Wəza net Maslənɗe 5

Ananiyas dət Safira

1Ɗəf tay adawyaŋ Ananiyas dət Safira ɗak nani, avələk təki nani. 2Andək səzet deleɗ an avəla, ɗak nan pak təsənka, yaŋ aki maddambirgiti, aɗi avet maslənɗe. 3Yaŋ Piyer amna: Ananiyas, sən mi Satan aknəh mokrok ka kəmbəɗangən Zeŋgile Salala, ka kəɗɗametgin deleɗ va kəvəl guli nok di? 4Namna noki asan lahəŋka, adan kəvəla, addəv gagdak nok asan'e ɓa sa? Vimi kəɗi wənəs a mokrok di? Sit ɗiy kəwə wən ɓa, sən Maŋgəlva yi. 5Adan Ananiyas aprəm əpeləska, ndən ŋgom zamə. Ɗiy dəprəmən wənəs pak geslne armek diyɗa. 6Gewleɗ azzoŋko, atərnənka agilgənənka, andəknənka.

7Dərɓagan zəga na təbəz hoku a waleŋti, ɗak nan toŋgu, ya təsən zəga an dəgəɗ ɓa. 8Piyer aɓsət na: Anah su ɗa, vaŋki kəvəlnən guli van sa? Yaŋ təmnah: Ha'aw, Vaski! 9Piyer aɓsət na: Vimi kəsleriŋ a walaŋkum kawsla Əmpəs na Daya di? Ɓaɓəlma təlit gewleɗ dəndəkən zəluk yas a maddamba, nok pak wagilgukuni. 10Ndət ŋgom ləŋ ammba tələn zamə. Səza gewleɗ atoŋgoŋgu, arəhtənək məmtəta, adan agilgətəni, andəktənək a maŋgava zilta. 11Geslne metiŋ armak əsap net ɗiy na Maŋgəlva baymeti dit ɗiy en dəprəmən wənəs pakə.

Sekeneɗ diyɗa

12Maslənɗe aɗɗaŋgək sekeneɗi gəm zəgeɗ naggət aket diyɗa a weleŋgit ɗiyi. Məzutafaŋ tahəŋ məslerti, əkkalaŋ baymet ammba balak na Salmoŋ. 13Səret ɗiy dəppaŋ pak, tay dədawda kiyən əsap azet ɓa, də ɗiy adawsimnin zlaŋ. 14Məs dətafən Daya tay ənzləraŋ abe abe, zel diyɗa dit gili'e. 15Hã ɗiy əkinin məs gbəgbaɗe aket tiveɗi, əvoŋgit aket ɓərzləmeɗi gəm aket ɓeɓeleɗi, vi an Piyer tay ətoŋgo, zeŋgilen dəmbatgən dəka məs gbəgba' səreti. 16Ɗiy diyɗa'e azzoŋguk sə walaŋgit gəlaɗe gugriɗ dəssoŋ tərwəsl ki Yerusalem, əkiyaŋ məs gbəgbaɗe, mãy ɗiy məs əmpəs mbərayən adawzimgit sahã, pakis ambəlaŋka.

Tay əsərnən met maslənɗe

17Adan daya net məsdəlveŋge asil dit ɗiy məs dəssoŋ dəndən pak va ənəh na ɗiy məs dəzbetin Sadukiɗe, aɗɗaŋgək kotoroku. 18Armeninik maslənɗe, azgetinik a fərsəna. 19Yaŋ də dəfəɗ na, maslay na Daya akol maddambeɗe na fərsəna, agilgiti, aɓsit na: 20Məddoŋ məziw addəv Gəla na Maŋgəlva, mənah əpel na zeŋgileŋ pak sit ɗiyi. 21Aprəmənka, atoŋgoŋguk pum addəv Gəla na Maŋgəlva, əyegetin ɗiyi.

