Juan 7
7
Apkeliaskeiam apkelialheng'a apanke Jesús
1Netamen alhta m'a, aplomaka lhta Jesús akieto iokhalhma Galilea. Ma lhta nkomak'ak eniakhak ma'a Judea ngkanek apkelemhama apmaniaie judios apkelketangke lhta apkenmahai'a ennapok ma'a. 2Nkanketvakme lhta aknem aktaqmelaikama lhma judios apanko'ok akvesai'a akpaklhenammalhka kaselha aiempeiok. 3Lhta aptangkok apkellano apkelialheng'a apanke Jesús:
—Melhnekha nkek hengke'e, eniakha ta nhan lheiap ma'a Judea kakpota elvetak apkeltamesaikamok lheiap lhamakho qaselha apkelanai'a lheiap. 4Apkelto la nhan eiekpelkakpok lheiap, have ekpoksek apkelanai'a qaselha hempelapkeskama, napaqtavek koka etne m'a —lhta aptangkok.
5Koka apkelpaqmetke lhta pankek apkelialheng'a Jesús aniem'o nhan apkeliaskeiam ma'a. 6Koka lhta aptak Jesús:
—Mankovakmok mokhom aknem ehenkok, ketlhengkap koka ntasek lhamakho aknem. 7Meltaqnevak apkelemhama apmaniaie ketlhengkap hengke'e, ko'o koka heltaknevakke ngkanek asketlhengkaske mota apkeltemakha ngkolatsekama m'a. 8Enmeiakhak koka ketlhengkap mok apankavek ma'a aktaqmelaikama lhma nak, moniakhek ko'o, mankovakmok mokhom aknem ehenkok —lhta aptak Jesús.
9Ka apnakho lhta Jesús ma'a Galilea.
Apasengvaiam Jesús aktaqmelaikama lhma akpaklhenammalhka kaselha aiempeiok
10Koka netamen ma'a apielhakpe lhta nhan apmeiakho Jesús ma'a aktaqmelankelha lhma neptamna'ak apkelialheng'a. 11Neksa aktaqmelaikama lhma lhta m'a, apkelketangke lhta apkelemhama apmaniaie judios Jesús ma'a, lhta aptangkok:
—¿Ko la apmaiangkolha enenlhet alhta, he? —lhta aptangkok.
12-13Ma lhta ellasak apketlheno enenlhet Jesús akieto aktaqmelankolha lhma m'a, apkelmalenioma lhta m'a ngkanek apkellak'ave lhta apkelemhama apmaniaie' judios ellenhok ma'a, lhta aptangkok enenlhet:
—Apiave lhma' enenlhet anak ma'a, hela —lhta aptak.
—Ma', meiholhma m'a, apmopvana ania'a m'a —lhta aptak po'ok enenlhet.
14Netamen, nalhet aktaqmelaikama lhma lhta ngvakmok ma'a, aptalhnengvakho nhan Jesús Eniapom Neten apnemakha, ka apkempo lhta apketlhekmoskama m'a. 15Nkelpelapkaske lhta apkelleng'o apkelemhama apmaniaie judios ma'a, lhta aptangkok:
—Meltamesammakpok henganemakha engankok anak ha'e, niehe aptemakha apiangveiakmo nak —lhta aptangkok.
16Koka lhta aptak Jesús apkellatemmongka m'a:
—Ka asketlhekmoskama nak have ehenkok ehenke', koka aniem'o m'a apto lhta heiapaskama. 17Apmak'ak hata nkek eliehekhok Eniapom Neten enenlhet, eihok hata aktakha asketlhekmoskama nak aniem'o Eniapom Neten, have aniem'o ehenkok ehenke. 18Enenlhet apto la aplhenammakpo panke', apkeltemo ngkolhek altangko nema apiamo neten apankek. Koka enenlhet apteniai'a la mota aptemeskeskama neten apanke apvesai'a apto apkapaskama, koka enenlhet anak akto iokhalhmek aplheianma m'a, have apmopvana ania'a. 19Apkellaiangkek nak na nek Moises ley ketlhengkap, koka meleliehekho, ¿se lha ntak apkenmak'o nak hellaqhek ke, he? —lhta aptak Jesús apkellano.
20Ka apkellatemmongka lhta enenlhet ma'a, lhta aptangkok:
—¡Mamma enenlhet apmahai'a eniaqhek lheiap, kasekapok av'alhok akmaikama lheiap! —lhta aptangkok.
