Lucas 24

Nema aklhatekhaskeiam Jesús

1Ka akvaiakmo lhnak ampakhasekha nkek aknem semana m'a, anmeiekho lhnak akieto nemakha akpekkanveianlha aphapak ma'a, alletsekho lhnak na aimenek akmases aimes alpeneskamo. 2Ka alvetangvekho lhnak ma'a nema akteskeskama metaimong atong akiavai'a nemakha akpekkanveianlha enghapak. 3Ka alentalhnemo lhnak konne m'a, mang noka nkolvetai'ak aphapak Apveske Jesús ma'a. 4Nketlhengamavek nak nkenio'ok mankolvetai'o aphapak Jesús, ka akpelapkeskamo lhnak apkeliephongvai'a apqanet enenlhet apkelteteskai'o lhnak ngkelvana'ak ma'a, apkenmopai'a pankek nak apkelentalhnema m'a, apkelienmomo nhan. 5-6Nkelmenaiangkek nak ngkelvana'ak ma'a ka alteklheiangko lhnak atapno'ok lhepop ma'a akvakho alteklheio nhan naqta'a lhepop, koka enenlhet nak ma'a lhnak aptaiangkok apkellanemo:

—Molelianva Jesús hengke'e apieseksek anak apkeletsepma, aplhatekhangvakmek lhek ma'a. Kotlheianvakho no av'alho'ok aptakha lhta apaivoma akieto ma'a iokhalhma Galilea. 7Aplheno lhta ngkolhek hata angkongvakmo Enenlhet Apketka nak enenlhet'avok anak apkellanekamo ngkollatsekama kakpota ngkolhek na aliaqlho apmeiok apmankok neten iamet aktenneskama. Koka hanetolhem'a aknem na lhta ngkotnek apketsepma m'a, kakpota elhatekhangvomok mokhom —lhna aptaiangkok enenlhet.

8Nkelpelapkeskangkek nak atlheianvekho av'alho'ok ngkelvana'ak ma'a aktemakha lhnak apaivoma Jesús akmahai'akha ngkotnek apkaniemhaikama, 9nkelentepekhek nak ma'a akieto nemakha akpekkanveianlha enghapak, altaqhemo netamna'ak ma'a apkakhangkelha 11 nema alapaskamo kakpota nhan apkellelto apkelieplekama Jesús, aleltennaskekho lhnak ania'a m'a. 10María Magdalena lhnak ma'a kakpota nhan Juana, María Jacobo ngken kakpota nhan mo'ok ngkelvana'ak alletsakheskamo lhnak ania'a m'a apkelapaskamo. 11Koka apkeliaskeiakmek nak nema alapaskamo ania'a m'a, nketlheianmek nak apvalho'ok mangkotnek ma'a. 12Koka apketkekho lhnak Pedro m'a akieto nemakha akpekkanveianlha enghapak, apkammelhmo lhnak konne. Mang noka etai'ak Jesús aphapak ma'a, vanlha lhnak apvetai'o ietamopai'a napokha'ak apelhketemmap aphapak ma'a. Niemaskangkek nak apvalhok ma'a, ka aptaqhemo lhnak mokhom neptamen.

Apvetammap Jesús amai Emaus

13Netamen apqanet apkelieplekama apkenmeiekho lhnak natemma Emaus, 11 kilometro lhnak nietnemak Jerusalen ma'a. 14Apkeleltennaikokhek nak neksa apketlhengama m'a aktemakha akvetammalhka m'a. 15Ka apteteskekho lhnak Jesús ma'a kakpota elieplakhak apkenmeiakhelha. 16Koka lhema qaselha lhnak malha aleliasekamo lhma' m'a kakpota meliekpelkek Jesús, malha meliamo lhna ntemak na m'a, 17koka lhna aptemak Jesús apkelelmalhneiangka m'a:

—¿Selha apketlheno lhkek neksa apketlhengama ie, selha ntak allaioso nak apvalho'ok ke, he? —lhna aptemak.

18Ka apkatemmoiangka lhnak apvesai'a Cleofas, lhna aptemak:

—Lhamakho amaika'a apkeliave aktakha akvetammalhka m'a Jerusalen, vanlha noka meiho lheiap —lhna aptemak.

