लुका 9
9
येशुगी ङेने च्युङङीला झावा
(मेथा १०:५-१५; मारकु ६:७-१३)
1धा येशुगी ङेने च्युङङीला मुला भो़री, खुङक्याला डेक्या धाङ नाजाक्या चो़गा झ्यीयेगी नी़थु धाङ आङजा ॱनावालाक। 2धेनी खोङबागी खुङक्याला, को़न्क्षोकगी ग्यासी सेटाक झ्यीये धाङ नेपाक्या चो़गा झ्यीयेला झावालाक। 3खोङबागी खुङक्याला सुवालाक, “खेक्या डु ग्याप्येला, खीकीमुला भेक्योक धाङ खुमाक धाङ शामा धाङ आले धाङ घो़ ॱङी, झ्येरी घीन्दा ॱमाखेर। 4खेक्या खीम घारेगोला जुली, होदे युने मालोक्कीन थुक्पे होदे खीमगोरुराङ धो़क। 5धेनी खेक्याला यु घारु खेमेलेन्दी, होदे युने थो़न्दी डी़ घाङला खुङक्याला पाङपो हुङयेगी क्षीदु खीकी काङबी थालागो ॱरुक।” 6धेनी खुङक्या घोङपा श्युरी यु च्यीकने श्येम्मा झ्येरी, घीरीला ताम्शाङगो स्येदी धेनी हो़लेदु नेपाक्या चो़गा झ्येरी सोवालाक।
7धा पो़न्पो हेरोदेगी दे घीरीगी कोरला ॱहाघोरपालाक। धेनी खो गो थोम्बालाक घीझ्येरी ॱनाना मी रीङगागी, ठी़सो़खेन योहान्ना स्यीम्बुने सो़न्पो झ्युदुक ॱनेरी ॱनेवालाक। 8धेनी रीङगागी एलीया फेप दुक ॱनेरी ॱनेवालाक धेनी श्येम्माक्याई एम्मागी ॱङो़नस्येखेनक्याने च्यीक सो़न्पो श्याङदुक ॱनेरी ॱनेवालाक।
9धेनी हेरोदेगी ॱनेवालाक, “योहान्नागी गोवा ङी चेदु च्युक्पी हीना देरे लाबक्या घोरकीन मी दे सुले?”
धेनी खो खोङबाला ज्यायेगी थापस्यी चावालाक।
येशुगी मी ॱङातोङला शामा ॱनाङवा
(मेथा १४:१३-२१; मारकु ६:३०-४४; योहान्ना ६:१-१४)
10धेनी कुछापक्या लोक्ती होरी, खोराङक्याई झ्येजा लेगा घीरी येशुला स्येपालाक। धेनी खोङबागी खुङक्याला ठीक्ती, बेथसेदा ॱनागीन ग्याजारु खाबा फेप्पालाक। 11हीना मीछोकगी दे ॱहाघोरती, खोङबागी स्याबाला डावालाक धेनी खोङबागी देक्याला हुङदु च्युक्ती, को़न्क्षोकगी ग्यासीगी कोरला सुवालाक धेनी नाजाने थार घो़गीनक्याला चो़गा जेपालाक।
12धा ङीमा यो़गु झ्यीदी घाङला, कुछाप च्युङङीगो होरी खोङबाला श्यी़वालाक, “मीछोकक्या ॱये-ॱयो़नगी युक्या धाङ ढोङक्याला सोरी, धेजा धाङ शाये चारु झाङा जे घीझ्येरी ॱनाना होराङ दुरु साजा एन्दोङला दुक।”
13हीना खोङबागी देक्याला सुवालाक, “खेक्याराङ देक्याला शाये रे तेर।”
धेनी खुङक्याई ॱनेवालाक, “हीकीमुला ग्याङगा ॱङा धाङ ङ्या ॱङी माना मेक, याङमेना हेक्या सोरी दे मी घीरीला शामा ङ्यो घोगीलाक।” 14होदुरु केवे-फो ॱङातोङ चो़ हो़तालाक।
धेनी येशुगी सुवालाक, “देक्याला मी ॱङापच्युगी छोखाकला धेदु च्युक।” 15धेनी खुङक्याई होदेरेराङ झ्येवालाक धेनी घीरीला धेदु च्युक्पालाक। 16धेनी खोङबागी होदे ग्याङगा ॱङा धाङ ङ्या ॱङीउगो क्षाकला ॱनुम्दी, नाम्खे श्यीङखाम स्योकला शीक्ती झ्यीलाप जेपालाक धेनी होदे दुबु-दुबुला च्याक्ती, मीछोकला तेर ॱनेरी ङेनेक्याला ॱनावालाक। 17धा मी घीरीगी फोवा डागीन थुक्पे शेवालाक। धेनी ङेनेक्याई दुबु ल्हाक्माक्या धी़री, बाक्ता च्युङङी खावालाक।
येशु मास्यीकागो
(मेथा १६:१३-२३; मारकु ८:२७-३३)
18ङीमा च्यीक येशु खोङबा च्यीगा सोवा धेबी घाङला, ङेनेक्या खोङबामुला हो़तालाक धेनी खोङबागी खुङक्याला ढीवा जेपालाक, “मीछोकक्याई ङाला सु लाक ॱनीओ?”
