Marcos 9

1Lhna aptemak mokhom Jesús:

—Have niapak ankek moklhem'a enenlhet apkellava nak hengke'e, meletsepo nak mokhom elvetangkok hata aknem etnekhak apveske Eniapom Neten akieplomo apmopvana —lhna aptemak.

Apienievekha apiempek Jesús

26 aknem na ntemak akiekai'a m'a, apmeiekho lhnak Jesús neten metaimong akhaiam. Ka apkeliantemekho lhnak Pedro, Jacobo kakpota nhan Juan. Ka apienievekho lhnak apiempek Jesús ma'a napaqtavek apketlhelhma'ak. 3Apmopai'a pankek nak aptaiekha aptalhnema, malha apkelienmoma lhnak. Mamma lhnak apno ietamopai'a apmopai'a nkaqhok nema alienieskama nak. 4Ka akpelapkeskamo lhnak apkelenteiapvei'o Elias kakpota nhan Moises annenga, Jesús nak apkelpaqmetkeskai'ak ma'a. 5Lhna aptemak apkanemo Pedro Jesús:

—Hengetlhekmoskama ¡Ntalhnavek anke nak hengke'e! Ennengko'o ta angellana hanetolhem'a pa'at, lhema lheiap, mo'ok na Moises, kakpota nhan Elias —lhna aptemak.

6Lhnak aptemak Pedro nkanek apiengvaktengkek nak ma'a, nnavek nak na m'a apketlhelhma'ak. 7Ka akvai'o lhnak na iephopai'a peskeska ankok, apkellengai'o lhnak nema aliatekama aiseksek iephopai'a, lhna ntemak:

—Ko'o eietka ham, avanhek ankek askamelaiam, ellasekho ta nhan ketlhengkap —lhna ntemak ania'a m'a.

8Kolhvavek ankek nak apkelletsepanei'ak Elias kakpota nhan Moises annenga lhnak ma'a. Mang nak elvetai'ak mokhom ma'a, vanlha lhnak apkaimommakpo Jesús. 9Neksa apkelenteiapma lhnak neten metaimong akhaiam ma'a, apkeleltennaskamavek nak Jesús metlhene' aktakha apkelvetai'a, hato ka m'a akvakmo ta aplhatekhangveiam apieseksek apkenmaskengvaiakmo m'a Enenlhet Apketka nak. 10Mang nak etlheianmak ma'a, apkelelmalhnemmakpavek nak mok apankave, lhna aptaiangkok:

—¿Se lha nengeltema nenlhatekhangveiam apieseksek apkenmaskengvaiakmo, he?

11Netamen apkelelmalhneiangka lhnak Jesús ma'a, lhna aptaiangkok:

—¿Have nlho niapak apketlheianmo nak escribas evak hata apmanie m'a Elias? —lhna aptaiangkok.

12Ka apkellatemmoiangka lhnak Jesús ma'a, lhna aptemak:

—Hai, have niapak evak hata apmanie m'a Elias kakpota elanekhak lhamakho qaselha m'a. Nietnengkek na aktalhesammalhka m'a vakkahak Eniapom Neten apaivoma avanhek hata nhan ngkotnek aplengaiangko akientalhnema m'a Enenlhet Apketka m'a, ngkolhek hata aktaknevangka nhan ma'a. 13Koka asmak'ak aleltennaksek apvai'ak ma'a Elias, avanhek ankek aptevasemmap ma'a ka aktemakha nak na aklheianma vakkahak Eniapom Neten apaivoma —lhna aptemak.

Jesús aptaqmelkeskaiam apketkok keliaqhameio' aktevaskama

14Neksa apkelhiaiam nak Jesús ma'a akieto apkakhangkelha apkeltamesaikamok, apvetangvekho lhnak apkellatemommakpo escribas, apkelvakhei'avek nak na enenlhet'avok ma'a. 15Ka apkelvetai'o lhnak enenlhet'avok Jesús apkelhiaiam ma'a, apkeletkaiangko lhnak apkelhianlha apkeltanieiam ma'a. Apkelpaiveskaiakmo lhnak na m'a, nkeliemaskeiakmek nak na apvalho'ok ma'a. 16Ka apkelelmalhneiangka lhnak Jesús enenlhet'avok ma'a, lhna aptemak:

—¿Se lhke kto apkeliamenakpo lhkek askeltamesaikamok ke, he? —lhna aptemak Jesús.