19—¿Selha qaselha akvetammalhko m'a ie, he? —lhna aptemak Jesús.

Ka apkellatemmoiangka lhnak ma'a, lhna aptaiangkok:

—Ka Jesús ko Nazaret alhta, Eniapom Neten apkeltennasemmap ania'a apankok alhta m'a. Avanhe lhta akmovana apaivoma, kakpota nhan apkellanai'ak lhta qaselha mongvetai'o napaqtavek enenlhet'avok ma'a. 20Koka apkelemhama apmaniaie sacerdotes kakpota nhan apkelveskaie enganko'ok anak, apkellangkongvakme lhta m'a apkelveskai'e romano kakpota ellaqhek eliaqlhak apmeiok apmankok neten iamet aktenneskama m'a. 21Nketlheianme lhta niekhe engelvalhok ennengko'o hengel·hatsoskakhak nelvesai'a Israelitas neksa akietnema hengellammelhmakha, koka hanetolhema aknem antak apmatnama lhta m'a. 22Ka sosekhek lhek moklhem'a ngkelvana'ak netlhelhma'ak anak, hengeleltennaskaktamo lhkek lhema ania'a hengelnelhtengkasavek lhek neten ma'a. Nkenmeiekhek na lhta akieto metaimong alhva apietnakha aphapak Jesús, 23ka atlheno lhta mankolvetangvekha m'a. Vanlha lhnak lhta alvet'o apqanet ángeles ma'a, apketlheno lhna lhta nhan aplhatekhangveiam Jesús ma'a, ka alvaktamo lhta nhan mokhom ma'a nengaqhangkelha lhta. 24Ka apkenmeiakho lhta netlhelhma'ak anak ma'a akieto nemakha akpekkanveianlha enghapak metaimong alhva, apkelvetangvakho lhnak lhta akto have niapak ankek aktakha lhta atlheianma ngkelvana'ak ma'a, mankolvetai'a Jesús aphapak —lhna aptemak Cleofas.

25Ka aptemo lhnak Jesús apkellanemo m'a:

—Koka mankotlheiangvakhok apvalho'ok ketlhengkap apketlheianmo lhnak nanek apkeleltennasemmap ania'a nnenga ngkotnek hata m'a, 26nkaimommalhkek na lhta Cristo ennangkoho akientalhnema amanie nema aktemeskeskama ta apientalhnemo pankek ma'a —lhnak aptemak ma'a.

27Ka apkelpeiveskasekho lhnak Jesús aktemakha aktalhesammalhka Vakkahak Eniapom Neten Apaivoma aplhenammap Cristo, ampai'o lhnak nanek aktalhesammalhka ley Moises, ka amhaiangko nhan vakkahak apnaktalheskama lhnak nanek apkeleltennasemmap ania'a annenga. 28Netamen nak ma'a, apkelvekho lhnak natemma Emaus, apmahai'ak na niekhe eieka aplhengama Jesús ma'a, 29koka apkelleltemavek nak elhnekhak apketlhelhma'ak ma'a, lhnak aptaiangkok:

—Eniaio nhan lheiap hengke'e, ienaqteske —lhnak aptaiangkok ma'a.

Ka aphaivomo lhnak na Jesús ma'a natemma nak, apnemo nhan lhemek ma'a. 30Apkakhaiangkek nak aptaveikokho m'a, ka apmamo lhnak pan Jesús, aptemo lhnak na gracias Eniapom Neten, apkellaiangko nhan ma'a. 31Ka alpelapkeskamo lhnak apkeliekpelkangveiam apto Jesús enenlhet anak, koka apsepanei'o lhnak napaqtavek ma'a. 32Koka lhnak aptaiangkok apkelpaqmetkesammakpo mok apankave' ma'a:

—Have na niapak Jesús ha'e enenlhet lhek, nkellekkasema lhkek engelvalhok neksa hengelpeiveskasekha lhkek aktemakha aktalhesammalhka Vakkahak Eniapom Neten Apaivoma nalhet amai lhek —lhna aptaiangkok.

