लुका 17
17
धीक्पा धाङ धेपा धाङ लेगेनगी कोरला
(मेथा १८:६-७,२१-२२; मारकु ९:४२)
1येशुगी राङगी ङेनेक्याला सुवालाक, “धीक्पा झ्यीदु च्युक्कीन ॱली़टेक्या हुङगीलाक हीना होदे ॱली़गीन मी दे ॱङ्याली! 2दे टुवा च्यीमेक्या च्योक्रेने च्यीकला धीक्पा झ्यीदु च्युक्कीन, मीगी़ मीक्पाला थाकगी धोगोङ क्षे च्यीक ताक्ती, ग्याछो नाङदु ॱयुक्ना घागुलाक। 3होझ्येरी खेक्या च्याङजे झ्यी। ख्यी़ नोगी धीक्पा झ्यीना, खोला आङजी तोङ धेनी खी़ धीक्पा पारी सेम ग्युरना, खोला घोयाङ तेर। 4धेनी ङीमा च्यीकला ख्यी़ नोगी ख्यो़ला थेङमा धी़न धीक्पा झ्यीनाः, खो थेङमा धी़नराङ ख्यी़चारु होरी, ‘ङा ङारी धीक्पा पारी सेम ग्युरवा ताङयेहीन’ ॱनेरी ॱनाना ख्यी़ खोला घोयाङ तेर।”
5धेनी कुछापक्याई चोवोला श्यी़वालाक, “हीकी धेपा दे फेरु च्युक्वा जे।”
6धेनी चोवोगी सुवालाक, “खेक्याला छुकगी ढीउ चो़ धेपा तीते च्यीक हो़ना, खेक्याई दे होशेगी दोङबोला ‘खेरी चावाने घोक्ते ग्याछो नाङदु च्युक’ ॱनेरी ॱनाना होदेगी ख्यी़ खाला ङेन्गीलाक।”
7“खेक्याने मी च्यीकला ॱयोक्पो च्यीक हो़ना, धेनी होदे ॱयोक्पोगो श्यीङ ॱङो़री हुङना, याङना लुक छो़री खीमला हुङना, खी़ खोला ‘लाम्साङ शामा शायेला धो़क’ ॱनेरी ॱनागीलाक से? 8खी़ होदे ॱयोक्पोला देरे ॱनागी माले, ‘ङी शामा डाढीक झ्यी धेनी घोलाक झ्येरी ङी शा-थुङ ॱमासा थुक्पे, ङी श्याप्ची श्यी़। होदे स्याम्ने ख्यो़ शो-थुङ झ्यी।’ 9खी़ का ॱनाङगीन च्योक्रे होदे ॱयोक्पोगी झ्यीना, खी़ खोला होरक्षे ॱनागीलाक से? 10देरे झ्येरीराङ खेक्याला का ॱनाङना लेगा घीरी झ्येसारी, खेक्यागीया देरे ॱनो़, ‘हेक्या फेन ॱमेथोक्कीन ॱयोक्पोक्या हीन। हेक्याई हीकी झ्यीघोगीन लेगेनगो च्यीगा झ्येवालाक।’”
जेने मी च्यु
11येशु सामारीया धाङ गालीलगी घुङने झ्युरी, येरुसालेम स्योकला फेई हो़तालाक। 12धेनी खोङबा यु च्यीकला फेई घाङला, जेने मी च्यु ग्याङने लारी धेगीन थुक्पालाक। 13खुङक्याई केक ग्याप्ती ॱनेवालाक, “चोवो येशुला, हेक्याला ॱङीङजे शीक्रोनाङ।”
14खोङबागी होदेक्याला शीक्ती सुवालाक, “सोङ धेनी राङला क्षो़पो़नक्याचारु तो़न।”#लुका ५:१२; लेवी १४:१-३२ धेनी होदेक्या डी़ घाङलाराङ, खुङक्याई जेनेगो दाक्पालाक। 15होदेक्याने मी च्यीकगी राङ ढाक्टागो थोरी केक क्षेला, को़न्क्षोकगी तो़टा ताङी-ताङी ग्याप लोक्ती होवालाक। 16धेनी येशुगी श्यापला क्षाक छारी, खी़ येशुला थुक्चीक्षे श्यी़वालाक। धा खो सामारीपा च्यीक लाक।
17धेनी येशुगी सुवालाक, “मी च्युराङ ढाक्पा माले? श्येम्मा मी घुगो घाना? 18फीदी मी दे माना लोक्ती होरी, को़न्क्षोकला तो़टा पुगीन श्येम्मा सुवाः माझ्युवाले?” 19धेनी खोङबागी खोला सुवालाक, “लोङ धेनी सोङ। ख्यो़री धेपागी ख्यो़ला चो़गा झ्येवालाक।”