17Ka apkatemmoiangka lhnak lhema enenlhet ma'a, lhna aptemak:

—Hengetlhekmoskama, asiantemantek lhek eietka, mankoliateskeskama mota kasekapok av'alhok hengke'e. 18Neksa akvekta kasekapok av'alhok, nieplavave mota akiamasma nalhepop, ntepke mota nhan akiaqmopai'a apatong, apkeltaklhek na apmo'ok, ngkeliennaktesema mota nhan apiempehek. Askeltavek lhe niekhe elentepkesek apkeltamesaikamok anak lheiap, koka man lhe nkollapvanka'ak ma'a —lhna aptemak.

19Koka lhna aptemak Jesús apkellanemo m'a:

—¡Apkeliaskeiam ketlhengkap, heiastengangke niekhe, mankoleklemo niekhe nhan evalhok aspalhkaiangka mota ketlhengkap! ¡Ngva', eliantementa no apketkok anak halep! —lhna aptemak

20Ka apkeliantementamo lhnak apnakha Jesús apketkok nak ma'a, akvetai'o lhnak na kasekapok av'alhok m'a. Kolhvavek ankek nak ntemeskasekha' apketsepaikama, apiaqnanmo lhnak nalhepop apkellelhpokhaiangka lhnak ma'a, aktepkeskamo lhnak na akiaqmopai'a apatong. 21Ka apkenmalhneiangka lhnak Jesús apiapom apketkok ma'a, lhna aptemak:

—¿Lhennenga nlho aktema heng, he?

—Hai', lhennenga, aptemakha lhta nematka. 22Ntevaskangke mota, nieniavke mota natelh ka nhan nemmen akmahai'a ngkaqhek. ¡Epasem no eietka akietno la apmopvana lheiap, eietno no nengaqta'a ennengko'o! —lhna aptemak apiapom.

23Netamen, lhna aptemak Jesús:

—Koka nkaimelhkek mei'askamek lheiap, apto la enenlhet mei'askeiam apvankek elanak apmak'akha la elanak —lhna aptemak.

24Ka apiennakteskamo lhnak apaivoma apiapom apketkok ma'a, lhna aptemak:

—Moi'askakmok ko'o, hepasem hata kakpota nkoiangvomok moi'askeiam —lhna aptemak ma'a.

25Ka apvetai'o lhnak Jesús apkenmahai'o enianvak enenlhet'avok ma'a, lhna aptemak apkanemo apkelpalhengkaseiangka kasekapo av'alhok akpaiseiam:

—¡Koieniekha ham apketkok anak, metka apaivoma ntemeskeskamak kakpota nhan mennai'a lhma, moi'otamo nkek mokhom! —lhna aptemak.

26Mpaihekama lhnak atong keliaqhameio', ka aktemeskasekho lhnak mokhom apketsepaikama, akteiapmo lhnak na m'a. Malha apketsepma lhna ntemeskeskamak apketkok nak ma'a.

—¡Apketsepke, apketsepke! —lhna aptaiangkok enenlhet'avok ma'a.

27Ka apmamo lhnak Jesús apmek apketkok nak ma'a, apkenengkasekho lhnak neten.

28Netamen Jesús aptalhnemo lhnak konne pa'at, ka apkelelmalhneiangka lhnak apkeltamesaikamok, lhna aptaiangkok:

—¿Se lha kto ennengko'o mangellapvanko nak angellentepkesek keliaqhameiok ke, he? —lhna aptaiangkok.

29Ka apkatemmoiangka lhnak Jesús ma'a:

—Koka heng akto nak keliaqhameio' nak, vanlha apvanka'ak elentepkesek aknangko la apkelelmalhnongkoma —lhna aptemak Jesús apkellanemo apkeltamesaikamok.

Jesús aplhenekho mokhom ematong hata

30Jesús kakpota nhan apkeltamesaikamok apkenmeiekho lhnak iokhalhma Galilea, mang nak eltemak nkonnalhkak ania'a m'a. 31Vanlha lhnak apkeltemo mota etlhekmoksek apkeltamesaikamok. Lhna aptemak apkellanemo Jesús:

—Elpathetek hata enenlhet'avok ma'a Enenlhet Apketka nak, ellangkongvomok hata apkellammelhmakha kakpota nhan ematong ma'a. Koka hanetolhem'a aknem hato ka ngkotnek elhatekhangvomok ma'a —lhna aptemak apkellanemo m'a.

32Mang noka eliangveiakmok mokhom ma'a aktakha apaivoma Jesús, meleltemo lhnak na elpeiveskasekha alhnakho nkek ma'a nkanek nkollaioseskesek apvalho'ok ma'a.

