Luka 22

Deyeɗe tay əɗɗaŋ kuket narma Yesu

(MAT 26:1-5; MAR 14:1-2; YOH 11:45-53)

1 # ƏGI 12:1-27 Adan pay na əzləra dit meptekeɗ məza wuɗo ɓa məs adawyaŋ na Pak agapə. 2Deyeɗe net məsdəlveŋge dit mərbaŋ-mahenziŋ akayaŋgək kuket nawzani Yesu, ya tay əgeslne'eŋ sitin ɗiyi.

Yuda tay məsla zən napsit Yesu deyeɗe

(MAT 26:14-16; MAR 14:10-11)

3Yaŋ Satan atoŋ a makra Yudas məs adawyaŋ na Iskariyot, məs səweleŋgit gewleɗ kəlaw kiyit sula. 4Yaŋ ambatə, asler dit deyeɗe net məsdəlveŋge gəm deyeɗe net məzəlpaŋ aka va mbar adapsit di. 5Annekeŋke, yaŋ aynanən napsən koɓeɗi. 6Atafəka, yaŋ akay pay an dəslə kapsit məza ɗiy əsənən ɓa.

Yesu aslənək ɗiy dəzaɓanəngən zəga nawzəm na Pak

(MAT 26:17-25; MAR 14:12-21; YOH 13:21-30)

7Səza pay maddaabəŋ net peŋɗe məza wuɗo ɓa məs nawtaw wəla zəga vi Pak agapə. 8Yesu aslənək Piyer də Yohanna, aɓsit na: Məddoŋ məzaɓan zəga nawzəm na Pak, məzəmgəni. 9Aɓsənən na: Aŋga kəŋgəl mədagən di? 10Aɓsit na: An kətoŋgoŋguk a walaŋgəla, ɗəf də hinziw akan waze ələm sukum; məzbani, Addəv gəla a təki adawtoŋgo, 11mənah sən afən gəla van na: Mərbəzəga amna: ngay gəla nədawzəm Pak addəvən dit gewleɗ naw di? 12Ɗəf nan warban sukum gəla an na disiŋ metiŋgin, məzaɓani, adaki kədawzaɓanən əzəm na Pak. 13Addoŋko, arəhənək zəga pak va anah siti, azaɓanənək əzəm na Pak.

Way an salala

(MAT 26:26-30; MAR 14:22-26; 1KO 11:23-25)

14Adan pay nan agəɗə, Yesu asanə əzəm dit maslənɗe. 15Aɓsit na: Maw anzanək sirsir aka əzəm way na Pak əŋ də munokum tak nədawzəm sahã. 16Vi in tat ənah sukum, sessel nəzəm na ɗah ɓa hã an məɗama nan arbanək zən addəv məlĩ na Maŋgəlva. 17Ndən huloŋguk gəmə, agəɗ soko, amna: Məgəma muɗakan awalaŋ zukum, 18vi in tat ənah sukum, sessel nəsə na ɗah mbazla na uwa net megezlembirkeɗ ɓa, hã gap an məlĩ na Maŋgəlva adeke. 19Ndən mepteke gəmə, agəɗək soko sən Maŋgəlva, arɗani apsit dawnəh na: Aŋki gəɓa zuw məpsa vikum, məɗɗa vaska vi kəɗɗumowəngəni. 20#YER 31:31-34Vas agəɗə'e dət huloŋguk nawsa zəga sə dərɓaga azəmən waya, amna: Huloŋkəŋkə, ndətə wənmiynan meleketeni miynan dit mbel naw məs dəggbo'oŋ vikum.

21 # GLƊ 41:10 Ya va ɗəf nawzəm Kiyu yaŋ ərɗa way də iyna. 22Vi Wətən Ɗəf wamtə va məziwgini, ya əray aka ɗəf məs dəzəm kini. 23Atəŋgaŋgək əssohon ziti, naway nawɓap əɗɗa zəgas kan səmmbet di.

Naway nawsan daya di?

