Hechos 3

Pedro aptaqmelkasekha enenlhet apiaqteikama

1La 3 ienaqteso lhna ntemak ma'a, apmeiekho lhnak Pedro kakpota nhan Juan Eniapom Neten apnemakha kakpota elelmalhnak ma'a, apkeltemakha apankavek na mota m'a. 2Apnengkek nak na lhema enenlhet apiaqtekama apteianlhasekha m'a. Lhamakho aknem nak nema akiantemekha mota nekha atong akvesai'a Aktaqmelo kakpota eniapiosakpok ellasnama qaselha apkellelto apkelentalhnengvekha m'a. 3Apvetai'o lhnak enenlhet apiaqtekama aplheiakmo Pedro kakpota nhan Juan, sekha lhnak apkenmahai'a elentelhek Eniapom Neten apnemakha m'a, apkelelmalhneiangka lhnak patakkom ma'a. 4Apkellanei'avek nak sekhek Pedro kakpota nhan Juan enenlhet anak, lhna aptemak apkanemo Pedro:

—Eltaqmelkaso no hengellailhemo sekhek ennengko'o lheiap —lhna aptemak ma'a.

5Apkelanekhek nak aptakha enenlhet nak ma'a, aklheianmo lhnak apvalhok apkenmahai'a ellangkok qaselhaha. 6Koka lhna aptemak Pedro apkanemo:

—Mamma ko'o patakkom kanhan oro, vanlha koka asmak'ak atnek angvana akieplomo apvesai'a Jesucristo ko Nazaret: ¡Etnemekha neten, elheng ma'a! —lhna aptemak Pedro.

7Ka apmamo lhnak apmek akiennakha Pedro m'a, apkenengkasekho nhan neten, aliennaiekho lhnak kolhvavek ankek apmanko'ok kakpota nhan haimatkok apankok. 8-9Apnelhtengamavek nak neten, aplhengamo nhan ma'a, apkelentalhnemo lhnak na lhemek Eniapom Neten apnemakha. Apnelhteiangkek nak neten neksa aplhengama, apiavenkaseiangka nhan apvesai'a Eniapom Neten ma'a. Aplhamakho enenlhet'avok nak na apkelvetai'a m'a, 10avanhek nak na aliemaskama apvalhok kanhan apkennelhtengama neten ngkanek apkeliekpelkemave nak apto lhnak apkellanhekama mota qaselha m'a akieto atong Eniapom Neten apnemakha akvesai'a Aktaqmanma.

Apkeltennaikama Pedro akieto malamong pa'at akvesai'a Salomón

11Mang nak elpaknemekhak aptaqmalveiam ma'a Pedro kakpota nhan Juan akieto m'a malamong pa'at akvesai'a Salomón. Apkeletkaikokhek nak enenlhet'avok akieto apkelaqnangkolha m'a aniem'o alpelapkeskama apkelvetai'a. 12Netamen lhna aptemak Pedro apkellanemo m'a:

—Ketlhengkap enenlhet ko Israel, nkeliemaskek lhek apvalho'ok apkellan'o aptaqmalveiam enenlhet anak hengke'e. Apkellanek na ketlhengkap aniem'o nenmopvanka'a engankave kanhan neltaqmelkasemmalhko ennengko'o, koka have niekhe m'a. 13Eniapom Neten apveske apanko'ok nelieihengka nnenga Abraham, Isaak kakpota nhan Jacob, ka apkaikamok apmopvana apketka Jesús kakpota nhan aptemeskeskamo neten apankek ma'a. Apkeltaknongkongke lhtoka ketlhengkap ma'a, apkellangkongvaiakmo nhan apkelanma apmaniaie romano, niekhe apmahai'o lhta epaqnemekhak Pilato m'a. 14Apkeltaknongkongke lhtoka ketlhengkap apto Apokkenammap memangveiam ngkolatsekama, apeivomo nhan, apkeleltemo lhtoka ketlhengkap epaqnemekhak lhema ntekioma niapom. 15Alleniemai'o lhtoka ketlhengkap apmatnamo m'a apto niekhe apkelanai'a neniennaktema nak, Eniapom Neten koka nhan aplhatekhaskeiakmok ma'a, ennengko'o nhan nelvetaiangko m'a. 16Aniem'o koka nhan mei'askeiam apvesai'a m'a aptaqmalvakmo lhkek enenlhet anak hengke'e apkeliekpelkemelha nak ketlhengkap.

17Elialheng'a, asiavek ko'o neksa meliamo lhta ketlhengkap kakpota nhan apkelemhama apmaniaie apanko'ok anak apkeleltemo lhta ematong Jesús ma'a. 18Koka apkellelientemongkeskamavek nak nanek apkeleltennaskama ania'a annenga Eniapom Neten apankok ennangkok hata akientalhnema apto apkapaskama Cristo, ntemengkek ma'a qaselha nak. 19Ntase kolhva eliaqmongkasekha mo'ok apvalho'ok ketlhengkap, elpengkamok na apvalho'ok akieto m'a apnakha Apveske, netamen hata m'a ngkolhek anmaskeskaso apkeltemakha ngkollatsekama. 20Netamen hata m'a elpaieskeskamok apvalho'ok Apveske, apkapaso ta mokhom apto apkeliekieskama tep nak nanek, apto Cristo, Jesús apvesai'a m'a. 21Koka Jesús elhek hata mokhom ma'a neten akvakmo apeneso lhamakho qaselha alhnanko'ok Eniapom Neten, aptemo lhnak nanek aplheianma aniem'o apketlhenekho apkeleltennaskama ania'a apanko'ok apkelpokkanma. 22Apkeleltennaskangkek nak na nek Moises nengelieihengka, lhnak nanek aptemak:

"Eniapom Neten Apveske apanko'ok eliekiaqsek hata lhema aphapak apieseksek ma'a kakpota etnek apkeltennaskamo ania'a apankok ka stonak ko'o. ¡Eleliehekho ta m'a enenlhet anak ma'a! 23Koka apkellelto la meleliehekho m'a apkeltennasemmap ania'a nak ma'a, ngkolhek hata aktepkeso m'a nentema nennemolhema m'a", lhnak nanek aptemak Moises annenga.

24Ampai'akha sekhek anke lhta apkeltennasemmap ania'a Samuel annenga kakpota nhan po'ok apkeleltennasemmap ania'a apketlheiam neptamen ma'a apketlheianmo m'a aktemakha nak nelvetai'a ennengko'o kolhvave nak. 25Ketlhengkap apkellelto aptavana'ak neptamen apkeleltennasemmap ania'a annenga, etlhevangkok hata nhan qaselha annemo mo'ok apvalho'ok apkenmahai'akha etnangkok Eniapom Neten kanhan apkelieihengka. Lhnak nanek aptemak Eniapom Neten apkanemo Abraham:

«Nkoltaqmelek hata apkellangiemhaikama aplhamakho enenlhet'avok lhma nkek ham aniem'o aptaven neptamen lheiap», lhnak na nek aptemak Eniapom Neten.

26Hai, Eniapom Neten alhta aplhatekhaskakmok Apketka, apkapaske lhta nhan ma'a kakpota eltaqmelkeskesek apkellaniemhaikama apmaniaie koka ketlhengkap, kakpota elvatesangkok na qaselha ngkollatsekama apkellanekamok —lhna aptemak Pedro apkellanemo enenlhet'avok ma'a.

Currently Selected:

Hechos 3: TMF

Highlight

Copy