Jenesis 15

Nai Maromak promete ba Abrão

1Nee liu tiha, Nai Maromak hatudu Aan ba Abrão. Nia hatete, “Abrão! O keta tauk. Hau mak proteje o hosi o nia inimigu. I Hau foo ba o prémiu boot.”

2-3Maibee Abrão hataan, “NAI Maromak, bele Ita Boot foo mai hau sasaan barak mos, la iha folin ida, tan hau la iha oan. Nunee, rikusoin sira nee hotu hau nia atan Eliezer hosi Damasku mak sei hetan.”

4Maibee NAI Maromak hataan, “Laos nunee! O nia oan rasik mak sei hetan rikusoin nee, laos atan nee.”

5I Nia lori Abrão sai ba liur hodi dehan, “Agora o haree ba loro leten. O haree took fitun sira nee, bele sura ka lae? O nia jerasaun sei sai barak hanesan fitun sira nee.”

6Abrão fiar NAI Maromak nia liafuan. Tanba nia fiar nee mak NAI Maromak simu nia hodi deklara katak nia ema nebee moris loos ona.

7NAI Maromak hatutan tan, dehan, “Hau nee Nai Maromak. Hau mak lori o sai hosi sidade Ur iha ema Kasdim sira nia rain, hodi foo rai nee ba o hodi sai o nia rikusoin.”

8Abrão husu, “Maibee, NAI, halo nusaa mak hau bele hatene loloos katak rai nee sei sai hau nia rikusoin?”

9NAI Maromak hataan, “Nunee! Mai ita halo serimonia ida, hodi hametin Hau nia aliansa. Agora o baa lori animal sira nee mai Hau: karau inan ida, bibi inan ida, ho bibi malae aman ida. Animal sira nee tenki tinan tolu. Lori tan manu lakateu ida, ho manu pombu ida mai.”

10Entaun Abrão baa lori animal sira nee hotu mai. I nia fera fahe ba rua karau, bibi, ho bibi malae nee. Nia fahe naan sira nee ba rua tau iha rai, iha linha rua, hateke ba malu. Maibee manu sira nee nia la fera fahe ba rua. 11Depois manu fuik sira nebee baibain haan naan dodok sira nee semo tuun mai atu haan naan nee, maibee Abrão duni tiha sira.

12Bainhira loro matan monu dadauk, Abrão toba dukur tiha. Nia mehi dehan, nakukun mai falun metin tiha nia, halo nia tauk atu mate.

13-15I NAI Maromak foo hatene ba nia dehan,

“Abrão! O sei moris too katuas liu, i mate ho hakmatek, foin sira hakoi o ho diak.

Maibee o nia jerasaun sira sei baa hela iha ema nia rain.

Ema rai nain sei halo sira hanesan atan i hanehan sira too tinan atus haat.

Maibee ikus mai, Hau sei kastigu nasaun nee.

I Hau sei lori o nia jerasaun sira ho sira nia rikusoin bara-barak sai hosi nebaa.#Apostolu sira nia Istoria 7:6-7

16Too iha jerasaun lima foin sira fila fali mai iha fatin nee.

Agora, ema Amori sira hela iha rai nee. Sira nee hahalok aat, maibee sira nia aat nee seidauk todan liu.

Aban-bainrua, bainhira ema Amori sira nia hahalok nee aat demais liu ona, mak foin Hau uza o nia bei oan sira hodi harahun sira.”

17Bainhira kalan ona, derepenti mosu fornu ida nebee suar hela, ho ahi lakan, liu hosi naan linha rua nee nia klaran. 18Momentu nee, NAI Maromak hametin Nia aliansa ho Abrão. Nia foo hatene dehan, “Hau promete, Hau sei foo rai nee ba o nia jerasaun sira, komesa hosi mota Ejitu too iha mota Eufrates, 19ho ema Kene sira nia rain, ho Kenas, Kadmon, 20Ete, Feris, Refaim, 21Amori, Kanaán, Girgasi, ho Jebus.”

Currently Selected:

Jenesis 15: BTDT

Highlight

Copy