Jenesis 20

Abraão bosok liurai Abimelek

1Liu tiha nee, Abraão muda hosi Manre, baa iha rai Negebe sul, i nia hela iha aldeia Kades ho aldeia Sur nia klaran. La kleur, nia muda fali baa hela iha aldeia Gerar. 2Nia foo hatene ba ema sira iha nebaa dehan, Sara nee nia alin. Nunee mak Abimelek, liurai Gerar, haruka nia ema baa lori Sara ba iha liurai nia palasiu. 3Iha kalan ida, Nai Maromak hatudu Aan ba liurai liu hosi mehi. Nia hatete, “O mate agora. Tanba o hadau fali ema nia feen.”

4Maibee Abimelek seidauk book Sara. Nunee nia hataan, “Maromak, hau la halo sala ida! Nusaa mak Maromak atu harahun fali hau ho hau nia povu?! 5Abraão rasik mak dehan, Sara nee nia alin, i feto nee mos hatete nunee. Tanba nee, hau haruka ema baa lori nia mai ho laran moos, i la halo sala buat ida. “

6Nai Maromak hataan, “Loos duni, Hau hatene o nee laran moos. Nee mak Hau halo o la bele book feto nee, i o la halo sala mai Hau. 7Agora, o haruka nia fila ona ba nia laen. Nia laen nee Hau nia profeta. Nunee o husu ba nia halo orasaun ba o, para o keta mate. Maibee se o la foo fila fali feto nee, o kuidadu! Tanba se lae, o ho o nia ema hotu sei mate.”

8Aban dadeer, liurai bolu nia funsionariu sira hotu, hodi konta nia mehi nee, i sira hotu tauk atu mate. 9Depois liurai Abimelek bolu Abraão hodi husu, “Hau halo sala saida ba ita mak ita halo susar hau ho hau nia reinu nunee? Tuir loos ita la bele halo buat nee. 10Ita hanoin saida, too ita halo nunee?”

11Abraão hataan, “Amu liurai, hau hanoin imi sira nee hotu la tauk Nai Maromak. Nunee ema bele oho hau hodi hadau hau nia feen. 12Hau dehan katak nia hau nia alin, loos duni. Tanba ami nain rua aman ida, maibee inan keta-ketak. Nee mak ami bele kaben. 13Nunee, bainhira Nai Maromak haruka ami baa iha ema nia rain, hau hatete ba hau nia feen dehan, ‘Ita baa iha nebee-nebee deit, se o hadomi hau, foo hatene ba ema katak ita nain rua feton ho naan.’ ”

14-16Entaun liurai Abimelek entrega fali Sara ba nia laen. Nia dehan, “Agora hau selu ba o nia maun osan mutin rihun ida, hanesan prova katak, hau la halo sala ida ho o. Para ema hotu hatene.”

I liurai dehan ba Abraão, “Hau nia rai nee nakloke ba ita. Ita hakarak baa hela iha nebee deit, konformi ita.” I nia mos foo ba Abraão karau ho bibi malae, ho atan mane ho atan feto.

17-18Iha tempu nebaa NAI Maromak la foo oan ba feto sira nebee hela iha liurai Abimelek nia uma, tanba Abimelek hadau tiha Abraão nia kaben. Maibee bainhira liurai foo fila fali Sara ba nia laen, Abraão halo orasaun, i Maromak halo feto sira nee bele hetan fali oan.

Currently Selected:

Jenesis 20: BTDT

Highlight

Copy