Lucas 20

Sira kestiona see mak foo direitu ba Nai Jesus

(Mateus 21:23-27; Marcos 11:27-33)

1Iha loron ida, Jesus hanorin no foo sai Maromak nia Novidade Diak iha area Uma Kreda Boot nian. Nia sei koalia hela, nai lulik nia xefi sira, mestri relijiaun sira ho lideransa katuas sira mai hasoru Nia 2hodi husu ba Jesus, “O iha direitu saida para halo buat sira nee? See mak foo direitu nee ba O?”

3Jesus hataan, “Hau mos atu husu buat ida ba imi. 4João nia sarani nee mai hosi Maromak ka hosi ema?”

5Sira husu ba malu, “Se ita hataan, mai hosi lalehan‘’, Jesus sei husu fali dehan, ‘Entaun, nusaa mak imi la fiar ba nia?’ 6Maibee se ita hataan, ‘mai hosi ema’, maka ema lubuk boot nee sei foti fatuk hodi tuda mate ita. Tanba sira fiar katak, João nee Nai Maromak nia profeta.”

7Entaun sira dehan ba Jesus, “Ami la hatene, sarani nee mai hosi nebee.”

8Jesus hataan, “Se nunee, Hau mos la hatete ba imi, see mak foo direitu mai Hau hodi halo buat sira nee.”

Komparasaun kona ba ema nebee aluga toos uvas

(Mateus 21:33-46; Marcos 12:1-12)

9Depois Jesus hanorin ema barak iha nebaa ho komparasaun ida nunee: “Iha toos nain ida kuda uvas iha nia toos. Kuda hotu tiha, nia foo ba ema aluga, depois nia baa hela kleur iha rai liur.#Isaías 5:1 10Too tempu kuu uvas, toos nain haruka nia ema ida baa simu ninia parte. Maibee ema sira nebee aluga toos nee baku nia, i duni nia fila ho liman mamuk. 11Depois toos nain haruka tan nia ema ida baa. Maibee sira mos baku nia, tarata nia, i haruka nia fila ho liman mamuk. 12Tuir mai nia haruka tan nia ema ida baa, maibee sira baku nia too kanek, i soe sai tiha nia hosi toos laran.

13Too ikus, toos nain hatete, ‘Hau atu halo tan saida? Diak liu hau haruka deit hau nia oan doben mak baa. Sira sei respeita nia.’

14Maibee bainhira ema sira aluga toos nee haree toos nain nia oan, sira dehan ba malu, ‘Nia mak sei hetan nia aman nia rikusoin hotu. Mai ita oho tiha nia, para rikusoin sira nee sai ita nian fali.’ 15Nunee sira rasta nia sai hosi toos laran, i oho tiha nia.

Agora, tuir imi nia hanoin, toos nain sei halo saida ba ema sira nebee aluga toos nee? 16Nia sei baa oho tiha sira hotu, depois foo fali toos nee ba ema seluk aluga.”

Bainhira sira rona Jesus koalia nunee, sira dehan, “Nee sei la akontese!”

17Jesus hateke ba sira hodi husu, “Entaun nusaa mak Maromak nia profeta hakerek nunee:

‘Iha fatuk ida nebee badaen sira soe tiha ona,

maibee agora fatuk nee sai fali fatuk prinsipal.’#Salmu sira 118:22

18Ema nebee monu ba fatuk nee, nia sei nakfera. I se fatuk nee monu kona ema, ema nee sei rahun.”

19Depois, mestri relijiaun ho nai lulik nia xefi sira rona komparasaun nee, sira hatene katak Jesus halo komparasaun nee kona ba sira. Nunee, sira buka dalan atu kaer kedas Nia. Maibee sira tauk ema barak iha nebaa.

Kona ba selu impostu

(Mateus 22:15-22; Marcos 12:13-17)

20Nunee mestri relijiaun ho nai lulik nia xefi sira haree tutuir Jesus. Sira haruka sira nia ema balu baa hafuhu Jesus hodi husu pergunta ba Nia. Ema sira nee finji husu ho laran, afinal buka atu halo monu Nia. Se Nia hataan sala, sira bele kesar Nia ba governador, para haruka kaer Jesus. 21Sira dehan nunee: “Mestri, ami hatene katak Ita Boot sempre koalia buat nebee loos, i la hili ema. Ita Boot sempre hanorin ho loos kona ba Nai Maromak nia hakarak. 22Ami nia pergunta mak nee: Tuir ita nia lei relijiaun, ita bele selu impostu ba estadu Roma nia liurai boot César ka lae?”

23Maibee Jesus hatene tiha ona sira nia bobar teen. Nunee Nia dehan, 24“Hatudu lai osan mutin ida mai Hau haree took. See nia oin mak iha osan nee? I see nia naran?”