19खुङक्याई ॱनेवालाक, “मी रीङगागी ठी़सो़खेन योहान्ना धेनी रीङगागी एलीया धाङ श्येम्माक्याई एम्मागी ॱङो़नस्येखेनक्याने च्यीक याङ सो़न्पो श्याङदुक ॱनेरी ॱनी।”
20खोङबागी खुङक्याला सुवालाक, “हीना खेक्या ङा सु लाक ॱनेकीओ?”
धेनी पेटोगी लेन तेरती ॱनेवालाक, “को़न्क्षोकगी मास्यीकागो!”
राङगी छीवे कोरला येशुगी ॱङो़नस्ये
21धेनी खोङबागी दे लाब सुलाः माना ॱनेरी, खुङक्याला का स्युक्क्षे ॱनावालाक। 22खोङबागी सुवालाक, “मी-भुगी दुक्पु माङा ङ्याङ घोगुलाक। धेनी गेम्पाक्या धाङ क्षो़पो़न क्षेक्या धाङ क्षो़ठीमगी ॱलोपो़न घीरीगी, खोला ङो ॱलोक घोगीलाक धेनी से घोगीलाक धेनी श्याक्मो सुम्बागोला खो श्याङ घोगीलाक।”
23धेनी खोङबागी खुङ घीरीला सुवालाक, “ङी स्याम्ला हुङङी दो़गीनक्या, राङला पारी राङगी ग्याङस्यीङ च्योई खुरती, ङी स्याम्बाला डा घोगीलाक। 24घीझ्येरी ॱनाना राङगी ॱरोक क्योप्कीनगी़ ॱरोक स्योरकीलाक हीना ङी दो़न्दु राङगी ॱरोक ॱलो़ ताङगीनगी़ ॱरोक क्योप्कीलाक। 25धा मी च्यीकला जीक्तेन घीरी थोप्नाः, याङ राङगी ॱरोक स्योरना खोला घी फेन थोक्कीले? 26घीझ्येरी ॱनाना ङा धाङ ङी काला ङोजा झ्यीगीनगोला, मी-भु खोरी शीजे धाङ यापगी शीजे धाङ धाम्पे भाङछेनक्याई शीजेला फेई घाङला खी़या ङोजा झ्यीगीलाक। 27हीना ङा खेक्याला धेन्पाराङ ॱनाहीन, दुरु लाङगीनक्याने मी रीङगागी को़न्क्षोकगी ग्यासी ॱमाथोवा छीवागी ढोवा लेन्गीमालाक।”
येशुगी कुयीप ग्युरवा
(मेथा १७:१-८; मारकु ९:२-८)
28येशुगी देक्या सुङसारती श्याक्मो ग्ये स्याम्ने, खोङबागी पेटो धाङ योहान्ना धाङ याकोबला राङमुला ठीया जेदी, रीला सोवा ग्याप्तु फेप्पालाक। 29धेनी खोङबा सोवा धेबी घाङला, खोङबागी श्याल ग्युरपालाक धेनी खोङबागी नाशा ॱलोकख्युकगी हो़क च्योक्रे क्याथीङ झ्युवालाक। 30धेनी खोङबामुला मी ॱङी, मोशे धाङ एलीया कामो़न सुङी हो़तालाक। 31खुङक्या शीजेगी थोक्ने ज्यारी, येरुसालेमदु डुप्ये हीन्गीन, येशु दे जीक्तेनने डारी फेप्येगी कोरला सुङी हो़तालाक।
32धा पेटो धाङ खी़मुला हो़गीनक्या ॱङीगी शीरी धे हो़तालाक। हीना ॱङी छेदी घाङला, खुङक्याई खोङबागी शीजे धाङ खोङबागीमुला श्येङदी धेगीन, होदे मी ॱङीउला ज्यावालाक। 33धेनी होदे मी ॱङीउ खोङबाने घोङपा श्युरी फेई घाङला, पेटोगी येशुला श्यी़वालाक, “ॱलोपो़न ला, हेक्या दुरु झ्येरी घा झ्युजुङ। धा हेक्याई धेजा सुम शोउ। च्यीक खोङबाराङला, च्यीक मोशे धाङ च्यीक एलीयाला।” (खोरी ॱनागीन लाबगो खोला क्षा माझ्युवालाक।)
