မဿဲ 20
20
စဗျစ်ခြံလောက်သမားလေရဲ့ပေါင်ဥပမာ
1“ကောန်းဂန်နိုင်ငံတော်ဟှာ သူ့ရဲ့စဗျစ်ခြံတွပ် လောက်သမားလေဟှို ငှားဟှို့ မိုးလန်းစောစော ထွပ်ဟှားဟှူ ခြံဇရှင်နတူလေဟှယ်။ 2သူဟှ တနေ့ဟှို ငွေဒန်းဂါးတပ္လားန ငှားဟှို့ ဘောတူဘီးဟှာ သူးနို့ဟှို စဗျစ်ခြံထဲဟှို စေလွှတ်လေဟှယ်။ 3သူဟှာ မိုလန်း ကိုးနာရီ လော့‑က်မာ ဆေးဟှို ပ္လန်ထွပ်လာဇာ လောက်လောက်ဘဲန အယ်နေရာမာ ရပ်နေဟှူ တခြားသူလေဟှို တွိရလေဟှယ်။ 4အယ်ကြောန့် သူးနို့လေဟှို ‘နန်းနို့လေလည်း သွားဘီး စဗျစ်ခြံထဲမာ လောက်လောက်ဂေ့ပါ။ ထိုက်သင့်ဟှူ လောက်အားခဟှို ငါပေးမယ်’ ဆိုဘီး သူးနို့လေဟှို ပြောလေဟှယ်။ 5အယ်ကြောန့် သူးနို့လေဟှာ သွားဂေ့ဟှယ်။ အယ်ဘီးဟှာ ဆယ်နှေ့နာရီန သောင်းနာရီမာ တခါ ပ္လန်ဟှို ထွပ်ဘီး လောက်သမားလေဟှို ငှားလေဟှယ်။ 6နေဒန်ဇာ ငါးနာရီလော့‑က်မာ သူဟှာ ထွပ်ဟှားဟှူ ခီမာ တခြားလူလေဟှာ အယ်နေရာမာဘဲ့ ရပ်နေဂေ့ဇာဟှို တွိလေဟှယ်။ ‘နန်းနို့လေ ဖြားဖြစ်ကြောန့် တနေ့လောင်း လောက်လောက်ဘဲန ရပ်နေဂေ့နူး’ ဆိုဘီး သူးနို့လေဟှို မေးလေဟှယ်။ 7အယ်သူလေဟှလည်း ‘ကျွန်တော်ဟှားလေဟှို ဖယ်သူလည်း ငှားဂေ့ဟှ’ ဆိုဘီး ပြောလေဟှယ်။ ခြံဇရှင်ဟှ ‘နန်းနို့လည်း သွားဘီး ငါ့စဗျစ်ခြံမာ အလောက်လောက်ဂေ့ပါ’ ဆိုဘီး ပြောလေဟှယ်။
8“ညဉ့်ခန်းဖတ်ရော့‑က်ဟှူ ခီမာ စဗျစ်ခြံဇရှင်ဟှ ‘လောက်သမားလေဟှို ခေါ်ဘီး နော့‑က်ဆောင်းငှားဟှူ သူလေဟှစဘီး ဦးဆောင်းငှားဟှူ သူလေထိ လောက်အားခရှင်းပေးလိုက်’ ဆိုဘီး သူ့ရဲ့ဘဏ္ဍာစိုးဟှို ပြောလေဟှယ်။ 9အယ်ကြောန့် ဘဏ္ဍာစိုးဟှာ နေဒန်ဇာငါးနာရီမာ ငှားဟှားဟှူ လူလေဟှို ငွေဒန်းဂါးတပ္လားစီ ရှင်းပေးလေဟှယ်။ 10ဦးဆောင်းငှားဟှားဟှူ သူလေဟှာ တခြားလူလေထတ် ပိုဘီးရလေ့မယ် ထန်မှတ်ဘီး ရော့‑က်လာဟှယ်။ အယ်ဘေမဲ့ သူးနို့လည်း ငွေဒန်းဂါးတပ္လားစီဘဲ့ ရလေဟှယ်။ 11သူးနို့လေဟှာ ငွေဒန်းဂါးတပ္လားစီဘဲ့ ရဂေ့ကြောန့် ခြံဇရှင်ဟှို ပြစ်တန်ဂေ့လေဟှယ်။ 12‘နော့‑က်ဆောင်းငှားဟှားဟှူ အယ်သူလေဟှာ တနာရီဘဲ့ လောက်လောက်ရဟှယ်။ ကျွန်တော့်ဟှားလေဟှာ နေပူဗ္လန်ထဲမာ တနေ့လောင်း ပန်ပန်ဘန်းဘန်းန လောက်ဆောန်ရဟှူလည်းဘဲ့ သင်ဟှာ ကျွန်တော်ဟှားလေဟှို အယ်သူလေနဒန်းတူဘဲ့ လောက်အားခဟှို ပေးဟှယ်!’ ဆိုဘီး ပြောဆိုဂေ့လေဟှယ်။ 13ခြံဇရှင်ဟှ သူးနို့ထဲဟှ တယော့‑က်ဟှို ‘မိဆွေ၊ ငါဟှာ နန့်ဟှို တရားဘဲလောက်ဇာ မှုဟှ။ နန်ဟှာ ငွေဒန်းဂါးတပ္လားန လောက်လောက်ဟှို့တွပ် ဘောတူဟှားဟှယ်။ 14နန့်ရဲ့ လောက်အားခဟှို ယူဘီးသွားဝေါ့။ နော့‑က်ဆောင်းငှားဟှူ လူလေဟှိုလည်း နန်းနို့လေဟှို ပေးဟှူမျိုးဘဲ့ ငါပေးမယ်။ 15ငါ့ကပ်လေဟှို ငါလောက်ရှင်မျိုး လောက်ခွမ့် မှေ့ဟှလော ငါဟှာ ဘောကောန်းဟှူကြောန့် နန်ဟှ နာလိုဘဲဖြစ်ရလော ဆိုဘီး ပြောလေဟှယ်’ ” ဆိုဘီးဟှာ မိန့်တော်မူလေဟှယ်။
16 #
မ ၁၉.၃၀; မာ ၁၀.၃၁; လု ၁၃.၃၀ အယ်ကြောန့် ယေရှုဟှ “အယ်မူမျိုးဘဲ့ နော့‑က်ဆောင်းဖြစ်ဟှူ လူလေဟှာ ဦးဆောင်းဖြစ်ဟှားဘီး ဦးဆောင်းဖြစ်ဟှူ လူလေဟှာ နော့‑က်ဆောင်းဖြစ်လေ့မယ်” ဆိုဘီး မိန့်တော်မူလေဟှယ်။
ယေရှုဟှ သေခံရဟှို့ကြောန်းဟှို သောင်းခါတိတိ ပြောဟှူကြောန်း
(မာကု ၁၀.၃၂–၃၄; လုကာ ၁၈.၃၁–၃၄)
17ယေရှုဟှာ ယေရုရှလင်ဗြို့ဟှို တတ်နေဒူးမာ တဗဲ့တော်ဆယ့်နှေ့ပါးဟှို သီးသန့်ခေါ်ဘီး၊ 18“နားထောန်ဂေ့။ နို့လေဟှာ ယေရုရှလင်ဗြို့ဟှို တတ်ဂေ့မယ်။ အယ်ဗြို့မာ လူ့ရဲ့သားဟှာ ယဇ်ပုရောဟိတ်ဂီးလေန ကျမ်းပြုဆရာလေရဲ့ လတ်ထဲဟှို အပ်နှံခံရလေ့မယ်။ သူးနို့လေဟှာ လူရဲသားဟှို သေဒန်စီရင်ဘီး၊ 19လူမျိုးခြားလေရဲ့ လတ်ထဲဟှို အပ်နှံဂေ့လေ့မယ်။ သူးနို့ဟှာ လူ့ရဲ့သားဟှို လှောန်ပြောန်ဘီး၊ ကီဒန်ပေးဘီး လတ်ဝါးကပ်တိုင်မာ တန်ဘီး သတ်ဂေ့လေ့မယ်။ အယ်ဘေမဲ့ သောင်းရစ်မြော့‑က်ဟှူနေ့မာ လူ့ရဲ့သားဟှာ ထမြော့‑က်လေ့မယ်” ဆိုဘီး မိန့်တော်မူလေဟှယ်။
