တမန်တော် 7
7
သတေဖန်ရဲ့ ပြောကြားချစ်
1အယ်ခီမာ ယဇ်ပုရောဟိတ်မန်းဟှ “အယ်စွပ်စွဲချစ်ဟှာ မှန်ဘဲ့လော” ဆိုဘီး သတေဖန်ဟှို မေးဟှယ်။
2သတေဖန်ဟှ “ညီကိုလေန ဖလေ၊ ငါ့စကားဟှို နားထောန်ဂေ့ပါ။ နို့လေရဲ့ဖ အာဗြဟံဟှာ ခါရန်ဗြို့မာ နေဟှို့တွပ် သွားခန်မာ မေသောပေါတာမိပြည်မာ ရှိနေဒူးမာ ဘုရားသခင်ရဲ့ ဖောင်းသရေတော်ဟှာ သူ့နားမာ ပေါ်လာဘီး 3ဘုရားသခင်ဟှ ‘နန့်ရဲ့ ပြည်န နန့်ရဲ့ မိသားစုဟှို ထားရစ်ဘီးဟှာ ငါပြဟှူ ပြည်ဟှို သွားပါ’ ဆိုဘီး သူ့ဟှို မိန့်တော်မူလေဟှယ်။ 4အယ်ကြောန့် အာဗြဟံဟှာ ခါလဒဲပြည်ဟှနေ ထွပ်လာဘီး ခါရန်ဗြို့မာ နေဟှို့တွပ် သွားလေဟှယ်။ သူ့ဖ သေဟှားဘီးန အယ်ဗြို့ဟှနေ ခု နန်းနို့ နေဟှူပြည်ဟှို ဘုရားသခင်ဟှ ပ္လောန်းခိုင်းလိုက်ဟှယ်။ 5အယ်ဘီးန ဘုရားသခင်ဟှာ အာဗြဟံဟှို အယ်ပြည်မာ ခေခ္လဟှို့ နေရာဟှိုမျှ ပေးဟှ။ အယ်ဘေမဲ့ သူကိုယ်တိုင်န သူ့ရဲ့ သားမ္လေးလေဟှို အယ်ပြည်ဟှို ပိုင်ပေးမယ် ဆိုဘီး ဂဒိပေးလေဟှယ်။ ဘုရားသခင်ဟှာ အယ်မျိုး ဂဒိပေးဟှူ ခီဒူးဟှ အာဗြဟံမာ သားမီးလေ မှေ့သေးဟှ။ 6ဘုရားသခင်ဟှ အာဗြဟံဟှို ‘နန့်ရဲ့ မ္လေးမ္လစ်လေဟှာ နိုင်ငံရပ်ခြားမာ နေရဂေ့လေ့မယ်။ အယ်နိုင်ငံဟှ လူလေဟှာ သူးနို့ဟှို ကျွန်ခံစေဘီးဟှာ နှစ်ပေါန်း ၄၀၀ လောင်းလောင်း ညှဉ်းဆဲဇာဟှို ခံရဂေ့လေ့မယ်။ 7အယ်ဘေမဲ့ ဘုရားသခင်ဟှာ သူးနို့ဟှို ကျွန်ခံခိုင်းဟှူ လူလေဟှိုလည်း ငါစီရင်မယ်။ အယ်ဘီးန နန့်ရဲ့ သားမ္လေးလေဟှာ အယ်ပြည်ဟှနေ လွတ်မြော့‑က်ဂေ့ဘီးဟှာ အယ်နေရာမာ ငါ့ဟှို ကိုးကွယ်ဘီး ဝတ်ပြုဂေ့လေ့မယ်’ ဆိုဘီး ပြောလေဟှယ်။ 8အယ်ဘီးန ဘုရားသခင်ဟှာ ရေဖျားလှီးဇာနဆိုင်ဟှူ ပဋိညာဉ်ဟှိုလည်း အာဗြဟံဟှို ပေးလေဟှယ်။ အယ်ကြောန့် အာဗြဟံဟှာ ဣဇာက်ဟှို မွီးဘီးန ရှစ်ရစ်မြော့‑က်နေ့မာ ရေဖျားလှီးပေးဟှယ်။ ဣဇာက်ဟှာ သူ့သားယာကုပ်၊ ယာကုပ်ဟှာ လူမျိုးဆယ့်နှေ့မျိုးရဲ့ ဘိုးဘေးလေဖြစ်ဟှူ သူ့သား ဆယ့်နှေ့ယော့‑က်ဟှိုလည်း ရေဖျားလှီးပေးလေဟှယ်။
