Fúcihum 15

Bapaalaay Atúuha nꞌAburam

1Nan púr to mee, Acehériit mee nalob nꞌAburam nꞌsíyaut. Narogool : « Aburam, jambil úsebi ! Injé ebangal bu gapooyi ban be eseni bacaam báamak. » 2Aburam násuupool arogool : « Acehériit mee, Atúuhaom, tíiŋut bacaamom mara ibajut aleeh ban íjuhut ebaj aleeh. Eliyeseer hara ésuk yara Damaas ho abilaam etun. » 3Nabaañ arogool : « Naŋ min usenutaam mee gabugoor, ájagaga hara yaŋom abile etun fubajom. » 4Acehériit mee narogool : « Haani ! Let ho abili etun, bare aleeh han aw fannai ubile ebaj. » 5Acehériit mee narogool ñeer ápurul bu tíyaŋ. Nabaañ arogool : « Apu úkaken min upin siwuut saasu, néeni aw be éjuh. » Nabenen arogool : « Búbajumi mee mbubile emeeŋ. » 6Aburam gáyinenool Acehériit mee, gucile najogool an átilintiliŋ.

7Acehériit mee nabenen arok Aburam : « Injé emmee Acehériit mee hápurenuli mee nꞌésuk yara Uúr yammee dó Kalide, be eseni mof maamu tan oommee mee jaat, mbil mukaan miiya. » 8Aburam nasonkenool arogool : « Acehériit mee, Atúuhaom, waa ubilaam ecil nímir mof me be ekaan múmbaam ? » 9Acehériit mee narogool : « Uŋarulom buyaan babaje símit sífaajiir, ejaameen yara símit sífaajiir, fújikel fara ésaaja fabaje símit sífaajiir, nꞌelef son élaabaan. » 10Aburam náŋarul sínunkureŋ saasu peepe, namuk so, najis so nꞌetut, nabaŋ ujis waawu ganoogan ngujooŋoor nꞌgapaal go, bare upuu waawu ajisut wo. 11Símomule nsiwaloúl bu nꞌeluu yaayu, Aburam nakam so.

12Nan bunak bujon mee, Aburam naloh gaŋot gáamak, emooc yáamak negongenool jaram ásebi jálako. 13Acehériit mee narok ñeer Aburam : « Mbil úmir mara búbajumi bu galako ejawoora mꞌmof mabiloot ekaan mooliil. Bugo be ekaan emiigeel ban bu gagonceni wátiiŋe símit siceme sibaagiir (400). 14Bare ínje fannaom be etek bugara mof magonceniil mee, ban bugani be épurul dó nꞌfubaj fáamak ró. 15Aburam, fufalleni be ejak, aw be ecet ngufogi, nujow nꞌgásuumaay. 16Nꞌgambac gabaaligen búbajumi bubile ébaañul bu mꞌmof mee. Mufeegáahi emooriit yaayu mútiiŋerut tan bil mee ecil nitegiil. »

17Nan bunak buloh mee, mmooc bíb, sambun nsítip búl etuhoor ujis wara sínunkureŋ saasu nak sikooret. 18No nꞌfunak faafu, Acehériit mee najok bapaalaay bugo nꞌAburam. Narogool : « Búbajumi nibil mee esen mof me ; kábiriŋ fal fara Esípt, káŋ bu nꞌeraal yáamak yan gurege mee Afúrat. 19Gacin dó mee bugo gommee : ekeniit, ekenisiit, ekadimoniit, 20ehiitiit, éperisiit, erefayiit, 21emooriit, ekanaaniit, egirigasiit bugo nꞌéyebusiit. »

Currently Selected:

Fúcihum 15: gsl

Highlight

Copy