33Kolhvavek nak apkeltaqhemo akieto Jerusalen, apkenmeiekho apkakhangkolha 11 apkellapaskamo mota Jesús kakpota nhan aplhamakha apketlhelhma'ak, 34lhnak aptaiangkok ma'a:

—Have lhke niapak aplhatekhangvakmo m'a Apveske, apiephongvei'o nhan napaqtek ma'a Simon —lhna aptaiangkok.

35Ka apkeleltennaiangka lhnak aktemakha apkelvetai'a amai akmaiangko Emaus, netamen apkeliekpelkangveiakmo lhnak apiaptemo pan ma'a.

Akpelapkeskama apiephongvaiam Jesús apieseksek apkeltamesaikamok

36Nheklhek nak apkelpaqmetkesammakpo m'a, apiephongvei'o lhnak Jesús ma'a, lhnak aptemak apkellanemo:

—Altaqmelaikama apvalho'ok hata ketlhengkap hengke'e —lhnak aptemak.

37Avanhek nak apkenmenaikamok ma'a, ngkanek enghangok nak apkellanemak ma'a. 38Koka lhnak aptemak Jesús apkellanemo:

—Menmenamok, meliaskem nahan, 39-40have enghangok ko'o, ellanhono eskepok emeiok, emankok. Henmanvanoho, mamma akiokha enghangok la'a —lhna aptemak ma'a.

41Koka mokhom nak apkeliaskeiam ma'a, nkelpelapkeskangkek noka apkelvetai'a m'a, alpaihekho lhnak na apvalho'ok ma'a, lhnak aptemak mokhom Jesús:

—Hellamok astoma —lhna aptemak.

42Ka apkellaiangko lhnak nekhatkok kelasma alkenammalhka', 43ka aptomo lhnak napaqtavek ma'a. 44Netamen nak Jesús ma'a lhna aptemak apkellanemo mokhom:

—Aktakha nak asvetammalhka ko'o, askeleltennaskangke lhta mota ketlhengkap, ntemengkek askaniemhaikama aklheianmo lhnak nanek ley Moises, apkeleltennasemmap ania'a annenga kakpota nhan vakkahak Salmo hetlheianma ko'o —lhna aptemak Jesús.

45Ka apkelpeiveskasekho lhnak ma'a kakpota eliangvomhok aktemakha aktalhesammalhka Vakkahak Eniapom neten Apaivoma, 46lhnak aptemak:

—Ka ntemak aklheianma Eniapom Neten apaivoma enietsepok hata Cristo, koka hanetolhem'a aknem hata ngkotnek apketsepma m'a, elhatekhangvomok hata mokhom, ka ntemak ania'a m'a. 47Nkolhek hata aleltennasengka apvesai'a lhamakho apkellavakha halhmankek ham, hata ellempak hengke'e Jerusalen kakpota eliaqmongkasekhak na mo'ok apvalho'ok enenlhet'avok kakpota Eniapom Neten etneskesama apankek meleliehekho nak apkellaskamakha, lhna ntemak na ania'a m'a.

48Koka eleltennes hata lhamakho qaselha aktakha nak apkelvetai'a ketlhengkap, 49eniakhamok hata hengke'e Jerusalen ngkanek kolhvavek hata angvapaksek takhaplhet'ok aktakha lhta apaivoma Tata have niapak ankek eniapaksek hata, aknema akmopvana apkeniem'o neten —lhna aptemak.

Nema akiasekha neten Jesús

50Ka apkelentepkeskamo lhnak Jesús apkeltamesaikamok na temma nak, aplaqlekho lhnak natemma Betania, apkeliasekho lhnak neten apmeiok apkeltemo nkoltaqmelek apkellangiemhaikama m'a. 51Neksa apkeltaqmelkeskeskama apkellangiemhaikama, apkaklheiangko lhnak tep atketsek Jesús ma'a, ka aknemo lhnak akiasekho neten. 52Neksa apmeiekha lhnak neten ma'a, apkelteklheiangko lhnak aptapno'ok aniem'o apkellai'o. Netamen nak ma'a apkeltaqhemo akieto Jerusalen, avanhek anke nak alpaihekha apvalho'ok ma'a, 53vanlha lhna mota ntemak apkenmeiekha Eniapom Neten apnemakha kakpota eliavenkaskesama mota apvesai'a Eniapom Neten ma'a.

Currently Selected:

Lucas 24: TMF

Highlight

Copy