Juan 9

Jesús aptaqmelkasekha metka apaqto'ok

1Neksa aplhengama lhta Jesús apvet'o lhema enenlhet apteiaianlha sekha metka apaqto'ok ma'a. 2Ka apkelelmalhnengka lhta apkeltamesaikamok, lhta aptangkok:

—Hengetlhekmoskama, ¿se lha aktemo apteiaiakmo nak metka apaqto'ok enenlhet anak, aniem'o nlho ka la ngkollatsekama allanai'a ngkana'ak nlho ka la nhan apkelanai'a apanke ngkollatsekama, he? —lhta aptangkok apkeltamesaikamok.

3Ka apkellatemmongka lhta Jesús ma'a, lhta aptak:

—Have aniem'o ngkana'ak allanekamok ngkollatsekama, nlho ka la nhan apkelanai'a apanke ngkollatsekama, apteiakme lhta metka apaqto'ok ma'a kakpota elvetak hata aplhamakho enenlhet'avok aktemakha apmopvana Eniapom Neten akmovana nkotaqmelkasekha. 4Neksa aktema mokhom aknem, ntasek angellanangkok apkeltemo lhta apto heiapaskama, lheme ta nkovak hata aptema pelhasep, koka mongapvankek angellanak qaselha m'a. 5Neksa asnema apieseksek ketlhengkap, ko'o asto askaponmatma asketsaskeskama lhma' nhan —lhta aptak Jesús.

6Ka apkelpatso lhta apiemanong nalhepop Jesús ma'a, nialpa lhta apkelan'ak, apkeltelhnaskesangko lhta apaqto'ok enenlhet, 7lhta aptak apkano:

—Eniakha ha'e pangkalhva nak alanemmalhka metaimong akvesai'a Siloe, nema altema koka nema apaskama, elienieskakha ta apaqto'ok ma'a —lhta aptak.

Ka apmeiakho lhta m'a, apkelienieskakho lhta apaqto'ok, aptaqhave lhta mokhom neptamen ma'a aknakho lhta nhan apaqto'ok ma'a. 8Neksa apkelvetai'a lhna lhta apkennemolhema apvekho apnemakha m'a, apkelpaqmetkesammakpo lhna lhta mok apankavek ma'a, lhna lhta aptaiangkok:

—¿Have nlho enenlhet alhta apkellanheiangka lhta mota patakkom enenlhet, he? —lhna lhta aptaiangkok ma'a.

9—Tokha' ham.

Koka po'ok enenlhet lhna lhta aptemak:

—Have, malha niekhe.

Koka aplhenammakpek na lhta apankek enenlhet alhta m'a:

—¡Hai, ko'o m'a! —lhna apta aptemak.

10Apkelelmalhnekhavek na lhta mota aktemakha altaqmalveiam apaqto'ok ma'a, 11ka apkeleltennaseiangka lhna lhta m'a, lhna lhta aptemak:

—Lhema enenlhet lhek apvesai'a Jesús, nialpa lhkek apkelan'ak, heltelhnaskesangko ehaqto'ok. Ka heiapaso akieto pangkalhva alanemmalhka metaimong Siloe kakpota alienieskakhak ehaqto'ok ma'a. Ka asmeiakho lhkek askelienieskakho, astaqmelakho nhan, asvetakho lhma' —lhna lhta aptemak apkeltennaiangka m'a.

12Koka apkelelmalhnekhavek na lhta mokhom enenlhet'avok ma'a, lhna lhta aptaiangkok apkellanemo:

—¿Ko la apnakha enenlhet anak ma'a? —lhna lhta aptaiangkok.

—Moihok ko'o —lhna lhta aptemak apkellatemmoiangka m'a.

Fariseos apkelelmalhnekho metka apaqto'ok aniem'o aptaqmalveiam

13-14Koka aknem nennekhelha sabado lhta m'a aptaqmelkeskaiakmo metka apaqto'ok apkelanei'o lhta nhan nialpa Jesús ma'a, lhna lhta nkeniemai'ak apkeliantemekhak aptaqmalveiam apkakhangkelha fariseos ma'a, 15lhna lhta aptaiangkok apkellanemo m'a:

—¿Ko la aktakha apvetakho na lhma lheiap? —lhna lhta aptaiangkok.

