Matiye 22
22
Wənməkkpaŋga na way na əɓele
(LUK 14:15-24)
1Yesu apel sitik wənməkkpaŋga maɓɓan əmpa, aɓsit na: 2Məslani məlĩ na disiŋ də məlĩ məs dədaɗɗa əzləra na əɓel na wətəni. 3Aslənik belemɗe nan əye ɗiy en məyet a wəzləra, ya də ngəmaŋ əzzoŋ ɓa. 4Yaŋ aslən belemɗe meɓɓet dawnəh na: Mənah sit ɗiy məyet na: Mətawi wəlet medgeɗgeɗe dit zəgeɗ memeyẽɗ məkərti zəga nawzəm pak mədani. Zəga pak məzaɓani, məde a wəzləra. 5Ya net dəzgaŋ sləma ɓa, ndəɗaŋ mbatə, an dəl a gulyo ananda, an dəl əman vani, 6ɗiy dembirgit armeninik belemɗe neki azəmgitin sahã, abaynini. 7Gədəv məlĩ adəka, aslənik məzəlpaŋ nani azet məbayaŋ gəbay neki, azla walaŋgəla-metiŋ neti. 8Yaŋ aɓsit belemɗe nan na: Mədani zəga na əzləra na əɓəl səkay, ya ɗiy en məyet dədahaŋ nazzoŋ ɓa. 9Məddoŋ kan aka zləzlaŋgbra tiveɗ pakə, məye ɗiy en kərəhaŋ pak dəzzoŋ a wəzləra na əɓele. 10Belemɗe addoŋguk aket tiveɗi, akkeletinik ɗiy en arahaŋ pakə, en mbəreyit dit moggeti. Gəla nawɓel aknahək dit ɗiy məyeti.
11Adan məlĩ atoŋ kawle ɗiy məyeti. Awələk ɗəf aweleŋgit ɗiyi, məs dəgul lukut nawɓel ɓa. 12Yaŋ anah sən na: Baynawa mbari kətoŋ aŋ məza lukut nawɓel ɓaŋ di? Dərah nawzlan sən ɓa. 13#MAT 8:12; 25:30; LUK 13:28Yaŋ məlĩ anah sit məɗɗaŋ wəza na: Məɓruk tələn də van pak məzgan ara guzli nappaka, dəhəmgən də əmpəran slayən adaka. 14Vi ɗiy məyet diyɗaŋ ya en məwelit siɗikkeŋ.
Nzalaka məfaɗ sən məlĩ metiŋ
(MAR 12:13-17; LUK 20:20-26)
15Yaŋ Farisaɗe akkalaŋgə, asapanənək met va adarmanən Yesu də wəpele. 16Asləninik gewleɗ net dit ɗiy na Herodə azan dawnəh na: Mərbəzəga, məsənək na təstəs kənani, is tat ərban tive na Maŋgəlva də gegesiŋ kawgeslne sit ɗiy ɓa, vi nok kawelet ɗiy ɓa. 17Anah səm əɗɗum nok kan ɗa: Tive tay nawfaɗ nzalaka sən Kaysara#22:17 Kaysara: Ndəni Sezar awaniɓa məlĩ na Rom cf MAT 22.17, 21; MAR 12.14,16,17; LUK 2.1; 3.1; 20.22,24, 25; 23.2; YOH 19.12,15; WNM 25. 8, 10, 11, 12, 21, 32. sa, tay ɓa? 18Yesu asənək əɗɗum net mbəraynəŋka, aɓsit na: məs muluvuluvuɗe, vimi kədawlanən an nazaw di? 19Mərban su suley nawfaɗ nzalaka vani. Arban sənənək suley na təbəz babara. 20Yaŋ aɓsit na: Aŋ foto na naway də əverəŋ di? 21Azlan sənənək na, na Kaysara. Yaŋ aɓsit na: Məpsən Kaysara an dəslə aza Kaysara, məpsən Maŋgəlva an dəslə aza Maŋgəlva.
