Va'Atəŋ 50

Gəlabay na Yakob

1Yosef, wop aba afəni#50:1 Wop aba afəni: Tay ərban əŋgla nan gəm əzəmsahã nan ammba afəni. Akki mbərən na, əsək net ɗiy meɓɓet na. ahəmək ammban ndən lalam əllam ki afəni.

2Yaŋ Yosef aɗi wən nan sit Məsgeɓɗe naka wəza nani, dəppayaŋgən mẽl sən kigəbay afəni. Mesgeɓɗe appayənək mel sən kigəbay Israyel. 3Agəɗək əvoŋ kaklaw poɗo aka əppay sən mẽle vi vaski mətaw pay nani. Mə Eziptiɗ ahəmənək əvoŋ kaklaw buhulu.

4Yaŋ pay nawhəmən agrakə, Yosef anah eŋgil ana Farawən da amna: «Va kəɗɗanən moggon nokum viwa, kamə mənah sən Farawən na: 5#VAA 47:29-31Afu asway guwəka amna: “Yaŋ na wanəmtə. Addəv magamas nəso' sən kiyu aka dələv na Kana'an əŋka, adaki kədawndəkwa.” Kamə kakaŋ na appaw əpeŋ əndək əbba, sissiŋ nəmilgəni.» 6Farawən amna: «Apeŋ dok əndək afuk va asway guko.» 7Yosef apeŋgik kawndək afəni. Məɗɗaŋ wəza na Farawən, ɗiy məsɓet sənanda, gəm ɗiy məsɓet naka dələv na Eziptə dəwənnet addoŋ matak dəndəni. 8Gəm gəla na Yosef dəwənnani, milmiŋgiɗin də gəla na afəni. Kirtiti, gilewi, timeŋgiɗ dit wasliɗe net appaŋ kaka' aka dələv na Gosen. 9Məlhãni yi dit mawteɗi, dit pilseŋge'e. Ɗəf titir rimiɗrimiɗ diyɗa.

10Azzoŋguk hã kelle na Gedirge, va wənəh na Goren-Ataɗ, dəgar ki Yurden. Aɗɗanənək gəlabayən adaka, gəlabay gəddak virviri. Aɗɗak gəlabay afən əvoŋ buhulu. 11Mə Kana'anɗe en naka dələv nadak awlanən gəlabay a kelle na Gedirge va wənah na Goren-Ataɗ, aɓɗaŋ na: «Aŋ gəlabay net mə Eziptiɗ an virviriyə!» Vini məyan na: gəlabay net mə Eziptə na dəgar ki Yurden.

12Kirtin aɗɗaŋ sənənək vaska, va aɗi sit wən nani. 13#WNM 7:16Kirtin akanənək aka dələv na Kana'an, andəknən addəv bətəŋ naddəv guli na Makpela, guli məs Abraham albah səva Efron mə Hitti, dəsangən ka net magamasɗe, haran sek aka Mamre. 14Dərɓaga andək afəni, Yosef amndakək a Eziptə, ndəni, milmiŋgiɗin dit ɗiy dəddoŋ dəndən əndək afən pakə.

Dərɓaga əmta na Yakob

15Milmiŋgiɗ Yosef, awlanən na afit amtəka, aɓɗaŋ na: «Kuzuŋ Yosef warməm a makran, waman səm harat huloŋguk na mambray məgəɗ sənəŋka!» 16Aɗi sənən wən nan sən Yosef dawnəh na: «Tak afuk dəɓəl əmta ɓa na, amna: 17Kənahaŋ sənəngən Yosef na: “Kamə, kəɗɗum aka əɓoŋ net milmiŋgiɗuk də mambray net aɗɗaŋ sukunəŋ ɓa. Kakaŋ na kamə kəɗɗum aka əɓoŋ net belemɗe na Maŋgəlva na afukuŋ ɓa.”» Adan anahaŋ sənən Yosef vaska, ahəmka. 18Milmiŋgiɗin sən kiyit addoŋguk əzbəraŋ ammbani, aɓɗaŋ na: «Mənam yakəŋ abok va belemɗe!» 19Yosef aɓsit na: «Kəgeslne'eŋ ɓa. Intə a gəla Maŋgəlva sa? 20Nokum mbərayən kəɗɗumoŋ akaw kəta, Maŋgəlva nan moggon aɗɗumu: Vi dəgəɗgən va dəpaŋkəŋ kawkõhgən vanday diyɗa. 21Ya kakaŋ na kədawgeslne'eŋ suwən ɓa, wanəzgə sləma akokum dit kirtukum.» Asɓetike, apel sitik a mekret təɗəkə.

22Yosef asanək də gəla a Eziptə, Ndən də gəla na afəni. Yosef azəvək əzva səkat də kəlawə, 23Yosef awələk sayit kirtin Efrayim mohoko'o. Gəm kirtin Makir, kirtin Manase, muwet aka takpra Yosef iyi. 24Yosef aɓsit milmiŋgiɗin na: «Naw wanəmtə. Maŋgəlva waɗɗum akokum, wagilgukum səka dəlvəŋ, kawkukum aka dələv məs asway sit may Abraham, Isak də Yakob.» 25#ƏGI 13:19; YOS 24:32; IBR 11:22Sissiŋ Yosef aswaygit mə Israyel na: «Pay Maŋgəlva adabbah sukum, kəkeningin sleŋsleŋɗe naw səŋka.» 26Yosef amtək də wəzva səkat də kəlaw. Appay sənənək tursan yaŋ muktukun addəv akoti a Eziptə.

Currently Selected:

Va'Atəŋ 50: GB

Highlight

Copy