Jenesis 25

Abraão kaben fali

1Abraão kaben fali ho feto ida naran Ketura. 2Ketura foo oan ba Abraão mak hanesan tuir mai nee: Zinran, Joksán, Medán, Midián, Isbake, ho Suá. 3Joksán nia oan mak Seba, ho Dedán. Dedán nia jerasaun mak ema Asúr, ema Letus, ho ema Leum. 4Midián nia oan mak nee: Efá, Efer, Enoke, Abida ho Elda. Sira nee hotu Ketura nia jerasaun.

5-6Bainhira Abraão sei moris, nia foo prezenti ba Hagar ho Ketura nia oan sira. Depois nia haruka sira baa hela iha rai Kanaán iha loro-sae sorin baa, dook hosi nia oan Isac. Maibee nia rikusoin hotu, nia entrega ba Isac.

Abraão mate

7-8Abraão moris too katuas liu ona, i nia mate ho tinan 175. 9-10I nia oan Isac ho Ismael hakoi nia iha fatuk kuak Makpela, besik Manre. Uluk Abraão hola rai nee hosi ema Ete, Zoar nia oan Efron. Sara mos hakoi tiha ona iha fatuk kuak nee. 11Abraão mate tiha, Nai Maromak foo bensaun ba Isac. Iha momentu nee, Isac hela besik bee posu naran Beer-Laai-Roi, nee katak ‘Bee matan hosi Maromak nebee Moris, nebee tau matan mai hau’.

Ismael nia jerasaun

12Nee Ismael nia istoria. Ismael nee Abraão nia kaben kiik Hagar nia oan. Hagar nee Sara nia atan hosi Ejitu. 13-16Ismael iha oan mane nain sanulu resin rua. Sira nia naran tutuir malu hosi oan boot too oan ikun, mak nee: Nebaiote, Kedar, Adbeel, Mibsaun, Misma, Dumá, Masá, Adade, Tema, Jetur, Nafis, ho Kedemá. Oan sira nee sai suku sanulu resin rua nia bei-ala, suku ida-idak ho nia rain rasik. Sira tau naran ba rai nee, ida-idak tuir sira nia bei-ala nia naran.

17Ismael mate ho tinan 137. 18Ismael nia jerasaun hela iha Havila ho Sur nia leet, iha dalan hosi Ejitu ba Asúr. Sira la hela ho Abraão nia jerasaun sira seluk.#Jenesis 16:12

Esaú ho Jacó

19Abraão nia oan Isac nia istoria, hanesan tuir mai nee. 20Bainhira Isac kaben ho Rebeca, Isac tinan 40. Rebeca nia aman Betuél, nia maun Labão. Sira nee ema Aram hosi Mezopotámia.#25:20:Lian orijinal dehan ‘Padan Arán’. Nia naran seluk Mezopotámia. Agora rai nee halo parte rai Síria norte nian, besik Irake.

21Rebeca la iha oan. Nee mak Isac harohan ba NAI Maromak, atu foo oan ba nia. NAI Maromak rona nia orasaun, nunee Rebeca isin rua, oan kaduak. 22Maibee labarik sira nee dudu malu bebeik iha nia inan nia kabun laran. Rebeca hanoin, “Tanba saa mak labarik rua nee nunee?” I nia husu ba NAI Maromak.

23NAI Maromak hataan,

“Oan nain rua iha o nia kabun laran nee sei sai nasaun rua nia bei-ala.

Nasaun sira nee sei funu malu bebeik.

Oan ida ikun sei forti liu ida boot.

I maun sei serbii ba nia alin.”

24Bainhira too ona nia loron, Rebeca mos tuur ahi, oan mane kaduak. 25Oan boot nia isin kor mean, i nia isin fulun hotu. Nee mak sira tau naran, Esaú (nee rona atu hanesan liafuan ida nebee dehan katak ‘isin fulun barak’).

26Depois nia alin moris mai, kaer hela nia maun nia ain tuban. Nee mak sira tau naran ba nia, Jacó (nee rona atu hanesan liafuan ida nebee dehan katak ‘ain tuban’). Bainhira sira moris mai, Isac tinan 60 ona.

Jacó hadau Esaú nia direitu hanesan oan mane boot

27Bainhira labarik rua nee boot ona, Esaú sai kasador diak ida. Nia sempre sai ba foho. Maibee Jacó ema hakmatek, i gosta hela iha uma deit. 28Isac hadomi liu Esaú tanba nia gosta haan naan hosi animal fuik. Maibee Rebeca hadomi liu Jacó.

29Iha loron ida, Jacó daan hela koto mean, Esaú foin fila hosi kasa mai. Nia kolen i hamlaha loos. 30Nia dehan ba Jacó, “Hau hamlaha atu mate! Foo koto nee mai hau haan lai!” (Nee mak sira bolu nia Edom. Nee rona atu hanesan liafuan ida nebee dehan katak ‘mean’.)

31Jacó hataan, “Diak, maun. Maibee foo lai maun nia direitu hanesan oan mane boot mai hau.”#25:31:Tuir sira nia lisan, oan mane boot mak troka nia aman, i nia mak iha hetan rikusoin barak liu nia alin sira.

32Esaú hataan dehan, “Hau la interese ho direitu oan mane boot nian! O nian deit baa. Hau hamlaha atu-mate ona nee.”

33Maibee Jacó dehan, “Maun jura uluk lai dehan, ita foo ona ita nia direitu nee mai hau.” Esaú mos jura nunee. 34I Jacó foo koto ho paun ba nia. Esaú haan-hemu tiha hotu, nia hamriik baa ona.

Nunee Esaú despreza tiha nia direitu hanesan oan mane boot.

Currently Selected:

Jenesis 25: BTDT

Highlight

Copy