မိခင်တယော့‑က်ရဲ့ တောန်းဆိုဟှူကြောန်း
(မာကု ၁၀.၃၅–၄၅)
20အယ်ဘီးန ဇေဗေဒဲရဲ့ မီးမဟှာ သူ့သားနှေ့ယော့‑က်နတူးဒူ တခုခုဟှို တောန်းဟှို့တွပ် ယေရှုနားဟှို လာဘီး ပျပ်ဝပ်လေဟှယ်။
21ယေရှုဟှ “ဖြားဇာလိုရှင်နူး” ဆိုဘီး မေးလေဟှယ်။
အယ်မီးမဟှ “ကိုယ်တော်ရဲ့ နိုင်ငံတော်မာ ကျွန်မရဲ့ သားနှေ့ယော့‑က်ဟှို ကိုယ်တော်ရဲ့ ညာဖတ်မာတယော့‑က် ကိုယ်တော်ရဲ့ ဘယ်ဖတ်မာတယော့‑က် ထိုင်စေတော်မူပါ” ဆိုဘီး တောန်းလျှော့‑က်လေဟှယ်။
22ယေရှုဟှ “နန်းနို့လေဟှာ ဖြားဇာလေ တောန်းလျှော့‑က်နေဟှယ် ဆိုဇာဟှို နန်းနို့သိဂေ့ဟှ။ ငါသော့‑က်ရဟှို့ ဒေါက်ခဝေဒနာခွပ်ဟှို့ နန်းနို့သော့‑က်နိုင်ဘဲ့လော” ဆိုဘီး မေးတော်မူလေဟှယ်။
သူးနို့ဟှလည်း “ကျွန်တော်ဟှားလေ သော့‑က်နိုင်ပါဟှယ်” ဆိုဘီး လျှော့‑က်ဂေ့လေဟှယ်။
23ကိုယ်တော်ဟှ “ငါ့ရဲ့ခွပ်ဟှို နန်းနို့လေဟှာ သော့‑က်ရလေ့မယ်။ အယ်ဘေမဲ့ ငါ့ရဲ့ ညာဖတ်န ဘယ်ဖတ်မှာ ထိုင်ရဟှို့ခွမ့်ဟှို ငါပေးပိုင်ဟှ။ အယ်နေရာဟှာ ငါ့ရဲ့ဖ ပြင်ဆင်ဟှားဟှူ သူလေတွပ်ဘဲ့ ဖြစ်လေဟှယ်” ဆိုဘီး မိန့်တော်မူလေဟှယ်။
24အယ်ကြောန်းရာဟှို တဗဲ့တော် ဆယ်ယော့‑က်ဟှာ ကြားသိဟှူ ခီမာ အယ်ညီကို နှေ့ယော့‑က်ဟှို စိဆိုးဂေ့ဟှယ်။ 25#လု ၂၂.၂၅,၂၆ယေရှုဟှာ တဗဲ့တော်လေဟှို သူ့နားဟှို ခေါ်တော်မူဘီး “နန်းနို့လေ သိဂေ့ဟှူတိုင်းဘဲ့ လူမျိုးခြားလေမာ အောက်ချောက်ဟှူ သူလေဟှာ ပြည်သူလေထတ်မာ စိုးတရပြုဘီး ခေါန်းဆောန်လေလည်း အာဏာထားတတ်ဂေ့လေဟှယ်။ 26#မ ၂၃.၁၁; မာ ၉.၃၅; လု ၂၂.