Jenesis 18
18
Bainaka nain tolu mai hasoru Abraão
1Iha loron ida, NAI Maromak hatudu Aan ba Abraão besik ai huun boot sira iha Manre. Loro manas, Abraão tuur hela iha tenda oin. 2Bainhira nia foti oin, nia haree ema nain tolu hamriik hela iha nebaa. Nia halai lalais baa simu sira. Nia hakruuk too rai, 3hodi dehan, “Senhor sira! Se bele karik, senhor sira mai tuur lai. Para hau serbii lai senhor sira. 4Senhor sira mai deskansa lai iha ai mahon nee. Orsida hau nia atan sira lori bee mai fasi senhor sira nia ain. 5Hau baa prepara hahaan ba senhor sira haan, para bele foo forsa, foin senhor sira lao baa. Hau kontenti tanba hau bele serbii senhor sira.”
I sira hataan, “Diak. Obrigadu.”
6I Abraão halai ba tenda laran, hatete ba Sara dehan, “Lalais! Foti trigu uut saka ida mai,#18:6:Lian Ebreu dehan ‘foti trigu seah tolu’. Seah tolu nee hanesan saku ida (kilu 20 too 25). hodi halo paun.”
7I nia halai baa haree tan nia karau vaka sira. Nia hili karau oan bokur ida, i nia haruka nia atan oho karau oan nee baa tein. 8Tuir mai, Abraão baa foti susu been, keiju, ho naan nebee foin tein nee, i nia lori baa foo ba bainaka sira nee. Bainhira sira haan, nia hamriik iha ai huun hodi serbii sira.
9I bainaka sira husu ba nia, “Abraão! O nia kaben Sara iha nebee?”
Nia hataan, “Iha tenda laran.”
10Depois ema ida hosi sira nain tolu nee, dehan, “Tinan oin mai, Hau sei mai fali. Iha tempu nee, o nia kaben Sara iha ona oan mane ida.”
Momentu sira koalia nunee, Sara rona hela hosi odamatan nia kotuk. 11Tempu nee Abraão ho Sara katuas ho ferik liu ona, i Sara nia fulan mos para tiha ona. 12Rona sira koalia nunee, Sara hamnasa iha nia laran. Nia hanoin dehan, “Hau ferik namkurut nunee, i hau nia laen mos katuas tiha ona. Halo oinsaa mak hau bele hetan fali oan?”
13NAI Maromak husu ba Abraão, “Nusaa mak Sara hamnasa? Nia hanoin katak buat nebee Hau koalia nee la bele sai realidade, tanba nia ferik ona? 14Hau nee NAI Maromak! La iha buat ida mak Hau la bele halo. Hanoin didiak. Tinan oin Hau mai fali iha nee, Sara iha ona oan mane ida.”
15Rona nunee, Sara tauk. I nia nega dehan, “Hau la hamnasa ida!”
Maibee Maromak hataan, “Ohin o hamnasa duni.”
Abraão harohan ba Maromak atu salva Sodoma
16Depois bainaka nain tolu nee lao liu ba sidade Sodoma. Abraão akompanha sira too iha dalan klaran. Iha fatin nee, sira bele haree sidade Sodoma. 17I NAI Maromak koalia iha laran dehan, “Diak liu Hau foo hatene ba Abraão katak, Hau sei halo rahun sidade Sodoma. 18Tan Abraão nia jerasaun sei aumenta barak, i sai nasaun boot ho forti. Hosi nia, nasaun hotu-hotu iha mundu sei hetan bensaun. 19Hau hili ona nia, hodi hanorin nia oan sira ho ema seluk atu tuir nafatin NAI Maromak nia dalan, para sira bele moris loos. Se sira tuir nunee, maka Hau sei kumpri Hau nia promesa ho Abraão.”
20Entaun NAI Maromak foo hatene ba Abraão dehan nunee, “Hau rona ona ema barak reklama kona ba ema iha sidade Sodoma ho Gomora, tanba ema sira nee halo aat demais liu ona. 21Nee mak Hau tuun baa haree rasik, atu hatene buat aat hotu Hau rona ona nee, loos ka lae.”
22NAI Maromak sei koalia hela ho Abraão, bainaka nain rua seluk nee kontinua lao ba sidade Sodoma. 23Abraão hakbesik ba Maromak hodi hatete, “Nai! Ita Boot atu harahun ema nebee moris loos ho ema aat hamutuk ka? 24Se iha ema nain 50 nebee moris loos iha sidade nee, Ita Boot sei halo rahun sira hotu ka? Ita Boot sei la salva sidade nee ka? 25Ita Boot keta halo nunee! Keta halo be ema nebee moris loos mos mate, tanba Senhor atu harahun ema aat sira. Ita Boot mak juis iha mundu ho iha lalehan. Ita Boot rasik hatene katak nee la loos.”
26NAI Maromak hataan, “Se Hau hetan ema nain 50 nebee moris loos iha sidade Sodoma, Hau sei la kastigu sidade nee, tanba sira.”
27Abraão husu tan, “Nai, hau husu deskulpa, hau bele koalia tan ituan, maski hau ema beik, la hatene buat ida. 28Se la iha ema nain 50 mak moris loos, maibee iha deit 45, oinsaa? Se menus ema nain lima deit, Ita Boot sei hakarak harahun sidade nee ka lae?”
Maromak hataan, “Se Hau hetan nain 45, Hau la harahun sidade nee.”
29I Abraão hamaus tan, “Se iha deit ema nain 40 mak moris loos, oinsaa, Nai?”
Nai Maromak hataan, “Se Hau hetan deit nain 40, Hau la harahun sira.”
30Abraão hamaus nafatin, “Ita Boot keta hirus, maibee se iha deit ema nain 30 mak moris loos, oinsaa?”
Nai hataan, “Se Hau hetan deit nain 30, Hau sei la harahun sira.”
31I Abraão husu tan, “Ita Boot keta hirus, hau husu tan ituan. Se iha deit ema nain 20 mak moris loos, oinsaa?”
Nai hataan, “Se Hau hetan deit ema nain 20, Hau sei la harahun sidade nee.”
32Abraão hataan, “Nai! Hau koalia dala ida tan, maibee Ita Boot keta hirus. Oinsaa se hetan deit ema nain sanulu mak moris loos?”
Maromak hataan, “Se iha deit ema nain sanulu mak moris loos mos, Hau la harahun sidade nee.”
33Koalia hotu ona nunee, NAI Maromak lao baa liu, i Abraão fila ba nia hela fatin.
Currently Selected:
Jenesis 18: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
