João 3

Nai Jesus koalia ho Nicodemus

1Iha ema ida hosi grupu relijiaun Farizeu, naran Nicodemus. Nia ema Judeu sira nia mestri boot ida. 2Iha kalan ida, nia baa hasoru Jesus, hodi dehan, “Mestri! Ami hatene katak Maromak mak haruka Ita Boot mai hanorin ami. Tanba milagre sira nebee Ita Boot halo nee, hatudu katak Maromak mak foo kbiit ba Ita Boot. Se laos nunee, buat sira nee sei la akontese.”

3Jesus hataan, “Nee loos! Hau atu dehan nunee: se ema la moris foun, nia la bele haree Maromak nia reinu no la bele sai Maromak nia ema.”

4Entaun Nicodemus husu, “Maibee oinsaa ema bele moris fali se nia boot tiha ona!? Nia la bele tama fila fali ba nia inan nia kabun laran ba dala rua, para nia inan bele tuur ahi fali.”

5Jesus hataan, “Nee loos! Maibee Hau dehan ba ita: se ema la moris hosi bee no hosi Espiritu, nia la halo parte iha Maromak nia reinu. Ema tenki moris hosi bee para bele sai moos, i moris hosi Espiritu para sai ema foun. Ho nunee, foin bele sai Nai Maromak nia ema. 6Tanba ema moris hosi ema, isin lolon nian, maibee ema nia espiritu hetan moris foun hosi Maromak nia Espiritu. 7Keta hakfodak se Hau dehan, ‘Imi tenki moris fila fali!’ 8Ita kompara ho anin. Anin huu tuir nia hakarak. Ita bele rona anin nia lian, maibee ita la hatene nia mai hosi nebee, i atu baa nebee. Ema hotu nebee moris foun hosi Maromak nia Espiritu mos nunee. Tanba ita bele haree Maromak nia Espiritu halo ona ema sai foun, maski ita la komprende oinsaa buat nee bele akontese.”

9I Nicodemus husu, “Oinsaa bele sai nunee?”

10Jesus hataan, “Ita ema Israel nia mestri boot. Nusaa mak ita la komprende buat sira nee? 11Hau hatete loloos ba ita. Ami hatene buat sira nee, tan ami sai sasin kona ba buat sira nebee ami haree ona. Maibee imi la simu ho diak ami nia liafuan. 12Imi lakohi fiar bainhira Hau foo hatene kona ba buat sira nebee iha mundu nee. Saa tan se Hau foo hatene kona ba buat sira nebee iha lalehan. Nee imi sei la fiar liu tan! 13La iha ema ida mak baa hasoru Maromak iha lalehan. So Hau deit, Ema Oan, nebee tuun mai hosi Nia.

14Uluk liu iha rai fuik maran, Moisés hasae samea riti ida iha ai riin ida nia tutun, para ema hotu bele haree nia, (i sira mos bele moris). Nunee mos tenki akontese ho Hau, Ema Oan. I sira sei hasae Hau iha ai leten,#Numerus 21:4-9 15nunee, ema hotu nebee fiar mai Hau hetan moris loloos nebee rohan laek.

16Tanba Nai Maromak hadomi teb-tebes ema hotu-hotu iha mundu nee, nee mak Nia haruka Nia Oan mane mesak, para ema hotu nebee fiar ba Nia, Nai Maromak la husik sira lakon, maibee Nia foo ba sira moris rohan laek. 17Tanba Maromak haruka Hau, Nia Oan mai iha mundu nee, laos para kastigu ema, maibee Nia haruka Hau mai hodi salva ema sala nain. 18Nai Maromak la kastigu ema nebee fiar mai Hau. Maibee Nia desidi tiha ona kastigu ba ema nebee la fiar mai Hau, tanba ema nee la fiar mai Hau, nudar Nai Maromak nia Oan mane mesak.

19Hanesan nee: Maromak haruka ona naroman mai hodi leno mundu nee. Maibee ema gosta liu moris iha nakukun dukee moris iha naroman, tanba sira nia hahalok aat. Nunee, Maromak kastigu sira. 20Ema hotu nebee halo buat aat, odi naroman nee. Tan naroman nee hatudu momoos sira nia hahalok aat. 21Maibee ema nebee moris halo tuir buat loos, sira baa iha naroman nee para naroman nee bele hatudu dehan sira moris tuir Maromak nia hakarak.”

Nai Jesus no João Sarani Nain

22Liu tiha nee, Jesus ho Nia eskolante sira sai hosi sidade Jerusalem, hodi baa iha rejiaun Judeia. Iha nebaa sira hela lalais deit hodi sarani ema. 23-24Iha tempu nee, liurai Erodes seidauk hatama João Sarani Nain ba komarka. I João sarani ema iha aldeia Enon, besik aldeia Salim, tanba iha nebaa iha bee matan barak. I ema sira baa iha João para nia sarani sira.#Mateus 14:3; Marcos 6:17; Lucas 3:19-20

25Relijiaun Judeu iha kostumi ida hamoos aan, foin sira bele harohan. Iha nebaa ema Judeu ida haksesuk malu ho João nia eskolante sira kona ba kostumi nee. 26I sira baa foo hatene ba João dehan, “Mestri! Ita sei hanoin, ka lae? Ema nebee buka ita iha mota Jordaun nia sorin nee, Nia mak Kristu, ka? Nia mos sarani ema! I ema hotu baa iha Nia.”

27João hataan, “Ema la bele halo buat ida, se Nai Maromak iha lalehan la loke dalan ba nia. 28Imi rasik rona tiha ona hau hatete ba imi dehan, ‘Hau laos Kristu nebee ita hein. Maibee Maromak haruka ona hau mai uluk, hodi loke dalan ba Kristu.’#João 1:20

29Hanesan ezemplu ida, noivu iha nia noiva. Maibee sasin nebee hamriik iha nia sorin, nia haksolok bainhira rona nia noivu koalia. Jesus hanesan noivu ida, i hau hanesan Nia sasin. Nee mak agora hau nia laran haksolok teb-tebes. 30Importante mak nee, Nia tenki sai ema boot ba bebeik, i husik hau sai ema kiik ba bebeik.”

Ema nebee mai hosi lalehan

31João koalia tan dehan, “Ida nebee tuun mai hosi Maromak iha lalehan, Nia mak boot liu hotu-hotu. Maibee hau mai hosi mundu nee, tan nee mak hau hanesan ho ema hotu-hotu iha mundu nee. Hau koalia kona ba buat sira nebee akontese loro-loron iha mundu nee. Maibee ida nebee tuun mai hosi lalehan, Nia makaas liu hotu-hotu. 32Nia foo hatene kona ba saida mak Nia rasik haree no rona ona. Maibee ema la simu saida mak Nia foo hatene ona nee. 33Se ema fiar no simu saida mak Ema hosi lalehan nee foo sai, nee hatudu katak Maromak nee loos. 34Ema ida nebee Maromak haruka mai nee, hatoo Nai Maromak nia lia menon. Tanba Maromak foo ona Nia Espiritu ba Nia la sukat. 35Tanba Aman Maromak iha lalehan hadomi teb-tebes Nia Oan. I Nia entrega buat hotu-hotu ba iha Oan nee nia liman.#Mateus 11:27; Lucas 10:22 36I ema nebee fiar ba Oan nee, sira hetan moris rohan laek. Maibee ema nebee la fiar ba Nia, no la halo tuir Nia liafuan, sira la hetan moris nee, nunee Nai Maromak hatudu Nia hirus nafatin hodi kastigu sira.”

Currently Selected:

João 3: BTDT

Highlight

Copy