Matiyu 9
9
Mwurunku bɛɛ kene bi ki Yesu gbɛ
(Maraka 2.1–12; Luki 5.17–25)
1Yesu i a pwulu de buŋ bɛɛ ru, ntiŋ i baa ki rukwuru, ntiŋ i ta awɔ kili ki ra. 2Koŋ bɛɛ ri i na mwurunku bɛɛ wu ntiŋ tɛ, niŋ bili wuru nankaraka ru. Yesu ǹʼja-i tu niŋ koŋ kiri bili afinŋ na, ntiŋ i ǹʼbi mwurunku ki tɛ tu : « Ńʼdanshuru, nʼsunfuru, mɔɔn bijɛ kiri tu-i nʼtɛ. »
3 Sariya kalimɔɔ bɛɛ ri niŋ bimaan ki rama-i waarinŋ wɔ̀ ru, kí i ǹʼbi-ri arì ciiru tu : « Ka weŋ ka i Kirinŋ tɔ li-a dɛ! »
4Yesu i kí ciiru wɔ ki tɔ, ntiŋ tu kí tɛ : « Nfɛnŋ na, ka ɲakilila jɛ ka bishi i ji ábɛɛ ciiru? 5Ŋì i bi mwurunku ki tɛ tu ‹ mɔɔn bijɛ kiri tu-i nʼtɛ ›, walima ŋì i bi tu wú jɔrɔkɔ tu, wú i tiri tan, ábɛɛ cirasun tu ǹʼdanwɔ bimaŋ di? 6Dɔnsaŋ, míŋ a ǹʼji ábɛɛ wu tu, mínwɔ̀ i Koŋ Danshuru ki i, ńʼtu so míŋ gbɛ ka pwɔkulinŋ ka sun, ŋí i konaŋ kiri wɔ bijɛ kiri tu kí tɛ. »
Niŋ ma-i, ntiŋ i ǹʼbi mwurunku ki tɛ tu : « Jɔrɔkɔ, ŋi i nʼwɔ bilifinŋ ki shi, ŋi i tiri kulu. »
7Mwurunku ki i jɔrɔkɔ, wú i tiri awɔ mani nu. 8Konaŋ kiri niŋ ja-i waarinŋ wɔ̀ ru, kɛmi i de kí ru, kí i Kirinŋ gbɛ-ri, ninwɔ̀ ki ka so ka bishi wɔri-i konanmini tɛ.
Matiyu dɔri bi ki Yesu gbɛ
(Maraka 2.13–17; Luki 5.27–37)
9Yesu po san-i niŋ mani nu, ntiŋ fwuudera ki i shuru bɛɛ sɔɔ ja ɲinisarakɔlɔtɔnŋ kiri wɔ baara mamaŋ ki ru, niŋ shuru ki tɔ ki wuru tu Matiyu#9.9 Matiyu : Mìŋ shuru tenŋ ki tɔ ki i tu Lewi, Maraka wɔ sɛbɛ ki ru.. Ntiŋ i ǹʼbi niŋ tɛ : « Ǹʼpa míŋ cɛfan. » Matiyu i jɔrɔkɔ, ntiŋ i ǹʼpa Yesu cɛfan.
