Zakarya 8
8
Iynama nassa fendeŋ də wəba
1Əpel na Yawe Məzuɓappak ade suka, amna:
2Vaŋ Yawe Məzuɓappak anahə:
Sələh na wəŋgla na Siyon tay a makraw diyɗa,
in tat əttəman wəŋgla nan tay əzlu a makrawa.
3Vaŋ Yawe anahə:
Nəmndawək a Siyon,
in tat də gəla a Yerusalem.
Kawyani Yerusalem na «walaŋgəla gegesiŋ»,
mossorgo metiŋ na Yawe Məzuɓappak na,
«mossorgo metiŋ Salala».
4Vaŋ Yawe Məzuɓappak apeli:
Mezzeɗ mezeŋgleket
dit muguluŋgit
wassoŋ a Yerusalem əmpa,
naway pak də mikke nan
avan sən əzva neti.
5Təki na walaŋgəla-metiŋ waknah dit kirni,
mezeŋgleket dit muguluŋgiti,
wasmayaŋ a təki nani.
6Vaŋ Yawe Məzuɓappak anahə:
An madembirgit ɗiy awlanənək va gərəŋ
aka pay nan na,
ama haraw tam wagəɗ gərəŋ sa?
Yawe Məzuɓappak aɗiymani.
7Vaŋ Yawe Məzuɓappak anahə:
In yakəŋ əkõhgit ɗiy naw
səka dələv nammba pay nampum gəm na moskoyo.
8Wanəmilgiti, wassoŋ də gəla a Yerusalem.
Wassoŋ ɗiy nawa,
wanəsaw Maŋgəlva net
də gegesiŋ gəm də təstəsə.
9Vaŋ Yawe Məzuɓappak anahə:
Məsok zukum,
mənokum məzəprəmən əpel
an məskəleŋɗe apeleŋ
pay məɗi gabba Gəla na Yawe,
gəm narkan Gəla na Maŋgəlva.
10Vi tak pay nani,
əfaɗ iya na ɗəf tay ɓa,
wərəh tay aket zəgeɗ memeyẽɗ ɓa.
Ɗəf tay məzugilyen
may məzutoŋ zay aba məzuzel ɓa,
vi nəppanək ɗəf pak əsilyen aka galani.
11Ya kakaŋ na, nəsaw na va lahəŋ
də madembirgit ɗiyiŋ ɓa,
Yawe Məzuɓappak aɗiymani.
12Vi wanəzlga zazaya,
megezlembirke wawə,
dəlvafuŋ wazaɓ zəga,
disiŋ wazi minɗe nani,
zəgeɗis pak wanipsit
madembirgit ɗiy naw ka neti.
13Mə Yudeɗ dit mə Israyelɗe,
kəssoŋguk va ɗiy məreygit
a weleŋgit ɗiy-ɗarə,
vaski nədawkõhgukum,
wakəssoŋ ka ɗiy məzeɓti.
Kəgeslne'eŋ ɓa, məsok zukum.
14Vi vaski Yawe Məzuɓappak apeli:
«Va nərma wən nawgəɗ sukum mbərayən
vi efiŋgiɗkum adansuwən gədəvwa,
Yawe Məzuɓappak aɗiymani,
nəddəɗan wən naw ɓa.
15Vasna, makraw affetke,
addəv pay kakaŋ na, nərmak wən
nan nawgəɗ sukum moggon
a Yerusalem gəm sit ɗiy na Yuda.
Kəgeslne'eŋ ɓa.
16 #
EFE 4:25
Wən an kədaɗɗaŋ yaŋka:
ɗəf pak dəpel wən gesiŋ sən galani;
addəvit gəleɗe nawtawwən nokum,
a memeŋgleɗe net walaŋgəleɗe gugriɗ nokum,
mətawwən təstəs nawki zazaya;
17ɗəf adaɗɗum mbərayən aka galan ɓa;
kədasway ɗar ɓa;
nəzelik zəgeɗis pakə, Yawe aɗiymani.»
Pay naɗɗa meme wakkpaŋ pay na wəzləra
18Əpel na Yawe Məzuɓappak ade suka, amna:
19Vaŋ an Yawe Məzuɓappak anahə, amna: Wəɗɗa meme na təla mapoɗoni, na təla masle'eni, na təla mabuhuloni gəm na təla makəlawan wassoŋ ka pay na hĩyã hĩyã də nanneke gəm wəzləra nannek viyit ɗiy na Yuda.
Məŋglu gegesiŋ də zazaya.
20Vaŋ an Yawe Məzuɓappak anahə:
Ɗiy naket dəlveŋge temtem,
dit en na walaŋgəleɗe gugriɗ
wazzoŋ ɗakɗak əmpa.
21Ɗiy na walaŋgəla-metiŋ maɓɓan
waddoŋ ənahaŋ sitin ɗiy naddəv maɓɓan na:
«Məmbatgən əzzayan
makra Yawe,
kawkayan Yawe Məzuɓappakə.
Naw pak wanəmbat tamə.»
22Ɗiy diyɗa wazzoŋgu, gəm dəlveŋge gbogboŋɗe
wazzoŋ a Yerusalem
kawkayan Yawe Məzuɓappakə,
gəm kazzayan makra Yawe.
23An Yawe Məzuɓappak anah yaŋka:
Addəv pay nan na, ɗiy kəlaw naddəvit maɗe
en ɗiy adawpeleŋ aket dəlveŋge
warmanən gabba lukut na mə Yuda,
dawnəh na: «Mam aka wəmbat də mənokum,
vi məprəmək na: Maŋgəlva tay də mənokum.»
Currently Selected:
Zakarya 8: GBD
Highlight
Share
Copy
Want to have your highlights saved across all your devices? Sign up or sign in
All right reserved