9“ယာကုပ်ရဲ့ သားလေဟှာ သူးနို့ညီ ယောသပ်ဟှို နာလိုဘဲကြောန့် အဲဂုတ္တုပြည်မာ ကျွန်ခံဟှို့တွပ် ရောန်းလိုက်ဂေ့ဟှယ်။ အယ်ဘေမဲ့ ဘုရားသခင်ဟှာ သူ့နတူးဒူ ရှိနေဟှူကြောန့်၊ 10သူ့ရဲ့ ဒေါက်ခဆင်းရဲလေ ထဲဟှနေဘီး ကယ်တန်လိုက်ဟှယ်။ ဘုရားသခင်ဟှာ ယောသပ်ဟှို အဲဂုတ္တုပြည်ရဲ့ ဖာရောမန်းဂီးရှေ့မာ မျစ်နှာသာရစေဟှယ်။ သူ့ဟှိုလည်း ဉာဏ်ပညာပေးလေဟှယ်။ ဖာရောမန်းဂီးဟှာ သူ့ဟှို အဲဂုတ္တုပြည်န သူ့ရဲ့ နန်းတော်တခုလောင်းဟှို အောက်ချောက်မားဖြစ် သူ့ဟှို ခန့်ဟှားလေဟှယ်။ 11အဲဂုတ္တုပြည်န ခါနာန်ပြည်လေမာ စာခေါန်းဗားဘေး ရော့‑က်လာဟှူ ခီမာ လူလေဟှ ရရာတိုင်း ဒေါက်ခရော့‑က်ဂေ့ဟှယ်။ နို့လေရဲ့ ဘိုးဘေးလေမာလည်း စားဇာမှေ့ဂေ့ဟှမ်း။ 12အယ်ဘေမဲ့ အဲဂုတ္တုပြည်မာ စားဇာလေရှိနေဟှယ် ဆိုဇာဟှို ယာကုပ်ကြားရခီမာ သူ့ရဲ့ သားလေဟှို အယ်ပြည်ဟှို ပထမခါ လွှတ်လိုက်ဂေ့ဟှယ်။ 13သူးနို့ဟှာ ဒုတိယခါ ရော့‑က်လာဂေ့ဟှူ ခီမာ ယောသပ်ဟှာ သူ့ညီကိုလေဟှို သူဟှာ ဖယ်လူဖြစ်ဟှယ် ဆိုဇာဟှို ပြောပြလိုက်ဟှယ်။ ဖာရောဟှာ ယောသပ်ရဲ့ မိသားစုကြောန်းဟှို သိဟှားဟှယ်။ 14အယ်ကြောန့် ယောသပ်ဟှာ သူ့ဖ ယာကုပ်နတူးဒူ ခွန်နစ်ဆယ်ငါးယော့‑က်ရှိဟှူ မိသားတစုလောင်းဟှို အဲဂုတ္တုပြည်ဟှို ခေါ်လိုက်ဟှယ်။ 15အယ်ကြောန့် ယာကုပ်ဟှာ အဲဂုတ္တုပြည်ဟှို သွားဟှယ်။ အယ်ပြည်မာဘဲ့ သူ့န သူ့သားလေဟှာ သေဟှားဂေ့ဟှယ်။ 16သူးနို့ရဲ့ လောန်းလေဟှို ရှေခင်ဗြို့ဟှို ယူဆောန်ဟှားဘီးဟှာ အာဗြဟံဝယ်ဟှားရစ်ဟှူ သန်းခ္လိုင်းမာ သင်္ဂြိုဟ်ဂေ့ဟှယ်။ အယ်သန်းခ္လိုင်းဟှ ဟာမော်ရဲ့ သားလေနားဟှ ကပ်န ဝယ်ဟှားဟှယ်။
