma, hatak Kanilis ʋt pit tihleli tuk ash, Saimon in chuka ya̱ a ponaklo tuk osh okhissa itikba ya̱ hieli tok.
18Mihmʋt tahpʋla cha a ponaklot, Saimon, Pita hohchifo kʋt, yʋmmak o̱ antakmá, nanta cho? achi tok.
19Pita yʋt holhpokuna tuk ash o̱ anukfihinli fehna, Shilombish ʋt, Yakeh! hatak tuchina kʋt chi hoyoshke.
20Yohmi hoka tanit pit akowa cha, nana kia isht ai anuktuklo iksho hosh awant ish iashke, yʋmma ʋno ak osh auet tihleli li tuk oka; im achi tok.
21Yohmi ma Pita yash ot akowʋt iʋt, Kanilis ʋt auet in tihleli tuk hatak ash im ona mʋt, Yakeh! ʋno ak osh hatak hʋsh hoyo hatuk a̱ sia mak oke. Nanta hosh a katiohmi ho̱ a̱yʋt hʋsh la cho? achi tok.
22Mihma, Kanilis Kʋpitʋni hatak a̱hli, micha Chihowa ya̱ i̱ nukshohumpa cha tuk, micha Chu okla moyuma ka ai im annoa achukma hosh ahanta chatuk, yʋmmak osh in chuka ya̱ ish ona chi̱ ka, chi hoyo cha, anumpa ha̱ chi a hakla chi̱ ka, Chihowa yʋt enchil holitopa ya̱ isht ai im anoli tuk oke; okla achi tok
23Yohmi ma i̱ howʋt aboha pit apitta na ma̱ya tok. A̱tuk o̱ ont onna ma, Pita yʋt wakaya cha awant ia ma, itibapishi ʋhleha kanohmi kʋt Chappa ya̱ a̱sht api̱hʋt ilhkoli tok.
24Atuk osh yʋmmak atuk a̱ onna ma, Seselia ya̱ okla ont chukowa tok; yohmi ma Kanilis ʋt i̱ kanomi ʋhleha, micha i̱ kana fehna aiena ka hoyot itahobit tahli cha, a̱sht pit hoyo tok.
25Atuk osh Pita yʋt ant chukowa ma, Kanilis ʋt ont afama cha, iyi ituma ya̱ hlipiyʋt ai okpʋchi tok.
26Yohmi kia Pita yʋt, Hikiá, ʋno ak kia hatak sia akinli hoke, ahanchi cha halʋllit tanichi tok.
27Micha im anumponlit pit chukowa mʋt, itahoba tuk ʋt laua hosh ai asha na pisa tok.
28Yohmi mʋt Chu hatak okʋt okla inla takla a̱ya hokmá, keyukmʋt ont ibafohka hokmá nana ka kaniohmit im ai ʋlhpiesa keyu ka hʋsh ithaiyanʋshke; yohmi kia ʋno yokʋto hatak nana kia ik ʋlhpeso, micha okpulo a la he keyu ho̱, Chihowa yʋt ʋm abahanchi tuk oke.
29Yʋmohmi hatuk o̱, sa hoyo makinli ho̱ nana ak acho hosh, a̱yʋt hʋchim ʋla li hoke. Yohmi hosh hʋchi̱ ponaklo lishke, nanta katiohmi ho̱ is sa hoyo tuk oh cho? im achi tok.
30Mihma Kanilis ʋt, Nitak ushta kash o̱ nahullochit anta li̱, hʋshi kanʋlli himak foka tok. Yohmi hosh hʋshi kanʋlli isht ʋlhpisa ont isht chakkali ho̱, ʋm aboha anu̱kaka ya̱ ʋba pit ai anumpuli li tuk; yohmi ma hatak ʋt nafohka shohmalali fohka kʋt sa tikba ya̱ hikia tuk.
31Mihmʋt, Kanilis, ʋba pit ish anumpuli ka haklo, micha nan ish hopehinla chatuk a̱ Chihowa yʋt ithaiyana hoke.
32Yohmi hoka Saimon, Pita hohchifo ka pit hoyot Chappa ya̱ pit ish tihlelashke; yʋmmak okʋt okhʋta lapali ka Saimon wak hakshup hummʋchi in chuka yo̱ anta hoke; yʋmmak osh ʋlakmʋt ant chim anumpula hi oke: achi tok.
