Luka 1
1
Ətoŋ addəvən
(1:1-4)
Ətoŋ addəvən
1Adan ɗiy diyɗa agayaŋgək wəver alabaraɗe məs dəɗɗaŋ awalaŋgəm, 2va ɗiy en məs agəɗ keret də ətəŋ nan akkpaŋgaŋ ka məɗɗaŋ wəza na Əpele, 3naw pak nulak lew səza nəkoson gabban lewlew təŋ səza suwerini, karban suk məverin nan də mabbərkizəni anoko ɗəf gagdak Teyofil, 4vi kəsəngən gesiŋ na əyak an məs kərahə.
Uwa na Yohanna məgəɗ baptem gəm əssa wəyən nan gəm an na Yesu
(1:5—2:52)
Maslay tay ərban uwa na Yohanna məgəɗ Baptem
5 #
1AL 24:10
Aka pay na Herodə məlĩ na Yude, məsdələv tay adak iya nan na Zakari, addəv ngaɓa na Abiya; guluk nan zev Aron tə, iya nat na Elizabet. 6Sulegit pak ɗiy təstəsəŋ aba Maŋgəlva. Tahəŋ wəzbanən wən məs Daya aɗiyə gəm mahenziŋ nan pak məza heslepe ɓa. 7Ya tahəŋ də muzliya ɓa, vi Elizabet ndarzlayək tə, ndəɗaŋ sulegit pak azəmaŋgək əzva.
8Ya addəv əɗɗa wəza nan aba Maŋgəlva, əzban aza əkkpaŋ na ngaɓa nan, 9məwelni də vẽpəlwa, va matuya adazba, vi kawtoŋ addəv gəla na Daya, kawzla tursan adaka. 10Ngaɓa net ɗiy beymet tay əkkam appaka pay əzla tursan. 11Yas maslay na Daya arban zən azani, ziwwe dəka dəzən na gəlamatuya nawzla tursan. 12Ulan ləŋgə, kiy Zakari zlərwiyə, geslne' armaka. 13Yaŋ maslay aɓsən na: Kəgeslne ɓa, Zakari, vi əkkam nok aprəmka. Guluk nok Elizabet watəwəsuk wiyna, kəlvan gən na Yohanna. 14Wakərah ənneke də əpepɗeke, ɗiy diyɗa wannekenin zit də uwa nani. 15#ƏŊƊ 6:3Vi wasan metiŋ aba Daya. Asə na mbazla net megezlembirkeɗ ɓa, mbazla məhə̃sən ɓa. Waknah də zeŋgile salala səddəvət mani. 16Wamilgit mə israyelɗe diyɗa aza Daya, Maŋgəlva neti. 17#MAL 3:23,24Wadaw aba Daya də əmpəsa gəm əɓap na Eliya, vi kawmilgin mekret efiŋgiɗit kirin ezet kirtiti, məɓoŋgit tam dəɗɗumoŋgən va ɗiy təstəsə, vi kawzeɓet ɗiy nawga Daya.
18Yaŋ Zakari anah sən maslay na: Mbarmbari nədawsənən na wagəɗ gesiŋ di? Vi naw nəgalək səkay, ɗak naw tam təndak əzva. 19#DAN 8:16; 9:21Maslay azlan sənək na: Intə Gabriyel aba Maŋgəlva nədawsawa vi kawgəɗ sən wəza. Məslənu na, vi kawpel suk gəm kawnah suk alabara neneke. 20Awle hərzlumuk warəhmə, kəɓap na əpel ɓa hã pay zəgeɗis adaɗɗaŋgə vi kətaf əpel naw məs dədaknəh də pay nan ɓa.
21Pay nan ɗiy tahəŋ wəganən Zakari. Aggətaŋgək aka əlya nan addəv Gəla na Maŋgəlva. 22Adan agili dəɓap əpel sit ɓa, asənənək na tay an awəl addəv Gəla na Maŋgəlva. Ndən təŋ əpel sit goryom goryom, asanək man ŋgba'ə.
