Matiye 7

Kədawtaw wən aket ɗiy meɓɓet ɓa

(LUK 6:37-38; 6:41-42)

1Kədawtawaŋ wən aka ɗəf ɓa, vi adawtaw wən akokum ɓa. 2#MAR 4:24Vi wataw wən akokum va kətawən wən aket ɗiyi, zəga məs kədawslenin ɗiy dəndənəŋka, dəndəni adawslukuməni. 3Vimi kədawla kevile ara məlmuko, ya kawla motoffo məs dəsan arok ɓa di? 4Vimi kədawnah sən məlmuk na appaw nəgəm suk kevile səroko yaŋ nok van motoffo tay aroko'e di? 5Məs muluvuluvu, agilgən motoffo sərok daabəŋ, asna akəwəl lewlew nawgəm kevile səra məlmuko. 6Kədapsitin zəga salala sit kirɗe ɓa, vi adawmə'aŋ akokum kawbakokum ɓa. Kədazgetin averzleɗ na sləma nokum sit vedemɗe ɓa, vi adawndapetin də tilit ɓa.

Məssõhu, məkayani, mərga maddamba

(LUK 11:9-13)

7Məssõhu wakərəhaŋgə. Məkayani wakərəhəni, mərga maddamba kawkol sukumi. 8Vi ɗəf dəssõh pak warahə. Ɗəf an dəkayani warəha. Ɗəf an dərga maddamba kawkol səni. 9Awaniɓa ɗəf naway sərokum wətən adassohon memteke na, ndən kapsən gərəm di? 10Awaniɓa adassohon kilif na, ndən kapsən dohõ di? 11Munokum mbəraykum dərəŋ kəsənənək əpsit zəgeɗ mogget sit kirtukum. Mbari Afukum na disiŋ apsit na zəga moggon sit məzəssohonən ɓaŋ di?

12 # LUK 6:31 An məs kəŋglaŋ ɗiy dəɗɗan sukuməngəni, məɗɗa sit vaska. Aski mahenziŋ dit məskəleŋɗe kpakə.

Maddammba feŋge

(LUK 13:24)

13Mətoŋ kəla maddamba feŋge. Vi maddamba an viŋ də tive an tay tuwãh ɓa, a təki nawza adawkaŋ ɗəfa, ɗiy diyɗa tahəŋ məzəddoŋ dədaka. 14Ya maddamba an feŋge gəm tive an gargar məzukaŋ ɗəf a təki na zeŋgile, məzəzbanən tahəŋ diyɗa ɓa.

Məskəleŋɗe məwaŋ wəna

(LUK 6:43-44)

15Məzi zukum azet məskəleŋɗe məwaŋ wəna, tahəŋ əzzoŋ azokum va timiŋgiɗi, ya diddivit na kirɗemuyã vorgomohɗiŋ. 16Wakəsinin aza wəza neti. Kawɓuhi uwa na megezlembirke səket gedirgeɗi awaniɓa uwa na sokoyo səka tintif sa? 17Wəlaŋga moggoni kirtin mogget adawa, wəlaŋga mbərayən kirtin mbəreyit adawa. 18Wəlaŋga moggoni awə na kirtin mbəreyit ɓa, wəlaŋga mbərayən awə na kirtin mogget ɓa. 19#MAT 3:10; LUK 3:9Wəlaŋga an awa kirtin mogget ɓa pak, kawbəlni, kazgani aka offo. 20#MAT 12:33Vaski kan kədawsinin aza uwa neti.

Əpelin gəm əɗɗani

(LUK 13:25-27)

21Məzunah su na: Daya, Daya paki nawtoŋ məlĩ na disiŋ abbər məgəɗ əŋgla na Afu na disiŋ ɓa. 22Pay nani, ɗiy diyɗa wanahaŋ suwən na: Daya, Daya! Də iya nok məgəɗ kəleŋ, də iya nok mərɓih tuyeŋɗe, də iya nok məgəɗ sekeneɗ diyɗa ɓa sa? 23#GLƊ 6:9Asna wanəzlan sit na: Nəsənkum ɗah ɓa, məzar səzaw faraɗa, mənokum məɗɗaŋ wəza mbərayən.

Gəleɗe sula

(LUK 6:47-49)

24Ya məs dəprəm əpel nawəŋ pakə, dəgəɗ wəza dəndəni, agilik va ɗəf məs maɗula, dərka gəla nan aka milɓe. 25Yaŋ buwən aziyə, məlpeŋɗe azzoŋgu, barkataŋɗe asilyoŋgu, arɓəzlaŋ aka gəla vani, ya dəɓəzl ɓa vi mərkan aka milɓe yi. 26Ya məs dəprəm əpel nawəŋ pakə, dəgəɗ wəza dəndən ɓa, agilik va ɗəf məza maɗulan ɓa, dərka gəla nan aka hoyoŋko. 27Yaŋ buwən aziyə, məlpeŋɗe azzoŋgu, barkataŋɗe asilyoŋgu, arɓəzlaŋ aka gəla vani, aɓəzl əbzla mbərayən.

Gagdak na Yesu

28 # MAR 1:22; LUK 4:32 Adan Yesu agrak əpeləska, ɗiy pak aggətaŋgək aka əyak nani, 29vi dəpel sit va net mərbaŋ-mahenziŋ net ɓa, apel sitik də gagdaka.

Currently Selected:

Matiye 7: GB

Highlight

Copy