21-23Koka lhta aptak mokhom Jesús:
—Apmangkek takha Moises annenga aptemakha lhnak nane mota Abraham, Isaak, Jacobo nnenga akiaqtemenammalhka nak ketsek nekhatkok apkammelhakha apkenno apketkok la'a, akvakmo nenvanlha nak apkelvaneiangko nhan ketlhengkap nkaqhok aknem sabado apkakhaikokhelha na niekhe kakpota apkellanek na ketlhengkap melieka'ak ley ma'a. ¿Se lhta kto nkeso lhta annatheskama ketlhengkap sekhe lhta ie, astaqmelkasakho lhta lhema enenlhet sabado lhta m'a, he? 24Metlhenankek aptemakha po'ok aptaqmanma nlho ka la ngkolatsema aptemakha aniem'o apaqto'ok apankave apkelanei'o, ntasek koka etnangkok akietemo nkek apketlheianma m'a —lhta aptak Jesús apkellano m'a.
Jesús aplheianma apkeniem'akha
25Apkelpaqmetkesakpe lhta mok apankavek moklhem'a enenlhet'avok ko Jerusalen ma'a, lhta aptangkok:
—¿Have nlho apketamekpo lhta enenlhet anak apmahai'a ematong, he? 26Ka ha'e, apkelpaqmetkesangka nak enenlhet, manak kelha emammakpok —lhta aptangkok enenlhet.
Lhta aptak na po'ok:
—Kolhva kelha meliaskeiakmok apkelemhama apmaniaie enganko'ok anak apto Cristo ha'e enenlhet anak —lhta aptangkok.
27Koka lhta aptak na po'ok enenlhet:
—Ma', have Cristo ha'e, hata apvo'o ta m'a meliehek enenlhet'avok hata apkeniemai'akha m'a, ennengko'o koka neliavek apkeniemei'akha m'a enenlhet anak ha'e —lhta aptak ma'a.
28Apleng'a lhtoka Jesús neksa apketlhekmoskama lhta konne Eniapom Neten apnemakha, lhta aptak apiennakteso apaivoma:
—Apketlhengke niekhe ketlhengkap apkeliamo se lha ko'o ie, kakpota nhan ko la askeniem'akha m'a, meliehek koka. Have asvai'a ehenko ie', heiapaskama m'a apto apiamolhma, ketlhengkap koka meliekpelkak ma'a. 29Vanlha koka ko'o asiekpelkemo m'a ngkanek askeniem'o nhan ko m'a, heiapaskama nhan ma'a —lhta aptak Jesús apkellano enenlhet'avok ma'a.
30Ka apkenmak'o lhta elpathetek Jesús apkelemhama apmaniaie judios ma'a, koka ma lhta nkollapvanka'ak, ma lhta nhan nkovakmok aknem apankok ma'a. 31Koka ma lhta nha ntek enenlhet meliaskeiam Jesús ma'a, lhta aptangkok:
—Hai', Cristo ham, ellanhono lhamakho qaselha mongenatkeskama apkellanai'a mota ham, eliangvomho koka —lhta aptangkok ma'a.
Fariseos apkenmahai'a elpathetek Jesús
32Apkelleng'a lhta nhan ania'a aplhenammap Jesús fariseos kakpota nhan apkelemhama apmaniaie' sacerdotes, ka apkellapaso lhta apkellanekama nekhav'ak Eniapom Neten apnemakha m'a kakpota elpathetek Jesús ma'a. 33Apne lhtoka Jesús konne Eniapom Neten apnemakha, enenlhet alhta apketlhekmosak ma'a, lhta aptak:
—Aloka ta mokhom apieseksek ketlhengkap akiakvatakho, kakpota ataqhok hata mokhom apnakha apto lhta heiapaskama. 34Helketmok hata ketlhengkap, koka manghelvetekhek hata, mankollapvankek hata nhan enmeiakhak asmak'akha nak aniakha —lhta aptak.
35-36Ka apkelelmalhnekpo lhta mok apankavek apkelemhama apmaniaie judios ma'a, lhta aptangkok:
—Se lha aplheno nak ai'e, ko la apmak'akha emhangkok kakpota mongelvetekhe. Kelha apme eniakhak ma'a elpalhakvakha judios apkellelto nak apkakhengveiam ma'a apieseksek anak griegos, kakpota nhan etlhekmoskamok griegos ma'a —lhta aptangkok ma'a.