၂၆နန်းနို့လေထဲမာ အယ်မူမျိုး ဖြစ်သင့်ဟှ။ နန်းနို့ထဲဟှ တယော့‑က်ဟှာ အကြီးကဲဖြစ်ရှင်ဟှယ် ဆိုဟှာ အယ်လူဟှာ နန်းနို့လေရဲ့ စေခံဖြစ်ရမယ်။ 27အယ်ဘီးဟှာ နန်းနို့လေထဲဟှ တယော့‑က်ဟှာ ကီးမြတ်ဆောင်းဖြစ်ရှင်ဟှယ် ဆိုဟှာ အယ်လူဟှာ နန်းနို့လေရဲ့ ကျွန်ဖြစ်ရမယ်။ 28အယ်မျိုးဘဲ့ လူ့ရဲ့သားဟှာ သူတပါးဟှို စေစားဟှို့လာဇာ မှုဟှ။ သူတပါးရဲ့ စေခံဟှို့န သူ့သတ်ဟှို စွန့်ဘီး လူလေဘောင်ဂီးဟှို ဝီးနှုဟှို့တွပ် ကြွလာဟှယ်” ဆိုဘီး မိန့်တော်မူလေဟှယ်။
လူကန်းနှေ့ယော့‑က်ဟှို ကုသပေးဟှူကြောန်း
(မာကု ၁၀.၄၆–၅၂; လုကာ ၁၈.၃၅–၄၃)
29ယေရှုန တဗဲ့တော်လေဟှာ ယေရိခေါဗြို့ဟှနေ ထွပ်လာဟှူ ခီမာ လူအောက်ဂီးဟှာ နော့‑က်တော်ဟှိုလိုက်ဂေ့လေဟှယ်။ 30လမ်းဘေးမာထိုင်နေဟှူ လူကန်းနှေ့ယော့‑က်ဟှာ ယေရှုဖြတ်ဟှားဟှယ် ဆိုဇာဟှို ကြားသိဟှိကြောန့် “သခင်၊ ဒါဝိဒ်ရဲ့သားတော်! ကျွန်တော်ဟှားလေဟှို သနားတော်မူပါ!” ဆိုဘီး အော်ဟစ်လေဟှယ်။
31လူအောက်ဂီးဟှ သူးနို့ဟှို တိတိဆိဆိနေဟှို့တွပ် ပြစ်တန်ဘီး ပြောဂေ့ဟှယ်။ အယ်ဘေမဲ့ သူးနို့ဟှ “သခင်၊ ဒါဝိဒ်ရဲ့သားတော်! ကျွန်တော်ဟှားလေဟှို သနားတော်မူပါ!” ဆိုဘီး ပိုဘီးဟှာ အော်ဟစ်ဂေ့ဟှယ်။
32ယေရှုဟှာ ရပ်တော်မူလိုက်ဘီး သူးနို့ဟှို ခေါ်လိုက်ဟှယ်။ “နန်းနို့တွပ် ဖြားဇာလောက်ပေးစေရှင်ဟှယ်နူး” ဆိုဘီး ကိုယ်တော်ဟှ မေးတော်မူလေဟှယ်။
33သူးနို့ဟှ “သခင်၊ ကျွန်တော်ဟှားလေရဲ့ မျစ်စိဟှို ဗြင်စေတော်မူပါ!” ဆိုဘီး လျှော့‑က်ဂေ့လေဟှယ်။
34ယေရှုဟှာ သူးနို့ဟှို သနားတော်မူဟှူကြောန့် သူးနို့လေရဲ့ မျစ်စိဟှို လတ်နတို့တော်မူလေဟှယ်။ ရှစ်ရှင်းဘဲ့ သူးနို့ဟှာ မျစ်စိဗြင်ဟှားဘီး နော့‑က်တော်ဟှို လိုက်ဂေ့လေဟှယ်။
Currently Selected:
မဿဲ 20: NTDWB24
Highlight
Share
Copy
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.
