Zakarya 2
2
Ula masulani: mohõŋɗe dit məŋzleŋge
1In haraw le'gən na, nəwəl na, mohõŋɗe poɗo yeŋki. 2Yaŋ nənah sən maslay məzupel də in naka: «Məŋgə eŋ vet di?» Yaŋ aɓsu na: «Eŋ mohõŋɗe dətrayanən Yuda, Israyel gəm Yerusalem əŋgə.»
3Yaŋ Yawe arbə su məŋzleŋge poɗo. 4Yaŋ nəmna: «Eŋ miy azzoŋ əɗɗaŋ di?» Azlan suwa amna: «Eŋ Mohõŋɗe dətrayanən Yuda hã gap ɗəf təttaka tay dəslan kiyən a disiŋ ɓa. Məŋzleŋgeŋ azzoŋ na kawgeslne'giti, kanzlu mohẽt dəlveŋge məs dəsilgənən mohẽt aka dələv na Yuda atərayanən naka.»
Ula mohokoni: helege nawsla zəga
5In haraw le'gən na: Yaŋ nuwəl ɗəfa, helege nawsla zəga avan kawwa. 6Nəssõhon na: «Aŋga kədaddok di?» Yaŋ aɓsu na: «Əsla Yerusalem, kawla zezek nan də slosloprok nan gbaŋgbari di?»
7Yaŋ maslay dədawpel də in nak agili, maslay maɓɓan pay ələmsəni. 8Yaŋ aɓsu na: «Anzok anah sən wiyən ndaka, is na: Yerusalem wasan va walaŋgəleɗe gugriɗ məs kiyit viŋŋge, vi ɗiy dit zəgeɗ memeyẽɗ nassoŋ addəvən diyɗaŋka. 9Yawe aɗiyman na: Naw wanəsaw ka zlava na offo kiyən tərwəslə, wanəkkpaŋ ka gagdak addəvni.»
Yawe tay əmnda iye ɗiy məsimgiti
10Haya! Haya!
Mənzoŋ səka dələv na kəla disiŋ, Yawe aɗiymani,
vi də tapaslay pay poɗo nətəraygukum,
Yawe aɗiymani.
11Haya! Siyon,
akõhgən kiyko,
is məs kəsok də gəla a Babilon əŋka.
12Vi an Yawe Məzuɓappak anah yaŋka: aslənu də gagdak azet dəlveŋge məs dəgəmkumən ka ərəh na mawgaya:
«Vi ɗəf an dərəŋgukum pak
mawyãk haran arəŋgəni.»
13Vi in yakəŋ
əslan vaw aketi,
wakkpaŋgaŋ ka ərəh na mawgay net belemɗe neti.
Wakəsənnən na, Yawe Məzuɓappak dəslənwa.
14Aɗɗələ, anneken zuko, waŋ na Siyon,
vi in yakəŋ əzzawa,
wanəsaw də gəla addəvko,
Yawe aɗiymani.
15Pay dəpas na, ɗiy diyɗa
dədawsapaŋ aza Yawe.
Wakkpaŋgaŋ ɗiy nawray vawa,
wanəsaw anokda.
Ya wakəsən na Yawe Məzuɓappak dəslənu azoko.
16Yawe wagəm Yuda
ka nawray van
səka Dələv Salala
gəm wamndan uwel
Yerusalem əmpa.
17Ɗəf pak dəsan semsem aba Yawe,
vi tay əfɗah sə təki nassa nan salala.
Currently Selected:
Zakarya 2: GBD
Highlight
Share
Copy
Want to have your highlights saved across all your devices? Sign up or sign in
All right reserved