Iemmen hengiennakteskama
37-38Ngvakme lhta aktakha nnelha akpaiveskekha' aknem aktaqmelaikama lhma m'a, akto lhta neten ankek akiaspommalhka aknem anak ma'a. Ka apkenmakho lhta neten Jesús apieseksek enenlhet, apiennakteso apaivoma, lhta aptak:
—Apiemak'ak hata nke' enenlhet, hei'ota ta, mangheiaskakmo la'a enenlhet angvangko ta apiama kakpota nkotepangkok iemmen apvalhok malha akto nak alvata iemmen aktaqmanma nkek la'a, ka ntak ma'a Vakkahak Eniapom Neten apaivoma —lhta aptak Jesús.
39Koka aptemakha lhta aplheianma Jesús ma'a aptemakha Espíritu, etlhevangkok hata m'a apkellelto la meliaskeiam. Mang koka evai'ak ma'a sekhe lhta m'a, amanie lhtoka sekhek nkaimommalhkek ngkolhek aktemeskeso apientalhnemo#7:39 Amanie lhtoka nkaimommalhkak ematong Jesús, netamen elhatekhangvomok nahan kakpota elhkak apientalhnemo. Jesús ma'a.
Apketlheianma enenlhet alpeivekha aptemakha Jesús
40Moklhem'a lhta enenlhet akto apkellengai'a apkeltennaikama Jesús ma'a, lhta aptangkok:
—Have na niapak ankek apto apkeltennasemmap ania'a nellailhemo nak evakha ta, ka ham, enenlhet anak —lhta aptangkok ma'a.
41Koka po'ok enenlhet alhta aptak:
—Cristo enenlhet anak ham.
Koka po'ok alhta aptak:
—Have', menieniemek na lhta m'a Cristo iokhalhma Galilea nak. 42Nietnek aktalhesammalhka Vakkahak Eniapom Neten apaivoma Cristo apto David aptaven neptamen, etiemok hata natemma Belen, apkavakha David annenga —lhta aptak ma'a.
43Ma lhta nkolhok mo'ok apketlheianma enenlhet'avok Jesús ma'a. 44Moklhem'a enenlhet alhta apkeleltave niekhe ellaqlhengkesek Jesús nengaqlhengkasemmalhkelha, koka nkelvannalhke lhta apvalho'ok ma'a.
Apkelientalhnakha apkeliaskeiam Jesús
45Ka apkeltaqho lhta neptamna'ak apkellanekama Eniapom Neten apnemakha apkakhangkelha apkelemhama apmaniaie' sacerdotes kakpota nhan fariseos, ka apkelelmalhnengka lhta, lhta aptangkok:
—¿Se lha kto meliantemantamo nak enenlhet nak lhek ke, he? —lhta aptangkok apkelemhama apmaniaie m'a.
46Ka apkellatemmongka lhta m'a, lhta aptangkok:
—Ntasek lhek apkeltennaikama m'a, mamma enenlhet elhok ma'a —lhta aptangkok ma'a.
47Koka lhta aptangkok fariseos:
—¡Apkeliennengkaskek na ketlhengkap ma'a! 48Ellanhono, apkeliaskakmek apkelanma apmanie enganko'ok anak, kakpota nhan apkelanma apmanie fariseos enenlhet anak ma'a. 49Koka enenlhet'avok anak meliamok nak ley, nema aliematkeskama m'a —lhta aptangkok ma'a.
50Apne lhta nhan ma'a lhema fariseo apvesai'a Nicodemo, apioiakmo lhna lhta pelhasep apnakha Jesús, lhta aptak apkellano aptemo lhemek fariseos:
51—Ka ntak ley enganko'ok anak, mangapvankek anlhenek apselhnanemmap emmo'ok metka nellengai'a la aplhenammap apanke —lhta aptak.
52Ka apkellatemmongka lhta m'a, lhta aptangkok:
—Lheiap anak na apto malha ko Galilea. Eltameso no apkelanei'o henganemakha Moises, mamma lhema apkeltennasemmap ania'a enieniemak ma'a Galilea —lhta aptangkok ma'a.
Ngkelvana aktevaskama aliemhapma
53Netamen ma'a apkeltaqhakho lhta moklhem'a apkakhaiangkelha.
Currently Selected:
Juan 7: TMF
Highlight
Share
Copy
Want to have your highlights saved across all your devices? Sign up or sign in
©2023 LETRA Paraguay
