Jenesis 33
33
Jacó hasoru malu ho nia maun Esaú
1Iha loron nee, Jacó haree Esaú mai ho ema nain 400. Entaun Jacó fahe nia oan sira, ida-idak ho nia inan. 2Nia tau nia kaben kiik rua nee ho sira nia oan sira lao iha oin. Depois Lea ho nia oan sira, foin Raquel ho nia oan José iha kotuk liu. 3Maibee Jacó lao iha sira hotu nia oin. Bainhira atu besik ona nia maun, nia hakneak no hakruuk too rai, dala hitu.
4Bainhira Esaú haree nia alin Jacó, nia halai baa hasoru, i nia hakuak no rei nia. I sira nain rua tanis. 5Bainhira Esaú haree feto sira ho labarik sira, nia husu, “Ema sira nee see?”
Jacó hataan, “Sira nee mak Nai Maromak foo ona ba maun nia atan, hau.”
6Depois nia kaben kiik sira, ho sira nia oan sira mai hakruuk ba Esaú. 7Tuir mai, Lea ho nia oan sira mai hakruuk ba Esaú. Ikus liu, José ho nia inan Raquel mos mai hakruuk ba Esaú.
8I Esaú husu, “Animal sira nebee ohin o haruka mai nee, hodi halo saida?”
Jacó hataan, “Hau foo animal sira nee, para senhor bele simu hau ho laran diak.”
9Maibee Esaú hataan, “Alin Jacó! Hau nia riku mos barak. Nunee o lalika foo buat ida mai hau.”
10I Jacó hataan, “Maun, keta halo nunee! Maun tenki simu, para hatudu katak maun simu ona hau ho liman rua. Tan ohin hau haree maun nia oin hamnasa, hanesan hau haree Nai Maromak. 11Nunee, hau husu ho respeitu, atu maun simu hau nia prezenti nee. Tan Nai Maromak diak teb-tebes ba hau, nee mak Nia foo mai hau buat hotu nebee hau presiza.” Jacó hamaus nafatin Esaú, too nia simu duni prezenti sira nee.
12Depois Esaú hatete, “Entaun, ita lao ona! Hau akompanha imi.”
13Maibee Jacó hataan, “Lalika, maun! Maun haree rasik baa, labarik sira nee sei kiik, i seidauk bele lao lalais. I animal sira nebee foin oan mos barak. Se ita obriga sira lao lalais, iha loron ida deit, animal sira nee bele mate mohu. 14Nunee diak liu maun sira baa uluk deit. Mak ami lao neineik hosi kotuk. Depois mak hau baa hasoru maun iha Seir.”
15I Esaú hatete, “Se nunee, hau husik hela hau nia ema balu ho o, para sira hatudu dalan ba imi.”
Maibee Jacó hataan, “Maun, lalika fadigadu! Naran katak, hau hatene, maun simu ona hau.”
16Depois Esaú sira fila fali ba Seir. 17I Jacó sira baa iha Sukot. Iha nee, nia halo uma, no halo luhan hodi sulan nia animal sira. Nee mak fatin nee, sira tau naran Sukot. (Nee dehan katak ‘baraka’.)
18Nunee Jacó sira fila ho diak hosi Mezopotámia. Ikus mai, sira baa too iha aldeia Sikem iha rai Kanaán. I sira halo tenda hodi hela besik aldeia nee.#33:18:Lian orijinal dehan ‘Padan Arán’. Nia naran seluk Mezopotámia. Agora rai nee halo parte rai Síria norte nian, besik Iraque. 19Rai nebee Jacó sira hodi halo tenda nee, nia hola kotu hosi Hamór, Sikem nia aman. Nia selu ho osan mutin atus ida. 20Iha fatin nee, nia hada fatuk halo altar hodi halo sakrifisiu. I nia tau fatin nee naran El-Elohe-Israel, nee dehan katak, ‘Maromak nebee Israel adora’.
Currently Selected:
Jenesis 33: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
