लुका 20
20
येशुगी वाङगी कोरला ढीवा
(मेथा २१:२३-२७; मारकु ११:२७-३३)
1ङीमा च्यीक, येशु क्षो़खाङदु मीक्याला क्षो़ सुङी हो़तालाक धेनी ताम्शाङगो स्येदी घाङला, क्षो़पो़न क्षेक्या धाङ क्षो़ठीमगी ॱलोपो़नक्यामुला गेम्पाक्या खोङबाचारु होरी 2खोङबाला श्यी़वालाक, “सी़ आङजागी थोक्ने, ख्यो़ दे घीरी झ्यीदाले धेनी देरे आङजा ख्यो़ला सी़ तेरजो?”
3खोङबागी खुङक्याला सुवालाक, “ङाः खेक्याला लाब च्यीक ढीयेहीन। धा ङाला ॱनो़, 4योहान्नागी ठी़सो़गो नाम्खे श्यीङखामने झ्युवाले याङना मीने झ्युवाले?”
5धेनी खुङक्या खोराङक्या नाङदु देरे ढो़ झ्येवालाक, “नाम्खे श्यीङखामने लाक ॱनाना, खी़ होराङला खोला घीझ्येरी धेपा मीझ्यीदा ॱनेरी ढीगीलाक। 6हीना ‘मीने लाक’ ॱनाना, घीरीगी योहान्ना ॱङो़नस्येखेन लाक ॱनेरी चीगीन झ्येरी, होराङला धोगोङ श्युरती सेगीलाक।”
7होझ्येरी खुङक्याई, “होदे घाने झ्युङगीनगो हेक्याला स्येयेमेक।” ॱनेरी लेन ॱलोक्पालाक।
8धेनी येशुगी खुङक्याला सुवालाक, “देरे हीन्ना, ङी दे लेगाक्या आङजा घाने झ्यीदाले ॱनेरी, ङा खेक्याला ॱनायेमेन।”
दुम्राला लेगा झ्यीगीनक्याई पे
(मेथा २१:३३-४६; मारकु १२:१-१२)
9होदे स्याम्ने येशुगी मीक्याला पे दे सुवालाक, “मी च्यीकगी घुन्डुमगी दुम्रा च्यीक ताप्पालाक। धेनी होदे दुम्रागो श्यीङबाक्याला बोक्माला तेरती, खोराङ धी़चो़ रीङागी क्षीला यु श्येम्मा च्यीकदु सोवालाक। 10धेनी तो़न धी़ये धी़चो़गो ॱलेवी घाङला, दाक्पोगो राङला घुन्डुम तीते च्यीक तेरास्योक ॱनेरी, ॱयोक्पो च्यीकला बोक्माला लेन्गीनक्या चारु झावालाक। हीना होदेक्याई खोला दुरी लाक्पा तोङबा ॱलोक्ती झावालाक। 11धेनी दाक्पोगी़ ॱयोक्पो श्येम्मा च्यीकला झावालाक हीना खुङक्याई होदेलाः दुरी ङोजा पाप्ती, लागा तोङबा ॱलोक्ती झावालाक। 12होदे स्याम्ने खी़ ॱयोक्पो सुम्बागोला झावालाक हीना खुङक्याई होदेलाः ॱमा शो़री तो़न्दी झावालाक। 13धेनी दुम्री दाक्पोगी़ ॱनेवालाक, ‘धा ङा घी झ्यीये? धा ङा ङारी भीजा ढीन्चेनगोला झाङयेहीन। धेनी खोला खुङक्याई घुस्याप झ्येटु।’ 14हीना खुङक्याई दाक्पोगी़ भीजाला थोङी घाङला, खोराङक्या नाङदु ॱनेवालाक, ‘खो नी ग्युज्यीनगो लाक। होराङ खोला सेदु धेनी थोप्ताङ घीरी होराङला थोप्कीलाक।’ 15धेनी खुङक्याई भीजागोला श्यीङ फीला ठीक्ती सेपालाक।”
धेनी येशुगी ढीवालाक, “धा, दुम्री दाक्पोगी़ खुङक्याला घी झ्येटी़? 16खो होरी खुङक्याला सेगीलाक धेनी दुम्रागो श्येम्माक्याला तेरकीलाक।”
मीक्याई होदे घोरती ॱनेवालाक, “देरे नामाः माझ्युङास्योक।”
17धेनी येशुगी खुङक्याला शीक्ती सुवालाक, “देरे हीन्ना, देरे ढीक्टा दी दो़न्दाक घी ले?
