Yuhana 5

Yesu wɔ bɔlɔma bɛɛ kene bi ki Yerusalɛmu

1Niŋ bataa kɔɔtɛ, Yawutu kiri wɔ ɲaannabyɛ bɛɛ i na so, Yesu i tunpa ta Yerusalɛmu. 2Yerusalɛmu kili ki demantɔnŋ wɔ̀ i dɔri-ra tu saa ri demantɔnŋ, tonta#5.2 tonta : Niŋ wuru tonta sanmaan i, ju i ji ǹʼnu, walima kí i ju faa bo-ri ǹʼnu, nwɔma koŋ i so a wu-i ǹʼnu. bɛɛ wuru niŋ demantɔnŋ ki tɔntɛ, nwɔ̀ i dɔri-ra Iburuwulu ki ru tu Bɛtisayida. Bɛlinŋ taanŋ bwɔmaan wuru niŋ ta ki kankanfan, yìrì i ǹʼnakwunu. 3Kiratɔnŋ mwɔɔnna mwɔɔnna ni bili bili wuru niŋ bɛlinŋ kiri fɛ. Niŋ kiratɔnŋ kiri wuru ɲaanfwuu ri fa bɔlɔma ni fa mwurunku ri i. [Niŋ kiratɔnŋ kiri wuru ju ki ruti waaci ki sunsuu-ra. 4Sabu Ŋuntiŋ ki wɔ mɛlɛkɛn bɛɛ wuru jɛri-ra waaci kiri bɛɛ ri ru, ŋì i na niŋ ju ki ruti-ri. A niŋ ju ruti ki kɔ-ri waarinŋ wɔ̀ ru, kiratɔnŋ wɔ̀ jɔnɔ wuru jɛri-ra niŋ ta ki ru, nintiŋ wɔ kira ki wuru kɔ-a, hali niŋ ji-ri kira kwuru woo kwuru u.]

5Niŋ ɲaan ki tɛ, shuru bɛɛ wuru nmaŋ, niŋ jiri kɔniŋ fa jiri bwununfulupɔni (38) ma wuru awɔ kira ki ra kɔ. 6Yesu niŋ shuru ki bilimaan ki ja-i waarinŋ wɔ̀ ru, ntiŋ i ǹʼtɔ tu ntiŋ cin niŋ mani ki ru kɔ, ntiŋ i ntiŋ nanɔri tu : « Miŋ i ǹʼtɛ ŋi i kene wa? »

7Kiratɔnŋ ki i Yesu wɔ wulu ki rupwulu tu : « Ŋuntiŋ, a ju ki ruti waarinŋ wɔ̀ ru, koŋ míŋ gbɛ nwɔ̀tiŋ a míŋ shi jɛri ǹʼnu kì, míŋ i so-a ńʼcɛɛn so sun nmaŋ, niŋ i ta-a fa koŋ tɔri jɛri-i míŋ jɛŋ kɔ. »

8Yesu tu niŋ shuru ki tɛ : « Jɔrɔkɔ, ŋi i nʼwɔ bilifinŋ ki shi, ŋi i tiri tan. »

9Mìŋ manaanŋ tenŋ ki ru, shuru ki i kene, ntiŋ i awɔ bili byɛ ki shi, ntiŋ a bo tiri tan sun.

Niŋ bi ki ma-i Yawutu kiri wɔ Nufaan jibi bɛɛ sun. 10Yawutu kiri jɛntɔnŋ kiri i ǹʼbi shuru kenemaan ki tɛ tu : « Nufaan jibi yɛ! Miŋ kakan ŋi i ka bili byɛ ka shi kì. »

11Shuru kenemaan ki tu : « Konwɔtiŋ míŋ kene-i, ninki ǹʼbi-i tu : ‹ Nʼwɔ bilifinŋ ki shi, ŋi i tiri tan. › » 12Kí i ntiŋ nanɔri tu : « Nkɛnŋ ǹʼbi tu miŋ nʼwɔ byɛ ki shi ŋi i tiri tan? »

13Shuru kenemaan ki a kenetɔnŋ ki tɔ-ri kì, sabu Yesu fɔni wuru konaŋ ki ru, ninwɔ̀ wuru cuucuu-ra niŋ mani ki ru. 14Pyaanniŋ, Yesu fa niŋ shuru ki i ta fu Kirinfusinaŋ ki ra. Yesu tu ntiŋ tɛ : « Ǹʼshɛɛli, miŋ kene-i dɔɔ! Nka nʼbanba, fa bijɛ tɔri ma kili kì, nwɔma bi wɔ̀ juu ka wu, niŋ fa nʼkila kì. » 15Shuru ki i ta ǹʼbi Yawutu kiri tɛ, tu koŋ wɔ̀ afinŋ kene, tu Yesu i.