24 # MAT 18:1; MAR 9:34; LUK 9:46 Yaŋ əbayma agəɗ awalaŋgit maslənɗe aka wən na naway nawsan daya di. 25Yesu aɓsit na: Milyeŋge net ɗiy-ɗar tay əzəmaŋ məlĩ aketi, məs də gagdak aketi, tay əɗɗaŋ ɗiy dəyeningin na məɗɗaŋ moggoni adawyenini. 26#MAT 23:11; MAR 9:35#MAT 20:25-27; MAR 10:42-44Ya nokum vaski ɓa, daya na walaŋkum dəkkpaŋ va sawã, ɗəf an nabe dəkkpaŋ va məgəɗ wəza. 27#YOH 13:12-15Ya naway dəday di, məs dəsan əzəm sa, awaniɓa məgəɗ sən wəza? Naw nəmna məs dəsan əzəməŋki ɓa sa? Ya naw in tat a walaŋkum va məgəɗ wəza.

28Nokum, munokumtə məs kəziweŋ ɓəlɓəl addəv wəsla nawa. 29Nəpsukumək məlyã va Afu apsuwa. 30#MAT 19:28Wakəzəmaŋgə, wakəsaŋ a təki nawzəm naw addəv məlĩ nawa, wakəssoŋ aket mezeŋgeɗ na məlyã vi kawtawwən aket mahəlfaɗe kəlaw kiyit sula na Israyel.

Wəza na Piyer dərɓaga akkpaŋgan mani

(MAT 26:31-35; MAR 14:27-31; YOH 13:36-38)

31Daya amna: Simoŋ, Simoŋ, Satan assohõkumuk kawtaŋgalkum va haykəmari. 32Ya nəkkamək viko, vi ətaf nok adawza ɓa. Nok an kəmilke asɓet milmiŋgiɗko. 33Piyer aɓsən na: Daya, nəzaɓanək zu nawmbat də isi, dəsan a fərsəna gəm aka əmta zlaŋ. 34Yesu aɓsən Piyer na: in tat ənah suko, gəmnda ahəm na dəpaŋ məza kənah gap təl hoku na kəsənu ɓa ɓa.

Pertete, nzəkkari gəm masalam

35 # MAT 10:9,10; MAR 6:8,9; LUK 9:3; 10:4 Yaŋ Yesu aɓsit na: Gala nəslənkum məza pertete ɓa, nzəkkari ɓa, hensek ɓa, zəga tay dəkkpap sukum sa? Aɓɗaŋ na tay dəkkpap səm ɓa. 36Yaŋ aɓsit na: Ya kakaŋ na: Ɗəf an də pertete dəgəm avani, vaska'e də nzəkkari; ya ɗəf an tay də masalam ɓa, dəvəl lukut nan dəlbahgən taka. 37#ISA 53:12Vi in tat ənah sukum an məs məvernəŋ dəknahgən akawa: Məŋɗani aweleŋgit məɗɗaŋ mambraya. Vi an məverin akaw pak tay əɗɗa. 38Aɓɗaŋ na: Daya, masalamɗe yeŋ sula. Aɓsit na: Məki.

Yesu tay əkkam aka mossorgo net heremeɗi

(MAT 26:36-46; MAR 14:32-42)

39Adan Yesu agili, ambatək va ɗaɗay aka mossorgo metiŋ net heremeɗi. Gewleɗ nan azbanənka. 40Əgap a təki nani, aɓsit na: Məkkamə vi kədawtoŋgoŋ addəv ərak ɓa. 41Yaŋ abit səzet fafra' nan na gba' naskan gərma, akduku, akkam 42dawnəh na: Əbba, an kəŋgəlka azargət huloŋguk na əzəm sahã kəŋ səzawa, ya əŋgla naw adaɗɗa ɓa, an nok dəgəɗə. 43Yaŋ maslay arban zən azan sə disiŋ vi kasɓani. 44Adan geslne' arma, akkamək zən soksoku, hanza nan akkpaŋgək va mbel mərme zit kpi'kpi' afuŋ.

45Səza asil səka əkkama, ndən bəryok ezet gewleɗ neki, arihik məleŋgti vi zit tay baybayə. 46Aɓsit na: Mi yi! Mənokum əleŋ sa? Məsili, məkkamə vi kədawtoŋgoŋ addəv ərak ɓa.