‘चीक्चोवाक्याई ॱयुक्ती श्याकश्या, धोगोङगो शुरधो झ्युङदुक।’#सुङगुर ११८:२२
18“होदे धोगोङ खाला गेगीनगो दुबु-दुबुला क्षाक्कीलाक धेनी होदे सी़ खाला ल्हीम्ना, होदेगी खोला ॱलेगीलाक।”
19धेनी क्षो़ठीमगी ॱलोपो़नक्या धाङ क्षो़पो़न क्षेक्याई, पे दे खोराङक्याई क्षीलाराङ ॱनेवालाक ॱनेरी, घोरती येशुला होदे धी़लाराङ शीम्ये झ्येवालाक हीना खुङक्या मीक्याला जीक्पालाक।
रोमापा ग्यावुला ठा झाङगीनगी कोर
(मेथा २२:१५-२२; मारकु १२:१३-१७)
20धेनी खुङक्याई घुकाप चारी ढाङपो हीन दोक-दोक झ्यीगीन सोवाक्याला, खोङबागी सुङगीन छीकक्या शीम्दी, खोङबाला चीख्यापगी ठीम धाङ वाङला ची ग्याप्येला झावालाक।
21होझ्येरी खुङक्याई येशुला ॱनेवालाक, “ॱलोपो़न ला, खेराङगी सुङगीन धाङ ॱलापच्या ॱनाङगीनगो धेन्पा लाक धेनी खेराङ मीगी ङोदोङला तेरी ॱयेवा ॱमेचेदा, खेराङ को़न्क्षोकगी लामगो धेन्पा ॱलाप जेदालाक ॱनेरी हेक्याला स्येयेहो़क। 22धा ग्यावुला ठा ज्याङना ढीयाले याङना मीढीयाले सुरी हेक्याला सुङाजे।”
23हीना खोङबागी खुङक्याई च्याङग्युगो खेन्दा जेदी सुवालाक, 24“ङाला दीनार च्यीक तो़न। देला सी़ रीमो धाङ मीङ दुओ?”
खुङक्याई ॱनेवालाक, “ग्यावुगी दुक।”
25धेनी खोङबागी होदेक्याला सुवालाक, “देरे हीन्ना ग्यावुगी हीन्गीनगो ग्यावुला तेर धेनी को़न्क्षोकगी हीन्गीनगो को़न्क्षोकला पु।” 26धेनी मीमाङक्याई दोङदु खोङबागी सुङगीनने घीया शीम ॱमाथुक्पा, खोङबागी लेन गोला ॱहालेरी खुङक्या खाबा धेबालाक।
ॱलार सो़न्पो श्याङयेगी कोरला ढीवा
(मेथा २२:२३-३३; मारकु १२:१८-२७)
27होदे स्याम्ने ॱलार सो़न्गीनगी कोरला खेमेलेन्गीन, सादुकीपा रीङगा येशुचारु होवालाक। 28धेनी खुङक्याई खोङबाला ढीवा च्यीक श्यी़वालाक, “ॱलोपो़न ला, मोशेगी देरे सुङ हो़तालाक, ‘मी च्यीकला टुवा माझ्युवा स्यीना, खी़ नोगो खी़ युक्जामागोला ॱनामा लेन्दी खोरी आज्यो क्षीला टु के घो़गुलाक।’ 29धा, आज्यो-नो धी़न हो़तालाक। क्षेस्योकगो ॱनामा लेन्दी टु माझ्युवा स्यीवालाक। 30होझ्येरी नो ॱङीवा, 31धेनी सुम्बागी़ मोला ॱनामा लेन्बालाक धेनी होझ्येरी पी़न धी़न्गारा टु माझ्युवा स्यीवालाक। 32धेनी स्याम्ला होदे केमीगोवा स्यीवालाक। 33होझ्येरी छीवाने ॱलार सो़न्पो लाङी घाङला, मो सी़ केमी झ्युङगीले? घीझ्येरी ॱनाना मो पी़न धी़न्गारागी केमी झ्युवालाक।”