Adan daya net məsdəlveŋge agap dit ɗiy nambani, ayanənək əkkala net ɗiy gugriɗe gəm əkkal net ɗiy məsɓet na Israyel pakə, yaŋ aslənaŋ a fərsəna vi kawki sit maslənɗe. 22Adan məgaɗe agapaŋgə dərihin a fərsəna ɓa, yaŋ amilyoŋgu anahaŋgə. 23Aɓɗaŋ na: Mərəhək ma fərsəna məmsan kəɗəslə, məzugaŋ pak tahəŋ a maddambaɗe, adan məkolo, mərah ɗəf təttaka adak ɓa. 24Adan aprəmən alabaraska, daya net məgaŋ Gəla na Maŋgəlva dit deyeɗe net məsdəlveŋge assoŋguk gərəŋ aka wənəska, dəsənən an dəgəɗ ɓa. 25Yaŋ ɗəf ade ənah sit na, ɗiy məs kəzgaŋ a fərsəna nek tahəŋ yaŋ addəv Gəla na Maŋgəlva, tay əyegetin ɗiyi. 26Ndəni kan daya net məzugaŋ dit məgaɗe addoŋgu, akinin məza də gəgay ɓa, vi geslne tay ədet na ɗiy adeskenin dit gərmeŋge.

27Adan akinini, aziwgitin abet ɗiy gugriɗe, yaŋ daya net məsdəlveŋge assohõn meti. 28#MAT 27:25Aɓsit na: Məɗi sukum wən nan dəɗi na, kədawyegetin ɗiy də iya na ɗəfəŋ ɓa ɓa sa? Yaŋ kəknəhən Yerusalem də iyak nokum, mokum aka əki mbel na ɗəfəŋ akamə! 29Piyer dit maslənɗe azlanəni aɓɗaŋ na: Ɗəɗah əprəm ma Maŋgəlva ki əprəm met ɗiyi. 30Maŋgəlva net efiŋgiɗəm asilginik Yesu məs kəbayaŋ nak səka əmta də əkkpa'ən aka wəlaŋga. 31Anani Maŋgəlva agagdakan də van dəzəŋ ka Daya gəm məkõhgit ɗiyi. Vi kapsən əɗi marava gəm əskoɓ mambray sən Israyel. 32Namə, miziweɗe net zəgeɗis mənan də Əmpəs an salala məs Maŋgəlva apsit ɗiy məzuɓe'eŋ sənəni.

33Adan aprəməni, gədivit adək diyɗa, yaŋ adaŋglaŋ əzetini. 34Yaŋ ɗəf taka səret ɗiy gugriɗ asili, mə Farisa yi adawyaŋ na Gamaliyel. Mərbə-mahenziŋgi yi, ɗəf gagdaki azet ɗiy pakə. Aɗiyək wən nawgilgit maslənɗe ənziya siɗikke. 35Aɓsit na: Zel na Israyel, məsla zukum səza an kədaɗɗaŋ sit ɗiyiŋki.

Malaka masula'ən nawka alabara na Maŋgəlva

(5:36—8:3)

36Fari ɓa, Tewdas asilik aŋka, ənəh nan na ɗəfi. Ɗiy asapaŋgək azan gap ɗiy səkat poɗo. Nan van məbayni, ɗiy en dətafnən wən nan pak atərayaŋka, tay dəmbər ɓa. 37Sə dərɓagani, Yudas mə Galile asilik gala pay adawvereŋ ɗiyi. Akkənik ɗiy amban diyɗa. Nan pak məbayni, ɗiy en dətafnən wən nan pak atərayaŋka. 38Kəkaŋ intat ənah sukum, məzar səzet ɗiyiŋki. Məppeti, vi an əɗɗuməska awani ɓa wəza nan səzet ɗiy ade, wazə dəvani. 39An səza Maŋgəlva ade, kəɓapən na əzet ɓa. Vi kədawrəhənən zukum na mənokum tat əgay də maŋgəlva ɓa. Yaŋ atafən wən nani. 40Ndəɗaŋ dah əyenin maslənɗe, aslərotini, atakənən met na adawpeleŋ də iya na Yesu ɓa. Ndəɗaŋ mbagitini. 41Yaŋ net agilyoŋ səbet ɗiy gugriɗ də ənneken ziti, vi agapaŋgək nawzelet aka iya na Yesu. 42Pay pak awbeweŋ də iyeget ɗiy gəm də əpel wən nenek na Kristu Yesu addəv Gəla na Maŋgəlva gəm anet ɗiy temtem da ɓa.

Currently Selected:

Wəza net Maslənɗe 5: GBD

Highlight

Copy