Ka apkatemmoiangka lhna lhta m'a enenlhet, lhna aptemak:

—Nialpa lhkek hetneskasak ehaqto'ok anak, ka askelienieskakho nhan, asvetakho nha lhma —lhna lhta aptemak.

16Koka lhna lhta aptaiangkok moklhem'a fariseos:

—Enenlhet apto aptaqmelkasekha nak lheiap have Eniapom Neten apkapaskama, meliahakhok henganemakha' enganko'ok anak, meliahakhok na aknem nennekhelha sabado —lhna lhta aptaiangkok ma'a.

Koka aplhamakha fariseos lhna lhta aptaiangkok ma'a:

—Tokha nlho ka Eniapom Neten apkapaskama m'a, sok akto apkelan'o nak qaselha mongenatkeskama, ka enenlhet la apkelanai'a ngkolatsekama mankapvankek elanak ma'a —lhna lhta aptaiangkok ma'a.

Mang na lhta nkolhnemok mo'ok apvalho'ok fariseos ma'a, 17ka apkelelmalhnekho lhna lhta mokhom aptaqmalveiam, lhna lhta aptaiangkok apkellanemo:

—¿Niehek aktakha aklheianma apvalhok lheiap enenlhet nak lhek ke, he? —lhna lhta aptaiangkok.

Ka apkatemmoiangka lhna lhta m'a, lhna lhta aptemak:

—Apkeltennasemmap ania'a apankek ma'a —lhna lhta aptemak.

18Koka apkelemhama apmaniaie' judios apkeliaskeiakmek na lhta m'a enenlhet apto aptaqmalveiam metka apaqto'ok alhta. Ka apkellapaskamo lhna lhta lhema apkellennengkasekama eliantengvakhak ngkana'ak ma'a. 19-20Ka apkelelmalhneiangka lhna lhta ngkana'ak, lhna lhta aptaiangkok:

—¿Ka nlho atkak ketlhengka' ham, he? —lhna lhta aptaiangkok.

—Hai —lhna ntaiangkok.

—¿Have nlho niapak apteianlhasekha metka apaqto'ok, he?

—Hai, have niapak —lhna lhta ntaiangkok ma'a.

Ka apkelelmalhnekho lhna lhta mokhom, lhna aptaiangkok:

—¿Niehek takha apvetakho na lhma atkak anak, he? —lhna lhta aptaiangkok.

21—Mangeliohok ennengko'o apto aptaqmelkasekha, elelmalhnama ta apankek ma'a, apvaneniek ma'a, apvanke eniatemmomaha.

22-23Lhna lhta ntaiangkok ngkana'ak ngkanek nkellai'ak na lhta apkelemhama apmaniaie judios enmaskeskasekhak alvesai'a alpalhakvekha apkaqnekhelha, aptaiangkolha lhta mota ellanhok apkellelto apketlheianma mota Jesús apto Mesias.

24Ka apkellaveiangka lhna lhta mokhom aptaqmalveiam, lhna lhta aptaiangkok:

—Neliavek ennengko'o Jesús apto apkelanai'a ngkollatsekama, ¿se lha aklheno apvalhok lheiap ma ie enenlhet anak, he? ¡Elheng no metne apmopvana ania'a napaqtek Eniapom Neten, hengeleltennes ennengko'o! —lhna lhta aptaiangkok ma'a.

25Ka apkatemmoiangka lhna lhta enenlhet aptaqmalveiam, lhna lhta aptemak:

—Moihok ko'o, vanlha lhta metka ehaqto'ok ko'o, kolhva asvetekho na lhma —lhna lhta aptemak ma'a.

26Koka apkelelmalhnekhavek na lhta mokhom ma'a, lhna lhta aptaiangkok:

—¿Ko lhkek aptakha aptaqmelkasakho lheiap, he? —lhna lhta aptaiangkok.

