လုကာ 10
10
တဗဲ့တော်ခွန်နစ်ဆယ်နှေ့ယော့‑က်ဟှို စေလွှတ်ကြောန်း
1အယ်မျိုးမိန့်တော်မူဘီးန သခင်ဘုရားဟှာ နော့‑က်ထပ် လူ ၇၂ ပါး#၁၀.၁ ၇၂ ပါး၊ တချို့ မူရင်းလတ်ရေးမူလေမာ ခွန်နစ်ဆယ်၊ ဆိုဘီး ဖော်ပြဟှားဟှယ်။ဟှို ဝီးချယ်တော်မူဘီး၊ နှေ့ယော့‑က်စီတွဲဘီး ကိုယ်တော်ကိုယ်တိုင် သွားဟှို့ ဗြို့ဝါလေဟှို ရင်ဦးဆောင်း စေလွှတ်လေဟှယ်။ 2#မ ၉.၃၇,၃၈ ကိုယ်တော်ဟှာ သူးနို့ဟှို “ရိသီးဇာလေ ဘောင်ဂီးရှိဘေမဲ့ ရိသီးမားလေဟှာ နဲနဲဘဲ့ရှိဟှယ်။ ရိသီးမားလေ စေလွှတ်ပေးဟှို့တွပ် ဗားဇရှင်ဟှို ဆုတောန်းဂေ့။ 3#မ ၁၀.၁၆ သွားဂေ့! ဝံပုလွေအောက်ထဲဟှို သိုးသားဂန်းလေဟှို စေလွှတ်ဟှူမျိုး နန်းနို့ဟှို ငါစေလွှတ်ဟှယ်။ 4#မ ၁၀.၇–၁၄; မာ ၆.၈–၁၁; လု ၉.၃–၅ ကပ်အိ၊ လွယ်အိ၊ ခေနပ်လေဟှို ယူဂေ့န။ လမ်းမာရပ်ဘီး ဖယ်သူဟှိုလည်း နှောက်ဆစ်ဂေ့န။ 5နန်းနို့ဟှာ အီတအီဟှို ဝမ်ဟှားဟှူခီတိုင်း ရင်ဦးဆောင်း ‘အယ်အီမာ ငြီသတ်ရှင်းရှိပါစေ’ ဆိုဘီး နှောက်ဆစ်ဂေ့။ 6အယ်အီမာ ငြီသတ်ရှင်းဟှို ရှစ်မြတ်နိုးသူရှိမယ် ဆိုဟှာ နန်းနို့ နှောက်ဆစ်ဟှူ ငြီသတ်ရှင်းဟှာ အယ်လူထတ်မာ ကျန်ရစ်လေ့မယ်။ ငြီသတ်ရှင်းဟှို ရှစ်မြတ်နိုးသူ မှေ့ဟှ ဆိုဟှာ နန်းနို့ နှောက်ဆစ်ဟှူ ငြီသတ်ရှင်းဟှာ နန်းနို့နားဟှို ပ္လန်လာလေ့မယ်။ 7#၁ ကော ၉.၁၄; ၁ တိ ၅.၁၈ နန်းနို့ဟှာ အယ်အီမာနေဘီး သူးနို့ ကျွေးဇာလေဟှို စားသောက်ဂေ့။ ဖြားဖြစ်ကြောန့်နူးဆိုဟှာ လောက်လောက်ဟှူသူဟှာ လောက်ခဟှို ရထိုက်ဟှယ်။ တအီဟှနေ တအီဟှို ပ္လောန်းဂေ့န။ 8နန်းနို့ဟှို လတ်ခံဟှူ ဗြို့ဟှိုဝမ်ဘီး ကျွေးဇာလေဟှို စားဂေ့။ 9အယ်ဗြို့မာရှိဟှူ လူနာလေဟှို နာပျော့‑က်စေဘီး ‘ဘုရားသခင်ရဲ့ နိုင်ငံတော်ဟှာ တည်ခါနီးနေဘီ’ ဆိုဘီး အယ်လူလေဟှို ပြောဂေ့။ 10#တ ၁၃.၅၁ အယ်ဘေမဲ့ နန်းနို့ဟှို လတ်ခံဘဲဟှူ ဗြို့ဖြစ်မယ် ဆိုဟှာ လမ်းထတ်ဟှနေ 11‘နန်းနို့ဟှို ဒိပေးဟှူနေန နို့လေရဲ့ ခေဖွားမာ ကပ်နေဟှူ နန်းနို့ဗြို့ဟှ မ္လေမုလေဟှို နို့လေ ခါခ္လလိုက်ဟှယ်။ အယ်ဘေမဲ့ ဘုရားသခင်ရဲ့ နိုင်ငံတော်ဟှာ တည်ခါနီးနေဘီ ဆိုဇာဟှို အော့‑က်မေ့ဂေ့!’ ဆိုဘီး ပြောဂေ့။ 12#မ ၁၁.၂၄; မ ၁၀.၁၅တရားစီရင်ဟှူနေ့မာ ဘုရားသခင်ဟှာ အယ်ဗြို့ထတ် သောဒုံဗြို့ဟှိုဘဲ့ ပိုဘီး ကရုဏာတော် ပြလေ့မယ် ဆိုဇာဟှို ငါ ပြောဟှယ်!
