लुका 22
22
येशुला सेयेगी ढो़
(मेथा २६:१-५,१४-१६; मारकु १४:१-२,१०-११; योहान्ना ११:४५-५३)
1क्युरची मेगीन ग्याङगा शागीन, याहुदापाक्याई पेसाकगी धी़छेनगो ङ्ये ॱलेप्पालाक। 2धेनी क्षो़पो़न क्षेक्या धाङ क्षो़ठीमगी ॱलोपो़नक्याई, येशुला घाङगी झ्येरी सेदु चुक्ये ॱनेरी, थापस्यी चाली हो़तालाक घीझ्येरी ॱनाना खुङक्या मीमाङक्याला जीयालाक। 3धेनी ङेने च्युङङीने ईस्कारीयोत ॱनागीन, युदागी सेम नाङदु सातान जुवालाक। 4खो क्षो़पो़न क्षेक्या धाङ क्षो़खाङ ॱरुङगीनक्याई ॱमाक्पो़नचारु सोरी, येशुला खुङक्याई लागाला घाङगी झ्येरी ची ग्याप्ये ॱनेरी ढो़ झ्येवालाक। 5धेनी खुङक्या ङ्यामो घेरी, खोला ॱङु तेरयेगी ॱना क्यावालाक। 6धेनी खो खा क्षाम्दी मीछोक मेती घाङला, खोङबाला खुङक्याई लागाला ची ग्याप्येगी घोकाप चावालाक।
ङेनेक्यामुला पेसाकगी धी़छेन
(मेथा २६:१७-२५; मारकु १४:१२-२१; योहान्ना १३:२१-३०)
7धा पेसाकगी लुक्टुला ॱमारछो़ पुगीन, क्युरची मेगीन ग्याङगा शागीन ङीमागो ॱलेप्पालाक। 8होझ्येरी येशुगी पेटो धाङ योहान्नाला देरे सुरी झावालाक, “सोरी होराङगी क्षीला पेसाकगी धी़छेनगी शाग्यु डाढीक झ्यी।”
9खुङ ङीउगी खोङबाला श्यी़वालाक, “हेक्या दे घारु डाढीक झ्यीये?”
10खोङबागी खुङक्याला सुवालाक, “खेक्या ग्याजा नाङदु ॱलेप्ती क्षुतोमला क्षु खेरती ग्युक्कीन, मी च्यीक खेक्याला थुक्कीलाक। धेनी खो डोजा नाङ थुक्पे खेक्या खी़ स्याम्ला सोङ 11धेनी होदे खाङबागी दाक्पोला ॱनो़, ‘गेन्लागी खेराङला सुजुङ, ङा ङी ङेनेक्यामुला पेसाकगी धी़छेनगी डो़नगो शाजा नाङगो घारु ले?’ 12धेनी खी़ खेक्याला खाङबा तो़योकला डाढीक झ्येरी श्याकश्या, नाङ क्षे च्यीक तो़न्गीलाक धेनी होदुरुराङ डाढीक झ्यी।” 13धेनी खुङक्या सोवालाक। धेनी खोङबागी सुङगीन च्योक्रे थुक्पालाक धेनी खुङक्याई डो़नगो डाढीक झ्येवालाक।
चोवोगी श्येलाक
(मेथा २६:२६-३०; मारकु १४:२२-२६; १ कोरीन्थुपा ११:२३-२५)
14धेनी धी़चो़ झ्युङी घाङला, येशु ङेने च्युङङीक्याई मुला श्येलाक श्येयेला श्युक्पालाक। 15खोङबागी खुङक्याला सुवालाक, “ङा दुक्पु ङ्याङयेगी एन्ला, खेक्यामुला दे पेसाकगी धी़छेनगी श्येलाक दे शायेला, ङी ॱङीङ थाक्पाने दो़पी। 16घीझ्येरी ॱनाना ङा खेक्याला ॱनाहीन, को़न्क्षोकगी ग्यासीदु दे माडुप्कीन थुक्पे, ङा याङदा दे श्येलाक दे शायेमेन।”
17धेनी खोङबागी श्यागा क्षाकला ॱनुम्दी को़न्क्षोकला थुक्जेक्षे पुरी सुवालाक, “दे लेन, धेनी खेराङक्या नाङदु घो़। 18घीझ्येरी ॱनाना ङा खेक्याला ॱनाहीन, को़न्क्षोकगी ग्यासी मेयोङगीन थुक्पे, धीरीङने ॱहाला ङा घुन्डुमगी खोवा थुङये मेन।”
