मेथा 12
12
ङासुगीन ङीमागी कोरला
(मारकु २:२३-२८;३:१-६; लुका ६:१-११)
1होदे धी़ला, येशु ङासुगीन ङीमा च्यीकला, श्यीङगी लाम्गाने फेप्पालाक। खोङबागी ङेनेक्या तोक्ती, ढोगी ॱङीमाक्या थी़री शेवालाक। 2हीना फारुसीपाक्याई दे थोरी, खोङबाला श्यी़वालाक, “तो़दाङ, ख्यी़ ङेनेक्याई, ङासुगीन ङीमाला झ्यी ॱमेछोक्कीन लेगा झ्यीदी।”
3खोङबागी खुङक्याला सुवालाक, “ग्यावु दावीद धाङ खी़मुला हो़गीन मीक्या तोई घाङला, खी़ घी झ्यीगीनगो खेक्याई माढोक हो़ती? 4खो को़न्क्षोकगी घुरखाङला जुरी, को़न्क्षोकगी कुदोङदु पुपा ग्याङगागो, खो धाङ खी़ रोवाक्याई शेवालाक। क्षो़ठीमला ताना, होदे ग्याङगागो क्षो़पो़नक्याई माना, खो धाङ खी़मुला हो़गीनक्याई शा ॱमेछोवालाक। 5याङ ङासुगीन ङीमाला क्षो़खाङ नाङदु क्षो़पो़नक्याई ङासुगीन ङीमागो ॱमीरुङनाः, खुङक्या क्यो़न मेगीन झ्युङगीनगो, खेक्याई क्षो़ठीमला माढोक हो़ती? 6ङा खेक्याला ॱनाहीन, को़न्क्षोकगी क्षो़खाङने खाक्क्षे च्यीक दुरु दुक। 7धेनी ‘ङा नी क्षो़पाला मेन्दा ॱङीङजे दो़दीहो़क।’#होशे ६:६ ॱनागीन लाब देगी दो़न्दाकगो, खेक्याई ॱहाघोर हो़ना खेक्याई क्यो़न मेगीनला क्यो़न ॱमाका हो़टु। 8घीझ्येरी ॱनाना मी-भु ङासुगीन ङीमागी चोवो लाक।”
9धेनी येशु होदेने फेप्ती, खुङक्याई छोक्खाङ नाङदु फेप्पालाक। 10धेनी होदुरु लाक्पा काम्गा मी च्यीक हो़तालाक। धेनी खुङक्याई खोङबाला क्यो़न चुक्येला देरे ढीवालाक, “ङासुगीन ङीमाला चो़गा झ्यी क्षोक्वाले?”
11खोङबागी खुङक्याला सुवालाक, “ङासुगीन ङीमाला खेक्याने मी च्यीकगी लुक च्यीक दोङ-दोङला ल्हीम्ना, खी़ होदेला शीम्दी याला ॱमेतो़न्गीले? 12लुक च्यीकले मी च्यीक घाजो़ माङा चाक्षे ले। होझ्येरी ङासुगीन ङीमाला, ले शाङपो झ्यी छोक्कीलाक।” 13धेनी खोङबागी मी देला सुवालाक, “ख्यी़ लाक्पा क्योङ।” धेनी होदे मीगी़ लाक्पा क्यावालाक धेनी होदे लाक्पा श्येम्मागो च्योक्रे थाङा झ्युवालाक। 14हीना फारुसीपाक्या होदेने थो़न्दी सोरी, खोङबाला घाङ झ्येरी सेये ॱनेरी ढो़ झ्येवालाक।
को़न्क्षोकगी दाम्दा श्याप्चीगी कोर
(मारकु ३:७-१२)
15येशुगी दे खेन्दा जेदी, खोङबा होदेने फेप्पालाक। धेनी मीछोक क्षे च्यीक खोङबागी स्याबाला डावालाक धेनी खोङबागी घीरीला चो़गा जेपालाक। 16धेनी राङगी कोरला सुला ॱमास्ये सुरी का ॱनावालाक। 17दे नी ॱङो़नस्येखेन यस्यायागी सुङगीनगो डुप्येगी क्षीला झ्युवालाक,
18“ङी दाम्दा ङी श्यीप्ची,
ङी सेम घागीन ङी चेवे देला तो़।
ङा ङी थुक्ङी खी़ खाला श्याक्येहीन,
धेनी खी़ मीरीक घीरीला, ठीम्चो़गी सेटाक झ्यीगीलाक।
19खी़ चो़पा धाङ दुकेक मेग्याप्कीलाक,
धेनी ॱराङगाकला खी़ केक सी़या मेघोरकीलाक।
20खी़ छाक्पु दाम्बु ॱमेचाक्कीलाक धेनी
स्यीये झ्यीगीन मेगी दोङरेला ॱमेसेगीलाक।
धेनी थाला ढाङतेनगी ठीमला ग्यारु च्युक्कीलाक।
21धेनी खोङगी छेनला मीरीक घीरीगी रेवा झ्यीगीलाक।”#यस्याया ४२:१-४
येशु धाङ धी़क बेएलजेबुल
(मारकु ३:२०-३०; लुका ११:१४-२३)
22धा डेगी शीम्सा ॱमीक ॱमेथोङगीन धाङ लाब ताङ ॱमीथुप्कीन मी च्यीक, येशुगी दोङदु ठीक्ती होवालाक। धेनी खोङबागी खोला ढाक्सो ॱनारी, खो लाब ताङ थुप्कीन धाङ थोङगीन झ्युवालाक। 23धेनी मीछोक घीरी ॱमीच्यीकी ॱहालेरी ॱनेवालाक, “मी दे ग्यावु दावीदगी सेगो हीन्ढी़?”
