मेथा 17
17
येशुगी कुयीप ग्युरवा
(मारकु ९:२-१३; लुका ९:२८-३६)
1श्याक्मो ढुकगी स्याम्ला, येशुगी पेटो धाङ याकोब धाङ खी़ नो योहान्नाला च्यीगा ठीक्ती, री थोवा च्यीक गाङला फेप्पालाक। 2धेनी खुङक्याई दोङदु, येशुगी कुयीप ग्युरपालाक। खोङबागी श्याल ङीमागी हो़ च्योक्रे स्यारपालाक धेनी खोङबागी नाशा हो़ च्योक्रे काउला ग्युरपालाक। 3धेनी होदे घाङलाराङ, खोङबागी दोङला मोशे धाङ एलीया खोङबामुला कामो़न सुङी श्युक्कीनगो, खुङ सुमला ज्यावालाक। 4धेनी पेटोगी येशुला श्यी़वालाक, “चोवो, हेक्या दुरु झ्युङगीनगो घायेरे झ्युदुक। खेराङगी थुक हो़ना, ङी दुरु श्युक्जा सुम शोउ, च्यीक खेराङला, च्यीक मोशेला धेनी च्यीक एलीयागी क्षीला।”
5पेटोगी लाब ताङी-ताङी, खोङबाक्याला ॱरीङबा काउ च्यीकगी ढीम्बालाक। धेनी ॱरीङबा साङने सुङकेक च्यीकगी देरे सुवालाक, “दे नी ङी चेवे से हीन। दीमुला ङा ॱमीच्यीकी ङ्यामो घा हो़क। खोङला ङेन।” 6ङेनेक्याई दे घोरती, खुङक्या ॱमीच्यीकी जीक्ती, साला घुक झ्येवालाक।
7हीना येशु फेप्ती, खुङक्या खाला क्षाक श्या जेदी सुवालाक, “लोङ धेनी माजीक।” 8धेनी खुङक्याई ताक झ्येरी ती घाङला, खुङक्याई होदुरु येशु माना सुवा ॱमाथोवालाक।
9खोङबाक्या रीने माला भाई घाङला, येशुगी खुङक्याला, “मी-भु छीवाने सो़न्पो माश्याङगीन थुक्पे, खेक्याई थोथोवा दे सुलाः ॱमास्ये।” सुरी का ॱनावालाक।
10धेनी ङेनेक्याई खोङबाला श्यी़वालाक, “होरे हीन्ना क्षो़ठीमगी ॱलोपो़नक्याई मास्यीका एन्ला, एलीया फेप घोगीलाक ॱनेरी, घीझ्येरी ॱनाले?”
11खोङबागी सुवालाक, “एलीया एन्ला फेप्कीलाक धेनी घीरी डाढीक जेगीलाक। 12हीना ङा खेक्याला ॱनाहीन, एलीया फेप्सालाक धेनी खुङक्याई खोङबाला ङो ॱमास्येवालाक हीना खुङक्याई घी थेगीनगो, खोङला झ्येवालाक। देरेराङ झ्येरी, खुङक्याई लाक्पाने मी-भु दुक्पु ङ्याङगीलाक।” 13धेनी येशुगी ठी़सो़खेन योहान्नागी कोरला खुङक्याला सुवालाक ॱनेरी, ङेनेक्याई ॱहाघोरपालाक।
डे ज्युजा भीजा च्यीक
(मारकु ९:१४-२९; लुका ९:३७-४३)
14धेनी येशु धाङ ङेने सुम मीछोकचारु फेई घाङला, मी च्यीक येशुगी डुङदु होरी पी़मु साला चुक्ती, खोङबाला श्यी़वालाक, 15“चोवो ङी भीजाला ॱङीङजे जेरोनाङ घीझ्येरी ॱनाना खोला शा नाजा झ्युरी, खो ॱमीच्यीकी दुक्पु ङ्याई। खो धुगा मे खोकला गेली, धेनी धुगा क्षु नाङदु ल्हीमी। 16ङी खोला खेराङगी ङेनेक्याचारु ठीक्ती होवी, हीना खुङक्याई खोला चो़गा जे थुक्की मीदुक।”
17धेनी येशुगी सुवालाक, “धेपा मीझ्यीगीन धाङ ङेन्पा मीरापक्याओ, ङा खेक्यामुला घाजो़ थुक्पे धेगुले? ङा खेक्याला नाम थुक्पे शो़पा झ्यीये? खोला ङाचारु ठीक्ती स्योक।” 18धेनी येशुगी होदेला काको़न जेपालाक धेनी खी़ नाङने डेगो थो़न्दी, भीजागो लाम्साङ चो़गा झ्युवालाक।
19धेनी ङेनेक्या येशुचारु शुरला च्यारती, खोङबाला श्यी़वालाक, “हेक्याई होदेला घीझ्येरी तो़न ॱमाथुवाले?”