ယောင်ကြည်ဘဲဟှူ ဗြို့လေကြောန်း
(မဿဲ ၁၁.၂၀–၂၄)
13“ခေါရဇိန်ဗြို့၊ နန်ဟှာ အမင်္ဂလာရှိဟှယ်! ဗက်ဇဲဒဗြို့၊ နန်ဟှာ အမင်္ဂလာရှိဟှယ်! နန်းနို့ဟှို ပြခဲ့ဟှူ နိမိတ်လတ်ခဏာလေဟှို တုရုဗြို့န ဇိဒုန်ဗြို့မာ ပြခဲ့မယ် ဆိုဟှာ အယ်ဗြို့လေဟှ လူလေဟှာ လျှော်တေဟှို ဝတ်ဘီး ပ္လာထဲမာ ထိုင်ဘီး နောန်ဒရဂေ့လေ့မယ်! 14တရားစီရင်ဟှူနေ့မာ ဘုရားသခင်ဟှာ နန်းနို့ထတ် တုရုဗြို့န ဇိဒုန်ဗြို့လေဟှိုဘဲ့ ပိုဘီး ကရုဏာပြလေ့မယ်။ 15ကပေရနောင်ဗြို့၊ နန်ဟှာ အမင်္ဂလာရှိဟှယ်! နန့်ဟှာ ကောန်းဂန်ထိ ချီးမြှော‑က်ရှင်းဟှို ခံရဘေမဲ့လည်း မရဏာနိုင်ငံဟှိုဘဲ့ ခ္လရှင်းဟှို ခံရလေ့မယ်!” ဆိုဘီး မိန့်တော်မူလေဟှယ်။
16 #
မ ၁၀.၄၀; မာ ၉.၃၇; မာ ၉.၄၈; ယော ၁၃.၂၀ ယေရှုဟှာ တဗဲ့တော်လေဟှို “ဖယ်သူဘဲ့ဖြစ်ဖြစ် နန်းနို့စကားဟှို နားထောန်ဟှူသူဟှာ ငါ့စကားဟှို နားထောန်ဟှူသူ ဖြစ်ဟှယ်။ ဖယ်သူဘဲ့ဖြစ်ဖြစ် နန်းနို့ဟှို ငြင်းပယ်ဟှူ သူဟှာ ငါ့ဟှို ငြင်းပယ်ဟှူသူ ဖြစ်ဟှယ်။ ဖယ်သူဘဲ့ဖြစ်ဖြစ် ငါ့ဟှို ငြင်းပယ်ဟှူလူဟှာ ငါ့ဟှို စေလွှတ်လိုက်ဟှူလူဟှိုလည်း ငြင်းပယ်ဟှူလူ ဖြစ်ဟှယ်” ဆိုဘီး မိန့်တော်မူလေဟှယ်။
တဗဲ့တော်ခွန်နစ်ဆယ်နှေ့ပါး ပ္လန်ရော့‑က်လာဟှူကြောန်း
17တဗဲ့တော် ၇၂ ပါး#၁၀.၁၇ ၇၂ ပါး၊ တချို့ မူရင်းလတ်ရေးမူလေမာ ခွန်နစ်ဆယ်၊ ဆိုဘီး ဖော်ပြဟှားဟှယ် (ရှု ခန်းငယ် ၁)။ဟှာ ရရာတိုင်း ဝန်းသာဘီး ပ္လန်ရော့‑က်လာဂေ့ဘီး “သခင်၊ ကျွန်တော့်ဟှားလေဟှာ ကိုယ်တော်ရဲ့ နာမန နတ်ဆိုးလေဟှို နှန်ထုလိုက်ဟှူ ခီမာ သူးနို့လေဟှာ နားထောန်ဘီးဟှာ ထွပ်ဟှားဂေ့ဟှယ်!” ဆိုဘီး လျှော့‑က်ဂေ့ဟှယ်။
