Apostolu sira nia Istoria 6

Sira hili ema nain hitu hodi tau matan ba ema kiak sira

1Iha tempu nee, ema nebee tuir Jesus amenta barak ba bebeik. Sira ema Judeu maibee hosi grupu rua, lian keta-ketak. La kleur, grupu ida nebee koalia lian Gregu, haksesuk malu ho grupu ida nebee koalia lian Aram. Sira hosi lian Gregu dehan, “Bainhira fahe hahaan loro-loron nian, ami nia feto faluk sira la simu sira nia parte.”

2Tanba nee, Jesus nia apostolu nain sanulu resin rua nee, halibur ema hotu nebee tuir Jesus hodi dehan, “Irmaun sira, se ami husik tiha ministeriu foo sai Maromak nia Liafuan, hodi toma konta imi nia haan-hemu, nee la loos. 3Nunee, diak liu, imi hili ema nain hitu hosi imi. Buka ema nebee naran diak, matenek i Espiritu Santu mak domina nia. Depois ami sei foti sira hodi toma konta kona ba haan-hemu. 4Nunee ami bele foo tempu tomak hodi halo orasaun, i hodi foo sai ho hanorin Maromak nia Liafuan.”

5I sira konkorda ho Pedro nia proposta nee. Entaun sira hili ema nain hitu, mak nee:

Estevão, nia fiar teb-tebes ba Nai Jesus, i Nai Maromak nia Espiritu Santu sempre domina nia,

Filipe,

Prócoro,

Nikanor,

Timão,

Pármenas,

ho Nicolau nebee laos ema Judeu maibee nia tama tiha ona relijiaun Judeu. Nia hosi sidade Antiokia.

6Depois sira lori ema nain hitu nee, hodi baa aprezenta ba iha Jesus nia apostolu sira, para tau liman ba sira nia ulun hodi halo orasaun, i foti sira hodi toma konta kona ba haan-hemu.

7Nunee Maromak nia Liafuan namkari too iha fatin-fatin. I ema sira nebee fiar ba Jesus amenta bebeik iha Jerusalém. Too nai-lulik Judeu barak mos tuir Jesus nia Dalan Loos.

Sira kaer tiha Estevão

8Nai Maromak foo grasa ho poder boot ba Estevão hodi halo milagre ho sinal oi-oin iha povu nia klaran, nebee halo sira admira teb-tebes. 9Depois, loron ida, ema balu komesa kontra nia. Sira nee membru hosi uma kreda relijiaun Judeu ida nebee sira tau naran ‘Laos Atan Ona’. Sira mai hosi rai dook, hosi sidade Sirene, sidade Alexandria, provinsia Silísia, ho provinsia Ázia. Sira komesa diskuti malu ho nia. 10Maibee Espiritu Santu foo matenek ba Estevão hodi koalia. Nee mak sira la manaan nia. 11Tanba nee sira komesa hanoin aat ba nia. I sira baa selu ema hodi foti lia falsu hasoru nia dehan, “Ami rona ema nee hatete aat profeta Moisés ho Nai Maromak!”

12Sira tau lia ba povu, too katuas lia nain sira, ho mestri relijiaun sira mos rona. Entaun sira hirus. I sira baa kaer Estevão lori baa aprezenta iha justisa nain relijiaun sira. 13Sira bolu mos ema nebee foo testemunha falsu kona ba Estevão dehan, “Ema nee sempre hatete aat Nai Maromak nia Uma Kreda Boot. I nia sempre koalia aat Nai Maromak nia lei nebee profeta Moisés rai hela ba ita. 14Ami mos rona nia koalia dehan, Jesus ema Nazaré, atu harahun tiha Uma Kreda Boot nee. Nia mos atu muda tiha ita nia lisan nebee profeta Moisés rai hela ba ita.”

15Ema hotu iha tribunal fihir ba Estevão, sira haree nia oin hanesan tiha anju nia oin.

Currently Selected:

Apostolu sira nia Istoria 6: BTDT

Highlight

Copy