လုကာ 5

တဗဲ့တော်လေဟှို ခေါ်ဟှူကြောန်း

(မဿဲ ၄.၁၈–၂၂; မာကု ၁.၁၆–၂၀)

1 # မ ၁၃.၁,၂; မာ ၃.၉,၁၀; ၄.၁ တနေ့မာ ယေရှုဟှာ ဂင်္နေသရက်အိုင်ရဲ့ ကမ်းနားမာ ရပ်နေဟှူ ခီမာ လူလေဟှာ ဘုရားသခင်ရဲ့ စကားတော်ဟှို နားထောန်ဟှို့ ကိုယ်တော်နားဟှို တိုးဝမ်ဂေ့ဟှယ်။ 2ကိုယ်တော်ဟှာ ကမ်းနားမာ ကပ်ဟှားဟှူ လှေနှေ့စင်းဟှို ဗြင်တော်မူဟှယ်။ ငါးဖမ်းမားလေဟှာ လှေလေထတ်ဟှနေ ဆင်းဘီးန ငါးဖမ်းပိုက်လေဟှို ဆေးနေဂေ့ဟှယ်။ 3ယေရှုဟှာ အယ်လှေနှေ့စီးထဲဟှ ရှိမုန်ရဲ့ လှေထတ်ဟှို တတ်တော်မူဘီးန လှေဟှို ကမ်းဟှနေ နဲနဲခွာဟှို့ သူ့ဟှို ခွမ့်တောန်းလေဟှယ်။ ယေရှုဟှာ လှေထတ်မာ ထိုင်ဘီးန လူအောက်ဂီးဟှို သွန်သန်ဟှယ်။

4ကိုယ်တော်ဟှာ သွန်သန်ရှင်းလေ ပီးဟှားဟှူ ခီမာ ရှိမုန်ဟှို “ရေနတ်ထဲဟှို ထွပ်ဟှားဘီး ငါးလေဟှို ဖမ်းဟှို့တွပ် နန့်န နန့်ပေါန်းဖော်လေရဲ့ ငါးဖမ်းပိုက်လေဟှို ခ္လဂေ့” မိန့်တော်မူလေဟှယ်။

5 # ယော ၂၁.၃ ရှိမုန်ဟှ “ကျွန်တော့်ဟှားလေဟှာ တညဉ့်လောင်း ကြိုးစားဘီး ဖမ်းလည်း ဂေါန်လည်းရဂေ့ဟှ။ အယ်ဘေမဲ့ ကိုယ်တော်ရဲ့ မိန့်တော်တိုင်း ငါးဖမ်းပိုက်လေဟှို ခ္လလိုက်မယ်” ဆိုဘီး ပ္လန်ပြောတော်မူဟှယ်။ 6#ယော ၂၁.၆သူးနို့ဟှာ ငါးဖမ်းပိုက်လေဟှို ခ္လလိုက်ဘီးန ငါးလေဘောင်ဂီး ဖမ်းမိကြောန့် ငါးဖမ်းပိုက်လေ စုပ္လဲခါနီး ဖြစ်ဟှားဟှယ်။ 7အယ်ကြောန့် သူးနို့ဟှာ လာဘီး ကူညီပေးဟှို့ တခြားလှေထဲမာရှိနေဟှူ သူးနို့ရဲ့ ပေါန်းဖော်လေဟှို လတ်ပြဘီး ခေါ်လိုက်ဟှယ်။ သူးနို့ဟှာ လာဘီးန လှေနှေ့စင်းလောင်းဟှို ငါးလေပ္လဲ့ ဖ္လဲ့လိုက်ကြောန့် လှေလေဟှာ မ္လုပ်ခါနီး ဖြစ်ဟှားဟှယ်။ 8အယ်မျိုးဖြစ်ဇာလေဟှို ရှိမုန်ပေတရု ဗြင်လိုက်ဟှူ ခီမာ ယေရှုရှေ့မာ ဒူးထော့‑က်ဘီး “သခင်၊ ကျွန်တော့်နားဟှနေ ကြွဟှားတော်မူပါ! ကျွန်တော်ဟှာ ပြစ်သား ဖြစ်ဟှယ်!” ဆိုဘီး လျှော့‑က်လေဟှယ်။