19देने खोङबागी ग्याङगा च्यीक क्षाकला ॱनुम्दी, को़न्क्षोकला थुक्जेक्षे पुरी च्याक्पालाक धेनी खुङक्याला देरे सुरी ॱनावालाक, “दे खेक्याई दो़न्दु झ्यीम्बा ताता ङी ली़ लाक। ङाला ढेन्सो़ झ्यीयेला खेक्या देरे झ्यी।”
20होझ्येरीराङ श्येलाक शेछारती, खोङबागी श्यागा ॱनुम्दी सुवालाक, “दे फोरा दे खीकी दो़न्दु ॱलुक्ला, ङी ठाकगी गोने धाम्चा साबागो लाक। 21हीना तो़, ङाला डागी लागाला ची ग्याप्तु च्युक्कीन मीगो, ङी मुलाराङ श्येलाकला धेदुक। 22घीझ्येरी ॱनाना थाक चेचागोला चीरी मी-भु डुगीलाक हीना खोला डाक्याई लागाला ची ग्याप्कीन मीगो ॱङ्यावाली।” 23धेनी खोराङक्याने सी़ देरे लेगा झ्यीये हीन्ढी़ ॱनेरी, ङेनेक्याई च्यीकगी च्यीकला ढीवालाक।
क्षेस्योक सु हीन्गीनगी कोरला
(मेथा २०:२५-२८;१९:२८; मारकु १०:४२-४५)
24धा ङेनेक्याने क्षेस्योक सु हीन्गीनगी कोरला, खुङक्या घुङदु चो़पा स्योरपालाक। 25धेनी येशुगी खुङक्याला सुवालाक, “मीरीक श्येम्माक्याई ग्यावुक्या खुङक्या खाला वाङ झ्यीदालाक धेनी खुङक्या खाला वाङ झ्यीगीनक्याला ढीन्चेन ॱनालाक। 26हीना खेक्यागो दे च्योक्रे माझ्यी। खेक्याने क्षेस्योक हीन्गीनगो च्युङस्योक च्योक्रे झ्युङघो़ धेनी पो़न्पोगो ॱयोक्पो च्योक्रे झ्युङघो़। 27शामा शागीन धाङ श्याप्ची श्युगीनगोने सु क्षे ले? शामा शागीनगो माले? हीना तो़, ङा खेक्याई घुङदु श्याप्ची श्युगीन च्योक्रे हीन।
28“ङाला दुक्पु झ्युङी घाङला, ङीमुला धेगीनगो खेक्या लाक। 29ङी यापगी ङाला ग्यासी च्यीक ॱनाङगीन च्योक्रे, ङाः खेक्याला तेराहीन। 30धेनी खेक्या ङी ग्यासीदु ङीमुला शा-थुङ झ्यीगीलाक धेनी श्युक्ठीक्याला धेदी ईस्राएलगी ग्युपा च्युङङीगी खाला ठीम झ्यीगीलाक।”
पेटोगी चोवोला खेमेलेन्गीन कोरला ॱङो़नस्ये
(मेथा २६:३१-३५; मारकु १४:२७-३१; योहान्ना १३:३६-३८)
31होदे स्याम्ने येशुगी सुवालाक, “सीमोन, सीमोन! दुरु ङेन! सातानगी ख्यो़ला ढो च्योक्रे होछारयेला श्यी़दुक। 32हीना ख्यी़ धेपा मायेवास्योक ॱनेरी, ङी ख्यी़ क्षीला सोवा ताप्पी। धेनी ख्यी़ सेम ग्युरसारती ख्यो़री पी़नक्याला तेन्पो शो़।”
33धेनी पेटोगी ॱनेवालाक, “चोवो, ङा खेराङमुला चो़न्खाङदु डोये धाङ स्यीयेलाः डाढीक हो़क।”
34येशुगी सुवालाक, “पेटो, ङा ख्यो़ला ॱनाहीन, ॱङेटो ॱङारोक झ्याफो केक माग्याप्कीन एन्ला, ख्यी़ ङाला लेमु सुम खे मेलेन्गीलाक।”
खुमाक धाङ रेखुग धाङ राल्डी
35धेनी येशुगी सुवालाक, “ङी खेक्याला खुमाक याङना रेखुग याङना पोल्ले ॱमाखेरा झाङी घाङला, खेक्याला ॱमेछाङगीन रे झ्युजी?”