18ယေရှုဟှာ “စာတန်ဟှာ ကောန်းဂန်ဟှနေ လျှပ်စစ်ဖြန့်မျိုး က္လလာဇာဟှို ငါဗြင်ရဟှယ်။ 19နားထောန်ဂေ့! နန်းနို့ဟှာ ဗွီလေန ကန်းမီးဂေါ့‑က်လေ ထတ်မာ လမ်းရှော့‑က်နိုင်ဘီး ရန်သူရဲ့တဂိုး အာဏာလေ အားလောင်းဟှို နိုင်ရဟှူ ခွမ့်အာဏာလေဟှို ငါပေးဟှားပီးဘီ ဖြစ်ဟှူကြောန့် ဖယ်ဘေးလည်း နန်းနို့ဟှို ညှဉ်းဆဲလေ့ မှုဟှ။ 20အယ်ဘေမဲ့ နန်းနို့ဟှာ နတ်ဆိုးလေဟှို နှန်ထုနိုင်ဟှူကြောန့် ဝန်းသားဂေ့န။ နန်းနို့ရဲ့ နာမယ်ဟှာ ကောန်းဂန်စာရင်းမာ ရေးဟှားပီးဘီ ဖြစ်ဟှူကြောန့် ဝန်းသာဂေ့” ဆိုဘီး သူးနို့ဟှို မိန့်တော်မူလေဟှယ်။
ယေရှု ဝန်းသာတော်မူဟှူကြောန်း
(မာကု ၁၁.၂၅–၂၇; ၁၃.၁၆–၁၇)
21အယ်ခီမာ ယေရှုဟှာ သန့်ရှင်းဟှူဝိညာဉ်တော်#၁၀.၂၁ သန့်ရှင်းဟှူဝိညာဉ်တော်အားဖြင့်၊ တချို့ မူရင်းလတ်ရေးမူလေမာ ဝိညာဉ်တော်အားဖြင့် ဆိုဘီး ဖော်ပြဟှားဟှယ်။ တချို့ မူရင်းလတ်ရေးမူလေမာ ကိုယ်တော်ရဲ့ ဝိညာဉ်ထဲမာ၊ ဆိုဘီး ဖော်ပြဟှားဟှယ်။အားဖြင့် ရရာတိုင်း ဝန်းသာနေဘီး “ကောန်းဂန်ဘောင်န မ္လေဂီးရဲ့သခင် ဖြစ်တော်မူဟှူဖ! ကိုယ်တော်ဟှာ ပညာရှိလေန ဉာဏ်ကောန်းဟှူသူလေတွပ် ဝှပ်ဟှားဟှူဇာလေဟှို ပညာမဲ့လေဟှိုဘဲ့ ဖွမ့်ပြပေးဟှူကြောန့် ကိုယ်တော့်ဟှို ကျေးဇူးတန်ဟှယ်။ မှန်ပါဟှယ် ဖ၊ အယ်မူဇာဟှာ ရှေ့တော်မာ နှစ်သက်ဖွယ် ဖြစ်ပါဟှယ်။
22 #
ယော ၃.၃၅;
ယော ၁၀.၁၅
“နို့ဖဟှာ ရာအားလောင်း ငါ့ဟှို ပေးဟှားပီးဘီ။ အယ်သားဟှာ ဖယ်သူဖြစ်ဟှယ် ဆိုဇာဟှို ဖမှတပါး ဖယ်သူလည်းသိဂေ့ဟှ။ ဖဟှာ ဖယ်သူဖြစ်ဟှယ် ဆိုဇာဟှိုလည်း အယ်သားန အယ်သားတော်ဟှ ဖွမ့်ပြဟှို့တွပ် ဝီးချယ်ဟှားဟှူ သူလေမှတပါး ဖယ်သူလည်း သိဂေ့ဟှ” ဆိုဘီး မိန့်တော်မူလေဟှယ်။
23အယ်ဘီးန ယေရှုဟှာ တဗဲ့တော်လေဖတ်ဟှို လှည့်ဘီးန သူးနို့ဟှို “နန်းနို့ ခုဗြင်နေရဟှူ ဇာလေဟှို ဗြင်ရဟှူကြောန့် နန်းနို့မျစ်စိဟှာ မင်္ဂလာရှိဂေ့ဟှယ်! 24နန်းနို့ဟှို ငါပြောမယ်။ နန်းနို့ ဗြင်ရဟှူ ဇာလေဟှို ပရောဖက်လေန မန်းဂီးလေဟှာ ဗြင်ရှင်ဘေမဲ့လည်း သူးနို့ဟှာ ဗြင်ရဂေ့ဟှ။ နန်းနို့ ကြားရဟှူ ဇာလေဟှိုလည်း သူးနို့ ကြားရဂေ့ဟှ” ဆိုဘီး မိန့်တော်မူလေဟှယ်။