27Ka apkatemmoiangka lhna lhta mokhom ma'a, lhna lhta aptemak:

—Askeleltennaskek lhek ketlhengkap, koka man lhek hellailhoho. Se lha ngkotnek altakhengveskakha alheianma, ketlhengkap kelha nhan apkenmak'ak etnangkok apkeltamesaikamok ma'a —lhna lhta aptemak.

28Mang na lhta ngkollatsekama apatno'ok apkellanei'o m'a, lhna lhta aptaiangkok:

—¡Lheiap koka apto apkeltameskama enenlhet anak ma'a, ennengko'o koka nengelelto hengeltamesaikamok Moises annenga! 29Nengeliavek ennengko'o apakmetkeskangkek nak nanek Eniapom Neten Moises, koka mangeliohok ko la apkeniem'akha enenlhet anak ma'a —lhna lhta aptaiangkok.

30-33Ka apkatemmoiangka lhna lhta mokhom enenlhet aptaqmalveiam, lhna lhta aptemak:

—Niemaskek lhek ko evalhok ma'a ketlhengkap koka meliohok apkeniem'akha m'a enenlhet anak apto lhkek hetaqmelkasekha, tokha kelha apkeniem'o Eniapom Neten ma'a. Ka apto la apkelanai'a ngkollatsekama enenlhet anak, Eniapom Neten mankapvankek engkesek apmopvana kakpota hetaqmelkasekha. Mangelvetai'ak ennengko'o akto nak nenieseksa, alhnakho nenvetai'a apkeniem'o Eniapom Neten ma'a enenlhet anak —lhna lhta aptemak.

34Koka lhna lhta aptaiangkok mokhom apkellanemo apkelemhama apmaniaie judios, lhna lhta aptaiangkok:

—Apteianlhasekha lheiap aknaikamok ngkollatsekama apvalhok, mankapvanke hengetlhekmoksek ennengko'o lheiap ¡Etiep, mevatamo nkek mokhom nengaqnekhelha nak! —lhna lhta aptaiangkok.

Malha metka apaqto'ok apkellelto la apkeliaskeiam

35Apleng'a alhta Jesús nema aktepkeskama enenlhet aptaqmalveiam alhta apkaqnekhelha judios, apvetakhe lhta nhan m'a, ka apkenmalhnengka lhta, lhta aptak apkano:

—¿Mai'e ei'askakmok lheiap Enenlhet Apketka nak, he? —lhta aptak.

36Ka apkatemmongka lhta enenlhet ma'a, lhta aptak:

—Apveske', heltennes no sekla enenlhet maie' kakpota moi'askamek ko'o —lhta aptak ma'a.

37Koka lhta aptak apkano Jesús ma'a:

—Ko'o m'a —lhta aptak.

38Ka apkelteklheio lhta aptapno'ok lhepop, aphalhantamo lhta nhan napaqte Jesús ma'a, lhta aptak apkano:

—Apveske, moi'askakmok lheiap —lhta aptak.

39Koka lhta aptak apkano mokhom Jesús:

—Asva'ak ko'o asmahai'a aliekpelkok enenlhet'avok aptaiangkolha ngkolatsekama nlho ka la aktaqmanma. Alvetaskesekhak na lhma mokhom metka apaqto'ok la'a, atneskasokhak hato ka malha metka apaqto'ok apkellelto nak apkelvetai'a lhma —lhta aptak Jesús.

40Apkelleng'a lhta nhan moklhem'a fariseos aktakha apaivoma Jesús, lhta aptangkok apkellano:

—Hengetlhenkek lheiap ennengko'o malha metka engaqto'ok —lhta aptangkok ma'a.

41Ka apkellatemmongka lhta Jesús ma'a, lhta aptak:

—Aptangko la ketlhengkap metka apaqto'ok, malha niekhe melvetai'a la ngkollatsekama apanko'ok apankave', mangkolhek na nema aliaqmongkaskesekha apkeltakha la'a. Ketlhengkap koka apkelleltakpok nema apaqto'ok, alhnakho nkek apkelvetai'a ngkollatsekama apkellanekamok, nkelietavek etlhevangkok nema aliaqmongkaskesekha ta —lhta aptak Jesús.

Currently Selected:

Juan 9: TMF

Highlight

Copy