34खो देक्या श्यी़ घाङला ॱरीङ च्यीक होरी, खोङबाक्याला काप्पालाक धेनी खोङबाक्या ॱरीङ नाङदु फेई घाङला, देक्या ॱमीच्यीकी जीक्पालाक।
35धेनी ॱरीङगी खोक्ने देरे सुङकेक च्यीक थो़न्बालाक, “दे ङी से धाङ ङी दाम्दागो हीन। खोङला ङेन।”
36धेनी सुङकेकगो झोक्ती होदुरु येशु च्यीगा ज्यावालाक। धेनी खुङक्या खाबा धेबालाक धेनी खुङक्याई थोथागो होदे ङीमाक्याला सुला ॱमास्येपालाक।
ॱनो़पा झ्युजा ख्योक्तोङ
(मेथा १७:१४-१८; मारकु ९:१४-२७)
37ॱङेटोगो येशु धाङ खोङबागी ङेने सुम, रीने भाप्ती फेई घाङला, मीछोक क्षे च्यीकगी खोङबाला ज्यावालाक। 38मीछोक खोक्ने मी च्यीकगी केक ग्याप्पालाक, “ॱलोपो़न ला, ङी भीजाला शीया जे ॱनेरी, ङा श्योवा पुलाहीन। खो ङी भीजा च्यीगारागो लाक। 39ॱनो़पा च्यीकगी खोला शीम्दी, खो ॱहाताक्पाला फेरा ग्यावी धेनी साला ग्येरी खाने बोवा थो़न्दी। धेनी खोला रा रुई ॱमाता थुक्पे खोने थो़न्दी मेडोवा। 40होदी ॱनो़पाला तो़न्रोजे ॱनेरी, ङी खोङबाराङगी ङेनेक्याला श्योवा पुवी हीना खुङक्याई तो़न थुक्की मीदुक।”
41येशुगी सुवालाक, “धेपा मेगीन धाङ ङेन्सेमगी मीरापक्याओ, ङा नाम थुक्पे खीकीमुला धेदी खीकीमुला शो़पा झ्यीगुले? ख्यी़ भीजाला दुरु ठीक्ती स्योक।” 42खो हुङी घाङला ॱनो़पागी़ खोला साला धाप्पालाक धेनी दाम्बालाक। हीना येशुगी होदे ॱनो़पाला काको़न जेपालाक धेनी टुगोला चो़गा जेदी खोरी आकीला ची ग्याप जेपालाक। 43धा को़न्क्षोकगी देरे शीजे थोरी, मीक्या घीरी ॱहाङसावालाक। हीना खोङबागी जेगीनगोला मी घीरी ॱहाङसाङी घाङला, येशुगी राङगी ङेनेक्याला सुवालाक, 44“ताम दे घीरी खेरी सेमला शीम। मी-भु मीक्याई लागाला ची ग्याप्ये झ्यीदी।” 45हीना दी दो़न्दाकगो खुङक्याई ॱहामाघोरपालाक। धेनी खुङक्याई ॱहामाघोरास्योक ॱनेरी, दे खुङक्याने सारी श्याक्पालाक। धेनी ङेनेक्या दी कोरला खोङबाला श्यी़येला जीक्पालाक।
च्युङस्योकगो क्षेस्योक
(मेथा १८:१-५; मारकु ९:३३-४०)
46धा ङेनेक्या खोराङक्या नाङने क्षेस्योक सु लाक ॱनेरी चो़लीङ स्योरपालाक। 47हीना येशुगी देक्याई साम्लोगो खेन्दा जेदी, टु च्यीक खेरती राङगी भोलोक्तु श्या जेपालाक 48धेनी ङेनेक्याला सुवालाक, “ङी मीङने दे टुला खे लेन्गीनगी़ ङाला खे लेन्गीलाक धेनी ङाला खे लेन्गीनगी़ ङाला झाङगीनला खे लेन्गीलाक। घीझ्येरी ॱनाना खेक्या घीरीने च्युङस्योकगो क्षेस्योक लाक।”