9သူ့နတူးဒူရှိဟှူ လူလေ အားလောင်းဂူဟှာ ဖမ်းမိဟှူ ငါးလေဟှာ ဘောင်ဂီး ဖြစ်နေကြောန့် အံ့ဩဟှားဂေ့ဟှယ်။ 10ရှိမုန်ရဲ့ လောက်ဖော်ဆောန်ဖတ်လေဖြစ်ဟှူ၊ ဇေဗေဒဲရဲ့ သားလေဖြစ်ဟှူ ယာကုပ်န ယောဟန်လေဟှာလည်း အယ်မျိုးဘဲ့ အံ့ဩဟှားဂေ့ဟှယ်။ ယေရှုဟှာ ရှိမုန်ဟှို “ကြော့‑က်ဂေ့န။ ခုဟှစဘီး နန်ဟှာ လူလေဟှို ဖမ်းရလေ့မယ်” ဆိုဘီး မိန့်တော်မူလေဟှယ်။

11သူးနို့ဟှာ လှေလေဟှို ကမ်းနားမာ ကပ်လိုက်ဘီး ငါးလေအားလောင်း ထားရစ်ဘီးန နော့‑က်တော်ဟှို လိုက်ဂေ့ဟှယ်။

နူနာရောဂါဟှို ပျော့‑က်စေဟှူကြောန်း

(မဿဲ ၈.၁–၄; မာကု ၁.၄၀–၄၅)

12တနေ့မာ ယေရှုဟှာ ဗြို့တဗြို့မာ ရှိနေဒူးမာ နူနာသယ် တယော့‑က်ဟှာ ယေရှုဟှို ဗြင်ဟှားဟှူ ခီမာ ပျပ်ဝပ်ဘီး ကိုယ်တော့်ဟှို “သခင်၊ လိုတော်ရှိဟှယ် ဆိုဟှာ ကျွန်တော့်ဟှို သန့်ရှင်းအောန် လောက်နိုင်ဟှယ်!” ဆိုဘီး တောန်းဗန်လေဟှယ်။ #၅.၁၂ ကျွန်တော့်ဟှို သန့်ရှင်းအောန် လောက်နိုင်ဟှယ်၊ အယ်ရောဂါဟှာ လူတယော့‑က်ဟှို မြဲဒမ်း သန့်ရှင်းဘဲအောန် လောက်ဟှယ် ဆိုဘီး ယူဆဟှယ်။

13ယေရှုဟှာ လတ်တော်ဟှို ဆန့်ဘီးဟှာ သူ့ဟှို တို့ထိတော်မူဟှယ်။ “ငါလိုရှိဟှယ်။ သန့်ရှင်းစေ!” ဆိုဘီး ကိုယ်တော်ဟှ မိန့်တော်မူဟှယ်။ ရှစ်ရှင်းဘဲ့ နူနာရောဂါဟှာ ပျော့‑က်ဟှားလေဟှယ် 14ယေရှုဟှာ သူ့ဟှို “ဖယ်သူဟှိုလည်း ပြောန။ အယ်ဘေမဲ့ ယဇ်ပုရောဟိတ်နားဟှို သွားဘီး ကိုယ်ဟှို ပြလိုက်ပါ။ စင်ကြယ်ဟှားဘီး ဆိုဇာဟှို လူလေရှေ့မာ သတ်သေဖြစ်ဟှို့တွပ် မောရှေပညတ်ဟှားဟှူတိုင်း ပူဇော်သကာဟှို ဆစ်သပါ” ဆိုဘီး မိန့်တော်မူလေဟှယ်။