खुङक्याई ॱनेवालाक, “माझ्युजुङ।”
36खोङबागी सुवालाक, “हीना देने ॱहाला, ख्यो़री खुमाक धाङ रेखुग खेर धेनी ख्यो़ला राल्डी मेना, ख्यो़री शेनगो चोरी राल्डी च्यीक ङ्यो़। 37घीझ्येरी ॱनाना ङा खेक्याला ॱनाहीन, क्षो़ठीमला ‘खो झ्याक्पाक्याई मुला चीवालाक।’#यस्याया ५३:१२ ॱनेरी ढीक्टागो ङाला डुप घोगुलाक। धेनी धेन्पाराङ ङी कोरला ढीक्टाक्या डुपालाक।”
38धेनी ङेनेक्याई ॱनेवालाक, “चोवो, शीक्रोनाङ, दुरु राल्डी ॱङी हो़क।”
खोङबागी सुवालाक, “होदे हो़ना ढीक्कुलाक।”
क्युरुस्यीङगी रीरु येशुगी सोवा ताप्पा
(मेथा २६:३६-४६; मारकु १४:३२-४२)
39ङीमा तेनग्याङ च्योक्रे येशु ग्याजाने थो़न जेदी, क्युरुस्यीङगी रीरु फेप्पालाक धेनी ङेनेक्या खोङबागी स्याबाला डावालाक। 40होदे साजादु ॱलेप्ती खोङबागी ङेनेक्याला सुवालाक, “खेक्या छो़ताला ॱमाछी़दास्योक ॱनेरी सोवा ग्योप।”
41धेनी येशु खुङक्या धेजाने च्यीमे ॱहाला फेप्ती, पी़मु साला चुक्ती देरे सोवा ताप्पालाक, 42“ङी याप खेराङगी थुकोङ हो़ना, दे दुक्पुगी फोरा दे ङाने ॱहाला ॱनुमा जे। हीना ङी दो़पा मेन्दा खेराङगी थुकोङ डुपास्योक।”
43धेनी नाम्खे श्यीङखामने नाम्खे भाङछेन च्यीक फेप्ती, खोङबाला स्युक ॱनावालाक। 44खोङबागी सेम ॱमीच्यीकी दुक्पुगी खारी, खोङबागी ॱङीङ थाक्पाने सोवा ताप्पालाक। धेनी खोङबागी ॱङुना ठाकगी थीक्पा च्योक्रे साला थीक्पालाक।#२२:४४ एम्मागी सुङरापक्याला, रीङगाला ४३ धाङ ४४ ढीक मेतालाक। 45धेनी येशु सोवा तापसारती याला श्येङदी, ङेनेक्याचारु फेप्पालाक। धेनी होदुरु खुङक्या दुङागी झ्येरी थाङ क्षेदी, ॱङी लोक्ती धेगीन शीक्पालाक। 46धेनी खोङबागी खुङक्याला सुवालाक, “खेक्या घीझ्येरी ङ्यारी धेदाले? लोङ धेनी छो़ताला ॱमीछी़येगी क्षीदु सोवा ग्योप।”
येशु शीम्पा
(मेथा २६:४७-५६; मारकु १४:४३-५०; योहान्ना १८:३-११)
47येशुगी कामो़न सुङी घाङला ङेने च्युङङीने, युदा ॱनागीनगी़ मीछोक क्षे च्यीक ठीक्ती होदुरु होवालाक। खो येशुला ओ झ्यीयेला, खोङबागी भोलोक्तु सोवालाक। 48हीना येशुगी खोला सुवालाक, “युदा ख्यो़ मी-भुला ओ झ्येरी ङोलोक झ्यीगुले?”
