Matius 25

Tnyanuk pupule na batdare buti

25:1-13

1Yesus nfalak ber Ni manglartar, “Noak ma Yakw, Tomwate Anaky kweluk Rai ma kfwarete saryamprene, iane farlan tnyanuk pupule sa farye: Ler sa e batdare buti ronr nir damrar ma rti rkakal merwan mangafsaw beberi.#Luk. 12:35 2Nof batdarar a ne, batar lim a rmod, ma lim e nir andaun ngamone. 3Batdarar lim ma rmod a ne ronr nir damrar, nempa to ronr nir ngule ma nres. 4Ma batdarar lim ma nir andaun ngamone ne ronr nir damrar, ma ronr ngule ma nres a na nir bulyar. 5Nempa merwan mangafsaw beberi ne to weni nma, mpa batdarar a ne matnir a rtump nwayat ma rarwa.

6Noak ma nronram fetwalan e rdengar ma tomwat sa nafwayak, ‘Hei merwan mangafsaw beberi nma lo mpa mya ma tkakal i!’ 7Mpe batdarar a ne rpote sir ma rasusan nir damrar. 8Ne batdarar ma rmod a ne rfalak ber batdarar ma nir andaun ngamone ne, ‘Myal mir ngule fen rufuky ber kam nrela, fali mamy damrar ketla rmat.’ 9Nempa batdarar ma nir andaun ngamone ne rfalak, ‘To bise fali keta ngule ye to dengan kit monuk, mpa ni ngafele e mtyi msyelir myof tomwatar ma rfenri ngule.’ 10Nempa noak ma rti rselir ngule e merwan mangafsaw beberi ne nma. Ne batdarar ma nir andaun ngamone ne rasusan monuk sir lo, mpa raktem merwan mangafsaw beberi ne rti festa dalam, ma rfolat fofolat.

11Mpene batdarar ma rmod a ne rma. Noak ma sir rsalan e fofolat a ne naktem lo mpa rfalak, ‘Maken, mtwulung ma mbwanril fofolat ber kam a fuky nrela!’ 12Nempa merwan mangafsaw beberi ne nfalak, ‘Ni botuan e yakw to kufai kmi.’”#Luk. 13:25

13Ne Yesus nfalak a nbal, “Mpa ka mijak dedesar, fali to mifai feti bengfir e ni tewat ma kmwa.”

Tnyanuk pupule na mangkaryayar ma rngabo ma mangkaryayar ma rsisrat

25:14-30

(Luk. 19:12-27)

14Yesus nfalak, “Noak ma Yakw, Tomwate Anaky kweluk Rai ma kfwarete saryamprene iane feleles farlan ansaur ye. Ler sa e bosar sa nose ma nti naflolwain far nus dodo. I to nti a fuky e, ntar ni mangkaryayar ma nal ni kabanir ma doit ber sir ma rajake ma rafmpwane nbal. 15Ne i nsaman ni dotyar a ne ber sir nlarat nir fakoran mpane. Mangkarya sa e i nal doit mase ribun lim, ma sa e i nal doit mase ribun du, ma sa nbal e i nal doit mase ribun lese. Lama i nsaman monuk dotyar a ne ber sir e, naflolwain far nus dodo. 16Ne mangkaryae ma nonri doit mase ribun lim a ne nbali i. I nafmpwane dotyar a ne ma raosanak terik ma doit mase ribun lim a nbal. 17Ma mangkaryae ma nonri doit mase ribun du a ne nbali i. I nafmpwane ni dotyar a ne ma raosanak terik ma doit mase ribun du a nbal. 18Nempa mangkaryae ma nonri doit mase ribun lese ne nbali i, ma nkal lobang ma namudim doit mase ma ni bos a nal ber i a ne.

19Dodo desar a betno bos a ne nbali i. Noak ma nbali i e nluan tomwatar ma rtar ni mangkaryayar ma nsaman dotyar ber sir a ne, nema nenrat feti rafmpwane dotyar a ne farpe. 20Ne mangkaryae ma nonri doit mase ribun lim a ne nma. Ne nfalak, ‘Maken, doit mase ribun lim ma mwal ber yakw ne naosanak terik ribun lim lo.’ 21Ne ni bos a ne nfalak, ‘Safe ma mose ne nangafel desar! Ko ye mangkarya ngamone ma bise ma kulele ko. Yakw kulele ko ma murus kabain angkir lo, mpa keta kulele ko a nbal ma murus kabain silayar. Mwa ma taktem a taosfesta ma tampumpuki kit.’