24हीना फारुसीपाक्याई दे घोरती ॱनेवालाक, “दे मी देगी डेक्या तो़न्गीनगो डेक्याई चो, बेएलजेबुलगी थोक्ने च्यीगा लाक।”
25खुङक्याई साम्लो खेन्दा जेदी येशुगी सुवालाक, “ग्याखाप च्यीकगी नाङदु ॱमीथी़न्दा झ्युङना, होदे तोङालाक धेनी ग्याजा धाङ खीम नाङदु च्यीकगी च्यीकला ॱमीथी़न्ना होदे ॱमेनेलालाक। 26धा धी़कगी धी़कला तो़न्ना, खो खोरी नाङदुराङ ॱमीथी़न्दा झ्युङालाक। धा हुरे हीन्ना खी़ ग्याखाप घाङगी झ्येरी ॱनेगीले? 27धा ङी बेएलजेबुलगी थोक्ने डेक्या तो़न्ना, खीकी भीजाक्याई सी़ थोक्ने होदे तो़न्गीले? होझ्येरी देक्याराङ खीकी ठीम्पो़न झ्युङगीलाक। 28हीना ङी डेक्या तो़न्गीनगो को़न्क्षोकगी थुक्ङीने हीन्ना धेनी नाम्खे ग्यासी खीकी खोक्दु ॱलेप हो़तालाक। 29याङमेना मी स्युक्क्षे च्यीकला एन्ला मादाम्पा, खी़ नाङदु जुरी खी़ च्यालाकक्या घाङगी झ्येरी ठोक थुक्कीले? खोला दाम्ना च्यीगा, खी़ नाङदु जुरी च्यालाकक्या ठोक थुक्कीलाक।
30“ङी छोकला मेगीन घीरी, ङी डाला हुङालाक धेनी ङीमुला मीधुगीन घीरी तोरकीलाक। 31होझ्येरी ङा खेक्याला ॱनाहीन, धीक्पा घीरी धाङ को़न्क्षोकला कुरवा धेप्कीन घीरी सेल्गीलाक हीना धाम्पे थुक्ङीला कुरवा धेप्कीनगी धीक्पा दे सेल्गीमालाक। 32धेनी मी-भुगी कोरला ङेन्पा ॱनागीन धीक्पा दे सेल्गीलाक हीना धाम्पे थुक्ङीगी कोरला ङेन्पा ॱनागीन धीक्पा दे, धान्दा धाङ माउपारगी धी़ थुक्पे ॱमेसेल्गीलाक।
स्यीङदोङ धाङ होदेगी ढेबु
(लुका ६:४३-४५)
33“ढेबुने स्यीङदोङ स्येगीन झ्येरी, स्यीङदोङ शाङा शोना ढेबु घा केगीलाक धेनी स्यीङदोङ आ शोना ढेबु आ केगीलाक। 34दुक्डुगी ग्युपा खेक्या, खेक्या ङेन्पा झ्येरी, शाङा घाङ झ्येरी ॱनाथुक्वाले? घीझ्येरी ॱनाना सेमला घी हो़गीनगो खाने थो़न्दालाक। 35मी शाङागी, राङगी सेम नाङदु हो़गीन शाङाने शाङा तो़न्दालाक धेनी मी ङेन्पागी, सेम नाङदु हो़गीन ङेन्पाने ङेन्पा तो़न्दालाक। 36ङा खेक्याला ॱनाहीन, ठीम चेगीन ङीमाला मी घीरीगी खोरी ॱनेना क्षोमेगीन छीक ङेन्पा रे-रेगी लेन तेर घो़गीलाक। 37घीझ्येरी ॱनाना खेरी छीकक्याई थोक्ने, ख्यो़ दाक्कीलाक याङमेना ख्यी़ छीकक्याई थोक्ने ख्यो़ला ठीम फोक्कीलाक।”
ताक दो़गीनगी कोरला
(मारकु ८:११-१२; लुका ११:२९-३२)
38धेनी क्षो़ठीमगी ॱलोपो़नक्या धाङ फारुसीपा रीङगाक्याई येशुला श्यी़वालाक, “ॱलोपो़न ला, हेक्या खेराङने ताक च्यीक थोङयेगी दो़पा हो़क।”