16Niŋ ma-i, Yawutu kiri i jɔrɔkɔ Yesu cɛfan, tu nfɛnŋ na ntiŋ niŋ shuru ki kene Nufaan jibi ki sun. 17Yesu i kí rupwulu tu : « Míŋ Tiŋ ki i faa baara ma-a, míŋ yɛri ki i baara ma-a waarinŋ bataa ru. »

18Niŋ wulu ki bimaan ki i ǹʼbɛɛ bo Yesu kilɛn ŋuŋ ki sun Yawutu kiri gbɛ. Kí tu : « Wú Nufaan jibi ki rufyɛ-i, niŋ wú po kì, wú i Kirinŋ dɔri-ri tu a Tiŋ sɛlɛsɛli, wú i a yɛri pyi-ri Kirinŋ wu. »

Yesu wɔ sotinbi ki

19Yesu i wulu ki shi, ntiŋ i ǹʼbi kí tɛ tu : « Sɛli ki ra, míŋ a ǹʼbi ábɛɛ tɛ ńʼtu Danshuru ki so-a bi tɔri tenŋ ma-i a yɛrɛtɛ kì, duu ŋì i Tiŋ ki ja-i nwɔ̀ ma-a. Tiŋ ki bi wɔ̀ ma, Danshuru ki yɛrima ki i niŋ bishi ma-a, 20sabu Danshuru ki bidi-i Tiŋ ki tɛ, ŋì i a mabi ki bataa ji-ri ǹʼwu. Tiŋ ki i faa-ra na sotinbi wɔri Danshuru ki tɛ, ŋì i bi ri ma, nwɔ̀ri gbɛ-i ábɔɔ bi jamaan kiri bataa wu, fɔ yìrì botɔnsun i ábɛɛ pa. 21Sabu Tiŋ ki i konkwuu kiri ŋmɛni-na, ŋì i ɲaninkulutɔnbi ki wɔri kí tɛ ɲaan wɔ̀ tɛ, a Danshuru ki ji ǹʼtɛ a i ɲaninkulutɔnbi ki wɔri konwɔtiŋ tɛ, ŋì i wɔri-ra nintiŋ tɛ. 22Niŋ bantenŋ i kì, Tiŋ ki yɛrima ki konaŋ kiri wɔ kiti ki kwuru-ra kì, ŋì niŋ kiti kwuru bi ki bataa tu-i Danshuru ki gbɛsun, 23nwɔma konaŋ kiri bataa i Danshuru ki gbɛ Tiŋ ki gbɛka ra. A konwɔtiŋ a kaan Danshuru ki gbɛ, nintiŋ a kaan Tiŋ ki gbɛ, ninwɔ̀ ki Danshuru ki cin-i. »

24Yesu tu kí tɛ sɛbɛ tu : « Sɛli ki ra, míŋ a ǹʼbi ábɛɛ tɛ ńʼtu konwɔtiŋ i mɔ́ɔ́n wulu kari rama-a, ntiŋ i bili míŋ cintɔnŋ ki ra, ńʼtu nintiŋ ɲaninkulutɔnbi kɔbali ki kila kɔ, kiti ki a kwuru ntiŋ sun kili kì, ntiŋ po san-i beŋ ki ru, ntiŋ i de ɲaninkulutɔnbi ki ru. 25Sɛli ki ra, míŋ a ǹʼbi ábɛɛ tɛ, ńʼtu waaci yiri-ra nmaŋ, niŋ waaci ki i dɔɔ, ńʼtu koŋ beenimaan kiri ra Kirinŋ Danshuru ki wulu ki rama. A nwɔ̀ri ǹʼwulu ki rama, nini a ji ǹʼɲaninkulutɔnŋ ni i.

26Sotinbi i Tiŋ Kirinŋ gbɛ, ŋì i ɲaninkulutɔnbi ki wɔri konaŋ ni tɛ ɲaan wɔ̀ tɛ, ŋì sotinbi wɔri-i Danshuru ki tɛ, ŋì i ɲaninkulutɔnbi ki wɔri konaŋ kiri tɛ mìŋ ɲaan tenŋ ki tɛ. 27Miŋ tu Danshuru ki i Koŋ Danshuruu, ŋì i kiti kwurumaanna ki so ki wɔri-i ǹʼtɛ.