Sira hataan, “Liurai boot César nian.”

25Jesus hataan, “Se nunee, foo ba estadu buat nebee mak estadu nian, i foo ba Nai Maromak buat nebee mak Nai Maromak nian.”

26Resposta nee halo sira admira teb-tebes, tanba sira la konsege hetan liafuan sala atu bele hamonu Nia iha ema barak nia oin. Entaun sira mos nonook ona.

Nai Jesus hanorin kona ba moris fila fali hosi mate

(Mateus 22:23-33; Marcos 12:18-27)

27Ema balu hosi grupu relijiaun Saduseu mos mai koko Jesus. Ema Saduseu sira hanorin dehan, ema mate sei la moris fila fali. Entaun sira husu ba Jesus,#Apostolu sira nia Istoria 23:8 28“Mestri, Moisés hakerek lei ida rai hela mai ita dehan, se mane ida mate husik hela nia kaben, maibee la iha oan, mane nia alin tenki kaben fali ho feto faluk nee, para bele foo jerasaun ba nia maun.#Deuteronomio 25:5 29Entaun, hanesan nee: uluk iha maun-alin nain hitu. Maun boot kaben, depois nia mate, la iha oan. 30Depois nia alin ida tuir nia nee, kaben fali ho feto faluk nee. La kleur nia mos mate, la iha oan. 31Nunee mos ho nia alin tuir mai. Nia kaben ho feto faluk nee, maibee nia mate, la iha oan. Nunee nafatin too nain hitu nee mate hotu, la iha oan. 32Ikus mai feto faluk nee mos mate. 33Agora ami husu nunee: feto nee kaben ho mane nain hitu. Aban-bainrua bainhira Maromak halo moris fali ema mate sira, feto nee nia kaben mak ida nebee loos?”

34Jesus hataan, “Iha mundu nee, ema kaben. 35Maibee aban-bainrua iha mundu foun, ema nebee serve atu moris fila fali hosi mate, la kaben ona. 36Sira Maromak nia oan, tanba Nia mak halo sira moris fila fali ona. Sira hanesan anju, i la mate tan ona. 37Hori uluk Moisés rasik hatudu loloos katak, ema mate sei moris fali, bainhira nia hakerek kona ba ahi lakan iha ai huun kiik-oan ida. Iha tempu nebaa, Maromak foo hatene ba Moisés dehan, ‘Hau mak Maromak. O nia bei-ala Abraão nia Maromak, Isac nia Maromak ho Jacó nia Maromak’.#Ezodu 3:6 38Nee hatudu katak, maski ema mate, ba Maromak, sira sei moris nafatin. Tanba so ema moris deit mak bele adora Nai Maromak, ema mate lae.”

39Rona nunee, mestri relijiaun balu dehan, ‘Mestri, Ita Boot hataan nee diak loos.” 40Hotu tiha ema ida la brani husu tan pergunta ba Jesus.

Kristu nee see?

(Mateus 22:41-46; Marcos 12:35-37)

41Depois Jesus husu ba sira, “Ema dehan katak, Kristu liurai David nia Jerasaun. Se nunee, nusaa mak 42uluk liurai David rasik hakerek iha livru Salmus dehan,

‘Nai Maromak hatete ona ba hau nia Nai, dehan,

“Mai tuur iha Hau nia sorin loos,

43too Hau halo O nia inimigu sira

taka rabat iha O nia ain okos.’ ”#Salmu sira 110:1

44Iha nee, liurai David rasik bolu Kristu, ‘hau nia Nai’. Se nunee, oinsaa mak Kristu bele sai fali David nia Jerasaun?”#20:44:Nunee Nai Jesus hanorin dehan, Nia laos liurai David nia Jerasaun deit, maibee Nia mos liurai David nia Nai.

Kuidadu ho mestri relijiaun sira

(Mateus 23:1-36; Marcos 12:38-40)

45Ema barak rona hela Jesus nia hanorin, iha ema hotu nee nia oin. Jesus hatete ba Nia eskolanti sira nunee: 46“Imi tenki kuidadu didiak ho mestri relijiaun sira. Sira gosta hatais batina naruk hodi lao, i gosta ema kumprimenta sira iha merkadu. Bainhira iha uma kreda laran ka iha festa, sira gosta tuur iha oin hanesan ema boot. 47Maibee sira mos gosta han-matak feto faluk sira hodi hadau sira nia uma, i sira finji harohan nar-naruk para taka falta sira nia hahalok aat. Nai Maromak sei kastigu sira todan liu fali ema seluk.”

Currently Selected:

Lucas 20: BTDT

Highlight

Copy