Luka 21

Əvəl nat gagəbay məssahãŋkə

(MAR 12:41-44)

1Yaŋ Yesu aslan harani, awlek məsaryeɗ əɗiyən əvəl net addəv akoti net deleɗi. 2Awlətək gagəbay məssahãŋgək təzgək koɓo sula addəvən tamə. 3Yaŋ anah na: Gesiŋ nədawnah sukum: Ga gəbay məssahãŋgək kəs təɗiyək daykiyit ɗiy pakə. 4Vi neti aɗiyaŋgək siɗikke səza arya net an diyɗa, ya nata, səza sahã nat təgəm təɗi an nazgəl kiyət dəndən pakə.

Yesu tay əpel aka əɓzla na Gəla na Maŋgəlva

(MAT 24:1-2; MAR 13:1-2)

5Adan ɗiy meɓɓet adawpeleŋ aka Gəla na Maŋgəlva, va məbay sən gawla dit gərmeŋge moggeti gəm dit zəgeɗ məɗiyit sən Maŋgəlva, Yesu amna: 6Zəgeɗ məs kulaŋgiŋki, pay maɓɓan wade, məs kuwən apəl na aka kuwən maɓɓan məza kaɓzluni ɓa ɓa.

Tatwãhɗe gəm əsərma temtemi

(MAT 24:3-14; MAR 13:3-13)

7Assohõnənək dawnəh na: Mərbəzəga dewɗe zəgeɗis adaɗɗaŋ di? Mi narban pay zəgeɗis adaɗɗaŋ di?

8Yesu amna: Məsla zukum adawzokumən ɓa. Vi ɗiy diyɗa wazzoŋ də iya naw dawnəh na: Intə Messiya pay agapka. Kədazbetin ɓa. 9Wakəprəmaŋ alabaraɗe na əgay go'o də faraɗa, kədawgeslne'eŋ ɓa. Aslək dəgəɗgən vaska, ya əgrak dələv ləŋgi ɓa. 10Yaŋ aɓsit na: Ɗiy wagayaŋ dit ɗiy meɓɓeti. Məlĩ wagay də məlĩ maɓɓani. 11Əɓla na dələv wagəɗ diyɗa, mãy wagəɗ a təki temtem gəm gəbayɗe mərma. Zəgeɗ nawgeslne' sit diyɗa gəm sekeneɗ warbaŋ a disiŋ.

12Ya daabəŋ kiyit zəgeɗis pak na, warəmkuməni wasərnən mokum, wakukumən abet deyeɗe naddivit gəlaɗe nakkal net mə Yudeɗi, kazgokumi a fərsəna, kawkukumi abet milyeŋɗe gəm abet deyeɗe na kivadələv temtem aka wən na iya nawa. 13Zəgeɗis pak wazzoŋ sukuməni vi kəssoŋgən məziwe nawa. 14#LUK 12:11,12Mərma wən nan a mokrokum, kədaɗɗumoŋ dafsən va kədawhãyaŋ aka zukum ɓa. 15Vi naw wanəpsukum mokum də maɗɗula an məs məzuzel nokum aɓapaŋ na əziw abokum awaniɓa əbayaŋ ma də munokum ɓa. 16Efiŋgiɗkum, mãy mokum, milmiŋgiɗkum, hilfiŋgiɗkum mãy bayneŋgiɗkum dayday wapsukkumən avet ɗiyi, wabayaŋ sərokum. 17Ɗiy pak wazelkumən vi iya nawa. 18Ya sessel muhur kikum təttaka azə na ɓa. 19Də əsok zukum kədawkõhgənən zeŋgilokum.

Yesu tay əpel aka əzla na Yerusalem

(MAT 24:15-21; MAR 13:14-19)

20An kulanənək məzəlpaŋ asərŋgəslənək Yerusalem, məsən na pay nawza nan agapka. 21Asna ɗiy en dədassoŋ a Yude dənzoŋ aket mossorgoɗe gugriɗe, ɗiy en dəssoŋ a Yerusalem dəgilyoŋgu, ɗiy en nawra adawtoŋgoŋ a walaŋgəla-metiŋ ɓa. 22#HOS 9:7Vi wasan pay namndan harat huloŋku kaknahan an məverin. 23Əray aket gil en dədaway gəm en məzuweɗgitin kirin pay nani. Vi əzəmsahã metiŋ dədawsan aka dəlva gəm ədagədəv na Maŋgəlva aket ɗiy veti. 24Waskotoŋ ama masalam, karmeti a fərsəna aket dəlveŋge net ɗiy-ɗar pakə. Ɗiy ɗar wandapanən Yerusalem hã gap pay net ɗiy-ɗar toŋgu.

Əzza na Wətən Ɗəfa

(MAT 24:29-31; MAR 13:24-27)

25 # ISA 13:10; EZE 32:7; YO' 3:4; HNH 6:12,13 Zəgeɗ warban ara paya, ara təla aret ngərzleɗi. Aka dəlvafuŋ na geslne' warmet ɗiy-ɗarə, wagəgrəŋgaŋ sən ɓaɓəlma pehe gəm vovulumɗe nani. 26Ɗiy wamtaŋ sən geslne viyit zəgeɗ dədaɗɗaŋ aka dəlva, vi gagdakɗe na disiŋ waguguslu'oŋgu. 27#DAN 7:13; HNH 1:7Asna kawlani Wətən Ɗəf əzzan aka slaybuwən də əɓapa gəm də gagdak diyɗa. 28An zəgeɗis atəŋgaŋgək əɗɗa, misili, məsilgin kiykum, vi əbit nokum go'oy.

Wənməkkpaŋga də sokoyo

(MAT 24:32-35; MAR 13:28-31)

29Yaŋ Yesu apel sit wənməkkpaŋga: Mula sokoyo gəm wəleŋɗe pakə. 30An kulanənək tay əndəfoŋ səkayə, kəsənənək sən kikum ləŋ na mənzi go'oy. 31Vaski yi'e an kuleninik zəgeɗis əɗɗaŋgə, məsən na məlĩ na Maŋgəlva go'oy. 32Gesiŋ nədawnah sukum: Sessel sayit ɗiyəŋ atoŋ na məza zəgeɗis dəɗɗaŋ ɓa ɓa. 33Disiŋ də dəlvafuŋ wagrakaŋgə, ya sessel əpel naw agrak na ɓa.

Ətər wəray na wəga

34Məsla zukum vi mokrokum adawgəgrəŋ aka əzlər mbazla ɓa, aka əbay na mbazla, gəm aka əɗɗum aka ənziya egge ka pay nan kazzan mədigirzike akokum, 35va zəva ɓa, vi wade aket ɗiy dəssoŋ aka dəlvafuŋ pakə. 36Məssoŋ ketketi məkkam pay pakə, vi kərahaŋgən gbogboŋ nawkõh səmet zəgeɗ en dədaɗɗaŋ pakə, kiziweŋgin aba wətən Ɗəfa.

37 # LUK 19:47 Kapaya, Yesu tay əɗɗa əyak addəv Gəla na Maŋgəlva, ndən əgilyen dəfəɗ əmbat əvoŋ aka mossorgo məs adawyaŋ na mossorgo net heremeɗi. 38Ɗiy pak əzzoŋ bapummo azan addəv Gəla na Maŋgəlva vi kaprəmni.

Currently Selected:

Luka 21: GBD

Highlight

Copy