28Ŋì fa bali á ra kì, waaci yirira i nmaŋ, a niŋ so, konkwuu wɔ̀ri i saali kiri ru, nini a Koŋ Danshuru ki wulu ki rama, 29kí i po san saali kiri ru, nwɔ̀ri bi shɔɔrinŋ ma-i, nini a ŋmɛni ɲaninkulutɔnbi ki tɛ, nka nwɔ̀ri bi kulinŋ ma-i, nini i ŋmɛni kiti kwururama ki tɛ. »

Yesu tumaŋ ki

30Yesu tu sɛbɛ : « Míŋ so-a bi tɔri tenŋ ma-i ńʼyɛri tɛ kì. A Kirinŋ nwɔ̀ bi míŋ tɛ, míŋ kiti ki kwuru-ra ŋí i ǹʼkɛɲɛ niŋ wu. Mɔ́ɔ́n kiti ki teli-i, sabu míŋ ǹʼkwuru-ra ŋí i ǹʼkɛɲɛ ńʼyɛri ki dintɛ bi wu kì, duu míŋ cintɔnŋ ki dintɛ bi. »

Danshuru ki shɛɛri kiri

31« A míŋ ji wuru ńʼyɛri wulu bi-a, koŋ wuru-ra mɔ́ɔ́n wulu ki pa daŋ wu kì.

32Nka shɛɛri tɔri i míŋ na, ntiŋ i wulu wɔ̀ bi-a míŋ bi ki sun, niŋ i sɛli i. 33Ábɛɛ kpeeri bo ta-i Yuhana tɛ, ntiŋ sɛli ki bi-i ábɛɛ tɛ míŋ bi sun. 34Míŋ kɔniŋ maku konanmini wɔ shɛɛri ra kì, nka míŋ i ka bi-a, nwɔma ábɛɛ i á mwu. 35Sɛli ki ra, Yuhana ji-i miŋ tu sifilɛn cumaan, nwɔ̀ sarinŋ i po-a ábɛɛ faninmwuŋ, nka ábɛɛ á ciirudi-i ǹʼsarinŋ ki tɛ, waarinŋ pyaanŋ bantenŋ nu.

36Shɛɛri tɔri i míŋ wulu bi-a, nwɔ̀ gbɛ-i Yuhana wu : Tiŋ Kirinŋ baara wɔ̀ri biye-i míŋ gbɛsun, míŋ nini wɔ̀ri ma-a, nini i ǹʼji-a fɛrɛfɛri, tu Tiŋ Kirinŋ míŋ cin. 37Tiŋ Kirinŋ wɔ̀ míŋ cin-i, niŋ yɛri ki wulubi-i míŋ bi sun, nka ábɛɛ ǹʼwulu ki rama ja kì, á fani ɲaniŋ tu ja ǹʼna sun kì. 38Ǹʼwɔ wulu ki sɔɔ ábɛɛ ciiru kì, sabu Ŋì nwɔ̀ cin-i, ábɛɛ bili niŋ na kì. 39Ábɛɛ cɛrukɔli-i Kirinŋ wɔ wulu sɛbɛ ki kali ki ra, sabu ábɛɛ cirasun, tu ábɛɛ ra ɲaninkulutɔnbi kɔbali ki kila niŋ nu, mìŋ Sɛbɛ kiri dumiŋ míŋ wulu bi-a cɔ! 40Niŋ fa a fɔn na, ábɛɛ i ǹʼtɛ á i na míŋ tɛ, nwɔma á i ɲaninkulutɔnbi ki kila kì.

41Míŋ konanmini wɔ gbɛbi ceeli-la kì. 42Nka míŋ i ábɛɛ tɔ-a, Kirinŋ bidi ábɛɛ tɛ kì. 43Míŋ na-i ńʼTiŋ ki wɔ na nu, ábɛɛ ji míŋ tɛ kì, nka a koŋ tɔri ji na-ni a yɛri ki wɔ na nu, ábɛɛ wuru-ra ji nintiŋ tɛ! 44Ábɛɛ ra so bilinabi ma-i dɔɔkunŋ, ábɛɛ wɔ̀ri i tɔ ceeli-la a kaashi konanmini ni gbɛ, nka tɔ wɔ̀ i kila-a Kirinŋ tenŋ gbɛ, á jɛɛn-na á i niŋ ceeli kì?

45Á fa npwulu-li tu mínki a ta ábɔɔ pɔli ki bi Tiŋ Kirinŋ ɲaanfɛ kì dɛ! Ábɛɛ gbɛ faa-a Musa wɔ̀ ru dɛ, ninki a ta ábɛɛ pɔli wulu ki bi.

46Ábɛɛ ji wuru bili-li Kirinŋ wɔ cintɔnŋ Musa ra, ábɛɛ wuru-ra bili míŋ na sɛbɛ, sabu ntiŋ i míŋ wulu bi-a awɔ sɛbɛ kiri ru. 47A ábɛɛ bili niŋ wɔ sɛbɛ ki ru wulu kiri ra kì, ábɛɛ ra so bili-i mɔ́ɔ́n kiri ra dɔɔkunŋ? »

Currently Selected:

Yuhana 5: JOB

Highlight

Copy