23Adan pay na wəza nan agrakə, ndən mbat eŋgil ananda. 24Dərɓagan əvoŋ siɗikke, Elizabet ɗak nan ta' daway, təɗamanək gap təla sle. Tənah na: 25Vaŋ Daya agəɗ suwa. Atorik wil səraw səwaleŋgit ɗiyi.
Maslay tay ərban uwa na Yesu
26Aka təla masləreni, Maŋgəlva aslənək maslay nan Gabriyel a walaŋgəla-metiŋ məs adawyaŋ na Nazaret aka dələv na Galile. 27#MAT 1:18Azat waŋ gbuɓɓo, akən məs ɗəf adawyaŋ Yosef adawkaya, gabbet may Davit. Iya nat waŋ vat na Miryam. 28Maslay toŋ a maŋgavata, yaŋ amna: Anneken zuko, is məs kərah mbəlembəle, Daya tay də isi. 29Wəsɗa nan agəgrəŋgatəka, tat əɗɗumon va əsɗa vanəs aŋgəl ənaha. 30Maslay aɓsət na: Kəgeslne ɓa Miryam, vi kərahək mbəlembəle səza Maŋgəlva. 31#MAT 1:21Wakəɗi daway, wakəwə wiyən mizilin, kəlvangən na Yesu. 32#2SA 7:12,13,16; ISA 9:6Wasan metiŋgini, kawyani na Wətən Məsəɗəɗə. Daya Maŋgəlva wapsən mazaŋga na məlĩ Davit afəni. 33Wazəm məlĩ aka gəla na Yakob hã faɗə, əzəm məlĩ nan agrak na ɓa.
34Miryam təɓsən maslay na: Mbarmbari zəgas adaɗɗa adan nəsap də ɗəf mizilin ɓaŋ di?
35Maslay azlani, aɓsət na: Zeŋgile Salala wade akoko, əɓap na Məsəɗəɗə wade əsərətuk də zeŋgile nani. Vi vaski wiyən məs kədawa wasan Salala, kawyani na Wətən Maŋgəlva. 36Awle Elizabet həlfuk təɗiyək daway na wəyən mizilin aka əgal nata, təla masləren nat yaŋka ndət məs adawyaŋ lahəŋ na ndarzlaykə. 37#VAA 18:14Vi zəga tay məs Maŋgəlva aɓap na ɓa ɓa.
38Miryam təmna: Balamək na Daya yakəŋkə, dəgəɗ suk va əpel noko. Yaŋ maslay appata, ambat səzata.
Miryam tat əmbat ulət Elizabet
39Dəpaska'e ləŋgə, Miryam təsilke təmbatək də kakara aka vadələv na walaŋ gərəm a walaŋgəla-metiŋ na Yuda. 40Ndət toŋ ana Zakari da, təsɗat Elizabet. 41Səza Elizabet təprəm əsɗa nat Miryam, wiyən aɓələk addəvta. Elizabet təknahək də Zeŋgile Salala, 42yaŋ təŋgəsl vaŋvəl dayadaya, təmna: Əzaɓ akok sə walaŋgit gil, əzaɓ aka uwa naddəvko! 43Naw nawat nan kan ma Daya naw tədegən anawdaŋ di? 44Vi səza nəprəm əsɗa noko, wiyən aɓələk sən ənnek səddəvwa. 45Əzaɓ akat akən tətafa, vi an Daya anah sət, waknahə.
Gəlya məmyã'ən nat Miryam
46Miryam təmna:
zeŋgilew tat əgagdakan Daya,
47makraw tay ənnek də Maŋgəlva, məkõhguwa.
48 #
1SA 1:11
Vi aziyək haran akat balamək nan akən ɗarə.
Awle, kakaŋ na, sayit ɗiy pak wənahaŋ suwən na məs əzaɓ akata,
49vi Məzuɓap agəɗ suwək zəgeɗ gagdakɗe.
Salala yi iya nani,
50ulasahã nan tay əzban sayit ɗiy məzugeslne' sənən va amə'ə.
51Apparək gbogboŋ na vani,
andolik məs əɗɗum nawkaɓ aketi.