34येशुगी देक्याला सुवालाक, “दे जीक्तेनगी मीक्या ॱनामा लेन्ये धाङ ॱनामाला तेर झ्यीदालाक। 35हीना माउपारगी धी़ला डोये धाङ छीवाने सो़न्ये हीन्गीन चीचा मीक्या, ॱनामा लेन्ये धाङ ॱनामाला ताङ मीझ्यीदालाक। 36खुङक्या नाम्खे भाङछेनक्या च्योक्रे झ्येरी, खुङक्या याङ स्यीगीमालाक। धेनी खुङक्या छीवाने सो़न्पो लाङ सारसा झ्येरी, खुङक्या को़न्क्षोकगी से धाङ सेमो लाक। 37हीना स्यीम्बुक्या सो़न्गीलाक ॱनागीन दे, छेम्मागी कोरला हो़गीन ॱरुङगोला, मोशेगी चोवो को़न्क्षोकला आब्राहाम धाङ ईसाकगी को़न्क्षोक धाङ याकोबगी को़न्क्षोक ॱनेरी भो़री तो़न्दालाक। 38खोङबा स्यीम्बुगी को़न्क्षोक मेन्दा, सो़न्पोगी को़न्क्षोक लाक घीझ्येरी ॱनाना खोङबागी ॱमीक्वादु घीरी सो़न्पो लाक।”
39धेनी क्षो़ठीमगी ॱलोपो़नक्याने रीङगागी ॱनेवालाक, “ॱलोपो़न ला, खेराङगी घायेरे सुजुङ।” 40होदे स्याम्ने याङ सी़या खोङबाला ढीवा ढीयेगी आङदाक झ्यी ॱमाथुक्पालाक।
मास्यीका सी़ से हीन्गीनगी कोरला
(मेथा २२:४१-४६; मारकु १२:३५-३७)
41धेनी येशुगी खुङक्याला सुवालाक, “मास्यीका दावीदगी से लाक ॱनेरी, खुङक्या घाङगी झ्येरी ॱनाथुक्वाले? 42-43घीझ्येरी ॱनाना सुङगुरगी धेपला दावीद खोराङगी ॱनालाक,
‘चोवो को़न्क्षोकगी ङी चोवोला सुजुङ,
ङा ख्यी़ डाक्याला, ख्यी़ काङबी होकला माश्याक्कीन थुक्पे,
ख्यो़ ङी ॱये स्योकला धो़क।’#सुङगुर ११०:१
44“धा दावीदगी मास्यीकाला ‘चोवो’ ॱनेरी श्यी़ना, मास्यीका खी़ से घाङगी झ्येरी झ्युवाले?”
क्षो़ठीमगी ॱलोपो़नक्याने शाप-शाप झ्यी
(मेथा २३:१-३६; मारकु १२:३८-४०)
45धेनी मी घीरीगी ङेन्दी घाङला, येशुगी खोरी ङेनेक्याला सुवालाक, 46“क्षो़ठीमगी ॱलोपो़नक्याने शाप-शाप झ्यी, खुङक्या घो़ रीङबो घो़न्दी, कोरा ग्याप्ये धाङ ठोमक्याला मीक्याने घुस्याप थोप्येला थेदालाक धेनी छोक्खाङक्याला श्युक्ठी घायोक धाङ डो़नक्याला धेजा थोवाक्या थेदालाक। 47धेनी खुङक्या युक्जामाक्याई खाङबा ठोक्वालाक धेनी मीला तो़न्येला सोवा रीङा ग्यालाक। खुङक्याला क्षेपा छाप्क्षे फोक्कीलाक।”
Currently Selected:
लुका 20: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