20खोङबागी खुङक्याला सुवालाक, “खीकी धेपा च्युङराक्ती लाक। ङा खेक्याला धेन्पाराङ ॱनाहीन, खेक्याला छुकगी ढीउ चो़ धेपा हो़ना, खेक्याई दे री देला, ‘देने हुरु पो़री सोङ।’ ॱनाना होदे पो़गीलाक। धेनी खेक्याई झ्यी ॱमीथुप्कीन घीया मेयोङगीलाक। 21[हीना देरे डेगो ॱमो़लाम ग्याप्ती, ॱङ्युङनेला धेती च्यीगा, तो़न थुक्कीलाक।]#१७:२१ दे छीक्छे २१ दे एम्मागी गीरीक धेबक्याला मेतालाक।”
राङगी छीवे कोरला येशुगी ॱङो़नस्ये ॱङीवा
(मारकु ९:३०-३२; लुका ९:४३-४५)
22खोङबाक्या गालीलदु जोमी घाङला, येशुगी ङेनेक्याला सुवालाक, “मी-भु नी, मीक्याई लाक्पादु ची ग्याप्कु झ्यीदी। 23धेनी खुङक्याई खोला सेगीलाक हीना ङीमा सुम्बागोला खो सो़न्गीलाक।” धेनी खुङक्या ॱमीच्यीकी सेम फाम्बालाक।
क्षो़खाङगी ठा
24धा येशु धाङ ङेनेक्या काफारनाहुमदु ॱलेई घाङला, ठा धुगीनक्या पेटोचारु होरी खोला ॱनेवालाक, “खीकी घेगेन क्षो़खाङगी ठा मे ज्याङाले?”
25पेटोगी, “ज्याङालाक।” ॱनेरी ॱनेवालाक।
धेनी खो नाङदु जुली घाङला, येशुगी खोला सुवालाक, “सीमोन, जीक्तेनगी ग्यावुक्या सुने फुदोक याङमेना ठा दुवाले? राङगी भुक्याने याङमेना श्येम्माने दुवाले? ख्यी़ साम्लो घी हेतो?”
26धेनी पेटोगी “श्येम्माक्याने दुवालाक।” ॱनेरी श्यी़ घाङला येशुगी खोला सुवालाक, “हुरे हीन्ना भीजाक्याई ज्याङ मेघोवालाक। 27घीहीन्ना, खुङक्याला फोक्तु ॱमीच्युक्येला, ख्यो़ छोला सोरी च्याकग्यु च्यीक क्षु नाङला ॱयुक। धेनी एन्ला थो़न्गीन ङ्यागो लेन। होदेगी खा पेरी, ॱङुगी टाङगा च्यीक ॱङेगीलाक। होदे खेरती, होराङ ॱङीउगी ठागी क्षीला खुङक्याला ज्योङ।”
Currently Selected:
मेथा 17: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
