João 7

Nai Jesus ho Nia alin sira

1Liu tiha nee, Jesus lao baa-mai iha provinsia Galileia. Nia lakohi lao baa-mai iha provinsia Judeia, tanba ema Judeu nia boot sira iha nebaa atu oho Nia. 2Iha tempu nee, ema Judeu sira nia festa boot ida besik ona, nebee sira bolu “Festa Tenda”.#7:2:‘Festa Tenda’ lao durante loron 8. Festa nee mak rame liu. Tempu nee festa koileita sei lao hela, ema Israel sira hela lalais iha tenda nia okos nebee sira harii iha sira nia uma. Tenda nee foo hanoin ba sira katak, uluk sira nia bei-ala sira hela iha tenda, bainhira sira lao baa-mai iha rai fuik maran. Tenda nee mos hanesan ho tenda nebee ema halo iha toos bainhira koileita. Lee hosi Sai hosi Ejitu (Ezodu) 23:16; Ulun relijiaun sira nia regra 23:33-36, 39-43; Konta Fila Fali kona ba Dalan Moris (Deuteronomio) 16:13-15; Zacarias 14:16-19. 3Jesus nia alin sira haruka Nia dehan, “Diak liu Maun sai tiha hosi nee baa iha Judeia, para ema sira nebee tuir Maun iha nebaa mos bele haree saida mak Maun halo. 4Tanba se ema ida hakarak ema barak haree nia kbiit, nia la hatudu nia kbiit iha fatin subar. Tanba Maun halo milagre oi-oin, entaun, diak liu, se ema hotu bele haree saida mak Maun halo.” 5Nia alin sira koalia nunee, tanba sira rasik laduun fiar ba Nia.

6I Jesus hataan dehan, “Hau nia tempu seidauk too. Maibee se imi hakarak baa, bainhira deit konformi imi. 7Ema iha mundu nee la odi imi, maibee sira odi teb-tebes Hau, tanba Hau loke no hatudu momoos sira nia hahalok hotu. Tan sira nia laran aat. 8Ita nia loron boot relijiaun nian, besik ona. Imi deit mak sae baa Jerusalem. Hau seidauk hakarak baa, tanba Hau nia tempu seidauk too.” 9Nia koalia tiha nunee, Nia mos hela iha Galileia.

Nai Jesus baa tuir loron boot relijiaun Judeu nian

10Bainhira Jesus nia alin sira baa tuir ema Judeu sira nia loron boot iha Jerusalem, Jesus mos baa. Maibee Nia baa nonook deit, para ema la bele hatene. 11Iha Jerusalem, durante loron boot nee, ema Judeu nia boot sira buka Nia. Sira husu dehan, “Ema nia aman nee iha nebee?”

12Ema barak diskuti malu kona ba Nia. Ema balu dehan, “Nia ema diak.”

Ema balu tan dehan, “Lae! Nia nee, ema bosok-teen ida, lohi ema barak.” 13Maibee la iha ema ida mak koalia momoos kona ba Jesus, tanba sira tauk ba lider sira nee.

14Iha momentu festa lao hela, Jesus baa iha Uma Kreda Boot. Nia komesa hanorin ema iha nebaa. 15Ema Judeu nia boot sira admira dehan, “Ema ida nee la eskola boot hanesan ita, maibee oinsaa Nia bele hatene buat barak nunee?”

16Jesus hatete ba sira, “Rona mai! Buat sira nebee Hau hanorin nee, laos mai hosi Hau rasik, maibee hosi Nia nebee haruka Hau mai. 17Ema nebee hakarak teb-tebes tuir Maromak nia hakarak, nia sei hatene Hau nia hanorin nee, mai hosi Maromak, ka mai hosi Hau rasik. 18Ema nebee koalia lori nia naran rasik, nia hakarak buka deit nia naran. Maibee ema nebee hakarak gaba ema nebee haruka nia nee, nia koalia onestu. I nia la lohi tuun-sae. 19Moisés foo ona Maromak nia Lei sira ba imi. Maibee imi la halo tuir. Entaun tanba saa imi buka dalan hodi hakarak oho Hau?”