17“ဘုရားသခင်ဟှာ အာဗြဟံဟှို ပေးဟှားဟှူ ဂဒိတော်ဟှို ပ္လဲ့ဇောင်ဟှို့တွပ် ခီနီးလာဟှူ ခီမာ အဲဂုတ္တုပြည်မာ ဣသရေလ လူလေဟှို လူဦးရေတိုးပွားစေဟှယ်။ 18အယ်ခီမာ အဲဂုတ္တုပြည်မာ ယောသပ်ဟှို သိဘဲဟှူ မန်းဂီးတပါး ပေါ်လာဟှယ်။ 19အယ်မန်းဂီးဟှာ နို့လေရဲ့ ဘိုးဘေးလေဟှို လှည့်ဇားဘီး သူးနို့ဟှို နှိစစ်ဂေ့ဟှယ်။ သူးနို့ရဲ့ သားဂန်းဟှားလေဟှိုလည်း သေစေဟှို့တွပ် အီပ္လန်မာ ပစ်ဟှားခိုင်းဟှယ်။ 20အယ်ခီကာလမာ မောရှေဟှာ မွီးလာဟှယ်။ မောရှေဟှာ ဘုရားသခင်ရှေ့မာ ရရာတိုင်း နားလူဘွယ်ကောန်းဟှူ သားဂန်းဟှား ဖြစ်ဟှယ်။ သူ့မိသားစုရဲ့ သောင်းလ လောင်းလောင်း စောန့်ရှော့‑က်ဇာဟှို ခံရဘီး၊ 21သူဟှာ အီပ္လန်မာ ပစ်ဟှားခံရဟှူ ခီမာ ဖာရောမန်းဂီးရဲ့ သမီးတော်ဟှ သူ့ဟှို သားနေန မွီးဇားလေဟှယ်။ 22မောရှေဟှာ အဲဂုတ္တုလူလေရဲ့ တတ်ပညာ ဂူလောင်း သန်ဟှားဘီး နှလောင်းရည်၊ လတ်ရောင်းရည်လေန ပ္လဲ့ဇောင်ဟှူလူ ဖြစ်ဟှယ်။”
23“သူဟှာ သတ်လေးဆယ်ပ္လဲ့ဟှူ ခီမာ သူ့ညီကိုလေဖြစ်ဟှူ ဣသရေလ လူလေနားဟှို သွားလည်ဟှို့တွပ် စိဆောင်းဖြတ်လိုက်ဟှယ်။ 24ဣသရေလလူ တယော့‑က်ဟှို အဲဂုတ္တုလူ တယော့‑က်ဟှ ညှဉ်းဆဲနေဇာဟှို ဗြင်ဟှူ ခီမာ သူ့လူဖတ်ဟှနေ ဝမ်ကူညီဘီး အဲဂုတ္တုလူဟှို သတ်လိုက်ဘီးဟှာ ဂလဲ့စားချေလေဟှယ်။ 25မောရှေဟှာ သူ့ရဲ့ ညီကို မောန်နှမလေဟှို ကယ်တန်ဟှို့တွပ် သူးနို့ဟှို ဘုရားသခင်ဟှ လွှတ်လိုက်ဟှယ် ဆိုဇာဟှို သူးနို့လေဟှ နားလည်ဂေ့လေ့မယ် ဆိုဘီး ထန်ဟှားဟှယ်။ အယ်ဘေမဲ့ အယ်လူလေဟှာ နားလည်ဂေ့ဟှ။ 26နော့‑က်တနေ့မာ ဣသရေလလူ နှေ့ယော့‑က်ဟှာ ရန်ဖြစ်နေဂေ့ဇာဟှို ဗြင်ဟှူ ခီမာ မောရှေဟှ ‘နန်းနို့ဟှာ ညီကိုရှင်းဖြစ်ဘီးဟှာ ဖြားဖြစ်ကြောန့် ရန်ဖြစ်နေဂေ့နူး’ ဆိုဘီး သူးနို့ဟှို မေးဘီး ရန်ငြီးဟှို့တွပ် ကြိုးစားလေဟှယ်။ 27အယ်ဘေမဲ့ နိုင်ကျင့်နေဟှူလူဟှာ မောရှေဟှို ဘေးဟှိုတွန်းလိုက်ဘီးန ‘နို့လေဟှို တရားစီရင်ဟှို့တွပ် အောက်ချောက်မားဖြစ် နန့်ဟှို ဖယ်သူဟှ ခန့်ဟှားနူး။ 28နတ်ကီးဒူးဟှ အဲဂုတ္တုလူ တယော့‑က်ဟှို သတ်မျိုး ငါ့ဟှိုလည်း သတ်ဟှို့လော’ ဆိုဘီး မေးဟှယ်။ 29မောရှေဟှာ အယ်စကားဟှို ကြားဟှူ ခီမာ အဲဂုတ္တုပြည်ဟှနေ ထွပ်ပ္လေးဟှားဘီး မိဒျန်ပြည်မာ နေလေဟှယ်။ အယ်ပြည်မာ သားနှေ့ယော့‑က်ဟှို ရလေဟှယ်။