49धेनी योहान्नागी ॱनेवालाक, “ॱलोपो़न ला, मी च्यीकगी खेराङगी छेनने डेक्या तो़न्गीनगो हीकी थोजुङ, धेनी हीकी खोला काक्ये झ्येवी घीझ्येरी ॱनाना खो होरी स्याम्बाला मेडालालाक।”
50हीना येशुगी खोला सुवालाक, “खोला ॱमाकाक। घीझ्येरी ॱनाना ख्यी़ ग्यापला मेगीनगो ख्यी़ क्षोकला हुङालाक।”
सामारीपाक्याई येशुला ङो ॱलोक्पा
51येशुगी नाम्खे श्यीङखामला फेप्ये धी़चो़गो ॱलेप्ये झ्यीदी घाङला, खोङबागी येरुसालेमला डोये ॱनेरी थाक चेवालाक। 52धेनी खोङबागी राङगी एन्ला भाङछेनक्या झावालाक। धेनी खुङक्या खोङबागी क्षीला डाढीक झ्यीयेला सोरी, सामारीपाक्याई यु च्यीकला श्युक्पालाक। 53हीना खोङबा येरुसालेम स्योकला फेप्येगो स्येरी, मीक्याई खोङबाला फेप्सु माश्यी़वालाक।
54धेनी खोङबागी ङेने याकोब धाङ योहान्नागी दे थोरी ॱनेवालाक, “चोवो, हेक्याई नाम्खे श्यीङखामने माला मे पाप्ती, दे घीरी मेताला ताङयेगी का श्यी़येला खेराङगी थुकोङ हो़ते?”
55हीना खोङबागी खुङक्या स्योकला शीक्ती काको़न जेपालाक। 56धेनी खोङबाक्या यु श्येम्मा च्यीकला फेप्पालाक।
येशुगी स्याम्ला डाये
(मेथा ८:१९-२२)
57खोङबाक्या लाम्गाने फेई घाङला, मी च्यीकगी येशुला श्यी़वालाक, “चोवो, खोङबा घारु फेई, ङाः खेराङगी स्याम्ला डायेहीन।”
58धेनी येशुगी खोला सुवालाक, “स्याल्लाला धेजा फु हो़तालाक धेनी ॱनामगी झ्याक्याला छाङ हो़तालाक हीना मी-भुला गोवा श्याक्सा घारुवा मेतालाक।”
59धेनी खोङबागी श्येम्मागोला सुवालाक, “ङी स्याम्ला स्योक।”
हीना होदेगी ॱनेवालाक, “ॱलोपो़न ला, एन्ला ङा नाङला लोक्ती ङी आकीगी फुङबुगो कुङदु च्युक्रोजे।”
60धेनी खोङबागी होदेला सुवालाक, “स्यीम्बुराङला राङगी फुङबु कुङदु च्युक हीना ख्यो़ सोरी को़न्क्षोकगी ग्यासीगी सेटाक झ्यी।”
61मी श्येम्मा च्यीकगी ॱनेवालाक, “चोवो, ङा खेराङगी स्याम्ला डायेहीन। हीना एन्ला ङी नाङदु हो़गीनक्याने घोङपा लेन्दु च्युक्रोजे।”
62येशुगी खोला सुवालाक, “राङगी लाक्पा थोङबा खाला श्याक्ती, ग्याप स्योकला ॱमीक तागीन सुवा, को़न्क्षोकगी ग्यासीला फेन ॱमेथोक्कीलाक।”
Currently Selected:
लुका 9: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
