Matius 28

Ratu nafmorip a nbali Yesus nof Ni mamate

28:1-10

(Mrk. 16:1-8; Luk. 24:1-12; Yoh. 20:1-10)

1Lama ler Sanari omp, na Minggu bobolisin makrokap, Maria Magdalena ma Maria walyetar a ne rti rsalan Yesus Ni kubur. 2Metryat e ruku silai fali Ratu Ni malaektar sa ntompur nof surga. I nma ma nlawe bati ma nepat kubur ne ma namtoran bati ne das. 3I felany farlan fitik, ma ni rabit nangfuty resi. 4Ma mangajakar a ne ramtaut resi ma rngangasar. Ne sir rfufw na ompak farlan mangmwatar.

5Nempa malaekat a ne nfalak ber batar a ne, “Kete mimtaut, yakw kufai feti kmi minriak Yesus ma rsangwalu I a ne. 6I to namin ye, I nmorip a nbali lo farlan ma nfalak a ne. Ma mya ma msyalan ain ma rfele I a ne. 7Mpa misnyalik ma mbyali kmi, ma mfyalak ber Ni manglartar feti I nmorip a nbali lo. Ma I nbalun ma nti Galilea lo, mpa keta mitungan myor I a na iano. Ka minremi safe ma kfwalak ber a kmi.”

8Sir rasnyalik ma rti a rtate kubur ne. Ma boloka ramtaut nempa dalmir a rsenang resi nbal. Ma sir rafla rasnyalik ma rti rafbotin kabanir a ne ber Yesus Ni manglartar.

9Metryat e Yesus natungan nor sir ma nfalak, “Ngamone ber a kmi!” Ne rma ma rlosir I ma rkoke emnir ma rsatngur ber I. 10Ne Yesus nfalak ber sir, “Kete mimtaut, mbyali kmi ma mfyalak ber wangur ma ralele Yakw ne, ma rti Galilea. Na iano keta sir rsalan Yakw.”

Suldadwar rafbotin safe ma rsalan na Yesus

28:11-15

11Batar a ne rose rlarat safe ma Yesus nfalak ber sir. Noak ma batar a ne lolone dalamtene let e, suldadwar ma rajake Yesus Ni kubur a ne rti kote Yerusalem ma rafbotin safe-safe ma rsalan a ne ber mangsomp ulnir. 12Lama raale andaun ror maken Yahudyar monuk, sir rtetak ma ral dotyar yadin ber suldadwar a ne, nema kete rafbotin safe ma rsalan a ne ber tomwat walyetar. 13Ma rfalak ber sir, “Ka mfyalak ber tomwatar farye, noak ma kam marwa na nronram a ne Yesus Ni manglartar rma ma ramnang I tenany. 14Ma farlan gubernur Pilatus ndengar ngrie ne, la kam matanuk mor i nema ka kete nukun a kmi.”

15Suldadwar ral doit a ne, ma rose rlarat farlan safe ma mangsomp ulnir rfalak ber sir. Mpe ansaur na Yesus Ni manglartar ma ramnang I tenany a ne nsor monuk tomwat Yahudyar terik lere ye.

Yesus nfarete Ni manglartar ma rafwibar Ibar Ngamone

28:16-20

16Ne Yesus Ni manglarat buti resin lese ne rti Galilea na lenran ma Yesus nfatutu ber sir a ne lo.#Mat. 26:32; Mrk. 14:28 17Noak ma sir rsalan I, sir rsatngur ber I, nempa tomwatar ketnir to ralele botuan a fuky feti I a ne Yesus. 18Ne Yesus nti nlosir sir ma nfalak, “Amangw nal monuk kuase ber Yakw lo ma kfwarete surga ma saryamprene. 19Mpa mtyi mikmat nusar monuk na saryamprene ma miftutu sir nema reluk Ningw manglartar. Ma midiris sir myor Ame, Anaky ma Ratu Smwangtany ngarnir.#Kis. 1:8 20Ma miftutu sir ma rose rlarat safe-safe monuk ma kfwalak ber a kmi a ne. Ma ka mifai feti Yakw kor a kmi dedesar terik ma ler famudi.”

Currently Selected:

Matius 28: YMD

Highlight

Copy