10Niŋ kɔɔtɛ, jibi bɛɛ, Yesu wuru nufinŋ nu-a Matiyu wɔ mani nu. Ɲinisarakɔlɔtɔnŋ mwɔɔnna fa bi kulinŋ matɔnŋ mwɔɔnna tɔri ri i na sɔɔ ntiŋ fa awɔ kalindaŋ kiri fan niŋ nufinŋ nunama ki tɛ sɛbɛ. 11Farinsiyɛnŋ kiri bɛɛ ri niŋ ja-i waarinŋ wɔ̀ ru, kí tu Yesu wɔ kalindaŋ kiri tɛ tu : « Nfɛnŋ na, ábɔɔ kalimɔɔ ki i nuŋ nu-ni ɲinisarakɔlɔtɔnŋ kiri fa bi kulinŋ matɔnŋ kiri fan? »
12Yesu niŋ wulu ki rama-i, ntiŋ tu kí tɛ tu : « Koŋ kenemaan kiri maku janmatɔnŋ na kì, nka kiratɔnŋ kiri maku i ǹʼna. 13Á ta á miiri Kirinŋ wɔ wulu ki ru wulu kari kɔri ki sun tu : ‹ A ábɛɛ ámaŋ sunmakwulupa, míŋ i niŋ tɛ, ŋì i fwuu ábɔɔ saraka wɔrimaan sun ńʼtɛ. ›#Ose 6.6. Míŋ na koŋ telimaan kiri dɔri kì, duu bijɛmatɔnŋ kiri. »
Yesu ɲaanbi wɔ̀ tan-i sunŋ de bi ki sun
(Maraka 2.18–22; Luki 5.33–39)
14Niŋ kɔɔtɛ, Wutɔnŋ Yuhana wɔ kalindaŋ kiri i na Yesu ranɔri tu : « Nfɛnŋ ncin-a yibɛɛ fa Farinsiyɛnŋ kiri i sunŋ de-ri, ábɔɔ kalindaŋ kiri dumiŋ sunŋ de-a kì? »
15Yesu i kí rupwulu tu : « Marishinŋ ki wɔ wɔshuru kiri ra so arì ɲaannuŋunu-i, ŋì i kí fa ntiŋ tu arìmaŋ fan wa? Waaci yirira i nmaŋ, ntiŋ a na shi san kí ra. Niŋ jibi kiri ra, kí a na sunŋ de-ri.
16Koŋ juulinŋ ŋunaŋ bwulu sɔɔ-ra, ŋi i juulinŋ bwuumaan nada kì. A niŋ ma, juulinŋ ŋunaŋ bwulu ki a juulinŋ bwuumaan ki cɛɛn-ɛ, ŋì i ǹʼgbɛri. Niŋ ɲaan ki tɛ, juulinŋ bwuumaan ki gbɛrika ki a juu, ŋì i fwuu a jɔnɔ ki sun.
17Koŋ fani dunfɛnŋ juuraŋ bo-a foroko bwuumaan ni nu kì. A niŋ ma, dunfɛnŋ juuraŋ ki borama ki a foroko bwuumaan kiri gbɛri, dunfɛnŋ ki i kɔnkɔli, foroko kiri i ji-a li. Niŋ na, dunfɛnŋ juuraŋ ki kakan-i foroko ŋunaŋ ni nu, a niŋ ma, ǹʼtɔri li-a kì. »
Yawutu kiri ŋununtiŋ bɛɛ danmari kene bi ki, niŋ fa mari wɔ̀ a gbɛ pa-i Yesu wɔ juulinŋ tɔnŋ na ki ra
(Maraka 5.21–43; Luki 8.40–56)
18Ŋì i Yesu tu wulu ki ra kí tɛ, Yawutu kiri ŋununtiŋ bɛɛ i na nmaŋ. Ntiŋ i a kwushiri Yesu fɛ, ntiŋ i ǹʼbi tu : « Míŋ danmari ki beeni-i kaa dɔɔ, míŋ i miŋ nafɛ-a, na nʼgbɛ bili ǹʼsun, ŋì a ŋmɛni. »
19Yesu i jɔrɔkɔ, ntiŋ i ǹʼpa Yawutu ŋununtiŋ ki cɛfan, ntiŋ fa awɔ kalindaŋ kiri.
20Niŋ waari ru, mari bɛɛ wuru konaŋ ki ru nmaŋ, juwu kɔbali kira wuru niŋ na kabi jiri bwununfuuli, niŋ i a kpari Yesu tɛ, nmari i po ntiŋ kɔɔtɛ, nmari i a gbɛ pa ntiŋ sunjuulinŋ ki tɔnŋ ki ra. 21Niŋ mari ki ǹʼbo wuru a ciiru tu :
« A míŋ so ńʼgbɛ pa bantenŋ tan-i ntiŋ wɔ juulinŋ ki ra, míŋ a kene. »
22Yesu i a ɲaannupwulu, ntiŋ i mari ki ja, ntiŋ tu nmari tɛ : « Ńʼdanmari, tɔnnafurubi kila, mɔɔn bilinabi ki nʼkene-i. » Mìŋ manaanŋ tenŋ ki ru, mari ki i kene.
23Yesu na-i ta so Yawutu ŋununtiŋ ka wɔ mani ki ru, ntiŋ i kpilinŋ fyɛtɔnŋ kiri fa konaŋ ki ja mani ki bataa ru, kí i wulu ki mwɔ-ni, 24ntiŋ tu kí tɛ tu :
« Á á san nmaŋ, maannaanŋ ki beeni kì, ŋì i ɲinintan-a. » Niŋ bimaan ki sun, konaŋ ki i yɛtan bo-ri Yesu sun.