15အယ်ဘေမဲ့ ယေရှုရဲ့ ဒန်းဟှာ ရရာတိုင်း ပ္လံ့နှံ့ဟှားဘီး လူအောက်ဂီးဟှာ ကိုယ်တော်ရဲ့ တရားတော်လေ ကြားရဟှို့န သူးနို့ရဲ့ နာရောဂါလေ ပျော့‑က်ဟှို့တွပ် လာဂေ့ဟှယ်။ 16အယ်ဘေမဲ့ ကိုယ်တော်ဟှာ တိဆိဟှူနေရာမာ ဆုတောန်းဟှို့ ထွပ်ကြွဟှားတော်မူဟှယ်။

လေဖြတ်နေဟှူလူဟှို နာပျော့‑က်စေဟှူကြောန်း

(မဿဲ ၉.၁–၈; မာကု ၂.၁–၁၂)

17တနေ့မာ ယေရှုဟှာ သွန်သန်တော်မူနေဒူးမာ ယေရုရှလင်ဗြို့၊ ယုဒပြည်န ဂါလိလဲပြည် ဗြို့ဝါလေဟှနေ လာဟှူဖာရိရှဲ တချို့န ကျမ်းတတ်ဆရာလေဟှာ ထိုင်နေဂေ့ဟှယ်။ နာရောဂါ ပျော‑က်စေဟှို့ ဘုရားသခင်ရဲ့ တဂိုးတော်ဟှာ ယေရှုမာ ရှိတော်မူဟှယ်။ 18လူတချို့ဟှာ လေဖြတ်နေဟှူ လူတယော့‑က်ဟှို ထမ်းစင်န သယ်လာဘီး အီထဲဟှို သယ်ဆောင်ဟှားဘီး ယေရှုရဲ့ ရှေ့တော်မာ ခ္လဟှားဟှို့ ကြိုးစားဂေ့ဟှယ်။ 19ကြိုးစားဘေမဲ့လည်း လူလေဘောင်ဂီး ရှိနေကြောန့် သူးနို့ဟှာ လူနာဟှို သယ်သွမ်းဟှားဟှို့ လမ်းရှာတွိဘဲ ဖြစ်နေဟှယ်။ အယ်ကြောန့် သူးနို့ဟှာ အီးခေါန်မိုးထတ်ဟှို တတ်ဘီးဟှာ အီးခေါန်မိုးဟှို ဖော့‑က်ဘီးမှ လူနာဟှို ထမ်းစင်န လူအောက်ဂီးရဲ့လယ် ယေရှုရဲ့ ရှေ့တော်ဟှို လျှောခ္လဂေ့ဟှယ်။ 20ယေရှုဟှာ သူးနို့မာ ရရာတိုင်း ယောင်ကြည်ရှင်း ရှိဟှယ် ဆိုဇာဟှို ဗြင်တော်မူဟှားဘီး လူနာဟှို “မိဆွေ၊ နန်ဟှာ ပြစ်လေလွတ်ရှင်းခံရဘီ” ဆိုဘီး မိန့်တော်မူလေဟှယ်။

21ကျမ်းတတ်ဆရာလေန ဖာရိရှဲလေဟှာ “ဘုရားဟှိုစော်ကားဘီး ပြောနေဟှူလူဟှ ဖယ်သူနူး! ဘုရားသခင် တပါးဒဲဘဲ့ ပြစ်လေဟှို ဖြေလွတ်ပေးနိုင်ဟှယ်!” ဆိုဘီး သူးနို့ရှင်းရှင်း ပြောနေဂေ့ဟှယ်။

22ယေရှုဟှာ သူးနို့ရဲ့စိဟှို သိကြောန့် သူးနို့ဟှို “နန်းနို့ဟှာ ဖြားဖြစ်ကြောန့် အယ်ဇာလေဟှို နန်းနို့ရဲ့ နှလောင်းထဲမာ စဉ်းစားနေဂေ့နူး။ 23‘နန်ဟှာ ပြစ်လွတ်ရှင်းခံရဘီ’ ဆိုဘီး ပြောဇာဟှ လွယ်လော။ ‘နန် ထဘီး လမ်းရှော့‑က်’ ဆိုဘီး ပြောဇာဟှ လွယ်လော။ 24လူ့ရဲ့သားဟှာ လောကမာ ပြစ်လွှတ်ပိုင်ဟှူ ခွမ့်အာဏာ ရှိဟှယ် ဆိုဇာ နန်းနို့ဟှို သတ်သေပြမယ်” ဆိုဘီး မိန့်တော်မူလေဟှယ်။ အယ်ကြောန့် ကိုယ်တော်ဟှာ လေဖြတ်နေဟှူ လူဟှို “ထဒန်၊ ထမ်းစင်ဟှို သီးဘီးဟှာ အီပ္လန်ဝေါ့!” ဆိုဘီး မိန့်တော်မူလေဟှယ်။

25ရှစ်ရှင်းဘဲ့ အယ်လူဟှာ သူးနို့ အားလောင်းရှေ့မာ ထရပ်ဘီး။ သူအိခဲ့ဟှူ အိရာဟှို သီးဘီး၊ ဘုရားသခင်ဟှို ချီးမွမ်းဘီး အီဟှို ပ္လန်ဟှားဟှယ်။ 26သူးနို့ အားလောင်းဟှာ ရရာတိုင်း အံ့ဩဟှားဂေ့ဟှယ်! သူးနို့ဟှာ ကြော့‑က်လန့်လာဘီး ဘုရားသခင်ဟှို “အယ်နေ့မာ ရရာတိုင်း အံ့ဩဇာလေဟှို နို့လေဗြင်ရဂေ့ဘီ” ဆိုဘီး ချီးမွမ်းဂေ့လေဟှယ်။

လေဝိဟှို ခေါ်ဟှူကြောန်း

(မဿဲ ၉.၉–၁၃; မာကု ၂.၁၃–၁၇)

27အယ်ဇာလေ ပီးဟှားဘီးန ယေရှုဟှာ ထွပ်ကြွဟှားတော်မူဘီး လေဝိနာမယ်ရှိဟှူ ခွန်ကော့‑က်မားဟှာ သူ့ခွန်ရောင်းမာ ထိုင်နေဇာဟှို ဗြင်တော်မူလေဟှယ်။ ယေရှုဟှာ သူ့ဟှို “ငါ့နော့‑က်ဟှို လိုက်ပါ” ဆိုဘီး မိန့်တော်မူလေဟှယ်။ 28လေဝိဟှာ အားလောင်းဟှို ထားရစ်ဘီး နော့‑က်တော်ဟှို လိုက်ဟှားဟှယ်။

29အယ်ဘီးန လေဝိဟှာ သူ့ရဲ့ အီမာ ယေရှုတွပ် ဧည့်ခံဗွဲဂီး ကျင်းပလေဟှယ်။ အယ်ပွဲဟှိုလာဟှူ ဧည့်သည်လေထဲမာ ခွန်ကော့‑က်မားလေန တခြားလူလေပါဟှယ်။ 30#လု ၁၅.၁,၂ကျမ်းတတ်ဆရာလေ တချို့န သူးနို့ရဲ့ အောက်စုဝမ်ဖြစ်ဟှူ ဖာရိရှဲလေ တချို့ဟှာ ယေရှုရဲ့ တဗဲ့တော်လေဟှို ပြစ်တန်ဂေ့ဟှယ်။ “ဖြားဖြစ်ကြောန့် နန်းနို့ဟှာ ခွန်ကော့‑က်မားလေ၊ ပြစ်သားလေနတူးဒူ စားသော့‑က်ရဂေ့နူး” ဆိုဘီး သူးနို့ဟှို မေးလိုက်ဟှယ်။

