မာကု နိဒါန်း
နိဒါန်း
မာကု ရေးဟှားဟှူ ခရစ်တော်ရဲ့ ဒန်းကောန်းဟှာ ဓမ္မာသစ်ကျမ်းထဲမာ ယေရှုခရစ်တော်ရဲ့ သတ်တော်စဉ်ဟှို ဖော်ပြဟှားဟှူ ကျမ်းလေး စောန်ထဲဟှ တစောန်ဖြစ်ဟှယ်။ အယ်ကျမ်းတစောန်စီဟှို “ဧဝံဂေလိ” ဆိုဘီး ခေါ်ဟှယ် “ဒန်းကောန်း” ဆိုဘီး အဓိပ္ပာယ်ရဟှယ်။ ယေရှု သေဆောင်းဘီးနော့‑က်၊ အယ်ကျမ်းလေဟှို မဿဲ၊ မာကု၊ လုကာန ယောဟန်ဟှ ရေးဟှားဟှယ်။ မာကုရေးဟှားဟှူ ဧဝံဂေလိကျမ်းဟှာ ဧဝံဂေလိလေးကျမ်းထဲမာ အတိုဆောင်းဖြစ်ဟှယ်။ ဧဝံဂေလိကျမ်း အားလောင်းရဲ့ ဦးဆောင်းဖြစ်ဟှူ အယ်ကျမ်းဟှာ ခရစ်တော်မွီးဘီးနော့‑က် နှစ်ပေါန်း ၆၅–၇၀ ကြားမာ ရေးဟှားဟှယ် ဆိုဘီး ယောင်ကြည်ဟှားဂေ့ဟှယ်။ အယ်ကျမ်းဟှာ ရောမခရစ်ယာန်လေဟှို အားပေးဟှို့ ရည်ရွယ်ချစ်န ရောမဗြို့မာ ရေးဟှားဟှယ် ဆိုဘီး ပညာရှင်လေဟှ ယောင်ကြည်ဂေ့ဟှယ်။
ယောဟန်မာကု ဆိုဘီးလည်း ထန်ပေါ်ဟှူ မာကုဟှာ တမန်တော်ပေါလုန ဗာနဗရဲ့ ပေါန်းဖော်တယော့‑က်ဖြစ်ဘေမဲ့ သူဟှာ သူးနို့ရဲ့ သာသနာခရီးစဉ်ဟှို စွန့်ပစ်လိုက်ဟှူခီမာ သူ့ရဲ့ဂေါင်သိက္ခာဟှို ထိခိုက်လေဟှယ် (တ ၁၃.၁၃)။ နော့‑က်တခါ မာကုဟှာ ဗာနဗန ပ္လန်ဘီး ခရီးသွားလေဟှယ် (တ ၁၅.၃၇–၃၉)။ မာကုဟှာ ပေတရုရဲ့ရရာတိုင်းခင်ဟှူ ငယ်ဂျင်းအဖြစ်လည်း သိမှတ်ဂေ့ဟှယ် (၁ ပေ ၅.၁၃)။ မာကုဟှာ ယေရှုရဲ့သတ်တော်စဉ်ဟှို မျစ်မြင်တယော့‑က်မှုဘေမဲ့လည်း ပေတရုရဲ့ သတ်သေဘောင်ဂီးဟှို မှတ်တမ်းတန်ဟှားဟှယ် ဆိုဘီး ပညာရှင်လေဟှာ ယောင်ကြည်ဂေ့ဘီး အယ်မူဇာဟှာ မာကုရေးဟှားဟှူ ဧဝံဂေလိတွပ် အခြေခံဖြစ်ဟှယ်။ အယ်မူကျမ်းထဲမာ မာကုဟှာ တဗဲ့တော်ဖြစ်ဇာန နော့‑က်ဆောင်းခီမာ ယေရှုရဲ့ သွန်သန်ဇာဟှို အလေးပေးဘီး ဖော်ပြဟှယ်။
ကြောန်းရာ ကျဉ်းချောက်
၁။ အခန်းကြီး ၁ မာ မာကုဟှာ အယ်ကျမ်းဟှို နိဒါန်းပျိုးဟှယ် (၁.၁–၁၃)
၂။ အယ်ဘီးန၊ မာကုဟှ အခန်းကြီး ၁ မှ ၈ ထိ ဂါလိလဲပြည်မာ ယေရှုရှိနေဒူး သူ့ရဲ့ သာသနာလောက်ငန်းဟှို ဖော်ပြဟှယ် (၁.၁၄—၈.၂၁)
၃။ နော့‑က်ဘီးဟှာ၊ သူဟှ ယေရုရှလင်ဗြို့ဟှို ယေရှုရဲ့ခရီးစဉ်နပတ်သတ်ဘီး ပြောဟှယ် (၈.၂၂—၁၀.၅၂)
၄။ မာကုဟှ ယေရုရှလင်ဗြို့မာ ယေရှုရဲ့ သေဇာန ရှင်ပ္လန်ထမြော့‑က်ဇာ အပါအဝမ် သူ့ရဲ့အခီအကြောန်းဟှို ရေးသားချစ်န အဆောန်းသတ်ဟှယ် (၁၁.၁—၁၆.၈)
Currently Selected:
မာကု နိဒါန်း: DWBT
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
The Word for the World International and The Dawei Bible Translation Reviewer Committee.