लुका 11
11
सोवा ग्याप्कीन कोरला येशुगी ॱलापच्या
(मेथा ६:९-१३;७:७-११)
1श्याक्मो च्यीक, येशु साज्या च्यीकदु सोवा धेवी हो़तालाक। खोङबागी सोवा धेप सारती, ङेनेक्याने च्यीकगी खोङबाला श्यी़वालाक, “चोवो, ठी़सो़खेन योहान्नागी खोरी ङेनेक्याला ॱलाप्कीन च्योक्रे, हेक्यालाः सोवा धेप्येला ॱलाप्रोजे।”
2खोङबागी खुङक्याला सुवालाक, “खेक्या सोवा धेवी घाङला देरे श्यी़
‘के याप,
खेराङगी छेन धाम्पा ॱरुङवास्योक,
खेराङगी ग्यासी हुङवास्योक।
3हेक्याला हेरी ङीन्रेगी शामा ॱनाङरो जे।
4हीकी श्येनला घोयाङ तेरता झ्येरी हीकी धीक्पा सेल्वा जे।
धेनी हेक्याला छो़ताला छी़दु ॱमाच्युक्रो जे।’”
5धेनी खोङबागी खुङक्याला सुवालाक, “खेक्याने मी च्यीकला रोवा च्यीक हो़गीन छा श्याक्ना धेनी छेनगी तीक-तीकला, होदे रोवा चारु सोरी खोला, ‘छोटो, ङाला ग्याङगा सुम कीरो झ्यी। 6घीझ्येरी ॱनाना ङी रोवा च्यीक डु ग्याप्ती, ङीचारु होजुङ धेनी खोला शाये तेरयेला ङाला घीया मेक।’ ॱनेरी ॱने। 7धेनी होदे रोवागी़ नाङनेराङ ‘ङाला काल्ले ॱमातेर। घो ग्याप्सा हो़क। धेनी ङा धाङ ङी टुवाक्या ङ्याजा नाङदु हो़क। ङा लारी ख्यो़ला घीया तेर थुक्ये मीदुक।’ ॱनेरी लेन तेरकीनगो छा श्याक्ना 8धा ङा खेक्याला ॱनाहीन, रोवा लाक ॱनेरी खी़ लारी होदेला घीया ॱमेतेरनाः, हीना खी़ उजुक ग्याप्जीक झ्येरी खो लाङगीलाक धेनी खोला घो़गीन घीरी तेरकीलाक।
9“होझ्येरी ङा खेक्याला ॱनाहीन, श्यी़ धेनी ख्यो़ला ॱनाङगीलाक। चो धेनी ख्यो़ला ॱङेगीलाक। घो दुङ धेनी ख्यी़ क्षीला पेगीलाक। 10घीझ्येरी ॱनाना श्युगीन घीरीला ॱनाङगीलाक, चागीन घीरीला ॱङेगीलाक धेनी घो दुङगीन घीरीगी क्षीला पेगीलाक। 11धा खेक्याने आकी च्यीकगी, खोरी भीजागी ङ्या ॱलाङी घाङला, ङ्यागी छापला डु तेरकीलाक से? 12याङ घोङा च्यीक ॱलाङी घाङला, धीक्पा राचाक तेरकीलाक से? 13धा खेक्या ङेन्पा झ्येरीयाः, खेरी टुवाक्याला ॱङेन्बा शाङा तेरा स्येना, धा नाम्खे श्यीङखामदु श्युक्कीन खीकी यापगी खोङबाला श्युगीनक्याला, घाजो़ माङा धाम्पे थुक्ङी ॱनाङी हेटु।”
येशु धाङ बेएलजेबुल ॱनागीन धी़क
(मेथा १२:२२-३०,४३-४५; मारकु ३:२०-२७)
14धा येशुगी डे कुक्पा च्यीकला तो़न जेपालाक। धेनी डेगो थो़न्दी, होदे लाब ताङ ॱमाथुक्पा धेता मीगो लाब ताङ थुप्कीन झ्युवालाक। धेनी मीमाङक्या ॱहाङसावालाक। 15हीना मीक्याने रीङगागी ॱनेवालाक, “खो नी डेक्याई ॱरेउ बेएलजेबुलगी थोक्ने डेक्या तो़न्दालाक।” 16याङ श्येम्माक्याई खोङबाला छो़ता झ्यीयेला, नाम्खे श्यीङखामने ताक च्यीक श्यी़वालाक।
17हीना खुङक्याई साम्लो खोङबागी खेन्दा जेदी सुवालाक, “ग्याखाप च्यीकगी नाङला ठुक झ्युङना, होदे मेताला डोवालाक धेनी खीम च्यीक नाङ ठुक्नाः होदे ङ्याम्दी डोवालाक। 18धा सातान नाङदुवा ठुक हो़ना, खी़ ग्याखाप घाङगी झ्येरी ॱनेगीले? ङा दे ॱनाहीन घीझ्येरी ॱनाना खेक्या ङा बेएलजेबुलगी थोक्ने, डेक्या तो़न्दी ॱनेरी ॱनालाक। 19धा ङा बेएलजेबुलगी थोक्ने डे तो़न्दा हीन्ना, खेक्याई भीजाक्या सी़ थोक्ने तो़न्दाले? होझ्येरी खुङक्याराङ खीकी ठीम्पो़न झ्युङगीलाक। 20हीना ङा को़न्क्षोकगी थोक्ने डे तो़न्दी हो़ना, को़न्क्षोकगी ग्यासी खेक्याचारु ॱलेप्सालाक।