31ယေရှုဟှာ သူးနို့ဟှို “နေကောန်းနေဟှူ လူလေဟှ ဆရာဝန်ဟှို လိုအပ်ဟှ။ အယ်ဘေမဲ့ နေကောန်းဘဲလူဟှ ဆရာဝန်ဟှို လိုအပ်ဟှယ်။ 32ငါဟှာ ဖြောန့်မတ်ဟှူ လူလေ နောန်ဒရဟှို့တွပ် ခေါ်ဟှို့လာဇာ မှုဟှ။ ပြစ်ရှိဟှူ လူလေဟှို နောန်ဒရစေဟှို့တွပ် ခေါ်ဟှို့လာဇာ ဖြစ်ဟှယ်” ဆိုဘီး မိန့်တော်မူလေဟှယ်။

စာရှောန်ရှင်းန ဆိုင်ဟှူမေးခွန်းကြောန်း

(မဿဲ ၉.၁၄–၁၇; မာကု ၂.၁၈–၂၂)

33လူတချို့ဟှ ယေရှုဟှို “ယောဟန်ရဲ့ တဗဲ့လေန ဖာရိရှဲလေရဲ့ တဗဲ့လေဟှာ စာရှောန်ရှင်းန ဆုတောန်းရှင်းလေဟှို ခဏခဏ လောက်ဘေမဲ့ ကိုယ်တော်ရဲ့ တဗဲ့လေဟှာ စားသော့‑က်ဘီး နေဂေ့ဟှယ်” ဆိုဘီး မေးလျှော့‑က်ဂေ့ဟှယ်။

34ယေရှုဟှ “အီတတ်ပွဲမာ ဒို့သားနတူးဒူ ရှိနေဟှူ ပေါန်းသင်းလေဟှာ ဒို့သားနတူးဒူ ရှိနေခီမာ စာရှောန်ခိုင်းနိုင်လော။ 35အယ်ဘေမဲ့ ဒို့သားဟှို သူးနို့နားဟှနေ ဆောန်ယူဟှားဟှို့နေ့ ရော့‑က်လာခီမာ သူးနို့ဟှာ စာရှောန်လေ့မယ်” ဆိုဘီး ဖြေတော်မူလေဟှယ်။

36ယေရှုဟှာ သူးနို့ဟှို ပေါင်ဥပမာန “ဖယ်သူလည်း အန်းဂီးစသစ်ဟှို ဆုဖ္လဲဘီး အန်းဂီဟောန်းမာ ဖာလေ့မှေ့ဟှ။ အယ်မျိုးဖာမယ် ဆိုဟှာ အန်းဂီသစ်ဟှာ ပျစ်စီးဟှားဘီး အန်းဂီဇသစ်န အန်းဂီဟောန်းဟှာ လိုက်ဖက် မှုဟှ။ 37အယ်မျိုးဘဲ့ ဝိုင်သစ်ဟှို သားရေဖူးဟောန်းထဲမာ ထဲ့လေ့ မှေ့ဟှ။ ထဲ့မယ် ဆိုဟှာ ဝိုင်သစ်ဟှ သားရေဖူးဟောန်းဟှို ပေါ့‑က်ပ္လဲစေဘီး ဝိုင်န သားရေဖူး နှေ့ခုလောင်းဟှာ ပျစ်စီးဟှားလေ့မယ်။ 38ဝိုင်သစ်ဟှို သားရေဖူးသစ်မာဘဲ့ ထဲ့ရဟှယ်! 39ဝိုင်ဟောန်းဟှို သော့‑က်ဟှားဘီးဟှူ လူဟှာ ဝိုင်သစ်ဟှို သော့‑က်ရှင်ဂေ့ဟန်း! ‘ဝိုင်ဟောန်းဟှ ပိုကောန်းဟှယ်’ ဆိုဘီး နန်နို့ ပြောလေ့မယ်” ဆိုဘီး မိန့်တော်မူလေဟှယ်။

Currently Selected:

လုကာ 5: NTDWB24

Highlight

Copy