25Kí konaŋ ki bataa po-i taanna waarinŋ wɔ̀ ru, Yesu i de fu ki ru, ntiŋ i maannaanŋ ki pa a gbɛ sun, ŋì i ŋmɛni.
26Niŋ bi mamaan ki wulu ki i niŋ sɔɔta ki mani ki bataa rapo.
Ɲaanfwuu fuuli bɛɛ kene bi ki Yesu gbɛ
27Yesu i po san niŋ mani nu. Ntiŋ tirira ki, ɲaanfwuu fuuli bɛɛ i arì bo ntiŋ cɛfan, kí i fali-li, kí i ǹʼbi-ri tu : « Dawuda danshuru, yi sunmakwulupa! »
28Yesu ta-i so kulu waarinŋ wɔ̀ ru, ɲaanfwuu fuuli ki i arì kpari ntiŋ tɛ, ntiŋ i kí ranɔri tu : « Ábɛɛ bili-i ǹʼna tu míŋ a so ábɛɛ ɲaninaŋ kiri rawwulu-i ncinŋ wa? »
Kí i ntiŋ nupwulu tu : « Aawe, Ŋuntiŋ. »
29Niŋ na, Yesu i a gbɛ pa kí ɲaninaŋ kiri ra, ntiŋ i ǹʼbi : « Ábɛɛ bili-i míŋ na ɲaan wɔ̀ tɛ, ŋì ma ŋì i kɛɲɛ niŋ wu. » 30Kí ɲaninaŋ kiri i nawwulu. Nka Yesu i ǹʼbi furu kí tɛ tu kí fa ncusun koŋ i niŋ tɔ kì. 31Nka kí po san-i fu ki ru mani wɔ̀ ru, kí i Yesu wulu ki sunjo niŋ sɔɔta ki mani ki bataa ru.
Bubu bɛɛ kene bi ki Yesu gbɛ
(Luki 11.14–15)
32Niŋ shuru fuuli ki wuru po-a waarinŋ wɔ̀ ru, konaŋ kiri i na ɲinijɛtiŋ bɛɛ wu Yesu tɛ, niŋ ɲinijɛ ki niŋ koŋ ki ji wuru bubu. 33Yesu i ɲinijɛ ki kalikali, shuru ki i a bo wulubi sun. Niŋ jamaan ki i bo konaŋ ki bataa tɔnŋ sun, kí i ǹʼbi-ri tu : « Ka bi ka bishi ja ja-i Isirayɛli kɛniŋ ki ru fɛsɛfɛsɛ sun kì. »
34Nka Farinsiyɛnŋ kiri i ǹʼbi-ri tu : « Wú i ɲinijɛ kiri kalikali-la ɲinijɛ kiri wɔ ŋununtiŋ ki wɔ so ki wu. »
Yesu wɔ konaŋ ki sunmakwulupa bi ki
(Maraka 6.34; Luki 10.2)
35Yesu wuru ta-a kili sinaŋ kiri fa kili pyaanŋ kiri ra, ntiŋ i konaŋ ki kali-li Yawutu kiri wɔ kalinfu kiri ru, ntiŋ i kirinpɔlila Masabi ki Wulujii ki sunjo-ri, niŋ fa ntiŋ i konaŋ kiri wɔ kira kiri fa kɔ́ɔ́ bɔlɔmabi kwuru ki bataa kene-ni. 36Ntiŋ konaŋ ki ja-i waarinŋ wɔ̀ ru, kí makwulu i ntiŋ pa, sabu kí yɛli wuru-i, daŋ i kɔ kí sun miŋ tu saa ri, neetɔnŋ nwɔ̀ri ra kì. 37Niŋ ki ra, ntiŋ i ǹʼbi awɔ kalindaŋ kiri tɛ tu :
« Bilaŋ tɛri wɔ ki mwɔ-i, nka bilaŋ tɛritɔnŋ kiri nakuru-i, 38niŋ ki ra, á jitiŋ ki rafɛ tu ntiŋ cinŋ matiiri cin, kí i ta awɔ bilaŋ ki tɛri. »
Currently Selected:
Matiyu 9: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