30“နှစ်လေးဆယ် ကြာဘီးန သိနာတောန်နားဟှ ကန္တာရထဲမာ မီးလောန်နေဟှူ ချောင်ထဲမာ ကောန်းဂန်တမန် တပါးဟှာ မောရှေဟှို ကိုယ်ထန်ရှားပြလေဟှယ်။ 31အယ်မူဇာဟှို ဗြင်ဟှူ ခီမာ မောရှေဟှာ ရရာတိုင်း အံ့ဩဘီးန ရှင်းရှင်းလန်းလန်းဟှား ဗြင်ရဟှို့တွပ် နီးနားဟှို တိုးဟှားဟှယ်။ အယ်ဘေမဲ့ ဘုရားသခင်ဟှ 32‘ငါဟှာ နန်းနို့ ဘိုးဘေးလေရဲ့ ဘုရားသခင်၊ အာဗြဟံ၊ ဣဇာက်၊ ယာကုပ်ရဲ့ ဘုရားသခင် ဖြစ်ဟှယ်’ ဆိုဘီး သံတော်ဟှို ကြားရဟှူကြောန့် မောရှေဟှာ ကြော့‑က်လန့် တူလှောက်ဟှားဘီး ကေ့ဟှို့ရဲဘဲ ဖြစ်ဟှားဟှယ်။ 33ဘုရားသခင်ဟှ ‘နန် ခေနန်းဟှားဟှူ နေရာဟှာ သန့်ရှင်းဟှူမ္လေ ဖြစ်ဟှယ်။ နန့်ခေနပ်ဟှို ခလွတ်လိုက်။ 34အဲဂုတ္တုပြည်မာ ငါ့လူမျိုးလေဟှို နှိစစ်ခံနေရဇာဟှို ငါဗြင်ရဟှယ်။ သူးနို့ရဲ့ ညည်းတွားသံလေဟှို ငါကြားရဟှယ်။ သူးနို့ဟှို ကယ်တန်ဟှို့တွပ် ငါဆင်းလာဘီ။ အယ်ကြောန့် ခုလာဟှယ်။ နန့်ဟှို အဲဂုတ္တုပြည်ဟှို ငါလွှတ်မယ်’ ဆိုဘီး မောရှေဟှို မိန့်တော်မူလေဟှယ်။”
35“မောရှေဟှာ ဣသရေလလူမျိုးလေရဲ့ ပစ်ပယ်ခံရဟှူလူ ဖြစ်ဟှယ်။ အယ်ဘီးဟှာ ‘နို့လေဟှို တရားစီရင်ဟှို့တွပ် အောက်ချောက်မားဖြစ် နန့်ဟှို ဖယ်သူဟှ ခန့်ဟှားနူး’ ဆိုဘီး အယ်လူလေရဲ့ မေးဇာဟှိုလည်း ခံရဟှယ်။ အယ်ဘေမဲ့ သူဟှာ ဣသရေလ လူမျိုးလေဟှို အောက်ချောက်ဟှို့တွပ် မီးတော့‑က်နေဟှူ ချောင်ထဲမာ ထန်ရှားဟှူ ကောန်းဂန်တမန် တပါးရဲ့ ကူညီန ဣသရေလလူမျိုးလေ လွတ်မြော့‑က်ဟှို့တွပ် ဘုရားသခင် လွှတ်လိုက်ဟှူလူ ဖြစ်ဟှယ်။ 36သူဟှာ အဲဂုတ္တုပြည်န ပန်လယ်နီမာရော၊ နှစ်လေးဆယ် လောင်းလောင်း တောကန္တာရထဲမာရော