को़न्क्षोकगी ग्यासी
(मेथा २४:२३-२८,३७-४१)
20धा को़न्क्षोकगी ग्यासी नाम फेप्कीलाक ॱनेरी, फारुसीपाक्याई ढीरी येशुगी लेन दे सुवालाक, “को़न्क्षोकगी ग्यासी नी ॱमीकगी थोङ थुप्ये हीन्गीन झ्येरी फेप्कीमालाक। 21याङ मी सी़या ‘को़न्क्षोकगी ग्यासी दुरु दुक।’ याङना ‘हुरु दुक।’ ॱनेरी ॱना थुक्कीमालाक। घीझ्येरी ॱनाना को़न्क्षोकगी ग्यासी नी, खेक्याई खोक्दुराङ हो़तालाक।”
22खोङबागी ङेनेक्याला सुवालाक, “खेक्याई मी-भुगी ङीमाक्याने च्यीक थोङयेगी दो़पा झ्यीगीन धी़चो़गो हुङी हो़तालाक। हीना खीकी थोङगीमालाक। 23मीक्याई खेक्याला, ‘तो़दाङ, खोङबा दुरु दुक।’ याङना ‘हुरु दुक।’ ॱनेरी ॱनागीलाक। खेक्या फीला माडो धेनी खुङक्याई स्याम्ला माडाङ। 24घीझ्येरी ॱनाना ॱनामला ॱलोक्मार ख्युक्ती, ॱनामगी छोक च्यीकने छोक श्येम्मा थुक्पे, ठाछाई शोगीन च्योक्रे, मी-भु फेप्कीन धी़ला देरेराङ झ्युङगीलाक। 25हीना धाङपो खी़ दुक्पु माङा ङ्याङ घो़गुलाक धेनी दे मीरापगी खोला पाङगीलाक। 26नोआगी धी़चो़ला झ्युजा च्योक्रे, मी-भुगी धी़चो़लाः होदेरेराङ झ्युङगीलाक। 27नोआ डुगी नाङदु जुरी, क्षुलोक होरी, घीरीला मेताला ताङगीन ङीङमो थुक्पे, मीक्या शा-थुङ धाङ ॱनामा लेन्ये धाङ ॱनामाला तेरये झ्येरी धेबालाक। 28लोतगी धी़चो़ला देरेराङ झ्युवालाक। मीक्या शा-थुङ धेनी ङ्यो-चोङ धेनी श्यीङ ताप्ये धाङ खाङबा चीक्ती धेबालाक। 29हीना लोत सादोमने थो़न्दी डुगीन ङीमागोला, नाम्खे श्यीङखामने मे धाङ मुशे भाप्ती, खुङक्या घीरीला मेताला तावालाक। 30धा मी-भु ॱङो़न्दु जेगीन ङीमागोला देरेराङ झ्युङगीलाक।
31“होदे ङीमाला खाङबी ताङला हो़गीन, मी खोरी च्यालाकक्या नाङदुराङ हो़ना, खो होदे लेन्दु माला माभाबास्योक। होझ्येरीराङ श्यीङला हो़गीनक्या नाङला लोक्ते मायोङास्योक। 32लोतगी केमीला ढेन्सो़ झ्यी!#१७:३२ मी़ को़न्क्षोकगी काला ॱमाचीवा, मो छागी दोप-दोप झ्युवालाक। दे को़पा १९:२६ ला हो़तालाक। 33राङगी ॱरोक क्योप्कीनगी़ होदे ॱलाक्कीलाक हीना राङगी ॱरोक ॱलाक्कीनगी़ होदे क्योप्कीलाक। 34ङा खेक्याला ॱनाहीन, होदे छेन्मु ङ्याठी च्यीकला मी ॱङी हुङगीलाक। धेनी च्यीकला खेरकीलाक धेनी श्येम्मागोला भोरकीलाक। 35केमी ॱङीमुला थाक्यी धेदी घाङला, च्यीकला खेरकीलाक धेनी श्येम्मागोला भोरकीलाक। 36मी ॱङी श्यीङला हुङगीलाक। च्यीकला खेरकीलाक धेनी श्येम्मागोला भोरकीलाक।”
37धेनी ङेनेक्याई खोङबाला श्यी़वालाक, “चोवो, दे घारु झ्युङगीले?”
खोङबागी देक्याला सुवालाक, “रो हो़जारु झारको़क्या खोरकीलाक।”
Currently Selected:
लुका 17: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
