Zakarya 1
1
Alabaraɗe nassaka gəm əga
(1:1—8:23)
Yawe tay iye mə Israyelɗe
1 #
EZR 4:24—5:1; 6:14 Aka təla madodopoɗoni, də əzva masulan na Dariyus aka məlyã, əpel na Yawe agap aza məskəleŋ Zakarya, wətən Berekiya, wətən Iddo dawnəh na:
2«Yawe adək gədəv dərwadərwa aket efiŋgiɗkum.»
3Kənahgən sit na: «An Yawe Məzuɓappak anah yaŋka: Məmil azawa, Yawe Məzuɓappak aɗiymani, vasna, wanəmil azokum, Yawe Məzuɓappak anahə.
4Kədassoŋ va efiŋgiɗkum en məskəleŋɗe maddaabəŋ adawyetin lahəŋ də wənahaŋ na: “An Yawe Məzuɓappak adawnəh yaŋka: Məmili, məppan tive nokum mbərayən də wəza nokum mbəraynəŋka,” ya dəprəmaŋ ɓa, dəzgaŋ sləma akaw ɓa, Yawe aɗiymani. 5Ŋgahəŋ efiŋgiɗkum di? Məskəleŋɗe wassoŋ mederet faɗ sa? 6Wəpel nawa dit mahenziŋɗe naw en nəɗi sit wən nan sit gewleɗ naw məskəleŋɗe, dəgepnin efiŋgiɗkum ɓa sa? Yaŋ amilyoŋ anahaŋ na: Vaski Yawe Məzuɓappak aziwgin wən nan nawgəɗ səm va tive namə gəm va wəza namə, vas vani agəɗ səmə.»
Ula maddaabəŋ: pilseŋge
7Də əvoŋ kaklaw sula kiyən poɗo na təla makəlaw kiyən taka, təla nan na Sebati, aka əzva masulan na Dariyus aka məlyã, əpel na Yawe ade sən məskəleŋ Zakarya, wətən Berekiya, wətən Iddo, dawnəh na:
8 #
HNH 6:4
HNH 6:2
Nəwələk ɗəf aka pələs pepreŋ na dəfɗa: tay ziwwe aret silimɗe, hã addivit adaka, dərɓagan na, pilseŋge pepreŋɗe, hoyoŋko-hoyoŋko gəm babarɗe. 9Yaŋ nəmna: «Məŋgə en di Daya nawa?» Maslən məzupel də in nak aɓsu na: «Naw wanərban suk na məŋgə di.» 10Ɗəf dəziw aret silimɗe nak azlani amna: «En məs Yawe aslən əbbalan dəlvafuŋ əŋgə.» 11Azlan sənən maslən na Yawe məs ziwwe aret silimɗe naka, aɓɗaŋ na: «Məbbalanək dəlvafuŋ, dəlvafuŋ dit ɗiy nakan, dəwənnan tay kiyən foŋgo əffete.» 12Yaŋ maslay na Yawe azlani amna: «Yawe Məzuɓappak, hã gap dewɗe kula na sasãh Yerusalem ɓa dit walaŋgəleɗe gugriɗ na Yuda en məs kədəgədəv aket əzva kaklaw buhuləŋ di?» 13Yawe azlan sən maslay dədawpel də in nak də əpel moggoni, əpel nazzayan makra ɗəfa.
Yawe tay əmnda əwel Yerusalem
14Maslay dədawpel də in nak aɓsu na:
«Aslan wəloko, anah na:
Vaŋ Yawe Məzuɓappak anahə:
Sələh tay əɗɗəm ammba Yerusalem də Siyon.
Sələh an dərwadərwa.
15Makraw fiyõh fiyõhĩ
aket dəlveŋge məs dərəhən kiyti;
vi naw gədəvu siɗikke adə,
ya net abbahaŋ sənənək əraya.
16Vini Yawe anah na:
Wanəmndaw aza Yerusalem
də ula sasãhni,
Karkani Gəla naw adak əmpa,
Yawe Məzuɓappak aɗiymani.
Kawpakni helege aka Yerusalem.»
17Atəlma əmpa dawnəh na:
An Yawe Məzuɓappak anah yaŋka:
«Walaŋgəleɗe gugriɗ naw waknəhaŋ dit aryeɗ əmpa.
Yawe waffeten makra Siyon əmpa,
gəm wawel Yerusalem əmpa.»
Currently Selected:
Zakarya 1: GB
Highlight
Share
Copy
Want to have your highlights saved across all your devices? Sign up or sign in
All right reserved