အံ့ဩဘွယ်ရာန နိမိတ်လတ်ခဏာလေဟှို ပြဘီး ဣသရေလ လူမျိုးလေဟှို အဲဂုတ္တုပြည်ဟှနေ ခေါ်ဆောန်လာဟှူ လူဖြစ်ဟှယ်။ 37အယ်မောရှေဟှာ ဣသရေလ လူမျိုးလေဟှို ‘နန်းနို့ရဲ့ ညီကိုလေထဲမာ ငါ့နတူဟှူ ပရောဖက်တပါးဟှို ဘုရားသခင်ဟှာ နန်းနို့တွပ် ပေါ်ခိုင်းလေ့မယ်’ ဆိုဘီး ပြောဟှူလူ ဖြစ်ဟှယ်။ 38သူဟှာ တောကန္တာရမာ စုနေဟှူ ဣသရေလ လူမျိုးလေနရော၊ နို့လေ ဘိုးဘေးလေနရော၊ သိနာတောန်ထတ်မာ သူ့ဟှို စကားပြောဟှူ ကောန်းဂန်တမန်နရော တူးဒူရှိနေဟှူလူ ဖြစ်ဟှယ်။ နို့လေဟှို ပြောဟှို့တွပ် ဘုရားသခင်နားဟှနေ သတ်ရှင်စေဟှူ တရားတော်ဟှို ရလာဟှူလူလည်း ဖြစ်ဟှယ်။”
39“အယ်ဘေမဲ့ နို့လေရဲ့ ဘိုးဘေးလေဟှာ သူ့စကားဟှို နားထောန်ဂေ့ဟှ။ သူ့ဟှို ငြင်းပယ်ဘီးဟှာ သူးနို့ရဲ့ စိနှလောင်းဟှ အဲဂုတ္တုပြည်ဟှို ပ္လန်ရှင်ဂေ့ဟှယ်။ 40သူးနို့ဟှာ ‘နို့လေရှေ့ဟှ ကြွဟှားမယ့် ဘုရားလေဟှို နို့လေတွပ် လောက်ပေးပါ။ နို့လေဟှို အဲဂုတ္တုပြည်ဟှနေ ခေါ်ဆောန်လာဟှူ အယ်မောရှေဟှ ဖယ်မျိုးဖြစ်ဟှားဟှယ်ဆိုဇာ နို့လေသိဂေ့ဟှ’ ဆိုဘီး အာရုန်ဟှို ပြောဂေ့ဟှယ်။ 41အယ်ဘီးန သူးနို့ဟှာ နွားသားဂန်းဟှား ရောက်ထုဟှို လောက်ဘီးဟှာ သူးနို့လတ်န လောက်ဟှားဟှူရောက်ထုဟှို ယဇ်ပူဇော်ဘီးဟှာ စားဗွဲသော့‑က်ဗွဲ လောက်ဂေ့ဟှယ်။ 42အယ်ကြောန့် ဘုရားသခင်ဟှာ သူးနို့ဟှို မျစ်နှာလွှဲဘီးဟှာ ကောန်းဂန်ကြယ်တာရာလေဟှို ကိုးကွယ်ဂေ့ဟှို့တွပ် စွန့်ပစ်ဟှားလိုက်ဟှယ်။ ပရောဖက်ကျမ်းမာ”
“‘ဣသရေလ လူမျိုးလေ၊ နန်းနို့ဟှာ တောကန္တာရမာ နှစ်လေးဆယ် လောင်းလောင်း
ယဇ်ကောန်လေဟှို ပူဇော်ဟှို့တွပ်
ငါ့နားဟှို ယူလာဖူးဘဲ့လော။
43နန်းနို့ဟှာ မောလုပ်ရဲ့ တဲန
နန်းနို့ရဲ့ ဘုရား ရှင်ဖန်ရဲ့ ကြယ်လေဟှို သယ်လာဂေ့ဟှယ်။
အယ်ဇာလေဟှာ နန်းနို့ ကိုးကွယ်ဟှို့တွပ် လောက်ဟှားဟှူ ရောက်ထုလေ ဖြစ်ဂေ့ဟှယ်။