52 #
YOB 5:11; 12:19 Aprigitik məlyeŋge
səka mazaŋga na məlĩ neti,
aɓaygitik məzuɓe'gənən kiyti.
53Abetik ɗiy en də mãy də arya.
Arɓihik məsaryeɗ mbataŋ vet mekeleŋ.
54Adek əbbah sən Israyel maslən nani,
aɗɗumonək ulasahã nani,
55 #
VAA 17:7
#
1SA 2:1-10
va anah sit efiŋgiɗmə,
sən Abraham gəm sən zeŋvin hã faɗə.
56Miryam təsatək dət Elizabet gap zəga na təla hoku, siske na ndət həmndak eŋgil anat da.
Uwa na Yohanna məgəɗ baptem
57Pay nawa nat Elizabet gapə, ndət bok wiyna. 58Meggeŋgiɗət dit hilfiŋgiɗət aprəmənək na Daya agəɗ sətək moggon diyɗa, annekenənək zit dənta. 59#MƏS 12:3Adan əvoŋ madodopoɗon agapə, addoŋguk əskələn awra, aŋglaŋ əlvan na Zakari va iya na afəni. 60Yaŋ man təzlani, təmna: Awwo, kawyani na Yohanna. 61Aɓsətən na: Ɗəf tay səmmbet hilfiŋgiɗuk məs də iya vas ɓa.
62Yaŋ apeleŋ sənən afən də veti, vi kassohon va aŋgəl əyani. 63Zakari aŋgələk kalaɓkə, avere amna: Iya nan na Yohanna. Ɗiy pak aggətaŋka. 64Gətgətəs ləŋ man akol gəm hərzlumən apələ, atəŋ əpele, agagdakan Maŋgəlva. 65Gəslne' armək ɗiy də gəla kiyin tərwəsl pakə. Aka kivadələv naggərəm na Yude pak tay əpeleŋ aket zəgeɗ dətoŋgoŋgiski. 66Məs dəprəmən wənəs pak tay əɗɗumonən pay pakə. Tay ənahaŋ na: Wiynəŋ kan ka mi adawsan di? Vi va Daya tay akani.
Gəlya na kəleŋ na Zakari
67Zakari afən wiyən nak aknahək də Zeŋgile Salala. Agəɗək kəleŋ, amna:
68Soko sən Daya Maŋgəlva na Israyel
vi azlgək sləma aket ɗiy nani, akõhgitike.
69Agilgənək Məzukõhgəm gagdak
səddəv gəla na Davit gawla nani.
70Va məs anah lahəŋ də met məskəleŋɗe nan salala.
71Əkõh məs dədawpələm səvet məzuzelməni,
mãy səvet məzuzeleməni.
72Arbanək ulasahã nan aket efiŋgiɗmə,
də əɗɗumon wənmiyna salala nani,
73va asway sən Abraham afəmə, vaski adapsəmə;
74dərɓaga akõhgəm səvet məzuzelɗe
vi məɓapgən əgagdakan məza də geslne' ɓa,
75addəv salala gəm təstəs abani, addəv ənziya nam pakə.
76 #
MAL 3:1
Noko, wətuwa, kawyuki na məskəleŋ na Məsəɗəɗə;
vi wakədaw aba Daya vi kawzeɓet tiveɗ nani,
77vi kapsit əsən na əkõh sit ɗiy nan
də əvvuyon mambray neti,
78sən mbəlembəle na ulasahã na Maŋgəlva namə.
Ndəndəni pay məzugilyen adawkasak akam hã sə disiŋ,
79 #
ISA 9:1
vi dəkasakgin ɗiy en nara guzli
dit en nara zeŋgile na əmta,
gəm vi kawdawgən tələm aka tive na zazaya.
80Yohanna aɓayka, maɗulan asəɓka. Asanək a kapta-muyã hã gap pay arban zən abet ɗiy na Israyel.
Currently Selected:
Luka 1: GB
Highlight
Share
Copy
Want to have your highlights saved across all your devices? Sign up or sign in
All right reserved