20I ema barak nee husu, “O koalia saida mak nee? Karik espiritu aat tama ona iha o. See mak atu oho o?”

21Jesus hataan, “Hau foin halo milagre ida iha loron Sabadu deit, i imi hotu hakfodak. 22Maibee dala ruma imi mos serbisu iha loron deskansa. Hanesan nee: Moisés rai hela regra sunat nian dehan, bainhira ema tuur ahi oan mane, iha loron walu, tenki sunat bebee nee. Maski loron nee monu iha loron Sabadu, imi tenki sunat nia. (Maibee tuir loloos, lei nee antigu liu Moisés. Tanba Nai Maromak foo uluk ona lei nee ba Abraão.)#Jenesis 17:10; Levitiku 12:3 23Se sunat bebee ida natoon iha loron Sabadu deit la kontra Moisés nia lei, entaun tanba saa mak imi hirus bainhira Hau kura ema aleizadu ida iha loron Sabadu? Nee la tama iha kakutak.#João 5:9 24La bele foo sala ba ema tuir deit saida mak imi haree. Hanoin naruk no tetu didiak lai, foin bele foti desizaun ho justu.”

Nai Jesus mak Kristu, ka?

25Nee liu tiha, ema balu hosi sidade Jerusalem husu ba malu, “Ema ida nee mak ema buka atu oho, ka? 26Haree took baa! Nia koalia iha ema barak nia oin, maibee la iha ema ida mak kontra Nia. Tuir imi, oinsaa? Ukun nain sira hatene ona ka seidauk katak Ema ida nee, mak Kristu nebee Maromak promete ona atu haruka mai? 27Maibee problema mak nee: bainhira Maromak haruka Kristu mai, la iha ida hatene Nia mai hosi nebee. Maibee ami hatene Ema nee mai hosi nebee.”

28Tempu nee, Jesus sei hanorin hela ema iha Uma Kreda Boot nia area. Bainhira rona ema sira nee koalia nunee, Nia husu ba sira ho lian makaas dehan, “Imi hanoin katak imi konhese Hau, i hatene Hau mai hosi nebee, ka? Hau la mai iha nee tuir Hau nia hakarak rasik. Tan Ida nebee haruka Hau mai nee, iha duni. I imi la konhese Nia. 29Maibee Hau konhese Nia, tan Hau mai hosi Nia, no Nia mak haruka Hau mai.”

30Entaun sira koko atu kaer Nia. Maibee la iha ema ida mak bele kaer Nia, tan Nia loron seidauk too. 31Hosi ema barak sira nee, iha ema barak mos fiar ba Nia. Sira koalia dehan, “Ema ida nee halo milagre barak ona. Bainhira Kristu mai, Nia la halo milagre liu fali Ema ida nee. Loos, ka lae?”

Sira haruka ema baa kaer Nai Jesus

32Iha ema barak nee nia klaran, iha mos ema balu hosi grupu relijiaun Farizeu. Sira rona ema barak bis-bisi kona ba Jesus. Nee duni, sira ho nai lulik nia xefi sira haruka ema seguransa sira iha Uma Kreda Boot baa kaer Jesus.

33Jesus hatete, “Hau nia tempu hamutuk ho imi hela ituan deit ona. La kleur tan Hau fila fali ba Nia nebee haruka Hau mai. 34Bainhira imi buka Hau, imi sei la hetan. Tanba Hau baa iha fatin nebee imi la bele tuir.”

35Entaun ema Judeu sira nia lider husu ba malu dehan, “Ema Ida nee, atu baa nebee mak ita la bele hetan Nia? Karik Nia atu baa hela ho ema Judeu sira nebee hela iha rai liur hodi hanorin ema nebee koalia lian Gregu iha nebaa, ka oinsaa? 36Nia hakarak dehan saida, ‘Imi buka Hau, maibee imi la hetan’ i ‘Hau baa iha fatin nebee imi la bele tuir’?”

