Matius 3
3
Yohanes Mangadiris nafwibar Ratu Ni ngribatnir nema tomwatar rasusan dalmir la rlangun Ray Silai
3:1-12
(Mrk. 1:1-8; Luk. 3:1-18; Yoh. 1:19-28)
1Ngarkar fir a relak, Yohanes mangadiris nma ain letkape na propinsi Yudea. Na iane i ntabw ma nafwibar Ratu Ni ngribatnir ber tomwat ngayadin. 2I nfalak, “Ka mtyate mir salar, fali to dodo nbal e Ratu neluk Rai ma nfarete kmi lo.”#Mrk. 1:15 3Ni botuan e Yohanes mangadiris ye ma nabi Yesaya nfalak na i na luryain a ne. Nabi Yesaya nfalak farye:
“Keta tomwatar sa nfalere na ain letkape feti:
‘Misusan dalamtene ber Mangnrur Silai,
ma miflyonri dalamtene ma keta I nmpan nof a ne.’”#Yes. 40:3
4Yohanes biase nfonak rabit melawas ma rose rof unta fuluny. Ma ni bebebe e rose rof binatang kulit ma ni tnyame e tokdise ma wenan.#2Raj. 1:8; Mrk. 1:6 5Noak a ne tomwatar yadin rma ma rakmat Yohanes. Sir rma rof Yerusalem, propinsi Yudea ni kateman ma rof pnuar monuk ma ramin wer Yordan seriny baldu. 6Sir rma ma rakmat Yohanes ma ryoding nir salar betno i nadiris sir na wer Yordan.
7Noak a ne tomwat Farisyar ma tomwat Sadukyar yadin ramin iane nbal. Sir rma iane nema Yohanes nadiris sir a nbal. Nempa noak ma nsalan sir e i nfalak, “Hei tomwat yatkar a kmi! Mir adat farlan manunu. Ka kete mdyaun feti radiris a kmi mpa Ratu to nukun a kmi.#Mat. 23:33 8Mpa farlan botuan feti mtyate mir salar lo, ka mfyatutu mir adat ngamonar na mir momorip. 9Ma ka kete mdyaun feti keta Ratu to nukun a kmi fali empmir ber Abraham. Mdyengar ma kfwalak ber a kmi, Ratu Ni kuase ma nose batyar ye fen Abraham empuny nusiny.#Luk. 3:8; Yoh. 8:33 10Ratu nose ma nukun tomwatar ma to rtate nir salar ma to rfatutu nir adat ngamonar. Ratu nose ma nukun sir feleles farlan tomwate ma nomat kmwayan ma nose ma nketan katutun nor wakrir monuk. Katutun ma bunir to rangafel keta rketan ma ryebas far au dalam.#Mat. 7:19 11Yakw kal weye la kudiris a kmi, neluk faniak feti mtyate mir salar lo. Nempa tomwat sa ma nlarat yakw ma nma ye, keta nal Ratu Smwangtany ma au, ma nadiris a kmi. Ma Ni kuase nlengan nof yakw ma ktwatar Ni sabatwemar motak e to ubangw. 12Ratu nose ma nakese tomwatar ma rose rlarat Ni mpempeang, nof tomwatar ma to rose rlarat Ni mpempeang. Iane feleles farlan ma nal lipan ma ntaf gandum ma nakese isnir nof kiktir. Ma gandum isnir e, keta I nabutin na lumbung, ma kiktir e, nyebas far au ma nfolur dedesar.”
Yohanes nadiris Yesus
3:13-17
(Mrk. 1:9-11; Luk. 3:21-22)
13Noak a ne Yesus nof propinsi Galilea ma nti wer Yordan. I nti nakmat Yohanes ma ntak ma nadiris I. 14Nempa Yohanes to nlangun Ni tatake ne fali ndaun feti i to ubany. Ne nfalak, “Ni botuan e ka Ko mudiris yakw, ma safema Ko mukmat yakw ma kudiris Ko?” 15Nempa Yesus nfalak, “Mose mlwarat motak safe ma kfwalak ye. Kit tose farye iane feti tose tlarat Ratu Ni mpempeang.” Ne Yohanes nadiris Yesus. 16Lama Yohanes nadiris Yesus, I nbie nof weye dalam. Metryat e langit ntakbanril ma Yesus nsalan Ratu Smwangtany ma nose felany farlan manik merpati ma ntompur I. 17Ne rdengar Ratu liriny nof surga ma nfalak, “I ye Yakw Anakw ma kwamis I, ma nafsenange dalangw.”#Mat. 12:18; Mrk. 1:11; Luk. 9:35
Currently Selected:
Matius 3: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.