Ərma na Yesu

(MAT 26:47-56; MAR 14:43-50; YOH 18:3-11)

47Yesu dəɓəl əgrak əpel ɓa vanday yaŋka. Ɗəf adawyaŋ na Yudas taka sə waleŋgit gewleɗ kəlaw kiyit sula abeti. Azarək aza Yesu kafyokoni. 48Yesu aɓsən na: Yudas də əfyok kədawzəm ki Wətən Ɗəf sa? 49Adan en dəssoŋ dəndə Yesu awlanən an dədaɗɗa, aɓsənən na: Daya, məbil də masalam sa? 50Taka səmmbet abələk gawla na daya net məsdəlveŋge hã sləman dəzəŋ piwi. 51Yaŋ Yesu azlan na: Məppani məkə. Arəŋgənək sləma ɗəf naka anzaɗəka.

52Yaŋ Yesu anah sitik deyeɗe net məsdəlveŋge, deyeɗe net məzugaŋ Gəla na Maŋgəlva dit ɗiy məsɓet məs dəzzoŋ ərman na: Kəgilyoŋ dit masalamɗe mãy zleŋɗe vi karmu va kəɓəs na məvoŋtive nani di? 53#LUK 19:47; 21:37Pay pak nəsawək də munokum addəv Gəla na Maŋgəlva kərmuwən ɓa. Ya aŋki pay nokum də gagdak na guzliyo.

Piyer tay ənah na dəsən Yesu ɓa

(MAT 26:57-58,69-75; MAR 14:53-54,66-72; YOH 18:12-18,25-27)

54Adan armanəni, akanənək eŋgil ana daya net məsdəlveŋge da, Piyer tay əzbet sə faraɗa. 55Asɗaŋgək offo adak daŋgla, asoŋguk amani. Piyer tay ɗewwe awaleŋti. 56Səza məgəɗ wəza tula ama offo, ndət harat akan seki, təmna: Ɗəfəŋ pak asanək dəndəni. 57Piyer aɗamanək dawnəh na: Nəsən ɗəfəs ɓa ɗakə. 58Dərɓagan siɗikke ɗəf maɓɓan awlaka, amna: Nok pak neret kənani. Piyer Amna: Ɗəfa, intə ɓa. 59Dərɓagan ənziya zəga na təbəz taka ɗəf maɓɓan apelik man taŋtaŋ dawnəh na: Gesiŋ, ɗəfəŋ pak asanək dəndəni, vi mə Galile yi. 60Piyer amna: Ɗəfa, nəsən an kədawnah ɓa. Tak dəgrak əpel ɓa gəmnda ahəmə. 61Daya kpaŋgən harani awla Piyer. Yaŋ Piyer aɗɗumonək əpel məs Daya anah sən lahəŋ nak na: Tak gəmnda adawhəm dəpaŋka, wakənah na kəsənu ɓa təl hoku. 62Adan Piyer agil appaka ahəmək sawɓa.

Məraniyi Yesu mərgani

(MAT 26:67-68; MAR 14:65)

63Ɗiy məs Yesu asan evet amasaŋgək akani, arganənka. 64Asərətaŋgək zəga aka harani, assohõnəni aɓɗaŋ na: Agəɗ kəleŋ ɗa, naway dərguk di? 65Aranənək əmpa də tive temtemi.

Yesu aba ətawwəna

(MAT 26:59-66; MAR 14:55-64; YOH 18:19-24)

66Adan təki adaŋgə, ɗiy gugriɗ net mə Yudeɗi dit deyeɗe net məsdəlveŋge gəm mərbaŋ-mahenziŋ akkalaŋka, akiyənək Yesu aba ətaw wən neti. 67Aɓɗaŋ na: An əstə Kristu, anah səmə. Aɓsit na: An nənah sukumko kətafnən na ɓa. 68An nəssohõkumko, kəɓapən na əzlan kpak ɓa. 69Təŋ gəgaŋka Wətən ɗəf wasan aka va dəzəŋ na əɓap na Maŋgəlva. 70Ndəɗaŋ pak aɓɗaŋ na: Nok na, istə kan Wətən Maŋgəlva sa? Mənokum vat mənokum tat ənəh na intə. 71Yaŋ aɓɗaŋ na: Mənam tat də Wəray nawkay miziwe əmpa sa? Mənam sən kiyəm məprəmək səmani.

Currently Selected:

Luka 22: GB

Highlight

Copy