Enenlhet apto neten apankek apiaspommap

33Ka apkelvekho lhnak na temma Capernaum ma'a, apkelentalhnengvaiakmo lhnak konne pa'at, ka apkelelmalhneiangka lhnak Jesús apkeltamesaikamok:

—¿Se lhke kto apkellatemmokpo lhkek amai ke, he? —lhna aptemak.

34Koka apkelvanmongkek nak ma'a lhna songkek apkellatemommakpo aktemakha antek neten enganke'. 35Ka apnemo lhnak Jesús ma'a, apkeltemo lhnak na eniaqhengvatak nengaqtek apkeltamesaikamok, lhna aptemak apkellanemo:

—Aktemakha nemmahai'a angvomok nentema neten apanke neniaspommalhka, nkaimelhkek antek nema hengasennaikama mota, kakpota nhan antama koneng apanke' —lhna aptemak Jesús.

36Ka apkaveiangka lhnak lhema nematka m'a, apmamo apneskaiakmo lhnak na apieseksek apkeltamesaikamok, lhna aptemak apkellanemo:

37—Enenlhet apto la apmama takha akmak'akha la nematka ka apto nak nematka nak hengke'e aniem'o asvesai'a ko'o, henmek na takha ko'o. Enenlhet apto la hemama takha ko'o, apmek na takha apto lhta heiapaskama —lhna aptemak Jesús.

Enenlhet manghengelammelhma, netlhelhma'ak ma'a

38Lhnak aptemak Juan apkanemo Jesús ma'a:

—Hengetlhekmoskama, nengvet'a lhta ennengko'o lhema enenlhet apmaikama apvesai'a lheiap kakpota elentepkesek kasekapok av'alho'ok. Nennaveske lhta m'a ngkanek have netlhelhma'ak —lhna aptemak Juan.

39Koka apkatemmoiangka lhnak Jesús ma'a, lhna aptemak:

—¡Mennavesangko ie'! Nkanek enenlhet apmak'akha elana qaselha hempelapkeskama asvesai'a ko'o, mankapvankek hata helhenek asmapsoma. 40Ka manghengelammelhma nak enenlhet ennengko'o, netlhelhma'ak ma'a. 41Have niapak anke, akno la allangkok ketsek iemmen ketlhengkap aniem'o apkelieplekama Cristo, etlhevangkok hata akiaqmoiekha m'a.

Ngkolatsekama aniepkonek emmo'ok

42Nientelhek ankek hata ngkotnek apvetai'a apkaniemhaikama enenlhet apto la apkelpelapongkeskama apketkietse nak helieplekamaha. Ntase niekhe' nenteto la apiaspok lhema metaimong akiavai'a akiaqiema nenteklheklhema ankok anak kakpota eieniokpok aiseksek ankek alvata iemmen. 43-44Ka apmek anak lheiap nkelaneskaskek hata nkek ngkolatsema qaselha, ¡eiaqtemen hata! Ntase niekhe eklhek akpensema apmek akieto m'a akiennaktemakha enneniek, have aktonak ma'a eklhek nkospanei'akha talha akieplomo hanet apmeiok. 45-46Ka apmenek anak lheiap nkelaneskaskek hata nkek qaselha ngkolatsekama, ¡eiaqtemen hata! Ntase niekhe eklhek akpensema apmenek ma'a akieto akiennaktemakha enneniek, have aptonak ma'a ngkolhek hata akienievo nkospanei'akha talha akieplomo hanet apmanko'ok. 47Ka apaqtek anak lheiap nkelaneskaskek hata nkek ngkolatsekama, ¡elek hata! Ntase niekhe eklhek apiavek aptemakha nak Apveske Eniapom Neten, have aptonak eieniokpok ngkospaneiakha talha akieplomo hanet apaqto'ok. 48Meletsepmak iapa pketko'ok ma'a, kakpota nhan metka aksepanai'a talha m'a. 49Ka ngkanek ellaho mota ellanangkok ngkollatsekama ngkanek ngkolhek hata alelhpaqhangka iasek, elvanlhakpok nahan. 50Iasek akto aktaqmanma nenmaikama, koka akmasko la akmaska m'a, mmaskek na nemmangka m'a, nelhakkek nahan. Nnavek na ketlhengkap, etnamok hata nema anmaikama malha akto nak iasek. Ellanamok hata aktaqmanma, elloka ta panko ie' metka apkennapommap —lhna aptemak Jesús.

Currently Selected:

Marcos 9: TMF

Highlight

Copy