Bee nebee lori moris ba ema

37Iha loron ikus hosi festa nee mak sai loron boot liu. Jesus hamriik, hodi koalia ho lian makaas dehan, “Rona mai! See mak hamrook mai iha Hau hodi hemu!#Levitiku 23:36 38Ema nebee fiar ba Hau, mai hemu bee nee! Tan Maromak nia Eskritura Sagrada hakerek ona dehan, ‘bee nebee lori moris sei fakar sai hosi ema fiar sira nia fuan-laran.’ I sira hetan moris loloos. Nunee, sira mos tulun ema seluk para hetan moris loloos nee.”#Ezequiel 47:1-12; Zacarias 14:8; Neemias 9:15,19-20

39Jesus koalia kona ba Maromak nia Espiritu, tanba ema hotu nebee fiar ba Jesus sei simu Espiritu nee. Maibee bainhira Jesus koalia ida nee, sira seidauk simu Maromak nia Espiritu, tanba Maromak seidauk foo. Maromak seidauk foo tanba Nia seidauk foti aas Jesus.

Ema komesa fahe malu tanba Nai Jesus

40Ema barak nee rona Jesus koalia nunee, iha ema balu koalia dehan, “Ema Ida nee, Nai Maromak nia profeta nebee Nia promete ona hori uluk atu haruka mai.”#Deuteronomio 18:18-19

41Iha balu tan dehan, “Lae! Nia nee, Kristu, nebee Maromak hatudu kedas hori uluk ona.”

Maibee iha ema balu tan protesta dehan, “Mak lae duni! Tanba Kristu nee, laos ema Galileia. Loos, ka lae? 42Tanba tuir Maromak nia Eskritura Sagrada, Kristu nee, liurai David nia jerasaun. Iha fatin seluk hakerek mos dehan, Nia nee, ema Belem oan, iha liurai David nia moris fatin. Loos, ka lae?”#2 Samuel 7:12; Miquéias 5:2 43Entaun ema komesa fahe malu tanba Jesus. 44Iha ema balu hakarak kaer Jesus, maibee la iha ema ida mak liman kona Nia.

Ema Judeu nia boot sira la fiar ba Nai Jesus

45Liu tiha nee, ema seguransa iha Uma Kreda Boot nebee atu baa kaer Jesus nee, fila fali ba nai lulik nia xefi sira ho ema Farizeu sira. I ema boot sira nee husu, “Nusaa mak imi la lori Nia mai?”

46Sira hataan, “La iha ema ida koalia hanesan Nia!”

47Entaun ema Farizeu sira husu ba seguransa sira, “Oinsaa? Imi mos monu ona iha Nia bosok, ka? 48Hanoin ida nee! La iha ema ida hosi ami, ema Farizeu, ka hosi ukun nain sira mak fiar ba Nia. Se ema boot sira la fiar, nusaa mak imi hakarak fiar ba Nia? 49Maibee ema barak nebee hakarak fiar ba Ema ida nee, la hatene Maromak nia lei, maka Maromak sei foo kastigu todan ba sira.”

50Maibee iha nebaa iha ema Farizeu ida, naran Nicodemus. Nia mak uluk iha kalan ida baa hasoru Jesus. Nia husu ba sira,#João 3:1-2 51“Oinsaa? Tuir ita nia lei relijiaun, ita bele foo sala kedas ba ema, ka ita tenki rona lai nia no buka hatene lai nia halo saida, foin bele foo sala ba nia?”

52Sira hirus nia dehan, “O ema Galileia hanesan mos Nia? Estuda didiak Maromak nia Eskritura Sagrada, hodi hatene dehan, la iha Maromak nia profeta ida mak mai hosi Galileia.”

Feto kaben nain ida halo sala seksual ho mane nebee laos nia laen

53[Liu tiha nee, sira mos fahe malu, i fila ba uma.#7:53-8:11:Biblia lian Gregu nebee antigu liu no nebee diak liu, la hakerek istoria nee. Sekulu 10, istoria nee foin hakerek iha eskritura lian Gregu.

Currently Selected:

João 7: BTDT

Highlight

Copy