33Yohmi hatuk o̱ ashali̱ka pit chi hoyo li kʋno; atuk o̱ ish la kʋt ish ʋlhpesa hoke, yʋmohmi ma Chihowa yʋt nana chim apesa tuk a̱, mominchit e hakla chi̱ mak osh momʋt himak a̱ yakohmit Chihowa itikba ya̱ e chi̱ya hoke; achi tok.
34Mihma Pita yʋt itakha ya̱ wakʋmmi mʋt Chihowa yʋt hatak a̱ kanimanchi keyu ka, ai a̱hlit akostininchi lishke —
35Amba oklushi moyuma ka kʋna hosh yʋmma i̱ nukshoyupa cha, ai ʋlhpiesa ka yʋmohmi hokʋt, im a holitopa chatuk oke.
36Chihowa yʋt Islael ushi ʋhleha ya̱ anumpa auet ema na Chisʋs Klaist pulla ho̱ nuktanla hi a̱, isht ai im anuhumpa tok a̱, yʋmmak osh moma in Chitokaka yoke.
37Baptismo yo̱ Chan ʋt isht anumpuli ha yak o̱, anumpa yʋmmʋt Kalili ai ishtia tuk osh, Chutia yakni a̱ mominchit ai anumpʋt hlopulli tok;
38Kaniohmit Chihowa yʋt, Chisʋs Nasalet ai ʋtta ya̱ Shilombish Holitopa, micha nan isht im ai a̱hlika aiena ka isht ahʋmmichi tok; Chihowa yʋt awant a̱ya hatuk o̱, yʋmmak ashot nan achukma ka isht ahanta, micha nan isht‐ahullo okpulo isht ilbʋsha ʋhleha ya̱ mominchit hlakofichit noho̱wa tok, hʋsh ithaiyanʋshke.
39Micha yʋmmʋt Chu okla i̱ yakni, micha Cheluselem aiena ka nana ho̱ a kanimihinchi tukma, moyuma atokowa anoli pia mak oke; yʋmmak o̱ okla iti a takalichit ʋbi tok.
40Yʋmmak ash nitak ont atuchina ma, Chihowa yʋt tanichi cha, achukmalit haiakʋchi tok.
41Yohmi kia okla moma kak a tok keyu, amba nana atokowa anoli ʋhleha, Chihowa yʋt tikbanli atokohonli tok, illi tuk ʋt falamʋt tani ha ya, nan itibai impʋt, ishkot ma̱ya tok, pishno ak a tok oke.
42Mihma okla ha̱ il im anumpula he, micha okcha̱ya ʋhleha, mikmʋt illi puta aiena nan im apesa ya he, Chihowa yʋt atokoli ka ilap ak atuk a̱, atokowa il anohonla he, pim apesa tok oke.
43Yʋmmak o̱ hopaii moma kʋt, yʋmma hohchifo pulla hatuk mak o̱, kʋna ho kia i̱ yimmi hokʋt ai ashʋchika puta kʋt isht a kashofa ahayucha hi a̱, atokolit okla anohonli tok; achi tok.
44Pita yʋt anumpa ilʋppa anumpohonli kʋt moma ho̱, anumpa haklo yash Shilombish Holitopa yʋt mominchit onʋtuyula tok.
45Yohmi ma hakshup tʋptua na yimmi ʋhleha Pita ya̱ api̱hʋt ʋla tuk ʋt, okla nan ik ithano ʋhleha ak kia Shilombish holhpila kʋt o̱ fohopa hatuk o̱,
46Anumpa ilaiyuka okla anumpulit Chihowa ahnihinchi ka, okla ha̱klo hatuk osh momʋt nukhlakancha tok; Mihma Pita yʋt afalaminchit,
47Shilombish Holitopa yʋt anukfo̱ka tuk ʋhleha pishno akinli chohmi; yakohmi kʋt ik baptismo ka chi̱ ka, hatak nanta hosh oka ya̱ im ataklʋmma hinla cho? achi tok.
48Yohmi mʋt Chitokaka isht a hochifot okla baptisma chi̱, i̱ miha tok; yohmi ma awant anta na nitak kanohma chi̱ ka okla im ahni tok oke.
Pita yʋt oklushi nan ik ithano ʋbanumpa ont isht im anumpuli tuk o̱, nanumachi, 1, 19 Ʋbanumpa yʋt tʋmaha kanohmi ka ai anumpa.
Currently Selected:
Apostel isht Anumpa 10: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