အယ်ကြောန့် နန်းနို့ဟှို ဗာဗုလုန်ဗြို့ဟှို ကျော်ဘီးဟှာ ခေါ်ဆောန်ဟှားမယ်’ ဆိုဘီး ရေးဟှားတိုင်းဘဲ့ ဖြစ်လာဟှယ်။”
44“နို့လေရဲ့ ဘိုးဘေးလေတွပ် တောကန္တာရမာ သတ်သေခံဟှူ တဲတော် ရှိဟှယ်။ မောရှေဟှို ဘုရားသခင်ပြဟှားဟှူ ပေါင်ဇံတိုင်း သတ်သေခံဟှူ တဲတော်ဟှို ဆော့‑က်ဂေ့ဟှယ်။ 45နို့လေရဲ့ ဘိုးဘေးလေဟှာ သူးနို့ရဲ့ ဖလေနားဟှနေ အယ်တဲတော်ဟှို မွေဆစ်ခံဘီးဟှာ ဘုရားသခင် နှန်ထုဟှူ လူမျိုးလေရဲ့ ပြည်ဟှို ယောရှုနတူးဒူ ချီတတ်ဘီးဟှာ သီးပိုက်ဂေ့ဟှူ ခီမာ အယ်တဲတော်ဟှို သယ်ဟှားဂေ့ဟှယ်။ အယ်တဲတော်ဟှ ဒါဝိဒ်မန်းဂီး လတ်ထတ်ထိ ရှိနေဟှယ်။ 46ဒါဝိဒ်ဟှာ ဘုရားသခင်ရှေ့မာ မျစ်နှာသာရဟှူလူ ဖြစ်ဟှယ်။ အယ်ဘီးဟှာ ယာကုပ်ရဲ့ ဘုရား#၇.၄၆ ယာကုပ်ရဲ့ ဘုရား၊ တချို့ မူရင်းလတ်ရေးမူလေမာ ဣသရေလလူလေ၊ ဆိုဘီး ပါရှိဟှယ်။ ကိန်းဝပ်ဘီးနေဟှူ ဗိမာန်တော်ဟှို ဆော့‑က်ရဟှို့တွပ် ဘုရားသခင်ဟှို တောန်းရှော့‑က်ဟှယ်။ 47အယ်ဘေမဲ့ ဘုရားသခင်ရဲ့ ဗိမာန်တော်ဟှို ဆော့‑က်ခွမ့်ရဟှူ လူဟှ ရှောလမုန်မန်းဂီး ဖြစ်လေဟှယ်။”
48“အယ်ဘေမဲ့ ဗြစ်ဆောင်းဖြစ်ဟှူ ဘုရားသခင်ဟှာ လူလတ်န ဆော့‑က်ဟှားဟှူ အီမာ ကျိန်းဝပ်ဟှ ဆိုဘီး ပရောဖက်ဟှပြောဟှယ်။”
49ဘုရားသခင်ဟှ “ ‘ကောန်းဂန်ဘောင်ဟှာ ငါ့ရဲ့ ပလ္လင်ဖြစ်ဟှယ်။
မ္လေဂီးဟှာ ငါ့ရဲ့ ခေတန်ခေါင် ဖြစ်ဟှယ်။
နန်းနို့ဟှာ ဖြားအီမျိုး ငါ့တွပ် ဆော့‑က်ဂေ့ဟှို့နူး။
ငါကျိန်းဝပ်နေဟှူ နေရာဟှာ ဖယ်မာနူး။
50ငါကိုယ်တိုင်ဘဲ့ အယ်ဇာလေဟှို
ဖန်ဆင်းဇာ မှုဟှလော’ ”
ဆိုဘီး မိန့်တော်မူလေဟှယ်။
51“နန်းနို့ဟှာ ရရာတိုင်း ခေါန်းမာဂေ့ဟှယ်! နန်းနို့ စိနှလောင်းဟှာ ဘုရားသခင်ရဲ့ တရားတော်ဟှို ကြားရဟှို့တွပ် နားပန်းဂေ့ဟှယ်! နန်းနို့ဟှာ နန်းနို့ ဘိုးဘေးလေမျိုးဘဲ့ သန့်ရှင်းဟှူဝိညာဉ်တော်ဟှို မြဲဒမ်းဆန့်ကျင်ဂေ့ဟှယ်။ 52နန်းနို့ ဘိုးဘေးလေ ညှဉ်းဆဲဖူးဘဲဟှူ ပရောဖက်လေ ရှိဘဲ့လော။ သူးနို့ဟှာ ဘုရားသခင်ရဲ့ ဖြောန့်မတ်ဟှူစေခံ ကြွလာမယ့် ကြောန်းဟှို ကြိုတန်ဘီးဟောဂေ့ဟှူ ပရောဖက်လေဟှို သတ်ပစ်ဂေ့ဟှယ်။ ခုလည်း နန်းနို့ဟှာ အယ်သခင်ဟှို သတ်လိုက်ဂေ့ဟှယ်။ 53နန်းနို့လေဟှာ ကောန်းဂန်တမန်လေဟှနေ တဆင့် ပေးလိုက်ဟှူ ပညတ်တော်ဟှို ရဘေမဲ့ အယ်ပညတ်တော်ဟှို လိုက်နာဂေ့ဟှ” ဆိုဘီး သတေဖန်ဟှ ပြောလေဟှယ်။
သတေဖန်ဟှို က္လော့‑က်ခဲန ပစ်ဂေ့ကြောန်း
54ယုဒတရားလွှတ်တော် ဖွဲ့ဝမ်လေဟှာ အယ်စကားဟှို ကြားရဟှူ ခီမာ ရရာတိုင်း ဒေါသထွပ်ဘီးဟှာ အံက္လိနေဂေ့ဟှယ်။ 55သတေဖန်ဟှာ သန့်ရှင်းဟှူဝိညာဉ်တော်န ပ္လဲ့ဝဘီး ကောန်းဂန်ဟှို ကေ့လိုက်ဟှူ ခီမာ ဘုရားသခင်ရဲ့ ဖောင်းသရေတော်န ဘုရားသခင်ရဲ့ ညာဖတ်မာ ယေရှုရပ်နေဇာဟှို ဗြင်နေရဟှယ်။ 56သတေဖန်ဟှ “ငါဟှာ ကောန်းဂန်ပွမ့်နေဇာန လူ့ရဲ့သားဟှာ ဘုရားသခင်ရဲ့ ညာဖတ်မာ ရပ်နေဇာဟှို ငါဗြင်ရဟှယ်” ဆိုဘီး ပြောဟှယ်။
57အယ်လူလေဟှာ သံက္လယ်ဂီး အော်ဘီးဟှာ သူးနို့ရဲ့ နားလေဟှို လတ်န ပိဟှားဘီးဟှာ သတေဖန်နားဟှို တရှီထိုး ပ္လေးလာဂေ့ဘီးဟှာ၊ 58သူ့ဟှို ဗြို့ပ္လန်ဟှို ဆွဲထုဘီးန က္လော့‑က်ခဲန ပစ်ဂေ့ဟှယ်။ သိသတ်သေလေဟှာ သူးနို့ အန်းဂီလေဟှို ရှောလုနာမယ်ရှိဟှူ လူငယ် တယော့‑က်နားမာ ထားရစ်ဂေ့ဟှယ်။ 59သူးနို့ဟှာ က္လော့‑က်ခဲန ပစ်နေဟှူ ခီမာ သတေဖန်ဟှာ “သခင်ယေရှု၊ ကျွန်တော့်ရဲ့ ဝိညာဉ်ဟှို လတ်ခံတော်မူပါ” ဆိုဘီး ဆုတောန်းဟှယ်။ 60သူဟှာ ဒူးထော့‑က်ဘီးဟှာ “သခင်ဘုရား၊ သူးနို့ရဲ့ ပြစ်ဟှို ခွမ့်လွှတ်ပေးပါ ဆိုဘီး သံက္လယ်ဂီး အော်ဘီးန သေဟှားလေဟှယ်။”
Currently Selected:
တမန်တော် 7: NTDWB24
Highlight
Share
Copy
Want to have your highlights saved across all your devices? Sign up or sign in
The New Testament in Dawei Language © The Word for the World and the Dawei Bible Translation Committee, 2024.