ကောန်းဟှူ ရှမာရိရဲ့ ပေါင်ဥပမာ
25 #
မ ၂၂.၃၅–၄၀; မာ ၁၂.၂၈–၃၄ ကျမ်းတတ်ဆရာ တယော့‑က်ဟှာ ထလာဘီးဟှာ ယေရှုဟှို “ဆရာ၊ ထာဝရသတ် ရရှိဟှို့တွပ် ဖြားလောက်ရမယ်နူး။” ဆိုဘီး ပညာစမ်းရှင်ဟှူကြောန့် မေးလျှော့‑က်လေဟှယ်။
26ယေရှုဟှာ “ပညတ်တော်မာ ဖြားဇာလေ ပြောဟှားနူး။ နန်းနို့ ဖယ်မျိုးဖတ်ဟှားနူး။” ဆိုဘီး သူ့ဟှို မေးတော်မူလေဟှယ်။
27အယ်လူဟှ “‘နန့်ရဲ့သခင်၊ ဘုရားသခင်ဟှို စိနှလောင်းအကြွင်းမဲ့၊ ဉာဏ်စွမ်းအကြွင်းမဲ့၊ ကိုယ်စွမ်းအားလောင်းန ရှစ်ပါ။ အယ်ဘီးဟှာ နန့်ရဲ့ အီဇနီးရှင်းဟှို နန့်ကိုယ်နန် ရှစ်မျိုးဘဲ့ရှစ်ပါ’ ” ဆိုဘီး ပ္လန်လျှော့‑က်လေဟှယ်။
28ယေရှုဟှ “နန်ဖြေဇာဟှာ မှန်ဟှယ်။ အယ်မျိုးလောက်မယ် ဆိုဟှာ နန်ဟှာ သတ်ရှင်ရလေ့မယ်” ဆိုဘီး မိန့်တော်မူလေဟှယ်။
29အယ်ဘေမဲ့ အယ်ကျမ်းတတ်ဆရာဟှာ ဖြောန့်မတ်ကြောန်းပြရှင်ဟှူကြောန့် ယေရှုဟှို “ကျွန်တော့်ရဲ့ အီဇနီးရှင်းဟှ ဖယ်သူနူး။” ဆိုဘီး သူဟှ မေးတော်မူလေဟှယ်။
30ယေရှုဟှ “လူတယော့‑က်ဟှာ ယေရုရှလင်ဗြို့ဟှနေ ယေရိခေါဗြို့ဟှို ဆင်းလာဟှူ ခီမာ မ္လတိုက်ခံရလေဟှယ်။ မ္လလေဟှာ သူ့ရဲ့ အန်းဂီးလေဟှို ခလွတ်ဘီး၊ ရိုက်သတ်ဘီးဟှာ သေခါနီးနီးမှ ပစ်ဟှားခဲ့ဟှယ်။ 31အယ်မျိုးဖြစ်ဘီးန ယဇ်ပုရောဟိတ် တစ်ပါးဟှာ အယ်လမ်းတိုင်း ရော့‑က်လာဟှူ ခီမာ အယ်လူဟှို ဗြင်ဘေမဲ့လည်း ရှောန်ဘီးဟှာ သွားလေဟှယ်။ 32အယ်မျိုးဘဲ့ လေဝိတယော့‑က်လည်း ရော့‑က်လာဘီး အယ်လူဟှို ကေ့ဘီးန ရှောန်ဘီးဟှာ သွားလေဟှယ်။ 33အယ်ဘေမဲ့ ရှမာရိလူမျိုး တယော့‑က်ဟှာ ခရီးသွားရင်းန အယ်လူရှိဟှူ နေရာဟှို ရော့‑က်လာဟှယ်။ သူဟှာ အယ်လူဟှို ဗြင်လိုက်ဟှူ ခီမာ သနားစိလေ ဖြစ်လာဟှယ်။ 34သူဟှာ အယ်လူနားဟှို သွားဘီး အယ်လူရဲ့ ဒန်ရာလေထတ်ဟှို ဆီနဝိုင်ဟှို လောန်းထဲဘီးဟှာ ဝတ်န စဲပေးလေဟှယ်။ အယ်ဘီးန သူ့ရဲ့ မြည်းထတ်ဟှို