49धेनी खोङबागी थाकोरला हो़गीनक्याई घी झ्युङये झ्यीगीनगो थोरी ॱनेवालाक, “चोवो, हेक्या राल्डी भो़चे झ्यीगुई?” 50धेनी ङेनेक्याने च्यीकगी चो क्षो़पो़नगी ॱयोक्पो च्यीकला राल्डी ग्याप्ती, होदेगी ॱये स्योकगी आमच्योकगो चेबालाक।
51हीना येशुगी सुवालाक, “देरे माझ्यी।” धेनी होदे मीगी आमच्योकला जुरी, खोङबागी होदेला चो़गा जेपालाक।
52धेनी खोङबाला शीम्दु हुङगीन क्षो़पो़न क्षेक्या धाङ क्षो़खाङ ॱरुङगीनक्याई ॱमाक्पो़न धाङ श्येम्मा गोठीक्याला खोङबागी सुवालाक, “खेक्या झ्याक्पा च्यीक शीम्दु हुङगीन च्योक्रे, ग्युक्पा धाङ राल्डी खेरती हुङाले? 53ङा ङीमा तेनग्याङ क्षो़खाङदु खेक्यामुला हो़ती घाङला, खेक्याई ङाला माशीम्बालाक। हीना धान्दा खेक्याई धी़चो़ लाक धेनी मी़नाकगी वाङ लाक।”
पेटोगी येशुला खेलेन माझ्येवा
(मेथा २६:५७-५८,६९-७५; मारकु १४:५३-५४,६६-७२; योहान्ना १८:१२-१८,२५-२७)
54धेनी खुङक्याई येशुला शीम्दी, चो क्षो़पो़नगी नाङदु ठीक्ती सोवालाक। धेनी पेटो ग्याङने स्याबाला डारी सोवालाक। 55होदुरु घोरागी घुङदु मीक्या मे तारी धे हो़तालाक धेनी पेटो खुङक्यामुला धेबालाक। 56धेनी ॱयोक्मो च्यीकगी खोला मेगी हो़ला धेगीन थोरी, घामोमा श्यीप्ता झ्येरी तेरी ॱनेवालाक, “दे मी देयाः खोमुला हो़तालाक।”
57हीना पेटोगी देरे ॱनेवालाक, “भोमो, ङा खोङला ङो ॱमेस्येहो़क।”
58च्यीमे च्यीकने श्येम्मा च्यीकगी खोला थोरी ॱनेवालाक, “ख्यो़याः खुङक्याने च्यीक लाक।”
हीना पेटोगी ॱनेवालाक, “ङा मालाक।”
59धेनी क्षुजी च्यीक ग्यारी, मी श्येम्मा च्यीकगी उजुक झ्येरी ॱनेवालाक, “धेन्पाराङ दे मी दे खी़मुला हो़तालाक घीझ्येरी ॱनाना खोवाः गालीलपा लाक।”
60हीना पेटोगी ॱनेवालाक, “ख्यो़ घीन्गी कोरला लाब ताङाले ङाला स्येयेमेक।” धेनी लाम्साङ खो लाब ताङी घाङला झ्याफो केक ग्याप्पालाक। 61धेनी चोवोगी श्याल ग्युरती पेटोला शीक्पालाक। “धीरीङ झ्याके ग्याप्ये एन्ला, ख्यी़ ङाला लेमु सुम खे मेलेन्गीलाक” ॱनेरी चोवोगी सुङगीनगो खी़ ढेन्बालाक। 62धेनी खो फीला थो़न्दी ॱमीच्यीकी ङी़वालाक।
येशुला ॱमेटा पाप्पा
(मेथा २६:६७,६८; मारकु १४:६५)
63धेनी येशुला ॱरुङगीन ॱमाक्मीक्याई खोङबाला ॱमेटा पाप्ती दुवालाक। 64धेनी खोङबागी चेनला रेगी काप्ती ढीवालाक, “ख्यो़ला दुङगीनगो सुले, ॱङो़नस्ये स्यो़क?” 65धेनी खुङक्याई खोङबाला श्येम्मा ॱमेटा पाप्कीन लाब माङा तावालाक।
छोक्दी़गी दोङदु येशु
(मेथा २६:५९-६६; मारकु १४:५५-६४; योहान्ना १८:१९-२४)
66लाम लारी क्षो़पो़न क्षेक्या धाङ क्षो़ठीमगी ॱलोपो़नक्या छोक्दी़ जोम्बालाक धेनी खुङक्याई येशुला छोक्दी़रु ठीक्ती ॱनेवालाक, 67“ख्यो़ मास्यीकागो हीन्ना, हेक्याला स्यो़क।”
हीना खोङबागी खुङक्याला सुवालाक, “ङी ॱनानाः खेक्याई ङाला यीच्चे झ्यीगुमालाक। 68धेनी ङी ढीवा ढीनाः खेक्याई लेन तेरकुमालाक। 69हीना धीरीङने ॱहाला, मी-भु नी कुवाङ को़न्क्षोकगी क्षाक ॱये स्योकला श्युक्कीलाक।”
70धेनी खुङ घीरीगी ॱनेवालाक, “देरे हीन्ना, ख्यो़ को़न्क्षोकगी से ले?”
खोङबागी खुङक्याला सुवालाक, “ङा हीन्गीनगो खेक्याराङ ॱनालाक।”
71धेनी खुङक्याई ॱनेवालाक, “धा, होराङला पाङपो श्येम्मा घी घोये दुओ? खी़ खानेराङ होरी दे घोरजुङ।”
Currently Selected:
लुका 22: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