22Adan aprəmən əzlanəska, aggətaŋka, yaŋ appanən ambataŋgə.
Əssõh aka wən na əsilye net ɗiy mimtiti
(MAR 12:18-27; LUK 20:27-40)
23 #
WNM 23:8
Pay dəpaska, Sadukiɗe azzoŋguk azani. (Ndəɗaŋ məzunahaŋ na əsilye səka əmta tay ɓa.) Assohõnən na: 24#ƏMS 25:5Mərbəzəga, Moyis anahək na: An ɗəf amtək məza əppa kirin ɓa, məlmən dəzəmgən gəla azat guluk nani dəɗisəngən zev məlməni. 25Ya ɗiy meɓɓet tahəŋ awalaŋgəm də məlma zit buhul. An daabəŋ aɗiyək gulku ndən zamə, məza zeŋve ɓa, mbagət guluk nan sən məlməni. 26Masula'it vaska'a, mohoko'it pak vaska'a, hã gap aza ma buhuleti. 27Dərɓeget pakə, guluk nak zamə. 28Ya vas kan na pay əsilye səka əmta na ga nawa tədawsat səmmbet buhulis di? Vi ndəɗaŋ pak aɗitənka.
29Yesu aɓsit na: Munokum tat əzlzlaɓa, vi kaprəmnən gabba an məverin addəv Ɗerewel na Maŋgəlva ɓa, gagdak na Maŋgəlva ɓa. 30Pay əsilye səka əmta, zel agəmaŋ na gil ɓa, gil agəmaŋ na zel ɓa, kassay va maslayɗe a disiŋ. 31Dəwəl sən əsilye səka əmta na, kəŋɗanən an məs Maŋgəlva apel sukum dawnəh na: 32#ƏGI 3:6Naw intə Maŋgəlva na Abraham gəm Maŋgəlva na Isak, Maŋgəlva na Yakob. Maŋgəlva net ɗiy mimtiti yi ɓa, Maŋgəlva net ɗiy medereti yi.
33Ɗiy dəprəmnən aggətaŋgək aka əyak nan sawɓa.
Mahenziŋ an dəday pakə
(MAR 12:28-34; LUK 10:25-28)
34Adan Farisaɗe aprəmənən na Yesu adayək kiyit Sadukiɗe də wəpel nani, akkalaŋka. 35Ɗəf taka səwaleŋgit mərbə-mahenziŋ assohõn vi kawla nazani. 36Mərbəzəga mahenziŋ awani day di? 37#ƏMS 6:5Yaŋ azlan sən na: Aŋglu Daya Maŋgəlva nok də mokrok pakə, də megenegenok pakə, də maɗɗulok pakə. 38Ndəni mahenziŋ an maddaabəŋ an dədayə. 39#MƏS 19:18Ma sula'ən tay va ndəni'e. Aŋglu meggok va kəŋglu ki zuko. 40#LUK 10:25-28Mahenziŋ də wəpel net məskəleŋɗe pak asapaŋgək addivit mahenziŋɗe suleski.
Kristu gəm Davit
(MAR 12:35-37; LUK 20:41-44)
41Adan Farisaɗe akkalaŋgə, Yesu assohẽtik na: 42Mbari əɗɗum nokum aka Kristu di? Wətən naway di? Aɓsənən na: Wətən Davit. 43Yesu aɓsit na: Mbari kan Əmpəs anah sən Davit aya na Daya dawnəh na:
44 #
GLƊ 110:1
Daya anah sən Daya naw na:
Asok aka dəzəŋ nawa,
hã gap an nəvoŋgitik məzuzelɗe ammba təlko di?
45Ya an Davit ayak na Daya, mbarmbar adawsan wətən di?
46Ɗəf tay dəzlan sən əpel tətaka ɓa, təŋ səza dəpaska ɗəf tay dəda kiyən ɗah əssohon wən ɓa.
Currently Selected:
Matiye 22: GBD
Highlight
Share
Copy
Want to have your highlights saved across all your devices? Sign up or sign in
All right reserved
