Zakarya 11
11
Əza net dəlveŋge gagdakɗe
1Liban akol maddambeɗe noko,
offo dəzimgin muguguleɗ noko.
2Anɗəsə wəlaŋga lelewe,
vi wəlaŋga ɓəɓəl na Liban aɓəzlka,
vi məzeti wəleŋɗe en na sləma.
Mənɗəsə, korvoŋɗe na Basan,
vi muyã dit wəleŋɗe rəɓ arayka.
3Məprəm ɓaɓəlma ənɗəs net məzuteɗeŋge,
vi gagdak net azəka.
Məprəm əhəm net kirtin ɓoolu,
vi əkaɓ na Yurden azəka.
Məzuteɗeŋge sula
4An Yawe Maŋgəlva naw anah yaŋka: «Ateɗ gilew məɗiyit ka nawtaw wəleti. 5En məs dədelbihnin adawtewin wəlet awlanən na va aɗɗaŋgək mbərayən ɓa; en dədawvilnin tay ənahaŋ na: “Soko sən Yawe, nəkkpaŋgək məsarya” ya en dədawteɗin dayday awlanən sasẽhit ɓa. 6Vi Yawe aɗiyman na, nəppet na ɗiy naka dələv mederet əmpa ɓa. In yakəŋ əppet ɗiyi, ɗəf pak ava galani, gəm ava məlĩ nani. Waŋkənnən dəlva, nəkõhgit na ɗiy səvet ɓa.»
7Wanəteɗ gilew en məmanən vet adawkaŋ a təki nawtaw wəlet əŋka. Nəndək zleŋɗe sula. Niya taka na Neneke, maɓɓan tam niya na, wəslere, in ɗew əteɗ gilewi. 8Yaŋ nəzet məzuteɗəŋge hoku aka təla taka. Maɗɗulaw dəɓəs əsan aket ɓa, net pak mekret tay akaw ɓa. 9Yaŋ nəmna: «Nətaɗkum na əmpa ɓa! An namta dəmtə, an nahhiya dəhhəyə! En dədassoŋ medereti, wazəmnən ziti!»
10In zleŋge naw nədawya na Neneke nak gəmə, in ɓal əŋzluwən, vi kawpəl wənmiyna naw məs niynə dit ɗiy pakə. 11Apələk dəpas ləŋgə, məvəlaŋ zəgeɗ memeyẽɗ məs heret yarra akaw nek asənənək na, aŋ əpel na Yawe yi. 12#MAT 27:9,10#MAT 26:15Yaŋ nənah sit na: «An moggoni azokum na, məfaɗ su iya nawa, ya an vaski ɓa na məppani.» Yas afaɗ suwən iya naw nak də təbəz babar kaklaw hoku. 13Yaŋ Yawe aɓsu na: «Azgan sən mərkə mesteɓe, əfaɗ na sləma məs afaɗaŋ suwəni.» Nəgəmək təbəz babar kaklaw hoku nak nəzgan sən mərkə mesteɓe addəv Gəla na Yawe. 14Yaŋ nəŋzlu zleŋge naw masulan adawyaŋ wəslere naka, vi karsla məlma naka walaŋ Yuda də Israyel.
15Yawe aɓsu na: «Kakaŋ na, agəɗ va məzutaɗa dərwa. 16Vi wanəsilgən məzutaɗa maɓɓan aka dəlvəŋka: wən nan tay də an dəhhi ɓa, akayan na an dəzə ɓa; aynan na təl an dəŋgəzl ɓa; an məs petpeti, azəmgən na ɓa. Wampər slu net en məkirti, wappoŋ eperkeperke tilti.»
17Əray aka məzutaɗa
məs awtər wəray ɓa,
məppet gilew ndolu!
Masalam dəbəl vani,
dəɓəh haran dəzəŋ!
Van dəŋkəl soku!
Haran dəzəŋ dəgəɗ turum turumu!
Currently Selected:
Zakarya 11: GBD
Highlight
Share
Copy
Want to have your highlights saved across all your devices? Sign up or sign in
All right reserved