21“धा मी तोपक्षे च्यीकगी खोरी लाक्चा घीरी खेरती, खोरी नाङ ॱरुङदी धेना खी़ ग्युनोरक्या चेन्दा हुङालाक। 22हीना खोने तोपक्षे मी च्यीक होरी, खी़मुला टाप्ती खोला थोप्कीलाक धेनी खी़ ॱलोकाका लाक्चागो ठोक्कीलाक धेनी खोने ठोक्ठा ग्युनोरगो घो़गीलाक।
23“ङी छोकला मेगीनक्या ङी डा लाक। धेनी ङीमुला मीरुप्कीनक्याई ठेथोरी तोरकीलाक।
24“धा ॱनो़पा च्यीक मी च्यीकने थो़न्दी हुङना, ङासुयेला सा काम्साक्याने डोवालाक धेनी घारुवा सा माजोरा खी़ देरे ॱनालाक, ‘ङा थो़न्दी हुङगीन ङारी नाङदुराङ लोक्ती डोयेहीन।’ 25धेनी खो लोक्ती हुङी घाङला, होदे नाङगो खाम्साई क्षाक्ती, ढीक्ती श्याक्कीनगो ॱङेगीलाक। 26दे थोरी खो सोरी खोनेः ङेन्पा क्षे ॱनो़पा धी़न ठीक्ती हुङगीलाक धेनी खुङक्या होदे नाङदु जुरी होदुरु धेगीलाक। धेनी होदे मीगी ॱनेछुगो, एम्माने स्याम्ला छाप्क्षे झ्युङगीलाक।”
27येशुगी देक्या सुङी घाङला मीछोकगी खोक्ने, केमी च्यीकगी केक ग्याप्ती श्यी़वालाक, “खेराङला केगीन धाङ होमा तेरकीन आमा दे घीन्गी झ्यीलाप क्षे।”
28हीना खोङबागी सुवालाक, “को़न्क्षोकगी काला ङेन्दी, ॱरुङगीनक्या मोने झ्यीलाप क्षे लाक।”
येशुगी योनागी कोरला सुङवा
(मेथा १२:३८-४२)
29धा मीछोकगो क्षेरु डी़ घाङला येशुगी सुवालाक, “दे मीराप दे मीराप ङेन्पा च्यीक लाक। देक्या ताक चालालाक हीना देक्याला योनागी ताक माना, श्येम्मा ताक तेरकीमालाक। 30धेनी योना नीनेवेगी मीक्याला ताक च्यीक झ्युङगीन च्योक्रे, दे मीराप देला मी-भु झ्युङगीलाक। 31धेनी ठीम्चो़गी ङीमागोला ल्हो स्योकगी ग्यामु, दे मीरापगी केवे-फोक्यामुला लाङगीलाक धेनी खुङक्याला ठीम ताङगीलाक घीझ्येरी ॱनाना मो सोलोमोनगी स्येराप ङेन्येला जाम्बुलीङगी थाने होवालाक। हीना दुरु सोलोमोनने खाक्क्षे च्यीक दुक। 32धेनी नीनेवेगी मीक्या ठीम्चो़गी ङीमाला, दे मीरापमुला लाङगीलाक धेनी देक्याला ठीम ताङगीलाक घीझ्येरी ॱनाना योनागी क्षो़ स्येगीनगोला, खुङक्याई खोरी धीक्पाक्या पारी सेम ग्युरपालाक हीना दुरु योनाने खाक्क्षे च्यीक दुक।”
ली़गी हो़क ॱमीक लाक
(मेथा ५:१५;६:२२-२३)
33“धा सी़याः क्युङ पारती, होदे बेसा साजारु मेश्यालाक याङना खा काप्ती मेश्यालाक। हीना नाङदु हुङगीनक्याई थोङास्योक ॱनेरी ताक्ताला श्यालाक। 34ख्यी़ ॱमीक नी ख्यो़री ली़गी़ हो़क लाक। धेनी ख्यी़ ॱमीक थाङा हो़ना, ख्यो़री ली़ घीरी हो़गी खाङालाक हीना ॱमीकगो ॱमेथाङा हो़ना, ख्यो़री ली़ घीरी मी़नाकगी खाङालाक। 35होझ्येरी ख्यी़ नाङगी हो़क दे, मी़नाक्पा मीझ्युङयेला शाप-शाप झ्यी। 36होझ्येरी ख्यी़ ली़ घीरी मी़नाक्पा च्यीया मेता, हो़गी खाङ हो़ना क्युङगी हो़गी ख्यो़ला हो़सेर तेरकीन च्योक्रे, ख्यो़याः ठाछाई झ्युङगीलाक।”