39हीना खोङबागी सुवालाक, “ङेन्पा धाङ लोक्येम मीरापगी ताक चालालाक हीना खुङक्याला ॱङो़नस्येखेन योनागी ताक माना, श्येम्मा ताक घीया ॱमेतेरकीलाक। 40घीझ्येरी ॱनाना योना ङीन-छेन सुम ङ्या क्षे च्यीकगी फोवा नाङदु धेगीन च्योक्रे, मी-भुवाः ङीन-छेन सुम थुक्पे सागी तीङला धेगीलाक। 41ठीम चेगीन ङीमाला, ॱनीनेवे ढोङखेरगी मीक्या, दे मीरापमुला लाङगीलाक धेनी होदेला ठीम ताङगीलाक घीझ्येरी ॱनाना खुङक्याई योनागी क्षो़ला खेलेन्दी, राङगी धीक्पाक्या पारी सेम ग्युरपालाक। हीना तो़, दुरु योनाने खाक्क्षे च्यीक दुक। 42ठीम चेगीन ङीमाला ल्हो स्योकगी स्येबा ग्याखापगी ग्यामु#१ ग्यावु १०:१-१३ दे मीरापमुला लाङगीलाक धेनी देक्याला ठीम ताङगीलाक घीझ्येरी ॱनाना मो सोलोमोनगी स्येराप ङेन्येगी छीला जाम्बुलीङगी थाने होवालाक। धा तो़ दुरु, सोलोमोनने खाक्क्षे च्यीक दुक।”
43“मी च्यीकने ॱनो़पा आ च्यीक थो़न्दी डोना, होदे सा काम्बोक्याला धेजा चारी ग्युक्कीलाक हीना घारुवा ॱमेङेगीलाक। 44धेनी होदेगी ॱनागीलाक, ‘ङा ङाराङ थो़न्जा नाङलाराङ लोक्ती डोयेहीन।’ धेनी होदे ॱलेप्यी घाङला, होदे नाङगो तोङबा, छाक्ती श्याकश्या चाङमा धाङ घीरी ढीक्ती श्याकश्या थोङगीलाक। 45धेनी होदे सोरी खोरीमुला खोराङने ङेन्पा ॱनो़पा श्येम्मा धी़नला ठीक्ती, होदे नाङदु जुरी धेगीलाक। धेनी मी देगी ॱनेछुगो एम्माने दुक्तु डुगीलाक। होझ्येरी दे मीराप ङेन्पा देला देरेराङ झ्युङगीलाक।”
येशुगी युम धाङ कुछेक्या
(मारकु ३:३१-३५; लुका ८:१९-२१)
46येशु मीछोकला कामो़न सुङी घाङला, खोङबागी युम धाङ कुछेक्या खोङबामुला कामो़न श्युयेला, फीदाला लारी श्युक हो़तालाक। 47धेनी खुङक्याने च्यीकगी खोङबाला श्यी़वालाक, “शीक्रोनाङ, खेराङगी युम धाङ कुछेक्या, खेराङमुला कामो़न श्युङी दो़दी, फीला लारी श्युक दुक।”
48हीना खोङबागी होदे मीला सुवालाक, “ङी आमा सुले धेनी ङी पी़नक्या सुले?”
49धेनी खोङबागी ङेनेक्या स्योकला क्षाक क्यारी सुवालाक, “ङी आमा धाङ पी़नक्या देक्या हीन। 50घीझ्येरी ॱनाना नाम्खे श्यीङखामदु श्युक्कीन, ङी यापगी थुकोङगी लेगा डुप्तु च्युक्कीनक्याराङ, ङी आज्यो-नो धाङ ईजी-नुमु धाङ आमा हीन।”
Currently Selected:
मेथा 12: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