တန်ဘီးန လူနာဟှို ပြုစုပေးဟှို့တွပ် တည်းခိုခန်းဟှို ခေါ်ဟှားဟှယ်။ 35နတ်ကီးတိုင်မာ သူဟှာ ဇရှင်ဟှို ငွေဒန်းဂါးနှေ့ပ္လား ပေးဘီး ‘အယ်လူဟှို ကေ့ရှုပြုစုပေးပါ။ နော့‑က်ထပ် ကူက္လဇာလေဟှို ငါပ္လန်လာဟှူ ခီမာ ပေးမယ်’ ” ဆိုဘီး ပြောလေဟှယ်။
36ယေရှုဟှာ “အယ်လူလေ သောင်းယော့‑က်ထဲမာ ဖယ်သူဟှာ မ္လတိုက်ခံရသူန အီဇနီးရှင်းဖြစ်ဟှယ် ဆိုဘီး နန်ထန်နူး။” ဆိုဘီး မေးတော်မူလေဟှယ်။
37ကျမ်းတတ်ဆရာဟှ “လူနာဟှို သနားဟှူ လူဖြစ်ဟှယ်” ဆိုဘီး လျှော့‑က်လေဟှယ်။
ယေရှုဟှ “အယ်ဆိုဟှာ နန်သွားဘီး အယ်မျိုးလောက်ပါ” ဆိုဘီး မိန့်တော်မူလေဟှယ်။
မာသန မာရိအီဟှို အီးခ္လယ်သွားဟှူကြောန်း
38 #
ယော ၁၁.၁
ယေရှုန တဗဲ့တော်လေဟှာ ခရီးသွားနေဒူးမာ ဝါတဝါဟှို ဝမ်ဂေ့လေဟှယ်။ အယ်ဝါမာ မာသနာမယ်ရှိဟှူ မီးမဟှာ သူ့အီမာ ကိုယ်တော့်ဟှို ဧည့်ခံလေဟှယ်။ 39မာသမာလည်း မာရိနာမယ်ရှိဟှူ ညီမတယော့‑က်ရှိဟှယ်။ အယ်ညီမဟှာ သခင်ဘုရားရဲ့ ခေတော်ရင်းမာ ထိုင်ဘီးန ကိုယ်တော်ရဲ့ စကားတော်ဟှို နားထောန်နေလေဟှယ်။ 40မာသဟှာ ဧည့်ဝတ်ပြုရှင်းမှုလေကြောန့် စိပူပန်ဘီး ကိုယ်တော့်ဟှို “သခင်၊ ကျွန်မဟှာ ဧည့်ဝတ်ပြုရှင်းလောက်ဟှို လောက်နေရဟှူ ခီမာ ကျွန်မညီမဟှ ကိုယ်တော်ရဲ့ ခေတော်ရင်းမာ လာထိုင်နေဇာဟှာ မျှတမှုရှိဘဲ့လော။ ကျွန်မဟှို ကူညီပေးဟှို့ သူဟှို ပြောပေးအူး!” ဆိုဘီး လျှော့‑က်လေဟှယ်။
41သခင်ဘုရားဟှ “မာသ၊ မာသ! နန်ဟှာ အယ်မူကိစလေတွပ်ဘဲ့ စိုးရိမ်ပူပန်နေဟှယ်။ 42အယ်ဘေမဲ့ နန့်မာ လိုအပ်နေဟှူဇာ တခုဘဲ့ရှိဟှယ်။ မာရိဟှာ ပိုကောန်းဟှူဇာဟှို ဝီးချယ်ဟှားပီးဘီ။ အယ်မူဇာဟှို သူ့နားဟှနေ ဖယ်သူလည်း ယူရဟှို့ မှုဟှ” ဆိုဘီး သူ့ဟှို မိန့်တော်မူလေဟှယ်။
Currently Selected:
လုကာ 10: NTDWB24
Highlight
Share
Copy
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.