येशु फारुसीपाक्या धाङ क्षो़ठीमगी ॱलोपो़नक्यामुला
(मेथा २३:१-३६; मारकु १२:३८-४०)
37येशुगी होदेक्या सुङसारती, फारुसीपा च्यीकगी खोङबाला डो़नला भो़वालाक। होझ्येरी खोङबा नाङदु फेप्ती, श्यालाक श्येयेला श्युक्पालाक। 38धेनी श्यालाक श्येये एन्ला खोङबागी क्षाक ॱमीसील्गीनगो थोरी फारुसीपागो ॱहाङसावालाक। 39हीना चोवोगी खोला सुवालाक, “ख्ये फारुसीपाक्या फोरा धाङ देरमागी फी च्यीगा चाङमा शोवालाक हीना नाङगो ठादोक धाङ ङेन्पागी खारी धे हो़तालाक। 40ख्ये ॱलेन्पाक्याओ, फी को़ जेगीनगी़राङ नाङगोवा को़ जेपामाले? 41हीना नाङला हो़गीनगो उटेक्याला ज्यीम्बा तोङ धेनी ख्यी़ क्षीला घीरी चाङमा झ्युङगीलाक।”
42“ख्ये फारुसीपाक्या ॱङ्याली! घीझ्येरी ॱनाना खेक्या दुम्रा नाङगी ॱमेन्चा धाङ ॱङोच्छे ॱनाछोकगी ग्याजा च्युगो को़न्क्षोकला पुलालाक हीना को़न्क्षोकगी झाम्पा धाङ ठीम्चो़ला या मीझ्यीदालाक। खेक्याई लेगा एम्मा दे, यामे ॱमेताङा स्याम्मा देक्या खीकी झ्यी घोयेहो़क।
43“ख्ये फारुसीपाक्या ॱङ्याली! घीझ्येरी ॱनाना खेक्या छोक्खाङक्या नाङदु श्युक्टा खाक्क्षे धाङ ठोम्साक्याला घुस्याप राक्येला घावो झ्यीदालाक।”
44“खेक्या ॱङ्याली! घीझ्येरी ॱनाना खेक्या ताक मेगीन रोखाङ च्योक्रे दुक धेनी मीक्याला स्येये मेता होदे खाने घोबा ग्यालाक।”
45धेनी क्षो़ठीमगी ॱलोपो़न च्यीकगी खोङबाला श्यी़वालाक, “ॱलोपो़न ला, खेराङगी देक्या सुङा जेदी हेक्यालाः ॱमेटा पाबा जेदी।”
46धेनी येशुगी सुवालाक, “ख्ये क्षो़ठीमगी ॱलोपो़नक्या ॱङ्याली! घीझ्येरी ॱनाना खेक्याई मीक्याला खुर ॱमीथुप्कीन, क्षो़ठीमगी खु कालालाक हीना खेक्या राङगो होदे खुक्याला खेरी जु च्यीक्कीयाः मीजुवालाक।
47“खेक्या ॱङ्याली! घीझ्येरी ॱनाना खीकी फामाक्याई सेसा ॱङो़नस्येखेनक्याई धी़ठो खेक्या चीयालाक। 48होझ्येरी खेक्या खुङक्याई झ्येजा लेगा देला, खुङ क्यारी पाङपो झ्यीदालाक घीझ्येरी ॱनाना खेरी फामाक्याई खुङक्याला सेपालाक धेनी खीकी होदेक्याई रोखाङ शोवालाक। 49होझ्येरी को़न्क्षोकगी स्येरापगीयाः सुवालाक, ‘ङा खुङक्याचारु ॱङो़नस्येखेनक्या धाङ कुछापक्या झाङाहीन। खुङक्याने रीङगाला सेगीलाक धेनी रीङगाला दुक्पु तेरकीलाक।’ 50होझ्येरी जीक्तेन दे को़ने, ॱहाला ॱङो़नस्येखेनक्याई ठाकगी क्षेपागो दे मीरापला फोक्कीलाक। 51ङा खेक्याला धेन्पाराङ ॱनाहीन, हाबेलगी धी़चो़ने जेकारीयास थुक्पे क्षो़ठी धाङ क्षो़खाङगी घुङदु सेसा ठाकगी क्षेपा दे मीरापला फोक्कीलाक।
52“ख्ये क्षो़ठीमगी ॱलोपो़नक्या ॱङ्याली! घीझ्येरी ॱनाना खेक्याई स्येरापगी धीमीकगो ठोक्पालाक। धेनी खेराङक्याः माजुवालाक धेनी जुगीनक्यालाः काक्पालाक।”
53धेनी खोङबा होदेने फेई घाङला क्षो़ठीमगी ॱलोपो़नक्या धाङ फारुसीपाक्याई खोङबाला दो़न माङागी कोरला, सुङदु च्युक्येला चीरपालाक। 54धेनी खोङबागी श्यालने थो़न्गीन, छीकक्या शीम्येला खुङक्या घुक्ती धेबालाक।
Currently Selected:
लुका 11: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