22Ne mangkaryae ma nonri doit mase ribun du a ne nma. Ne nfalak, ‘Maken, doit mase ribun du ma mwal ber yakw ne naosanak terik ma doit mase ribun du lo.’ 23Ne ni bos a ne nfalak, ‘Safe ma mose ne nangafel desar! Ko ye mangkarya ngamone ma bise ma kulele ko. Yakw kulele ko ma murus kabain angkir lo, mpa keta kulele ko a nbal ma murus kabain silayar. Mwa ma taktem a taosfesta ma tampumpuki kit.’ 24Ne mangkaryae ma nonri doit mase ribun lese ne nma nbal ma nfalak, ‘Maken, yakw kufai feti ko to nim lolompang ber tomwatar. Ma ko mnengar motak ma mwal tomwatar nir yatin kotkir. Ma mwal let isnir nof lete ma ko to mtwanam a nbal. 25Ma kumtaut ko, mpa kwal lobang betno kumudim doit ma mwal ber yakw ne. Jo mwal a mbwali nim doit ye!’ 26Ne bos a ne nfalak ber i, ‘Hei mangkarya yatak ma sisrate ko! Ko mufai lo nre, feti yakw knwengar motak ma kal tomwatar nir yatin kotkir, ma kal let isnir kof lete ma to ktwanam. 27Farane e safema to mwal ningw doit a ne ber tomwat walyetar ma rafmpwane, nema noak ma kbwali yakw e keta kal doit numur ma naosanak a ne?’ 28Mpe bos a ne nfalak ber mangkarya walyetar, ‘Myal doit a ne myof i ma myal ber mangkaryae ma ni doit mase ribun buti ne.’ 29Fali tomwate ma nafmpwane kabanir ma ral ber i a ne fen ngamone, keta ral a rtafal ber i a nbal, nwayat ma ni kabanir a ne rtafal ma nlie nlengan desar. Nempa tomwate ma to boany nal ma nafmpwane kabanir ma ral ber i a ne fen ngamone, keta ral a rbali nir kabanir monuk rof i, boloka kabanir a ne lan rufuky.#Mat. 13:12; Mrk. 4:25; Luk. 8:18 30Ma mangkaryae ma to ubany a ne ka myebas i far makrokap dalam desar. Na iano keta i ntasing dedesar ma nkoman suse silai.”#Luk. 19:11-27#Mat. 8:12; 22:13; Luk. 13:28

Yesus nafbotin na lere ma keta I ntetak tomwatar nir ngriar

25:31-46

31Yesus nfalak a nbal, “Noak ma Yakw, Tomwate Anaky kmwa keta kumtoran Ningw kadere ma idak resi. Ma keta kmwa kor Ningw dadangin ma malaektar monuk ror Yakw.#Mat. 16:27; 19:28 32Ma keta kufbwurat tomwatar rof nusar monuk na soungwlury. Ma keta kukese sir, farlan domba nruany ma nakese dombayar nor mpimpyar. 33Ma keta kukese tomwatar ma rose rlarat Ratu Ni mpempeang a ne na seringw fian, ma tomwatar ma to rose rlarat Ratu Ni mpempeang a ne na seringw bayal.” 34Ma Yakw ma kweluk Rai ne keta kfwalak ber sir ma ramin seringw fian a ne, “Kmi ma Amangw nberkat a kmi a ne mya ye. Mya ma mimin Ningw faret ain. Yakw knwau ain ye ber a kmi, ntabw nof ma kose saryamprene. 35Fali noak ma Yakw kumlafar, kmi myal tnyame ber Yakw. Noak ma kumwes, kmi myal weye ber Yakw. Ma noak ma Yakw kweluk tomwat mangum, kmi mlyangun Yakw na mir das. 36Noak ma to kfwonak Yakw, kmi myal rabit ber Yakw. Noak ma kufanas, kmi msyalan Yakw. Ma noak ma kumin sel e kmi mti msyalan Yakw.”

37Mpe tomwatar ma rose rlarat Ratu Ni mpempeang a ne keta rfalak, “Mangnrure Silai, bengfir e kam msalan ma Ko mumlafar ma mfane Ko? Nre msalan ma mumwes ma kam mal weye ber Ko? 38Ma bengfir e Ko mweluk tomwat mangum ma kam mlangun Ko a na mamy dasar? Nre msalan ma to mfwonak Ko e kam mal rabit ber Ko? 39Bengfir e kam msalan ma mufanas nre mumin sel ma mti msalan Ko? 40Ma keta Yakw ma kweluk Rai ye kfwalak a nbal, ‘Mdyengar fen ngamone safe ma kfwalak ye, ni botuan e safe-safe monuk ma kmi myose ber Ningw soranyar, boloka lan tomwate lese nof sir a ne ma mdyaun feti nawatan, iane feleles farlan ma myose ber Yakw lo.’”

41Ma keta kfwalak a nbal ber sir ma ramin seringw bayal, “Mbyie myof ye. Kmi ye ma Amangw Ratu nose ma suse diat a kmi lo, mpa keta mtyi au ma nfolur dedesar. Au ne ma Ratu nau ber smwangat yatkar nir ulun nor ni malaektar. 42Fali noak ma kumlafar, kmi to myal tnyame ber Yakw. Noak ma kumwes, kmi to myal weye ma kwenum. 43Noak ma kweluk tomwat mangum, kmi to mlyangun Yakw na mir dasar. Noak ma to Ningw rabit, kmi to myal rabit ber Yakw. Ma noak ma kufanas nre kumin sel e to mtyi msyalan Yakw.” 44Ne keta sir rfalak, “Mangnrur Silai, bengfir e kam msalan ma Ko mumlafar, mumwes, mweluk tomwat mangum, to Nim rabit, mufanas, nre mumin sel e to mlangun Ko? 45Mpe keta Yakw kfwalak ber sir, ‘Mdyengar fen ngamone safe ma kfwalak ye, ni botuan e safe-safe ma kmi to myose ber tomwatar sa nof Ningw soranyar ma mdyaun feti nawatan, iane feleles farlan kmi to myose sasaf ber Yakw.’” 46Ne Yesus nfalak a nbal, “Ratu keta nukun tomwat yatkar monuk a ne ma nyebas sir far au ma nfolur dedesar. Nempa tomwatar ma rmorip a rlarat Ratu Ni mpempeang keta ronri momorip dedesar.”#Dan. 12:2

Currently Selected:

Matius 25: YMD

Highlight

Copy